Ka Nupepa Kuokoa, Volume LXIII, Number 9, 28 February 1924 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

 

MAI HOOHEMAHEMA E NA MAKUA!

 

            O kekahi mea ano nui loa. i makemakeia ai na makua mea keiki e hana. ma ka manawa e hanau mai ai ka lakou mau keiki, o ia no ka hele ana ae e hoike i ka papa ola, a i ole i na akena paha o ka papa ola e noho ana ma kela ame keia wahi like ole apuni keia Teritore.

            Me he mea la, iwaena o na kanaka Hawaii, he kakaikahi loa ka poe i maopopo ole i ke kauoha a ke kanawai, no ka hoike ana ae o na makua i ka wa e hanau ai ka lakou poe keiki no ka hoopaaia aku maloko o ke keena o ka papa ola ; o ka hapanui o na Hawaii, ua ike lakou i keia mea.

            Iwaena o kekahi mau makua mea keiki, ua hoohemahemaia no ka hoike ana ae i ka manawa i hanauia ai o ka lakou poe keiki, i na luna oihana, i kuleana no ka hoopaa ana i na hanau; aka ua hoopaa aku lakou i ka la i hanauia ai, ka mahiina ame ka makahiki maloko o na buke Baibala ; aole no he pilikia o ka hana ana pela o ka oi loa aku nae o ka pono, o ia no ka paa ana o kela hanau, iloko o na buke o ke keena o ka papa ola, kahi e hiki ai ke huliia aku, i ka manawa e makemake ai.

            Aole paha e ikeia ana ka waiwai o ka hoike ana aku i ka wa i hanauia ai o na keiki i ka papa ola e liilii loa ana no kela mau keiki aka aia laou a kanaka makua, e lilo auanei kela hoopaaia ana o ko lakou mau la hanau i kumu e hoopauia ai kekahi mau ninau pohihihi e ala mai ana i pili loa ia lakou ; elike me ko lakou kulana makaainana, ko lakou kuleana e koho haloka ka hooiaio ana i ko lakou mau makahiki, no ka hiki ke mare ; ka hooiaio ana i na makahki no ke komo ana ma kekahi mau hana ka hoopau ana i na pohihi, ma na mea pili hoopii kanawai ka hooiaio ana no ka hiki ke paa i na waiwai hooilina ame kekahi mau ninau lehulehu, e ala mai ana ma ka nee ana aku o ke ola ana o na keiki.

            O na Kepani ka lahui oi loa aku o ka noho pouliuli, ma na mea pili i ka hoike ana ae i ka papa ola no ka hanauia ana o ka lakou poe keiki mamuli mai no o ka naaupo ; ma na mea i ikeia iwaena o ka hapanui o kela lahui o ia no ka hele ana imua o ke Kanikela Kepani maanei a hoike aku la imua on a no ka manawa i hanauia ai ka lakou mau keiki me ka mano ua lawa iho la no kela hana ana pela, e pilikia ole ai ka lakou poe keiki ke nui ae lakou a lilo i poe kanaka makua.

            Aole he pololei o kela ano hana. Imua o ka papa ola ka pololei e hele mua ae ai e hoike no kela mau hanau, no ka mea he mau makaainana na keiki Kepani apau i hanauia ma Hawaii nei, no Amerika : a pela no me na Pake ame na lahui e ae, i loaa ole ke kuleana makaainana Amerika ia lakou ke hanauia ka lakou poe keiki ma Hawaii nei.

            Aia ma ke keena o ka papa ola kahi i hoopaaia ai na hanau na mare ame na make o ka poe apau e noho ana ma keia Teritore i kela ame keia makahiki. I ka wa e makemakeia ai e loaa ka manwa poloei loa i hanauia ai o kekahi poe keiki, a i ole ka manawa pololei loa i hanauia ai o kekahi poe keiki a i ole ka manawa paha i mareia ai o kekahi poe amake paha ua hiki loa ke loaa maloko o ka papa ola; a e lilo ana no hoi i mea kokua nui mai ma ka hooholo ana i kekahi mau ninau pohihihi e ala mai ana ma keia mua aku ma na ano apau.

