Ka Nupepa Kuokoa, Volume LXII, Number 49, 6 December 1923 — KE KAKAUOLELO HOU O KE KOMISINA HOME HAWAII [ARTICLE]

KE KAKAUOLELO HOU O KE KOMISINA HOME HAWAII

Ma ka Poaono aku nei i hala i lawe ae ai ke Komisina Rudolph Duncan i ke kulana kakauolelo a luna mana hooko o ke komisina o na home Hawaii, a ua hala aku nei oia no Molokai. no ka hookamaaina pono ana iaia iho, me ke kulana o ka noho ana o na Hawaii maluna o ko lakou mau aina hoopulapula. Ma ke ano he Hawaii, a i makee nui hoi no ka pono o na Hawaii. ua kupono loa ko Mr. Duncan kohoia ana i kakauolelo a luna mana hooko; a e lilo auanei kona mau manao hoakaka, no na alahele pono a ke komisina e lawelawe aku ai; pela hoi me na manao kokua no ka pono o ka poe hoopulapula, i mea nana nui ia aku e ke komisina. Elike no nae me na hana apau i malihini ia kakou, aole no o ka makaukau ka mua, aka o ke a'o ame ka hookamaaina pono ana i na loina pili ia hana, pela no ka mea e halawai mai ana me Mr. Duncan, aka nae aole e hala iaia he mau mahina ma keia hope aku, e lilo no oia i kanaka makaukau, ma kona kulana hou, me ka loaa pu aku o na ike apau e pili ana i na ano holomua o ka hoopulapula ana i na kanaka Hawaii.