Ka Nupepa Kuokoa, Volume LXII, Number 25, 21 June 1923 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

 EHA NUPEPA KUOKOA HONOLULU. T.H., POAHA, IUNE 21, 1923.

 

He Moolelo no

KA MEAHUNA POHIHIHI

A I OLE

Ka hoohokaia Ana o ka Manao Puuwai o ka

Mea Lili-He Moolelo i Piha me na

Wiliau o ke Aloha

 

Ma kekahi ahiahi mahope iho o ka hala ana aku o Mr. Kuene maluna o kona moku, no kana huakai holoholo, no na aina mamao, e noho ana o Silia maloko o kona rumi hookipa, me ka nanea loa ia ka heluhelu i kekahi buke moolelo hou, ana o ke kuai ana ma kela la.

Iloko nae o kona nanea, ua kani mai la ka hele kahea mamua o ka puka o ka hale. a lohe koke aku la no oia i kekahi mea e ninau ana i ka kauwa nona, a iaia i hele mai ai e wehe i ka puka. e ku aku ana kekahi kanaka malihini, i hele ka lauoho a poohina. a i kona ike ana aku i kela kanaka, hoomanao ae la oia no kona halawai mua ana me ia, ma kekahi wahi, e hiki ole ai nae iaia ke hoomanao i keia manawa.

“E huikala mai oe ia’u e ka lede, ina o Miss Haukona kou inoa.” wahi a ke kanaka malihini ia Silia.

“Ae o ko’u inoa ia.” me ka ike koke ana iho o Silia, o kela no ka ke kanaka i kau pu ai me ia maluna o ke kaaahi hookah mai Welafika mai, me ka maul ana iho nae, i ke kumu i makemake ai o kela kanaka e ike iaia.

“He hana mahaoi paha keia ma ka aoao o kekahi kanaka malihini. ka hoea ana mai e hui pu me oe, me ko’u hoolauna mua ole ia ana aku ia oe; aka nae, ke ole au e kuihewa, ke hoomanao nei no oe, no ko kaua kau like ana mai maluna o ke kaaahi hookahi no Ladana nei. Ua hoohuoi wale no au i kou helehelena. a i ka loaa ana ia’u o kou inoa mahope mai, akahi no a hooiaioia ka’u mea i hoohuoi mua ai, eia ka o oe no ke kaikamahine a kuu hoaloha kahiko, ka Rev. Nakanaela Haukona: ka mea i noho kahu mua no ka ekalesia o Alenadale, ma ke Kalana o Kena. Pele anei ka mea oiaio?”

“Ua noho kahu oia no ka ekalesia au i kamailio mai la a ina he hoaloha i’o oe no kuu makuakane, alaila, ke hauoil loa nei au i ka halawai pu ana me oe, “ wahi a Silia, me ka hoauheeia ana aku o kona mau manao hoohuoi no ke ano o kela kanaka malihini.

“O Simona Kaapuni ko’u inoa,” i pane hou aku ai ke kanaka malinini, me ke kono ana mai o Silia iaia, e komo aku noloko o ka rumi hookipa.

“Ma Etona ko maua wahi i noho pu ai me kou makuakane,” i hoomau aku ai no o Simona Kaapuni i kana kamailio ana, iaia i noho ai maluna o kekahi noho a Silia o ka panee ana mai imua ona. “He mau hoaloha pilipaa loa maua, aka nae mahope o ka hala ana o kekahi manawa, ua kaheaia mai la oia e hoi aku i kahu no ka ekalesia ma Birikona, o ka pau no ia o ko’u ike hou ana iaia, a mai kela wahi ae, i hoi aku ai oia no Alenadale.”

“Ua pololei kena mau mea au e hoakaka mai nei e Mr. Kaapuni. He ekolu wale no ona makahiki i noho ai ma Birikona, a hoi mai la ma Alanadale me ka nee hou ole aku no kekahi ekalesia okoa, ahiki wale no i kona make ana. Ma Alenadale ko’u wahi i hanauia ai, a malaila no ko’u makuahine i make ai oiai no au e kamalii loa ana ia wa.”

“O, he mea ehaeha maoli ka make ana o kou makuahine i kou wahi wa uuku loa,” wahi a Mr. Kaapuni, me ka hoikeike ana aku i kona ano kaumaha. “Mai kekahi hoaloha mai o’u e noho ana ma Alenadale, i lohe ai au e pili ana ia oe, a wahi ana. o oe kekahi kaikamahine maikai loa o ka leo i ka himeni, pehea ua hoomau aku anei oe i ka paka ana i kou leo no ka hana himeni, mahope mai o ka make ana aku o kou makuakane kuu hoaloha hoi?”