            O na makua mea keiki i maopopo mua ole ia lakou keia mea nui loa e hoonaauaoia lakou ma keia mua aku ma ka lawe ana aku i na aʻo ana ame na hoonaauo ana a ke Kuokoa no ke lakou pono.

 

UA PONO KA HOOPAUIA ANA

 

            O ka hopena o na hana noii a huli pono ma ka aoao o ke keena o ka loio Amerika Carden ame ka Ilamuku Cox, ma na mea e pili ana i ka hoopae malu ia ana o ka wisake ma Kauai o ia no ka hoopau ana aku o ka Luna Hooko i ke Kanawai Hookapu Waiona John H. Wise ia James A. K. Conchee ka mea ana i hookohu aku ai i akena no Kauai, mai ka paa ana i kela kulana.

            O kona koto pu ana iloko o ka hana hoopakele i ka hoopae malu i ka waona a lawe paha i ke ki-pe he hana pohihihi no ka hooiaio ana aka nae i ka nana aku eia na luna oihana federala ma ka meheu pololei e hookolo mai nei no ka hoea aku i kahi e loaa pono ai ka puulu o ka poe hakihaki i ke kanawai buokapu waiona.

            Aole he mau kanalua ana no ka hoao o ka poe hoopae malu i ka waiona e lawelawe ikekahi mau hana e palekana ai ka lakou mau hana hakihaki kanawai in a no ia ma ke ki-pe ana i na luna oihana federala o kekahi luna oihana nae e ae aku ana e lilo i mea hoopakele i ka poe o kela ano ua kupono ole loa oia e paa i ka hana o ke aupuni.

            I wahi e kau ai ka weli i ka poe hoopae malu i ka waiona kuai paha i ka waiona ma ke ano malu no ko lakou mau pomaikai iho e lilo ka poe na lakou e hooko nei i ke kanawai hookapu waiona i poe kuiʻo ma ka hooko ana i ka lakou oihana, aole i poe hiki wale no ke kuaiia me na apana dala, no ke kumakaia ana ia lakou iho , a ike aupuni.

            O ka manao ana e kukulu maoli aku i hale hana halakahiki ma Molokai no ka pono o ka poe kanu halakahiki ma ela mokupuni ame ka poe imanaoia e komo aku ma kela oihana i ka nana aku he hana paakiki no ia no ke kumu aole i lawa o Molokai no ka hoolawa ana ae i na limahana na lakou e lawelawe na hana i manaoia no kela hale ke hoea mai i ke kikina pala o ka halakahiki. ua ike kakou i ka hoolimalimaia ana o na keiki kula i ka wa hoomaha no ka hoolawa ana aku i na limhana o ka hale luana halakahiki ma Maui, i na makahiki ae nei i hala mamuli o keia pilikia hookahi i ka ua ai ka poe na lakou e kanu aku ana i ka halakahiki ma Lanai i ke kukulu koke ana i hala hana halakahiki ma kela mokupuni no keia manawa ahiki i ka ikeia ana ua lawa na limahana no ka noho hana ana maloko o kela hale hana.

            Ma ka po o keia Poaha ae e noho mai ai ka halawai a na kalapu Repubalika aupuni keia Teritore no ka wae ana i na moho elele no ka ahaelel teritore e noho mai ai iloko ae nei o ka la 7 o Apelila ma keia kulanakauhale no ke koho ana i elua elele ame ko laua mau hope no ka holo ana kau i ka ahaelele wae moho Peresidena ma Amerika. E hele ae e na Repubalika apau ma kela halawai ka poe i lilo i mau lala no na kalapu Repubalika aole o ka hoohemahema wale i na hana o ko lakou mau kalapu e lilo auanei ko lakou hoohemahema i kumu e lanakila ai na hana maalea a kekahi poe loea kalaiaina.

            Ma ka hooholo ana o kapoe hookuonoono o Waiakea, Hilo Hawaii e hoole loa ana i ka manao hooponopono o ka mahiko a Waiakea no kekahi mau pilikia i oili ae i ka nana aku e hoea okoa aku ana he mau hoopii kanawai imua o na aha hooolokolo no ka hooholo ana mai i ka mea pono a kela ame keia aoao pakahi e hana aku ai.

