Ka Nupepa Kuokoa, Volume LXII, Number 36, 6 September 1923 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

 

AOAO NO NA MANAO PEPA

SOLOMON HANOHANO, LUNAHOOPONOPONO

 

NA MOOLELO HOONANEA, NA NUHOU KALAIAINA

ME NA NUHOU O KA MANAWA

 

NUPEPA KUOKOA HONOLULU, T. H., POAHA, SEPATEMABA 6, 1923.

 

E A’O IKAIKA I NA KEIKI O LILO KA LAKOU HANA

HEWA I MEA NAHU MAI.

 

E na makua mea keiki, e a’o ikaika i ka oukou mau keiki aole e maauhele wale maluna o na alanui ma ka o, a i ole maloko o na hale pahupahu, a maloko paha o na hale kiionioni, no ka mea, ina e pa@ana kekahi keiki i ka hopuia ma nei mua aku, a ma ka manawa e ninaniuia ai o ke keiki imua o ka aha hookolokolo o na opio a akaka no ka makua ka hewa, no ka hoohemahema a hookuukuu wale e hele auwana maluna o na alanui ma ka po, e nanahu mai ana ke kanawai i ka makua ma ke ano he hewa mikamina ia no ka makua, a e kauia mai ana ka hoopai elike me ka hoopai a ka aha e kau mai ana.

 

He pule a oi i hala aku nei he kanalima ka nui o na keiki maauhele o ka po o ka hapukuia ana ae e na makai hopuhopu kamalii a kukuku ae imua o ka aha o na opio; he elima o ia mau keiki i hiliia i ka huipa mamuli o ke kauoha a ka aha, eha i hoihoiia aku i ke Kula Hoopololei o Waialee, a hookuuia kekahi mau keiki.

 

He nui a lehulehu wale na hana kolohe a na keiki elike me na hoopii hoohalahala i komo ae i ka aha; he hoonou pohaku kekahi hana kolohe a na keiki i na kaupaku hale; he kuamuamu a hana wale aku ka kekahi poe i ka poe e holo ae ana maluna o na lanai o ka hale i ka po, a he uwa kekahi mau hana hoonaukiuki a lakou me na walaau ano ole maluna o na alanui ma ka po.

 

O na keiki e ikeia ana e hele ana maluna o na alanui a maloko paha o na halekuai a mau halekii onioni mahope iho o ka hora 8 o ka po e paa ana lakou i ka hopuia ke loaa aku me ka nana ole o na makai i ke kulana o na makua na lakou ia mau keiki hookuli, a e hookolokoloia ana lakou, a, ina i ku ka hewa ma ka aoao o na makua no ke a’o ikaika ole i na keiki, a i ole ua a’oia no paha, aka ua hoolohe ole nae na keiki, e kauia mai ana ka hoopai maluna o ka mea i pili i ka hewa, ina o ke keiki paha ia a i ole o ka makua paha.

 

Mai hoopailani i na keiki hookuli a kolohe, e pono e a’oia lakou me ka ikaika, a i lohe ole ke keiki, e hoopaa aku iaia i ke kula hoopololei o Waialee no kekahi mau makahiki ahiki i kona oo ana, malaila oia e a’oia mai ai i na ano hana apau e lilo ai oia i kanaka waiwai o ka ola ana ma nei mua aku, malia o kona w@hi ia e a’oia mai ai apau kona mau ano kolohe, a lilo oia he makaainana maikai ma nei mua aku; e aho ia mamua o ka nanahu ana mai o ka kanawai ia oe, e ka makua mea keiki.

 

Ma ka hoomaopopo ana aole makua i nele i ke a’o ikaika i kana keiki, aka i ka manawa e alo ae ai o na maka o ka makua, a oiai o ka makemake mau ia o na keiki kolohe, a i ka hui ana aku me kekahi mau keiki i like ke kolohe me kona, ua hana aku la na keiki elike me ko lakou makemake, he makemake nae e hoopoino mai ai iaia a i ole i ka makua paha.  “E a’o aku i ke keiki i ka aoao maikai, a oo oia aole oia e huli mailaila ae,” wahi a Solomona ka Noeau.

