Ka Nupepa Kuokoa, Volume LXII, Number 18, 3 May 1923 — KA WAIONA MA KA ALOHA PAKA [ARTICLE]

KA WAIONA MA KA ALOHA PAKA

Ma ka po o ka Poalima aku nei i hala, ka po, i malamaia ae ai o kekahi aha hulahula nui, ma ka Aloha Paka, i paa ai i ka hopuia, hc eono poe haole, mamuli o ka loaa pono ana aku i na makai hopuhopu waiona, me na omole rama, elike me na hoike i waihoia ae ai imua o ka loiq apana Amcrika. He mau aliikoa kiekie, ame kekahi mau makaāinana, o ka poe lalawai o keia kulanakauhale. ka i poholo iloko o ka upena a na makai federala; he elua o kela'poe eono i hoea kino ae imua o ka aha federala ma ka Poakāhi nei, a kauia mai ka hoopa'i <> kanalima dala pakahi, o ke koena akn o lakou, ua hoopaneeia ahiki i ko lakou wa e kaawale ai mai ka lakou mau hana mai, alaila hoea ae imua o ka aha. Ma keia hopuia ana o kela poe eono, i hoea mai ai i ka hooiaioia ana, o na manao hoohuoi iloko o kekahi poe o keia kulanakauhale, aia iwaena o na aliikoa kiekie, a aia pu hoi iwaena o ka poe hanohano a ulakolako o Honolulu nei, e malamaia mai nei ka waiona, a maloko o na aha hoohauoli, i malama mau ia, i kela ame keia manawa. O kahi e loaa nei ka waiona i kekahi heluna nui o ko Honolulu nei poe, me ka maalahi loa, he ninau pohihihi no ia, koe wale no, na manao koho aku, mai na Kepani no ia, na lakou e puhi mai nei i ka okolehao, a mamuli o ka hookomoia ana mai ma ke ano malu, mai na moku. e ku mai nei, e ka poe. i hoolilo i ka hana hoopae malu i ka waiona, i hana imi waiwai na lakou. E haawiia na mahalo i na makai hopu waiona federala, i ko lakou hooko ana i ka lakou hana me ka hoopilimeaai ole, ina pela iho la ka nui o ko lakou makaala, ma na anaina hoohauoli, a hulahula a ka poe hanohano a lalawai o ke kulanakauhale nei, aole ana no e nele ka loaa aku o ka ike ia lakou, aole wale o ka poe Kepani, ame na lahui haahaa e ae, ka poe e hakihaki mai nei i ke kanawai hookapu waiona federala, aka o ka poe waiwai a hanohano no kekahi, a komo pu no paha me kekahi mau luna oihana o ke aupuni.