“Ae, ua hele mau aku au no ke a’oia mai i ka ike ame ka makaukau himeni, oiai au e noho ana ma Alanadale, a i ka haalelel ana i kela wahi, o ka pau ana ia o ko’u waiho ana aku ia’u iho, malalo o na kumu a’o himeni akamai,” wahi a Silia me ke kulou ana iho o kona poo ilalo, me he mea la, ua ala mai la na hoomanao ana iloko ona, no ke ano o kona hoohala ana i kona mau la ma Welafika.

“Ke ole au e huhihewa, o kela alakai himeni o ka ekalesia ma Welafika, o ke alakai himeni hookah no ia, e noho ana ma ke ekalesia a kou makuakane, i lilo ai i kahu ma Alanadale, aole anei pela?” me ka nana pono loa ana mai o Mr. Kaapuni ma na maka o Silia.

“Ae, o Mr. Naika, ke alakai o ka papa himeni, o ka ekalesia a kuu makuakane e noho kahu ana ma Alanadale,” wahi a Silia me he mea la, aole he hoihoi iloko ona, no ke kanaka a Mr. Kaapuni e hooniele aku nei.

“Ina hoi ha o kena ka mea oiaio, alaila ole aku la no hoi e nele kou kamaaina loa ia kela kanaka!”

“Ae, ua kamaaina loa au iaia, no ka mea o ka’u kumu no ia nana I a’o mai ia’u I ka ike ame ak makaukau himeni.”

“Ma kau ike I kea no o kana a’o ana I kela ike himeni, aole anei oia kekahi o na kumu makaukau loa?”

“Ma ka’u mau mea i hoomaopopo, he kanaka akamai loa oia i ka himeni, a ua mahalo nui ia oia e ka poe i lohe i ke ano o kana alakai ana i kana papa himeni.”

“Peha, aole anei ou ike, i kekahi mau ano kupaianaha iloko o kela kanaka. mawaho ae o kona kulana loea himeni?”

“Heaha auanei, he mea maa no paha ia iwaena o na kanaka apau, aole anei pela?” wahi a Silia i pane mai ai ma kea no ninau.

“He mea oiaio no kena au e kamilio mai la e kuu kaikamahine, aka aole anei oe i ike, o ke ano kupaianaha iloko o Mr. Naika. o ia no kona lilo ana i alakai no na hana pono, a ilokl o ia manawa hookahi, he alakai pu oia no na hana kupono ole, o ia hoi ka ai hua opiuma?”

Pahola ae la ka haikea ma ka heleelena o Silia, e hiki ole ai iaia ke huna aku, i ka hooopilikiaia o kona noonoo, mamuli o keia ninau a ke kanaka malihini, eia nae, ua ahuwale kona mau ano apau imua o Mr. Kaapuni, a pane mai la nae o Silia i ka i ana mai:

“I kela ame keia manawa, iloko o na makahiki ekolu i kaahope ae nei ko’u ike ana iaia, aole nae ma ke ano kamaaina maoli, e maopopo ai kona mau ano apau ame kana mau mea e hana ai.”

“Oiai oe e noho ana ma Ladana nei, he holoholo mau no anei oe i Welafika ikekahi mau manawa, ma ke ano hoomaha? wahi a Mr. Kaapuni i hoololi ae ai i ke ano o kana niele ana, ma kekahi alahele okoa loa.

“He kakaikahi loa ka’u mau manawa i holo aku ai no kela kulanakauhale, ma Ladana nei no ka hapanui o ko’u manawa e noho ai.”

“O Welafika kekahi wahi maikai loa a’u i ike ai. No na makahiki loihi ko’u kaahele ana mai kekahi wahi a i kekahi, e huli ana i na mea pili i na lua i hanaia mala oo ka honua, a i kuu hoea ana ma Welafika, malaila i loaa ai ia’u kekahi mau mea ano nui loa, a’u i ike ole ai ma na wahi e ae o ke ao nei. Pehaa ua iho no anei oe ilalo o ka heana o ka poe make, i hanaia mahope mai o ka halepule ma Welafika?”