 

NUHOU KULOKO

 

            Mamuli o ka aelike ana o na aoao a elua, i waiho loa ia aku ai ka ninau no ke ku a ku ole i ka mana o ka hookohuia ana o Louis S. Cain, i enekinia kalana, imua o ka aha kiekie, no ka hooholo ana mai.

            E alawa ae e na lala o ka ahahui ka Hale o na Alii o Hawaii, i ka halawai kumau, e puka aku nei ma kekahi wahi o keia pepa; e malamaia ana ma ka hora elua o ka auwina la o keia Sabati ae.

            No ka hoihoi ana aku i kekahi haole o ka hopuia ana, nona ka inoa o Herbert A. Locke, ma ke ku ana mai o ka mokuahi Calawaii, ma ka po o ka Poaono aku nei i hala, e hoea mai ana he makaikiu mai Amerika mai, ma ka la 5 ae nei o Maraki.

            E loaa no ka poi makepono o 25 paona i ka hookahi dala ma ke pakaukau a Mrs. Mary Robins, ma ka Makeke Kulanakauhale ma ke alanui Maunakea ma keia Poaono iho, Maraki 1 pela pu hoi me na iʻa maloo ame na hee maloo me ka oluolu o ke kumukuai.

            No ke ku-e i ke kanawai hookapu waiona federala, i paa ae ai o Harry Charman i ka hopuia e ka Makaikiu Antone Louis ma ka Poaono i hala, me ke kauia ana mai o kona hona, ma kahi o ka elima haneri dala. Ma ka oleloia ua nui ka waiona i loaa aku maloko o kekahi hale ana e noho ana ma ke alanui Hokele me Maunakea.

            I kulike ai me ke kahea pili oihana i hoopukaia ae e ke komite kuwaena teritore o ka aoao Repubalika e uoho ae ana ka halawai a na kalapu Repubalika apuni keia teritore, ma ka hapalua o ka hora ehiku o ka po o keia Poaha ae Maraki 6 1924 no ka wae ana i na moho elele no ka ahaelele teritore e noho mai ai ma ka la 7 o Aperila aku.

 

HOIKE KULA SABATI O WAIANAE.

 

            I ka Lunahooponopono o ke Kuokoa:- Ma ke Sabti i hala iho la ka malamaia ana o ka Hoike Hapaha o ke Kula Sabati o ka Apana o Waianae, no keia hapaha mua o ka makahiki 1924 a o ka Hope Kahu Kula Sabati Nui Jonathan K. Nakila ka mea nana e nana i na Kula Sabti o na apana Kona o Oahu, ka i hiki mai.

            Iloko o ke aheahe malie na hana i lawelaweia ahiki i ka pau ana a he ku i ka nani ame ka mahaloia na himeni ame na haawina i hoikeia mai, o ka oi aku nae o na papa i ku i ka ii a koʻu puuwai o ia no ka papa o na pokii ame ko na opio no ka mea ua paanaau maoli na haawina i aʻoia ia lakou me ka maikai pu o ka lakou mau himeni aole i pau iho la ilaila o ko lakou koa me ka hilahila ole kekhai mea a ka meakakau i mahala nui ai a ma ka olelo makuahine wale no hoi ka lakou mau haawina i haipaanaauia mai ai, hookahi wale no mea hoohalahala a kou meakakau o ka uuku o ka heluna o ia mau opio, a ke manaolana mau nei nae ma ka hoike haapaha e hiki mai ana e oi paumi aku ana paha, ka nui o na pokii ame na opio e aʻoia a e hoea ae ana ma ia hoike.

            He lehulehu na papa Kula Sabati o Waianae nei, he hapanui nae i hiki mai a o kekahi aole i hiki kino mai, o na lulu nae ka i haawiia mai, mamuli paha o kekahi mau pilikia a mau kumu okoa ae paha.

            Ua hoomakaia ka hoonee ana i na hana hoike ma ka hora 11 a pau ma ka hora 12:30 p. m., mahope o na paipai manao ana mai ka Hope Kahu Kula Sabati mai, ka Makua S. P. Kaaia, Henry Kapela, ke Kahu a Komite Wm. K. Poai.