 

KA LA O NA LIMAHANA

 

Mamuli o ka makemake o na kanaka paa mau i ka hana e loaa kekahi la hoomaha no lakou ua hooholo kekahi o na ahaolelo kuloko i hala i ka la 2 o Sepatemaba i hala iho la o kela ame keia makahiki i la kulaia aupuni no ka haawi ana i na kanaka e paa mau’ana i na hana like ole i la hoomaha a i la hoohauoli no lakou ma na lealea like ole, ma ka mea i maa mau ia mai kinohi mai o ka hoomanao ia ana no keia la he mau huakai hookahakaha ka i malamaia, aka nae i keia makahiki iho la aohe huakai hookahakaha i malamaia no ke kumu eia no ka lahui iloko o ka noho kanikau ana no ka Peresidena Harding i make.

 

Aole keia la i hookaawaleia no ka poe hana ole no ka mea he hoomaha mau no ia poe; aole no no ka poe e pipili mau ana maloko o na hale pahupahu, na wahi piliwaiwai a e hoopoho wale ana i ko lakou mau manawa waiwai o ke ola ana me ka noonoo ole, a e auwana hele wale ana me ka nana a au ana o na maka ma kela a ma keia wahi, me ka manao ma na hana ha’iha’i kanawai e loaa ai ko lakou mau mea e pono ai keia ola ana.  Aohe he kupono o keia la no ka poe he mau loaa makahiki nui ko lako no ka mea no lakou na manawa a pau; aohe no he kupono no ka poe i ike ole i ka luhi, ka inea ame ka ehaeha o ka hana, aka ua kupono no ka poe paa mau o na lima i ka hana, ka poe i hana me ka hoomanwanui mau i mea e loaa ai na pomaikai o keia ola ana, a o ka hua o ko lakou hoomanawanui ana i ka hana o ia ka loaa ana ia lakou o na pomaikai, ka noho ulakolako ana, ka noho kuokoa ana ame ka lilo i poe hiki ke hilinaiia, a ua lehulehu wale o ia poe e ola mai nei, he poe i mahalo nui ia e na hakuhana a e ka lehulehu. 

 

He nui a he lehulehu wale na hana like ole e loaa ai ka pono o keia ola ana, a he nui no hoi a he lehulehu na limahana i hoolimalimaia ma na hana like ole, elike me ke koho ana a kela ame keia ma kana hana i makemake ai; ua kokua na hana like ole i na limahana, a ua lilo no hoi na limahana i poe kokua i ka hana, no ka mea, ina aohe mau limahana aohe hana iki e hanaia; ua koiia kela ame keia e hana, a e hana e pono ai, o i kau ka la, o hiki mai auanei ka pouli aole i kana mai ka nui o ua pouli la; me ka hou o ka lae e loaa ai ka ai, he kauoha kumu keia mai ka hookumuia ana mai o ke ao, aohe pomaikai ili wale mai ke ole ka hana, o na pomaikai ili wale mai ma me ka hookahe ole ia o ka hou, a i ole ua loaa mai ma kekahi ano pono ole.

 