Ua lilo keia ninau a Mr. Kaapuni, i kumu e naka ai o Silia me ka haalulu, haikea ae la hoi kona helehelena, a pane mai la me ka leo haalulu.

“Aole au i hele iki e nana i kela wahi!”

Hoomanao mai la o Mr. Kaapuni, no kona waiho ana mai i kela ninau hookahi no imua o Silia, ia laua maluna o ke kaaahi, ma ka nana pono ana aku o ka wahine opio iaia, a o ia kana i pane mai ai:

“Ina e ninau mai ana kekahi mea ia’u, ina ua hele oe e makaikai ilalo o ka ilina o ka poe make, he hookahi no a’u mea e pane aku ai iaia, o ia kou ike ana i kahi i waihoia ai o na kino o ka poe make,” wahi a Mr. Kaapuni, me ka imoimo ana iho o kekahi maka.

“Eia ke kumu o ko’u hookahua ana i ka oiaio o kela pane, no ka mea ma kekahi la, ma kea no ulia, aole noi loihi loa ae nei, ua loaa aku la ia’u kekahi hainaka, iwaena o na lau laau kahiko, e waiho ana mamua o ka puka, e iho aku ai ilalo o ka ilina ma ka honua. Ma ko’u nana ana i kela hainaka, i ike ai au, o oe ka mea nona ua waiwi la, ma kou mau huakumu, ua loihi maoli ka waiho ana o kela hainaka malaila, no ka mea ua hele a paapu i ka lepo.

“Ua malamaia kela hainaka e a’u, a ua holoiia a maemae, a no kuu holo ana mai nei i keia kulanakauhale, manao iho la au he mea maikai no’u ka paa pu ana mai i ua hainaka la, a haawi aku ia oe,” alaila unuhi ae la oia i ka hainaka a waiho aku la imua o Silia, me ka huli o ke kihi o na huakumu i kuniia iluna.

“Ae, no’u i’o keia hainaka, aka heaha auanei ka waiwai o keia mea, ina no i kiolaia e oe, us oi loa aku ia o ka pono,” wahi a Silia, me ka hiki ole iaia ke huna aku, i ka hele o kona ano a kunahihi.

“Mamuli o ka loaa ana o keia hainaka ia’u, a no ko’u lohe ana hoi no kekahi hihia pohihihi loa, o ka oili ana ae ma Welafika i ka hooilo aku nei, pela wale no au i manao ae ai, malia paha o lilo ka loaa ana o keia hainaka, i mea waiwai. Pehea, ua kamaaina no nae paha oe i ke kiekie hanauna a Keoni Naika ea?”

“Ua ike no au iaia, aole nae ma kea no kamaaina maoli, he mau manawa lehulehu kana o ka hele ana ae e ike ia Mr. Naika, ua kiekie nei.”

“Ma na mea i kamailioia mai ia’u, he keu aku ka pipili o ka manao o ka makuakane no kana keiki hanauna, mamua o ka pepehiia ana o kela keiki.”

Kunou wale mai la no o Silia I kona poo, no ka hooia ana mai i ka pololei o na mea a ke kanaka malahini i lohe ai, eia nae ke ike aku la o Mr. Kaapuni, i ka naka haalulu o Silia.

“Ma ko’u manaoio maoli, elike, me ka’u mea I ike ai no Mr. Keoni Naika, aole he pololei o kela manao hoohuoi iloko o’u nona.”

“Heaha ke kumu o kou kamailio ana mai i keia mau mea imua o’u? No keaha i lilo ai ka inoa o Keoni Naika, i mea nau e kamailio ai; mamuli anei ia o kou manao ana, ua maopopo ia’u kekahi mau mea e pili ana i ka hihia pohihihi ma Welafika?”

“He hookahi wale no kumu nui o ko’u kamailio ana aku nei ia oe maluna o keia kumuhana, mamuli o ka lilo o ke karaima i hanaia, i mea pohihihi, a i kou hoike ana mai nei, ua kamaaina oe ia Mr. Naika, manao iho la ua, ua nui paha kau mau mea i ike no kela hana pohihihi, a e  hoomanao no hoi oe, he kanaka malihini loa au, ma kela kulanakauhale, o kea aho no o na malihini, o ka maopopo ia lakou o na nea pohihihi apau i hanaia. E huikala mai nae oe ia’u, ina ua lilo ka’u mau ninau i waiho aku nei imua ou, i mea maikai ole i kou noonoo, aole no hoi au e hoouluhua hou aku ana ia oe: he hookah nae a’u mea e hauoli nei, o ia no kou loaa ana iho la ia’u, ke kaikamahine a kuu hoaloha kahiko.”