            Iloko o ka uuku o na haumana i hiki mai he 63 ka nui ame 3 poe makaikai eia nae ma na dala i luluia ua piha ke $70 a in a paha no ka pau pono mai o na papa Kula Sabati, elike me ia i ikeia i kekahi mau manawa i hala, ke manao nei kou meakakau e piha ana he mau haneri dala no ka pomaikai o ke Kula Sabati o Waianae.

            Ua hookuuia na hana ma ka hora 12:30 mahope o ka himeni ana a ke anaina ma ka L. H. N., aoao 196 ame ka pule hookuu mai ke Kahu Wm. K. Poai mai a mahope iho o ia manawa i noho ai na aha ekou, ko ka Ekalesia Kula Sabati ame C. E. no ke kukakuka ana maluna o kekahi mau kumuhana.

            Kou, me ka mahalo

            Makaikai,

            Waianae, Feb. 26, 1924.

O DAVID B. HAUMEA MA KONA KULANA HOU.

 

            O ke kii keia o David B. Haumea i kamaain iloko o ka oihana makai o Honolulu nei, me kona paa lole makai hou, ma kona kulana, he makai no ka hui Alahao o Oahu nei.

            No na makahiki e kanakolu a oi, i noho hana ai o David B. Haumea iloko o ka oihana makai o Honolulu nei, malalo o na loli like ole iloko o kela oihana, aka ma ka makahiki aku la i hala ma ka la hope o ka mahina o Dekemaha, i kaawale mai ai eia mai ka oihana makai mai, me ka loaa o kona ukuhoomau mai ke aupuni kulanakauhale mai, no ke koena aku o kona mau la o ke ola ana.

            Mamua nae o kona waiho ana aku i ka oihana makai na noiia aku oia e ka Hui Alahao o Oahu nei, e noho hana malalo o kela hui no laila i keia manawa ke noho hana mai nei oia ma ke ano he makai no ka hui alahao e kiai ana a e makaala ana i ka poe on a a hoohaunaele ma na wahi e kokoke ana i ka hale hoolulu kaaahi ma Koiuiu ae nei.

            Ua hoomaka ka lawelawe ana o Mr. haumea i keia oihana hou ana, ma ka la 1 mai nei o ka mahina o ianuari, o keia makahiki.

            O kona mau hora hana, mai ka hora 1:30 mai o ka auwina la, o kela ame keia la ahiki i ka hora 5:30 o ke ahiahi a mai ka hora 9:00 aku o ka po a pau ma ka hora 11:00.

            Eia no o David B. Haumea iloko o kona mau la o ke kanaka uʻi in a e malama pono oia i kona ola kino elike me kona kulana mau iloko o na makahiki ana e paa ana i ka oihana makai no ke aupuni alaila e loaa ana no iaia he mau makahiki loihi e noho makai ai no ka hui alahao ahiki i ka loaa hou ana mai iaia he ukuhoomau e make ai elua manu i ka poka hookahi oiai no nae he elua no ana manu e ohi mau nei i kela ame keia mahina.

 

EKOLU I PAA HOU AE NO KA HANA WAIONA.

 

            He wahine Kepani, o Mrs. T. Izumi ka inoa a ma ka hoakaka a na makai no ka makahiki ka a oi aku ka hana mau ana o nei wahine i ka waiona ma kona hale ma ke alanui Muliwai ame Kukui, ka i paa ae i ka hopuia e ka Makai Nakea a hookomoia ae he hoopii e ku-e ana iaia no ka hana a kuai waiona. ma ka hoopii i hookomoia ae nona ua kuai mai oia i kekahi omole okolehao i ke kiu e hana pu ana me ka Makai Nakea ma ia po. He $250 kona bela i kauia aku.

            Ma ia la no i komoia aku ai kokahi hale hana bia (suaipa) ma ke alanui Liliha ena Makaikiu Edward Ross, Troche ame Kam Kwai a loaa pono aku ka waiona maloko o ia hale. Ua paa ae na on a no laua ia hale he mau Pilipino no lau na inoa o Theodore Rillamore ame M. Sabago i ka hopuia a hookomoia ae he hoopii e ku-e ana ia laua no ka haihai kanawai hookapu waiona lahui. He $250 ka bela i kauia mai maluna o laua pakahi.