Ka pomaikai o ka hoomau i ka hana – O ka poe i paa mau ka lima i ka hana pili mau no ka loaa ia poe, a iwaena o na kaukani kanaka Hawaii he lehulehu ka poe i ikeia ua ulakolako maoli ka noho ana (aohe olelo ana no na lahui e) o ke kumu mai o keia ua ai me ka noonoo, a ua hoopoina i kekahi no ka la ua; me na hunahuna liilii a lakou i hoopoina ai a i kapae ai ma kekahi wahi i hiki ai e loaa i pili no ko lakouo mau hale e malu ai ka wela o ka la ame ke anu a ka ua ame ka makani, a hala ia mau pilikia mawaho; o ka poe paa mau i ka hana a i ai kipalale, i ai me ka noonoo ole, a i uhaai haalele, ua pili mau no ka nele ia lakou me ka halawai me na pilikia lehulehu; o keia ka poe i kupono e hookanaka iho a e ao iho o ka ai pakiko ame ka hoomakaulii, no ka mea o ke kahua wale no ia o na lahui e i kuonoono ai ko lakou noho ana a e ikeia aku nei keekkeehi kulana maluna o ka lepo aloha o Hawaii i keia la, oiai nae he mau limahana wale no lakou a ka laweia ana mai no na mahiko, a i ka pau ana o ko lakou mau aelike me na mahiko, ua hooikaika lakou i ka hana ana no lakou iho, a i keia la ua lilo ka hapanui o lakou i poe kuonoono aulakolakomaoli, a i na kamaaina hoi o ka aina e noho pualewa wale ana me ka hoopili wale malalo aku o ia poe.  He ma’i nui keia no na Hawaii, na kamaaina o ka aina, a i na lahui e ke kuonoono, ka holoua ame ka ulakolako maoli.

 

Ka hulinaiia – O kekahi mea nui iwaena o na limahana oia ka hiki ke hilinaiia.  O na limahana a mau kanaka hoi ma kekahi olelo ana, he poe lakou e lawelawe hana ana no hai a e ukuia ana hoi no ka lakou hana.  Ina hoopono ka lakou hana ana e hilinai ana na hakuhana maluna o lakou a e haawiia ana ka mahalo no ia poe, a e loaa ana no na ukuhana maikai ia poe, a he mau kauwa hoi e hana mau aku ana malalo o na hakuhana ahiki i ka waiho ana aku, a i ole hoomahaia mai paha mai ka hana mai, me ka loaa o ka uku hoomau, elike me kekahi mau limahana lehulehu e ohi mau mai nei i na ukuhoomau i kela ame keia mahina.  O ia ka pomaikai o ka hilinaiia ame ka hoopono i ka hana, aka o ka poe e hana ana me na manao kolohe i ka pono o na hakuhana, ua ikeia ka hopena o ia poe.  ua hooau ino ia mai ka hana a ua hookomo pu ia aku iloko o ka pilikia.

 

He mea kokua nui na limahana hoopono a he kokua nui hoi i ka hana a na hakuhana, aka, o na limahana kolohe, epa ahiki ole ke hilinaiia, he hoopilikia i ka holomua o ka hana a ka hakuhana, a he hookomo iaia iho iloko o ka pilikia.  He nui ia poe.

 

I ka paa mau ana o ke kanaka hana i ka hana a hala kekahi manawa loihi aole no e nele ana kona ike a ka luhi, ka inea, ke kaniuhu a uiha, a e makemake ana oia e loaa kekahi manawa hoomaha a i manawa hoohauoli e hoopoinaia ae ai na ehaeha o ka hana, no ia kumu i ulu ai na manao iloko o na limahana lehulehu e loaa kekahi la hoomaha iloko o ka makahiki, a ua waiho ae i na noi i ka ahaolelo i hala ma o na wahaolelo la o ka lehulehu, a ua hookoia ia makemake mamuli o ka hookaawaleia ana o ka la 2 o Sepatemaba o kela ame keia makahiki i la kulaia.  He mea kokua ka limahana ia ka hana, a he mea kokua mai no hoi ka hana i ke kanaka e manao ana e pono oia i ka hana.  E a’o ikaika aku i na keiki o keia mau la e hana – e hana i loaa ka pono o ke ola ana.

 

O KAKOU PU KEKAHI E EHA ANA.

 

Mamuli o kela poino weliweli i loaa mai la i ke aupuni o Iapana, oia hoi ka lukuia ana mai la he mau haneri kaukani ekolu a oi o na home, a hooneleia he miliona a oi aku mau kanaka i na home, a he mau haneri kaukani o na ola i poino i ke olai, ke ahi ame ke kai hoee, me ka hooweliweli pu mai o ka pahola o ka wi ame ka ma’i ahulau maluna o ka lahui, aole o ke aupuni wale no o Iapana ka i eha, aka o Hawaii nei pu kekahi, a no ka mea mai Iapana mai kekahi mau lako meaai e loaa mai nei ia Hawaii nei e laa ka laiki, ame kekahi mau meaai e ae, a mawaho ae o ia mau mea na waiwai kalepa he nui wale. 