Hoomaka hou aku la o Mr. Kaapuni e kamailio e pili ana no ka makuakane o Silia, me ka ninaninau ana aku i na mea e pili ana i ka ma’i o kona hoaloha ame ka make ana, a ua lilo na hoakaka a Silia, i mau mea e hooluoluia mai ai kona manao, a i ka hala ana o kekahi manawa loihi, o ko laua kamailio ana me ka maikai, ku ae la oia iluna, a haawi aku la i na hoomaikai ana i ke kaikamahiine opio, me ka olelo ana aku, e huli hoi ana oia no kona hokele; me ka hooia ana mai nae, he manaolana kona, e hoea mai ana no he manawa no laua e halawai hou ai.

Mahope iho o ka haawi ana aku i ke aloha lululima, o ka oili mai la no ia o Mr. Kaapuni iwaho, a haalele aku la i ka home o Silia, me kona nana hou ole aku i kela wahine opio.

I hakalia no nae a paa ka puka i ke paniia, o ka hoi mai la no ia o Silia a maluna o kekahi noho, kulou iho la kona poo ilalo, o kona hoomaka aku la no ia e uwe.

Ia simona Kaapuni hoi i kaawale loa aku ai mai ka hale mai, hooho ae la oia I keia mau olelo”

“He keu aku kela a ke kaikamahine akamai me ka piha i ka maalea, a o ka’u mea e mahalo loa nei, o ia no ka u’i o kona helehelena, aole no hoi e nele ka haaheo o kuu hoaloha kahiko, no kana kaikamahine! Mamuli nae o kana mau mea i hoakaka mai ne ia’u, ke paa loa nei kuu manao, ua oi aku ke kamaaina o kela kaikamahine ia Keoni Naika, mamua o kekahi poe e ae e noho mai la ma Welafika, e hoea mai ana no nae, i ka manawa e loaa pono ai ia’u na mea oiaio loa.”

 

MOKUNA XXIV

 

He hookahi paha hora mahope o kela hala ana aku o Simona Kaapuni, ua hoopuiwa hou ia mai o Silia, i kona lohe ana aku, I ke kikeke o kekahi mea mawaho mai o ka puka o ka rumi hookipa, a lohe aku la oia i ka pane ana mai o kekahi leo wahine, e ninau mai ana iaia, ina no paha aia oia maloko a ka hale kahi i noho ai.

Hele aku la ua o Silia e wehe i ka puka, e ku ana kekahi wahine aoo, me kekahi palapala iloko o kona lima, me ka pane ana mai:

“He kelekalapa keia nau e Miss Haukona. Ea ua ma’i ia anei oe, he keu aku ke haikea o kou helehelena?”

“Aole, o’u ma’i maoli, he nalulu wale no ma kuu poo nei,” wahi a Silia, a o ka mea oiaio maoli no ia, ke ike la oia i ka eha o kona poo, ma muli paha hoi kekahi o kona ano e, no na kamailio i hoalaia mai e ke kanaka malihini.

“Na kekahi keiki opio i lawe mai nei a haawi i keia kelekalapa ia’u,” wahi hou a ka wahine aoo, a o ka hakuhale hou, o keia home a Silia e noho nei, me ka haawi pu ana mai i ke kelekalapa ia Silia.

Lawe mai la o Silia i ke kelekalapa, me ka haawi ana aku i kona mahalo i ka hakuhale, alaila huli hoi mai la noloko o ke keena hookipa, me ke pani ana aku i ka puka a paa.

Mahalo. o ka malamalama o ke kukui e kau ana maluna o ke pakaukau, i wehe ae ai o Silia i ka wa-hi i hookomoia ai o ke kelekalapa. a o keia ka manao maloko o ua kelekalapa nei ana o ka heluhelu ana iho:

“Miss Silia Haukona: Ina aole he nui loa o kau mau hana, e pilikia ole ai ke haalele aku oe, alaila, e hele koke mai oe e hui pu me a’u, ma La Roka, Palani, me ka hoohakalia hou ole aku. Eia au iloko o ka ma’i kupilikii loa. Ede Kuene.”

