Ka Nupepa Kuokoa, Volume LXII, Number 40, 4 October 1923 — E Kokua no ka Hana Maikai [ARTICLE]

E Kokua no ka Hana Maikai

Ma keia Poaono iho. e konoia mai ai na makaainana o Honolulu nei, e kuai i na penikala mai na lala mai o kekahi ahahui hou i kukuluia ae, no ka Halema'i Moiwahine ma ka inoa Ahahui Pua. Ma ka ike i loaa mai i keia pepa, no keia ahahui ame kana hana, ua pomaikai maoli ka poe e hoihoiia ana maloko o ka halema'i no ka lapaauia mai, 'no ka mea o ka Ahahui Pua ka mea nana e hoouna 1 komite no na home o ka poe i ma'i, a e noho ana hoi maloko o ka Halema'i Moiwahine, ina paha he mau kokua kekahi e pono ai e haawiia aku i ko lakou mau ohana. He liilii loa ke kenikeni e haawiia aku ana no keia hana kokua, me ka loaa mai nae he penikala no ia kenikeni, aka o ka pomaikai oi aku. o ia no ka lilo ana o na kenikeni i hoiliiliia ae a loaa kekahi huina- dala mahuahua, i mea e kokuaia aku ai na ma'i, ka poe i hoopilikiaia ko lakou noonoo, no ko lakou mau ohana, a i hoopilikiaia paha ma kekahi mau ano lehulehu e ae.