 

O ke kumukuai o keia mau waiwai ae la apau i na la i hala aku la ua loaa mai ma ke emi, aka, mamuli o kela poino nui mai la ma Iapana me he mea la e aneane aku ana e pau ke komo ana mai o ia mau waiwai i Hawaii nei a e kaohiia ana ka hoopuka hou ana mai iwaho no ka haawiia aku o ia mau mea i na makaainana pololi, ilihune a i hooneleia me na home ame na mea e pono ai ke ola ana, a hala he wa loihi. 

 

I keia mau la ke koiia mai nei na kokua a kela ame keia no ka haawi ana aku i ka poe popilikia ma Iapana elike me ka hiki ke haawi, he hana hiki ole ia ke alo ae; ke hana like mai la na aupuni e ae o ke ao ia hana kokua ,a ke hoouna ae la i ka lakou mau kokua i ka poe i kohoia no ia hana.

 

Ma kahi o ka loaa ia kakou o na mea kuai ma keia mau la me ke emi e pii hou ae ana na kumukuai mamuli o ka uuku o ka mea e loaa mai ana mai Iapana mai, a i ole ka loaa ole mai no paha a hala he mau manawa loihi ma nei mua aku.

 

E hoounaia aku ana he mau kauka ame kekahi mau kahuma’i wahine no Iapana no ka haawi ana aku i na kokua i ka poe i ola mahunehune mai, a he mau lako meaai a mau lako a ae kekahi e hoounaia aku ana no ke kokua ana aku i ka poe i halawai me ka poino.

 

He aupuni hoaloha o Iapana no Amerika a no Hawaii nei, a no na aupuni e ae pu no o ke ao, i ka manawa i halawai mai la o Iapana me na popilikia, o ka eha i loaa ia aupuni hoaloha ua loaa pu ia eha i na aupuni e ae, nolaila o ka hana a ka hoaloha i ka hoaloha iloko o ka wa o ka pilikia oia ka haawi ana aku i na kokua elike me ka hiki, i mea e hoomamaia ae ai kekahi kaumaha i kau iho maluna o ka mea i hoopoinoia, a ma kahi o eha kaukani dala a oi i luluia e ko Honolulu nei mau makaainana i kela mau la iho la no ke kokua ana aku i na lahui pilikia o Iapana.  Ma ka manawa i kaheaia ae ai na kokua no ka lahui pilikia o Iapana ma ke kuahaua a ke kiaaina, aohe i hookaulua iho ka lahui Amerika ame na aupuni a ae apau, ua hooko koke ia mai la ia leo, a e hoounaia aku ana na kokua iloko o ka manawa pokole; o ia ka hana a ka hoaloha i ka hoaloha i komohia iloko o a pilikia, he hana e hoike a e hooko ana i ka ka Haku i kauoha mai ai, aole i ka lahui Amerika wale no aka, i na lahuikanaka apau, “E aloha oukou kekahi i kekahi.” 

 

HE HOALOHALOHA NA KA AHA MOKUPUNI O HAWAII.

 

Oiai ka Aha Euanelio Ahanuina o ka Mokupuni o Hawaii e noho ana ma ka Luakini o Mokuaikaua ma Kailua N. Kona ma Kona la hana elua Poalima la 3 o Augate 1923, hora 10 a. m.  Ua koaa mai la ka lohe i ka Aha.  O ko kakou Peresidena Harding ua haalele mai i keia ola honua ana, ua lele aku ma ke ala hiki ole ke hoi hou mai ua moe aku i ka moe kau a moe hooilo.

 

Ua hoomaha koke ka Aha.  Ua malamaia he halawai haipule ma ke kakahiaka Poaono hor 9, a hora 10 a. m.  Ua kohoia he komite haku i mau olelo Hoalohaloha.