I ka maopopo pono ana ia Silia o ka manao maloko o kela kelekalapa, ua hoopiha loa ia aku oia me na manao aloha, no ka mea o Mr. Kuene ke kanaka nana i hoopakele ae iaia, iloko o kona mau hora o ka ehaeha loa, e kuewa hele ana ma na alanui, a o kela hoi ke kanaka nana, i hapai ae iaia mai kona kulana haahaa mai, ahiki i kona ike maoli ana iho, i kona kulana e ola ana i kela manawa.

(Aole i pau).

 

He Moolelo Walohia

Ko Vekinia Waiwai Hooilina

Hoopuhiliia na Hana a ka Mea Manao

Ino---Kau I ke Aki I ka

Manawa Hope

 

I ka manawa a ka wahine o ka ninau ana mai ia Mrs. Hatinekona, ua ike ia aku kona hikilele ana ae, a ke hoolele pau la oia i kona ike maluna o Veki ia manawa hookahi ana o ka ninau ana mai, me ka iini nui e loaa iaia ka inoa o ke kaikamahine. Aia kekahi hiona hiehie ma ko Veki mau maka a ma kona mau papalina i hialaai loa ai ka wahine, a i makemake loa ai hoi e loaa koke aku iaia ka haina no kana ninau.

“O Miss Alekanedero kona inoa,” i pane aku ai o Mrs. Hatinekona; “ua hoea mai oia me kona makuahine ianei mai Nu Ioka mai, he mau la kakaikahi he umi aku nei i hala, a he mau hoaloha hoi no maua, a pela iho la laua i hoea mai la ianei i nei ahiahi.

“He makemake no nae oe e hoolaunaia me ia? He kaikamahine u’i kela, aole anei ou manao pela? He kulana lede maopopo kona no kona mau makahiki, a mawaho ae a ia he oluolu oia me ka hoohilahila ole elike me kekahi poe kaikamahine o ko kakou aupuni nei.”

“E Sede Fanamu,” wahi a Mrs. Fanamu, no ka mea oia no ia i ninau mai ai, “e hoike mai oe me wai la kona helehelena elike ai?”

I kekahi wahine e noho kokoke mai ana i ninau aku ai oia, i mea nona e huli mai ai a nana i ka kaikamahine ana e nana aku ana.

Aohe e kala o Sede Fanamu, a i ole ka Lede Rolatona hoi i nei manawa, mamuli o ka mare ana ia Mr. Rolatona i hoopau ai i kona manaolana ana no ka lilo i hakuwahine no ka Hitadela, ka home o ke Sa Wiliama Hita, a ua mare aku oia i ka Haku Rolatona, he kanaka i oi aku ke oo mamua o kona mau makahiki.

“Nowai la kau i kamailio mai la, e mama?” wahi a Sede Fanamu o ka ninau ana akau.

“No kela kaikamahine hoi e ku mai la ma ka aoao o Helena Hatinekona. Owai ke kaikamahine i like ka helehelena me kona i kau hoomanao? i ninau aku ai ka makuahine.

“Aohe hiki ia’u la ke hoomanao ae,” i pane aku ai ka Lede Rolatona, me ka haka pono aku o kana nana ana i ke kaikamahine a ka makuahine o ka ninau ana mai iaia. “He hiohiona kona i ano kamaaina i ko’u mau maka, koe nae ko’u hoomanao ana ae i ka’u wahi o ka ike mua ana iaia, a pela hoi me kona inoa. Ui maoli io hoi kela kaikamahine i ka’u ike aku. Owai io la hoi kela kaikamahine?”

Aohe pane hou mai o Mrs. Fanamu, aka hoomau aku la kana nana ana ia Veki ma kana mau wahi a pau e hele aku ai.” He helehelena kona i kamaaina mua ia’u, o ka hiki ana nae ke hoomanao ae i kona inoa ame kona wahi o ka ike mua ana iaia he pohihihi loa.

Aole i liuliu loa ma ia hope iho hookokoke mai la na kaikamahine i ka Lede Hatinekona, alaila apo aku la o Mrs. Hatinekona i kona lima ma ka puhaka o Veki a olelo aku la.

“E kuu mea aloha, ke makemake nei au e hoolauna aku ia oe i kekahi o ko’u mau hoaloha kahiko loa i ninau mai nei i kou inoa. E Mrs. Fanamu, e ae mai oe e hoolauna aku au i kekahi o ka maua mau malihini opio, oia keia o Miss Veki Alekanedero.”

