Ka Nupepa Kuokoa, Volume LXII, Number 40, 4 October 1923 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

E Pepehi i ka Moo !!!

 

He Hoakaka i na Mana Koho a i na Kanaka Apau o ke Kulanakauhale a Kalana

 

            Aole he keena maloko nei o Hawaii no ka moo nahesa-no ka moo a ke Akua i hana ai no ke kolo ana ma ka lepo, a i ole no ka moo Kalaiaina ma ke kino lepo ka HOOPUNIPUNI ino.

 

            Ke hoopuka aku nei au i na leka ame na moolelo ma keia aoao no ka pepehi ana i ka Moo Nahesa Kalaiaina.

 

 

            Mahope iho o ko’u hoike ana ae ia’u he moho no ka waeia ma ka aoao Repubalika i Makai Nui, ua hoomaka ae la kekahi poe e ku-e ia’u, e kamailio i kekahi moolelo, he paahao ka au i hookuuia mai San Quentin mai, ka halepaahao mokuaina o Kaleponi.

 

            Aole lakou i ku e mai i ko’u moolelo o 10 makahiki maloko nei o Honolulu.  Aole lakou i ku-e mai ia’u maanei, a i keia wa-imua o kuu mau maka.  Aole, ua hana lakou i kela hana lepo loa o na kalaiaina lepo-e hoao ana e hapala i ko’u kulana maikai ma ka pahola@ana i kekahi moolelo hoopunipuni e pili ana i ko’u ola ana o ka wa i hala.

 

            No ka pepehi ana aku i keia moo nahesa a make iloko o ka mauu, ke kukulu aku nei au i keia mau moolelo ame na leka imua o na mana koho baloka ame kekahi poe e ae o Honolulu nei.

 

            He elua ae nei makahiki i hala, ua hoopaholaia ae he moolelo like o keia ano e pili ana ia’u.  Ua kapa aku au ia mea he HOOPUNIPUNI, a o na leka ame na moolelo i hoopukaia i keia la, o na mea ia i loaa mai ia’u. Aole au i manao e hoohana ia lakou ma ke ano akea, no ka mea he ano lapuwale ka moolelo holookoa, a aole no au i manao e hapai hou ia mai ana. Aka nae, oiai he moho au e holo nei no kekahi kulana oihana aupuni, ke paholaia nei keia mau lono oiaio ole a hoopunipuni, a ke hoopukaia aku nei NA MEA OIAIO.

 

1. I ka manawa mua i paholaia ae ai keia moolelo mamuli o ka’u noi ponoi, ame ko’u paakiki, ua “kuni manamanalima ia” au maloko o ka halepaahao o Oahu, malalo o ka hooponopono ana a “ Bill Jarrett, ka mea e noho makai kiekie ana, a ua hanaia he kii hoakaka piha, na ana hoikeike ano ame na kuni manamanalima.

 

2. Ua kakau aku ke kapena o ka oihana makaikiu o ke kulanakauhale a kalana o Honolulu nei, Arthur McDuffie, i ke poo o na makai o Los Angeles ame ka lunapaahao o San Quentin, e hookomo pu ana i na kuni-manamanalima, ke kii ame kekahi mau kuhikuhi e ae, a e ninau aku ana ina paha he mau moolelo kekahi e pili ana ia’u maloko o na wahi waiho palapala ma Los Angeles ame San Quentin.

 

3. Ua pane mai ke poo o na makai o Los Angeles ame ka lunapaahao o San Quentin i ke Kapena McDuffie aole a lakou mau moolelo e pili ana no’u- ma kekahi olelo ana ae hoi ua huai ae laua i ke kaao holookoa.

 

Eia iho NA MEA OIAIO, a eia mai na kope o na palapala i hoikeia ae nei:

 

Mai ke Kapena Makaikiu Aku o Honolulu i ka Lunapaahao o San Quentin

 

(Kope)                                                             Honolulu, Hawaii

                                                                                    Aperila 4, 1921

Lunapaahao Johnson,

            Halepaahao San Quentin.

 

Alohe oe:-

 

            Ua makemake au i na hooiaio ana ina paha he moolelo aole paha kekahi au o Samuel W. Robley. Eia kekahi lono lauahea maloko nei o Honolulu, he mea oia i noho mua maloko o kou halepaahao.

 

            Ke hoouna nei au ia oe i kona kuni manamanalima ame ke kii no ke kokua ana aku ma ka huli ana, ina paha he mea noho i’o oia, aole paha. Ina e hoike mai ana oe ia’u i keia mea elike me ka hikiwawe e loaa ana ia oe, e lilo no i mea mahaloia e a’u ame keia keena. Oluolu e hoihoi hou mai i na kuni manamanalima ame ke kii me kau pane.

 

Kou oiaio,

 

ARTHUR McDUFFIE,

Kapena o na Makaikiu, Honolulu.

 

 

Mai ka Lunapaahao Mai o San Quentin i ke Kapena Makaikiu o Honolulu

(Kope)

HALEPAAHAO MOKUAINA O KALEPONI

MA SAN QUENTIN

Aperila 14. 1921

                                                           

                                                            Wahi Waiho Palapaia- Honolulu.

 

Mr. A. McDUFFIE

Kapena o na Makaikiu,

Keena Makai,
Honolulu, Hawaii.