 

Oiai ua lohe mai makou me ka minamina, a me ke kanikau i ka make emoole ana o ko kakou peresidena i aloha nuiia, Warren Gamaliel Harding ma Kapalakiko, Kaleponi ma ka la 2 o Augate 1923. a, oiai mamuli o keia make hiki wawe ana o ko kakou peresidena, ua hooneleia o Amerika i kekahi o kona mau keikikane koikoi a o kekahi o kona mau alakai kilakila loa, he mea i aloha nui loa ia e na makaainana apau loa, mamuli o ke ano hoopono maoli, a mamuli o ke ano aiaio o kona mau manaopaa, a mamuli o ka pololei o ka hana ana i hana aku ai no ka pono o keia aupuni me ka uhane kaulike no ka poe apau, a me ke kaulike hoi i na aupuni apuni ke ao nei, kekahi mea i hookiekie ae i ke kulana hanohano o na makua nana i hookumu i keia aupuni, a o kekahi mea hoi i hoomau ai i na loina maikai loa, a na makua o keia aina o Amerika, a

 

OIAI, o ko kakou Peresidena, he Karistiano, aole ma ka inoa wale no aka, ma ka hana mamuli o kana kumuhoohalike, a me kana mau olelo, oia kekahi mea i hooiaio aku a i na loina a me na olelo ao o ka hoomana karistiano, ia no ka mole a me ke kumu o ke ola ana o ke aupuni. 

 

A mamuli o keia hooiaio ana, lilo ae la oia kekahi mea i hoolana aku ai i ka mano o ka poe e lawelawe ana i ka hana haipule a @ kukulu aku i ke aupuni o ke Akua ma na wahi apau o keia aina, a

 

OIAI, he hoaloha nui oia, no ka Paeaina o Hawaii nei, e hoao mau ana e hooholomua aku i na mea apau ana e hooholomua aku i na mea apau e pono ai keia Teritore, a he mea minamina nuiia e ka Lahui o Hawaii nei, mamuli o kona aloha ia kakou, a ua mahalo nui kakou iaia, no na hana maikai ana i hana mai ai no kakou,

 

NOLAILA, E hooholoia e ka Aha Mokupuni o Hawaii e noho ana iloko o ka Luakini o Mokuaikaua ma Kailua, me na makaainana o na apana o na Kona, ma keia la 4 o Augate 1923.

 

E hoouna aku kakou i ko kakou aloha oiaio loa, me ka menemene iloko o ke ohohia i ka wahine kanemake a ko kakou peresidena i aloha nui loaia.  E noi ana i ke Akua Mana Loa, e haawi mai maluna ona kona maluhia, a me Kona oluolu i keia wa kanikau a luuluu hoi, a

 

E HOOHOLO HOUIA, E hoopaaia keia Hoalohaloha, iloko o ko kakou buke moolelo o ka Aha, he mea e hoike aku ana i ko kakou aloha a mahalo no ke ola, a me ka hana a ko kakou peresidena, a me ko kakou aloha menemene no Mrs. Harding. 

 

Na ke komite:--

H. P. JUDD.

J. P. ERDMAN,

S. L. DESHA,

Mao ke Kakauolelo la,

W. M. KALAIWAA,

 

HE MANAO MAHALO I KE KAKOO A KE KUOKOA.

 

Mahalo!  E ka Lunahooponopono maikai, no na hoapono a kakoo o ka Nupepa Kuokoa, malalo o ke poomanao.

 

Oihana Makai ame ka Politika

 

Ua maopopo no ia kakou apau, he mea hiki ole i kekahi luna aupuni ke lawelawe pono i kana oihana ina aia kona noonoo me kana mau hooikaika ana ma ka politika.  Pela me ka Oihana Makai.  Oi loa aku; no ka mea i ka makai e hele ana mao a maanei me ka aahu a hoailona o kana oihana, o hooikaika ana no ka ono o kekahi moho o ke kanawai iho la ia i ka manao o kahi poe.  Pela wale ka makaainana no ka mea, ua maopopo, ina ia e hoole a hookanalua mai paha, he manawa e hiki mai ana e kau aku ai ka lima o ke kanawai maluna ona no kekahi wahi hewa uuku ana i hana ai a i imihala ia paha.