 

MOKUNA XXXIX.-Ka Rupata Noi

 

“O Veki Alekanedero,” wahi a Mrs. Fanamu o ka puana malie ana ae, me he mea la iaia wale no oia e kamailio iho ana, a iaia e noonoo ana i kana nana iho ia manawa me he mea la he pauku hao a i ole kekahi mea oolea e ae paha ka i hahauia mai iaia i hoomanao ae ai i ka inoa i poina iaia no ka manawa loihi, a nana mai la i ka helehelena o Veki.

Ua ike aku la oia ma ke akaku i ke kino niape o kekahi wahine u’i, i like loa me keia kaikamahine opio, e ku pololei mai ana mamua ona me ka wiwo ole, me ka nana ana mai.

Me he mea la i ka Mrs. Fanamu noonoo iho, ua ike aku oia i kekahi wahine u’i i like loa kona helehelena me kekahi kaikamahine, e ku pololei mai ana mamua ona me ka maka’u ole a e paio mai ana no kona pono, me ka helehelena i piha me ka ehaeha ame ka leo hoi o ka mea i poho ka manaolana, a e hoakaka mai ana i kona hewa ole ame ka hanauia ana o kana kaikamahine me ke ku i ke kanawai, a hoopuka mai la i na huaoleleo ku i ke konakona maluna o na wahine hookano i hoao aku e hoole i ka loaa o ka pono no kana koi i ka waiwai o kana kane a i hoao e hoonele loa iaia me kekahi hana huwahuwa haahaa loa.

Eia hou, i kana noonoo iho me he mea la e mau ana no kona lohe aku i na huaolelo wanana, “O kuu kaikamahine ke keiki ponoi a Sa Wiliama Hita, a i hanauia malalo o ke kanawai, a oia aku ana ka hooilina wahine o ka Hitadela, a he la e hiki mai ana e noho aku ana oia ma kahi i kupono loa nona. E hoike mua aku oe i kela ohana alii e hiki mai ana ka la e hooholo mai ai ka aha hookolokolo i ka pono o ka olelo hooholo no kuu keiki,” elike me ia ana o ka lohe ana mai ia Vekinia aku ma kela la poina ole iaia.

Ia Mrs. Fanamu i hoomanao ae ia no keia mau mea apau, naka wale ae la no kona kino, a oiai o Veki e ku mai ana nana ia Mrs. Fanamu, ke haohao la oia iloko iho ona i ke kumu o ka haikea loa ana ae la o kona helehelena me ka hikiwawe loa, a no keaha la i nana aku ai ka whine me k helehelena me he mea la, ua lilo oia i mea maka’u nana.

Aohe nae o Veki i haawi mai i kana noonoo nui ana maluna o ia helehelena ano e o Mrs. Fanamu; huli ae la oia e kamailio i ka Lede Rolatona, ka lede a Mrs. Hatinekona o ka hoolauna ana aku iaia, a ia lede e nana aku ana iaia oia pu kekahi ana o ka ike ana mai i ke anoe o kona helehelena me he mea la ua puiwa loa oia ka ike koke ana iaia.

Ia Veki ame Miss Hatinekona i u kaha aku ai e hele, huli ae la ka Lede Rolakona e nana ia Mrs. Fanamu, kona makuahine, me ka helehelena o ka mea i piha me ka pahaohao, a hawananwana ae la, me ka leo pihoihoi:

“Ua like loa io no kela kaikamahine me ia, eia nae hoi ma kona inoa a Mrs. H. Hatinekona i hoolauna mai nei o Miss Alekanedero.”

“Aole anei oe i hoomaopopo o ka inoa no ia o ka makuakane o ka makuahine o kela kaikamahine, ke kanaka i apuka ai i ke dala o ka banako maloko o Kapalakiko, a ma ia inoa kela wahine e hea mau ia nei.”

“A, ke maopopo io mai la ia’u he oiaio kena au e olelo mai la; no kela kaikamahine i hele aku la aole o’u manaoio oia no kela bebe a kaua i ike ai?”

“No keaha kou kumu i manao ai pela? E hoomanao oe he mau hakahiki lehulehu ae nei keia i hala aneane i ka iwakalua, a i ole ua piha no paha ka iwakalua o na makahiki mai kela manawa mai a kaua o ka ike hope ana ahiki i nei manawa. E hoomanao oe o ka umi-kumamawalu keia o na makahiki mai ko kaua manawa i haalele aku ai ia Amerika.”