 

Alohe oe:-

 

            Ke hoihoi hou aku nei au, i na kuni manamanalima o Samuel W. Robley, a ke makemake nei e olelo ae, mahope iho o ka huli ana me ke akahele maloko o ko’ makou mau moolelo, ua nele ka loaa ana o ka ike ia makou no ka noho hana ana o Robley maloko o na Halepaahao ma San Quentin ame Folsom.

 

Kou oiaio,

J. A JOHNSON

Lunapaahao.

 

KTP FF

Encl: Na Kuni Manamanalima; pepa; kil.

Mai ke Kapena Makaikiu aku o Honolulu i ke Poo o na Makai ma Los Angeles

 

(Kope)

 

Honolulu, Hawaii,

Aperila 4, 1921

Poo o ka Oihana Makai,

Los Angeles,

 

Alohe oe:-

 

            Ke makemake nei au e maopopo ina paha he moolelo kekahi au no Samuel Robley. Aia kekahi lono lauahea maloko nei o Honolulu, no kona hopuia ana a ahewaia no kekahi hewa moloko o kou kulanakauhale. E oluolu ana anei oe e hoike mai ia’u elike me ka hikiwawe e loaa ana, ina paha ua hopu i’o ia oia, aole paha, a no ka hewa hea, ina he mea kekahi o ia ano.

 

            Ke hoouna nei au ia oe i kona kuni manamanalima ame ke kii. Ina oe e haawi mai ana i keia ike elike meka hikiwawe e loaa ana e lilo no ia i mea mahaloia e a’u ame keia keena. Oluolu e hoihoi hou mai i ke kuni manamanalima ame ke kii me kau pane. Me ka mahalo ia oe no kau mau hooikaika ana ma keia hana

 

Owau iho no,

 

ARTHUR McDUFFIE

Kapena o na Makaikiu, Honolulu.

 

 

 

HOOUNAIA I KALEPONI MAMULI O KA’U NOI:

 

 

BUREAU OF IDENTIFICATION’

 

 

SAMUEL W. ROBLEY

Moho no ka waeia ma ka Paa Repubalika no ke Kulana

MAKAI NUI

 

 

 

Mai ke Poo Mai o na Makai o Los Angeles i ke Kapena Makai o Honolulu

(Kope)

 

KULANAKAUHALE O LOS ANGELES, KALEPONI, OIHANA MAKAI

Lyle Pendegast, poo.

Los Angeles, Kaleponi

Aperila 13, 1921

 

A.      McDuffie,

Kapena o na Makaikiu,

Honolulu, Hawaii,

 

Alohe oe:-

 

            Ua loaa mai ia’u kau leka o Aperila 4, 1921, me ke kii, na kuni-manamanalima, ame na ana hoike ano o SAM ROBLEY, no ka nana ana, aka, aole a makou moolelo, ma ke ano kuloko a i ole mai kekahi wai mai paha, no keia kanaka.

 

            No ka hooko ana i kau noi, ke hoihoi hou aku nei au i na kuni manamanalima ame ke kii ia oe.

 

Me ka mahalo,

LYLE PENDEGAST,

poo o na oihana makai.

 

Cline, 1. Bu

CRM/CNW

 

 

 

            Ua Pa’iia keia kii ame keia mau kuni-manamanalima ame na ana hoike ano maloko o ka halepaahao o Oahu ma ka la 3 o Aperila, 1921, mamuli o ka’u noi. Ua pa’iia lakou no ka huai ana ae i kekahi moolelo lepo ame hakuepa e pili ana i ko’u ola ana, i hoikeia ae no kekahi hana pilikino.

            Ke hoopukaia aku nei keia kii ame keia mau kuni-manamanalima i keia wa no kekahi hana pili i ka lehulehu-no ka huai ana ae i kekahi moolelo lepo a hakuepa e pili ana i ko’u ola ana/

            Ina paha ke kamailio nei lakou i keia moolelo e pili ana no’u ma ke ano makaainana wale no, a i ole e pili ana paha ia ia’u, ma ke ano he moho no kekahi oihana aupuni, e huai aku ana au i ka hoopunipuni o ka moolelo nona iho, a e hoike aku no au i ka mea hoopunipuni nana e kamailio ana ia mea-ke loaa oia ia’u

            Ua huai aku au i keia moolelo ma ke ano hoakaka piha no ka mea ua makemake au e pepehi koke i ka Moo Nahesa a make loa.

            Aka ke manao nei au ua oi aku ka noonoo nui o na kanaka o keia kulanakauhale a kalana i ko KEIAWA me KEIA MUA AKU mamua o ko ka WA I HALA.

            Ua makemake oe e maopopo ke ano o ka oihana makai e loaa aku ana ia oe. O keia ka kela ,me keia makaainana maikai i  makemake ai e loaa.

            Aole au e hoopau manawa wale ana me keia mau moolelo hakuepa i hoopaholaia me ka manao i wahi no’u e haule ai. Ke iini nei au e lawelawe i ka’u hakoko ana me ka maemae, ke kaulike ame ka hoinoino ole, e kalele ana me na ninau ano nui o keia wa, aole me na mea o ka wa i hala.

            Ke ku nei au no ka lawelaweia o ka oihana makai me ka maka’u ole ame ke kupono, maluna o na kahua o ke kaulike. O kona manao, o ia no ka hookoia o ke kanawai me ka hoopono, aole he mau hana hoopilimeaai.