 

Nolaila, he mana nui keia i loaa i na makai ma ka hoohulihuli ana i na makaainana e kakoo i na moho o ka aoao ana e hooikaika ana, a e hooweliweli ana hoi i ka poe i hoike akea ae i ko lakou manao ku-e..  He hana keia i hana mau ia i na kau apau.

 

Na keia mau hana i kono mai i ko’u noonoo e hoopau i keia kulana ku ole i ka mahalo i ikeia iloko o ka oihana maikai i na kau lehulehu i kaahope ae.  Ua ikemaka au i keia mau hana i ke kau koho baloka nui a kaahope ae.  A pela au i hoopaa ai a olelo iho, ina e loaa ia’u ka mana e hoololi a e hookaawale loa i ka oihana makai mai na hana politika mai, o ka’u mea mua ia e hana ai ma ka oihana.

 

He nani hoi ia, ua loaa mai la na kakoo ma ka aoao.  A pela hoi e ikaika ai na wawae o ka kamahele i ke keehi ana i na hana hoohaiki i ka pono kaulike o ka makaainana, ke haawi aku nei i ka mahalo a nui. 

 

C. P. IAUKEA,

 

Hoa o ka Papa Komisina Makai.

 

CHANGHAI, Aug. 30.—He lono ma ke kelekalapa mai Handow mai ke hoakaka ana o na koa i hoonoho ia ai maloko o na papu ma Tsao ame Tanggh Sien, ua hoala ae he kipi ma kekahi manawa kokoke i hala aku nei, a ua komo aku a hao i na waiwai maloko o na halekuai ame na home.  Mahope iho ua holo aku la lakou i ka mokuna aina o Honan a hui aku la me na Pake Powa a komo aku la e hoopilikia maloko o na kauhale e pili kokoke mai ana.

 

I NA MANA KOHO BALOTA O KE KALANA O HAWAII

 

KE HOIKE NEI O NORMAN K. LYMAN, HE MOHO OIA HE HOLO ANA NO KE KULANA LUNAHOOMALU NO KA PAPA LUNAKIAI O KE KALANA  O HAWAII, MA KE KAU KOHO WAE MOHO, MA KA LA 13, O OKATOBA 1923.

 

He moho e ku ana maluna o ka hooponopono Aupuni hoomakaulii, makaukau, a ano Oihana hooponopono Aupuni Kalana holomua; a e hoemi mai i na Auhhau pakeneka a kakou e auamo nei i keia mau la.

 

Aole e oi aku na hoolilo Kalana maluna o kona mau loaa makahiki

 

E loaa i mau alanui mau a maikai, apuni ke Kalana o Hawaii nei, a i paa mau na limahana alanui me ka hana a pihi ka makahiki.

 

E hoonoho ia i kanaka malama alanui ma kela ame keia Apana apuni keia Kalana.

 

I mau kokua, a hana hou no ka Oihana kinaiahi.

 

E hooponopono hou a e hoonui ana i ka pono wai o ke Kulanakauhale o Hilo, a e kukulu ana i luawai, a i ole i mau luawai hou no ka malama ana i wai, no na kau wai ole.,

 

E hooponopono hou i mau kahua paani maikai no na Keiki, na Paka, na alanui ame na alaloa apuni keia Kalana. 

 

I mau haawina Dala lawa pono no ka Oihana Hoonaauao o na Kula. 

 

I uku lawa pono no na Makai ame na limahana e ae o ke Aupuni Kalana.

 

Me keia mau kahua ae ia maluna i hoikeia, e noi haahaa aku ana i ka oukou mau kakoo lokahi ana mai ia’u, ka mea nana i haawi mua i na limhana, Elima Hora hana i kela ame keia Poaono.

 

Ko oukou Hoaloha Oiaio,

NORMAN K. LYMAN

 

Laau Hooikaika, Hooikaika i ka Manao, Hookoe i ka Mana ka B.B.C.