“Pela io no. Ea, hikiwawe no hoi ka lele ana o ka manawa la. aole anei?” i pane aku ai ka Lede Rolatona. me ka kani ana iho o kana uhu, no kona hoomanao ana ae i kona mau ia opio ia kaahope, na ola o ke ola hauoli loa.

“A, eia hou, ke hoomanao la no oe i ke kamailio ana mai o kela makuahine ona, Mrs. Alekanedero, ia’u e holo mai ana oia I Enelani nei ma kekahi manawa, a malia, o keia ua manawa la. no ka waiho ana ae i kana koi i kona kuleana, a pela hoi me ke kuleana o kana kaikamahine i ka waiwai o Sa Wiliama Hita,”  i pane aku ai o Mrs. Fanamu.

Ma ka manawa a Mrs. Fanamu ame ke kaikamahine o ka hoi ana mai i Enelani mai Amerika mai ia manawa oia i hoik@ aku ai i na mea apau a Vekinia i kamailio aku ai iaia, a i ka lohe maopopo ana  o laua ua okiia o Sa Wiliama Hita mai a Vekinia mai, ia manawa oia i hoolana mau ae ai i kona manao no ka lilo mai o Sa Wiliama Hita ia Sede Fanamu, ke kaikamahine, a e lilo ana o Sede Fanamu i Lede no ka Hitadela, he manalana palaualelo loa i ikeia mahope iho, a no ia ae ole ana o Sa Wiliama Hita e mare me Sede Fanamu, oia ke kumu i mare aku ai o Sede i ka Haku Rolatona.

‘Ke hoomanao nei au ia olelo ana mai ana ia oe, e holo mai ana oia i Enelani nei, eia nae hoi, he lehlehu keia mau makahiki i hala hope aku nei aohe he hoopii a Mrs. Alekanedero i lohe iki ia malia paha, ua hoopau wale oia ia manao ona, mahope iho o kona moku ana a kaawale mai ia Sa Wilima Hita aku,” i pane aku ai ke kaikamahine.

“O, aole; he wahine manaopaa a pio ole oia, o ka manao no kekahi mea ana e makemake ai e hanaia a ko, “ i pane aku ai o Mrs. Fanamu me ka inoino o kona helehelena e hoike mai ana i kona kaumaha no ka hopena e hiki mai ana mahope i kekahi la; “ma ko’u manao i hoopii wale no oia e okiia laua no kona manao e kaawale oia mai ka berita mare mai, aka, no kana koi i ke kuleana o kana kiekie i ka waiwai o kona makuakane aole oia e hoopau wale ana, elike me ia ana o ka hoike ana mai ia manao huna ona ia’u.”

“Ma na alahele apau i ka nana aku aia no he hoike e hooiaio mai ai no ko laua mareia ana malalo o ke kanawai,m a ina pela, e ko io ana no kana hoopii a e lilo io ana no kana kaikamahine i hooilina wahine no ka Hitadela. O ka’u mea wale no e hopohopo loa nei o ka lilo o ka ka Lede Linetona mau hana i hoolala ai i mea ko ole, a e lilo ai ia hana ana i mea nona e ehaeha ai i ka manawa hope, a ina pela io ana, eia ka hoi mea aloha o ko’u owili a komohia pu aku iloko o ia mai hana ana a’u i punihei wale aku ai ia hana manaoino.”

No kekahi manawa ka nana ana mai o ka Lede Rolatona ia Mrs. Fanamu, ka makuahine, me ka inoino o na maka, me he me la ua maka’u honua oia no ka hopena poino e hiki mai ana, a i ka hala ana o kekahi manawa, i mai la:

“O, e mama, aole au e hoouluhua anaiI ko’u noonoo no ka helehelena wale no o kela lede opio a kaua e koho wale aku nei!”

“Aole keia he koho wale,” wahi a ka makuahine o ka pane ana mai; “he kulike loa kona helehelena me kela wahine opio a kaua i halawai ai ma Nu Ioka. Ua ike pono oe iaia elike no hoi me ko’u ike pono ana.”

“Auhea kona makuanine? wahi hou a ke kaikamahine o ka ninau ana aku.

“Aohe au i ike. O ka Mrs. Hatinekona mea wale no o ke kamailio ana mai ne ia’u he umi la aku nei ka i hala ko laua hoea ana mai nei i anei mai Nu Ioka mai, a he leka ka laua o ka lawe pu ana mai na Mr. Hatinekona e hookipa mai i na lede a e pulama ia laua ma kea ano he mau malihini nana e elike ka punahele o ia mau malihini iaia me ka punahele ia Mr. Naita.”

