Ka Nupepa Kuokoa, Volume LXII, Number 34, 23 August 1923 — I Poe Kupono ka Kakou e Koho Ai [ARTICLE]

I Poe Kupono ka Kakou e Koho Ai

Ma keia kau koho o na luna oihana o na kalana lehulehu 0 kakou, he nui ka poe e holo mai ana he mau moho, no na kulana like ole, mai ka poe hiki ke hoomaopopoia aku ko lakou mau ano kupono, a ka poe kupono ole. O na ano no o kekahi poe a kakou i ike ai, ma ka lakou mau hana mawaho ae o na oihana aupuni, o na mea no ia e hiki ai ia kakou ke kaupaona no ko lakou kupono a kupono ole. Ke alualu nei kekahi poe, no ka hanohano o ka lilo ana i mau hoa no ka papa lunakiai, ke alualu nei kekahi poe ia kulana, no ke ake i ka ukumahina e loaa nei i na hoa o ka papa, a ke ake nei hoi kekahi poe e lilo i mau lunakiai, no kekahi mau kumu lehulehu e ae; o ke a'o nae a ke Kuokoa, e koho i na kanaka a oukou i ike ai, a i manaoio ai, he poe kupono lakou, elike me ko lakou mau ano kupono, ma ka lakou mau hana i lawelawe ai, a e lawelawe nei paha i keia manawa. Ma ke ano kalaiaina nae, e konoia ana na Repubalika, e koho no i ka lakou mau moho, pela no hoi me na Demokarata, aka nae aole he mea pono, e hoopoinaia keia mea oiaio, o ka poe apau e kohoia ana ma na kulana oihana o na kalana o kakou, aole no ka aoao kalaiaina ko lakou hana ana, aka no ka lehulehu o na mana koho balōka iloko o ia mau kalana, ma ia ano i kupono ai keia a'o ana aku i na mana koho baloka, e nana ma ke kanaka no kona kupono ana, aole no kona pili ana me kekahi aoao kalaiaina. He nui na kumu pahele baloka a na moho e hele aku ana imua o na mana koho baloka, a koi aku e koho mai ia lakou. He mea maa keia i ka ikeia iloko o na kau koho baloka apau 1 kaahope ae nei, i ka wa nae e kohoia ai a puka, ma' kahi o ka hooko ana aku ia mau hoopaa i hooia mai ai imua o ka poe na lakou i koho aku, he okoa loa ka mea e hana mai ai, nolaila e akahele kakou ma ke ano o ka kakou koho ana i na moho. Ua naauao kakou iloko o keia mau makahiki o ke ku ana 0 ko kakou mau aupuni kalana, ua ike hoi i ke ano o na hana a ka poe a kakou i hookau aku ai i na hilinai ana maluna o lakou; ina ua lawelaweia na hana e lkkou me ka pono ame ka pololei; ua lawa ia i kumu kupono na kakou e hoomau hou aku ai ia lakou, aka ina ua hoike mai ka lakou mau hana, i ko lakou kupono ole, alaila e kiola aku ia lakou ,a hoopiha ae 1 ko lakou mau makalua, me na kanaka i loaa na manaoio iloko o ka poe kono baloka, o lakou ka poe kupono i'o