 

He laau no ka pou, ke akepaa, na puupaa ame ke koko, ka lepopaa ame ka Rumatika.  $1.00 6 omole no $5.00.

 

O ka B. B. C.  He Laau no ka Hano, no ka Nae, ke Kunu Kalea, ka Naeoaiku, ka eha o ka L’uu, ka Ha o ka leo ame na ma’i e ae o ka puu, 50c.

 

KA LAAU HAMO B. B. C.

No ka Rumatika, ka hu’i ame ke aki, 50c.

 

O KA B. B. C. HE LAAU HOOLA I KA MOKU.

No na wahi i eha, na puupuu, na wahi i pepe ame na ma’ihehe.  25c.

 

Ke kuaiia mai nei e na halekuai laau ame na halekuai mahiko apau.

 

Na makou e uku ina lilo o na puolo ma ka haleleka maluna o na kauoha o $5.00 kuike apau.

 

E hoouna mai i na kikoo dala ame na kuhikuhi no kabi e hoounala aku ai ia

 

Benson, Smith & Co., Ltd.

Honolulu.

 

Alpine Milk

Mau ono o keia waiu maemae me ka momona no ka wa loihi, mahope mai o kou wehe ana i ke kini.

 

Ninau i kou kanaka kuai meaai no ka

 

“EIA KA BILA NO KA HOIAIO ANA”

8 Keneka

o ka paona o na i’o Hipa uha mua.

-Ma na Poakolu apau-

“Pehea ia no ka Hooemi Ana Mai i ko Kaua Lilo?”

“Heaha mai auanei kau, ua manao au eia au ke ai nei i na i’o pii loa.  He palupalu maoli no kela i’o hipa a he ku maoli no i ka ono.”

 

No ka Waiu Bata Ono “MAILE” he 60c

wale no o ka paona.

Metropolitan Meat Market

Ma ka aoao Waikiki o ke kihi o na Alanui Bekela ame Moi

 

Ua Olelo o Emekona---

“Pena o Raphael i ka Naauao”

Ke Olelo Nei Makou---

“Pena ke Kanaka Naauao”

O kana mea i manao ai e pena---ina o ka papahele lana na anuu alapii omua, ka halekuke, a i ole o kaupoku paha.

E Hoohana Ana Oia i na

Pena a W.P. Fuller & Co.

No Ia Mea.

 

He pena kupono loa ia no keia wa.  A@a @e pena a Fuller no na wahi apau e penaia ai iloko o ka hale, mai ke kahua ae a i kaupoku.  Kukakuka pu me ko makou Keena Pena no ke kokua ana aku ia oe ma ka hooholo ana i ka mea oi loa o ka maikai au i koho ai no kou mau makemake. 

 

He pena no ka la, ka pule ka mahina, a makahiki paha

Aka e Hana ia Mea Ano

LEWERS & COOKE, LTD.

Poe Makaukau ma na Lako Kukulu Hale Mahope mai o 1852

169-177 Alanui Moi Hema

 

Koho la

Thomas Kaomealani

Nahiwa

--i—

Lunakiai no Hawaii Komahana mai apana mai o Kohana

 

MAI KALI A PAA KAU BUKE BANAKO I KA UHILA E KA PUNAWELEWELE

 

O ka hapanui o na kanaka ua maa loa i ke kali a @ nui mai ka lakou dala, alaila, hookomo hou aku ma@ banako no ka hoopu’ipu’i hou ana aku i ka lakou mau @ ahu liilii.

 

E haalele loa ia mau manao ana pela, a e hoomau @ hoahu liilii ana elike me ka hiki ia oe.

 

O na huina dala mahuahua ma kou home a i ole ia il@ paha o kou mau pakeke, he mau mea ia e lilo ma’uw@ ana i kekahi manawa.

 

UA MAKAUKAU MAU MAKOU E LAWE MAI I KAU MAU HOA@@U LIILII.

 

Chinese-American Bank

Kihi o na Alanui Moi ame Nuuanu.                Honolulu, T. H.

Pahu Leka 2000                                              Kelepona 6119