“Ina he mea oiai okena au e ahoike mai nei alaila me kekahi pohai paha o ka poe kiekie laua o ka holo pu ana mai,” i hoakaka mai ai ka Lede Rolatona me kona noonoo nui ia manawa.

“Pela no ko’u manao a eia kekahi malia, he mau mea waiwai laua, ke launa pu la me ka poe hanohano. Ua ike pono aku nei anei oe o na aahu ame a kahiko a pau o kela kaikamahine i hoolaunaia mai nei ia kaua oia o Miss Alekanedero? He ku i ka nani kona mau aahu ame kona mau kahiko apau i ka ike aku, a ua hana i ano hoi me ka maiau loa.”

“Ae no hoi; na mea apau he nani wale no, aole oia wale, o na mea kumukuai pii loa wale no. Me he mea la he nui maoli ka laua dala i hiki ai e kuai i kela mau mea nani, ke maopopo ole nei ia’u, no ka mea, wahi no au i olelo mai ai ua laweia mai e Sa Wiliama Hita na dala apau a ka wahine i Enelani nei me ia, nohea la kela dala a keia mau mea i loaa ai i hiki ai ia laua ke ola me ka oluolu loa me ka hookaumaha ole ia o ko laua naau no ia mea he nele.”

“Ae, ke hoomanao io nei au i ko’u kamailio ana aku ia mea ia oe, oia mau mea apau aui lohe aku ai mai ka waha ponoi mai no ia o Mrs. Alekanedero; malia paha he mau alahele okoa aku no kekahi i loaa ai ka laua dala, no ka mea, ina aole pela pehea auanei e hiki ai ia laua ke holo mai i Enelani nei a i hale hoolimalima pii loa o ka uku ka laua e noho ai, a me keia kaila hoi o ko kela kaikamahine aahu, me kona mau kahiko apau.”

“Malia paha ua mare hou ka makuahine i ke kane?” wahi a ka Lede Rolatona o ka hoakaka ana mai.

“O, aole; aole ka ou homaopopo aku i kona inoa i nei manawa e heaia nei, oia mau no ka heaia o kona iano mamua o kona mare ana, koe wale no ka hoohuia ana aku o na huapalapala Mrs. mamua o kona inoa. E ninaninau pono aku ana au no ia mea. E noke aku ana au i ka nieniele ia Mrs. Hatinekona, i maopopo ia’u na mea apau e pili ana i kela wahine mamua o ko kaua haalele ana iho i keia hale i keia po,” wahi a Mrs. Fanamu, a hooki iho la i kana kamailio ana.

Ua hooko aku o Mrs. Fanamu i kana mea o ke kamailio ana ae i ke kaikamahine, aka nae, o ka mea hiki wale no ia Mrs. Hatinekona ke hoakaka mai ia’a no Vekinia o ia hoi. ua hala mai o Vekinia me kana kaikamahine i Enelani no ka hoolana ma’i mamuli o ke kauoha a ke kauka iaia e nee i kahi aina mamao, no ia kumu oia ame kana kaikamahine o ka holo ana mai o laua wale no, me kekahi hoa ole i hele pu mai me laua.

O Mrs. Hatinekona no kekahi i maopopo pono ole i ko Vekinia moolelo, ma kona manaoio, he wahine kane-make o Vekinia, aole e kala i make ai kana kane, aohe no a Vekinia mea o ia ano i hoike aku iaia, a o kekahi no hoi aohe ona komo i ka lole kanikau e maopopo ai he wahine kane-make oia.

O ka Mrs. Alekanedero wale no o ka hoakaka ana mai ia Mrs. Hatinekona ahole loaa o ka ikaika maikai iaia e hiki o ai o ia mau no kona nawaliwali, aka nae, ua oi ae nae kona maikai ia manawa mamua o ko laua manawa o ka holo ana mai.

Aohe i lawa keia hoakaka a Mrs. Hatinekona e loaa pono ai ka Mrs. Fanamu mea i makemake ai e ike, no ia kumu ua nui ka hoouluhuaia o kona noonoo, no ka haupuupu mau ae iloko ona e hiki mai ana he la e huaiia ae ai a ahuwale kana mau hana ino ia Vekinia mamuli o kona kokua hewa ana, i ko ka Lede Linetona manao lili a manaoio.

(Aole i pau)