Ka Nupepa Kuokoa, Volume LXII, Number 44, 1 November 1923 — Aole i Nana i Kona Haule Ana [ARTICLE]

Aole i Nana i Kona Haule Ana

E haawiia na mahalo kiekie ana i ka Lunakiai Chas. N. Arnold i kona ku okoa ana mai maluna o na kahua haiolelo iloko o keia mau la, a hoike mai no kona haawi i na kokua ana no ka moho, a kona aoao kalaiaina i wae ae ai no ke kulana meia; o ka manao pololei maoli no ia, e pono ai i ka poe apau i holo iho nei, a pau i ka haule ma ke koho wae moho, o ko lakou hoike maoli mai i na manao maikai, ma ke kokua ana, no ka lanakila o ka poe i waeia. Aole ka Lunakiai Kumalae i oili mai iwaho, a haawi i kana niau hooikaika ana no ka moho meia i waeia ae e kona aoao kalaiaina. Nokeaha mai la ke kumu, no kona haule ana paha, a i ole, ua oi loa aku paha kona makemake i ke kulana meia; ma o keia mau hoa la nae o ka papa. e ike aku ai kakou i ke kilakila o na ano o kekahi i kekahi, e hiki ole ai e kaohiia iho ka haawi ana aku i na mahalo kiekie ana nona. I-īc paio o ke ano hoaloha mawaena o kekahi moho me kekahi, ka i hooukaia ma ke kau wae moho aku la i hala: a i wahi e mau aku ai ia ano hoaloha. a e hilahila ole ai ke ku aua aku a haiolelo no ka pono oka mea i lanakila; e kapae loa ia ke kamailio ana i na mea pilikino, a kipehi wale aku paha i na olelo hoinoino maluna o ka lioa paio, no ka mea e hoi hou mai ana no ia mau olelo ihope a lilo i kumu e wiwo ai, a e hoomaka-e ai i na hoa. He mea hiki ole ke alo ae, ka haule ana o kekahi moho kupono, oiai o ka makemake o ka hapanui ke hookoia; e loaa nae kekani haawina a'o maikai loa ia kakou no keia nee ana aku, he hana kupono loa, a he hana kilakila no hoi, na kekahi moho i haule, ke kokua ana i ka moho i lanakila ma kona aoao kalaiaina ponoi iho, aole o ka elieli aku i kona kahua e ku ana, a hoao'aku e.huki mai iaia ilalo, i hookahi ko laua nele like ana i ke kulana oihana.