            LADANA. Feb. 25- Ua hoolahaia ae e ka Nupepa London Express kekahi lono ma ke kelekalapa mai Atenai mai i keia la, e hoakaka ana o ke aupuni Helene i noho poo ia e ke Kuhina Nui Kafandaris, ua hiolo mamuli o kona hoole ana e haawipio aku iaia ino i na koi mai ka poe mai o ka aoao kaliaaina Extremists, e kukulu ae i aupuni repubalika mamua o ke koho baloka ana a ka lahui.

 

Nuhou Kuwaho

 

            GUYAQUIL, Eeuadora, Feb. 22- He hoonaueue olai ikaika ka i ikeia maanei i ka po nei, hoopihoihoiia ka noonoo o ka lehulehu.

            MEKIKO Feb. 22- Ua hoikeia mai e na luna aupuni federala i keia la ka hopupioia ana o ke Kenerala Savador Alvarado ke alakai o ka poe kipi ma ke komohana.

            MEKIKO, Feb. 25-  Ua hoopukaia ae e ka Peresiden Obregon i keia la he kuahaua e wehe hamama ana i na alanui apau no ka hele ana a ka lehulehu ma ka Poaha.

            MEKIKO, Feb. 22- Ua hoikeia aku e ke keena o ko na aina e i Wakinekona i keia la o Charles Beecher Warren, ka me ai hookohuia mai ma ke ano he elele aupuni, ua aponoia e ke aupuni o Mekiko.

            COLUMBUS Feb. 25- O James M. Cox ka moho peresidena Demokarata i holo ai i ka 1920, ua waiho aku oia i kona inoa moho no ka waeia e ka aoao Demokarata maloko o na aha wae moho o ka mokuaina.

            MEKIKO Feb. 25- Ua hoao na koa kipi e hoopahu i ke kaaahi ohua e holo ana mai Vera Cruz no ke kulanakauhale o Mekiko ma ka auwina la Sabati. O na auka kiana pauda i waihoia ai malalo ae o ko alahao ua pahu mua mamua o ka manawa i makemakeia a he lehulehu wale o na kanaka i make. O kahi i laki ai ua hoopaa mua ia ka holo ana o kekaaahi mamua o ke pahu ana ae o ke kiana pauda.

            WAKINEKONA, Feb. 24- O ka Peresidena ame Mrs. Calvin Collidge pu kekahi i akoakoa ae ma ke anaina haipule i malamaia maloko o ka halepule Kristo ma ke alanui Alexandria, kahi a ka Peresidena Wakinekona i lawelawe ai ma ke ano he luna ekalesia. Maloko o ka noho palua a Keoki Wakinekona i noho ai i noho iho ai ka Pereiden ame Mrs. Calvin Cooidge, maluna o ia noho o Wakinekona ma kona manawa i noho ai i na anaina haipule maanei i ke kenekulia umikumamahiku.

            MANCEHSTER, Eng., Feb. 22- O na hoopaʻi hoopaahao apau ke ola he kakaikahi loa ke kauia aku maluna o na lawehala maloko o Enelani, koe wale no na hihia no lakou na hopaʻi make i hoemiia mai. Eia nae, aole i hookaulua iho ka Lunakanawai Branson i kekau ana aku i ka hoopaʻi paahao a pau ke ola ma kekahi manawa kokoke aku nei i hala, maluna o kekahi kanaka i hoopiiiia ae ai no ke oki ana i na lima a elua o kana kaikamahine kolea, o eha ame hapa makahiki. Ua hoakakaia ae e ka lunakanawai ka molelo o kela karaima ma ke ario oia ka oi aku o ka mea manaonao loa i hanaia ana i lohe ole ai mamua. Iloko o ka manawa e hooloheia ana o keia hihia mamua o ka aha elua mau whaine o ka papa kiure i maule a e haloiloi mai ana hoi na waimaka ma na maka o ka lunakanawai. Ua lulu ae na makaainana o Aeerington, kahi o ke kaikamahine poino e noho ana, he $30,000 no ka hoolako ana iaia i kona mau mea e pono ai ma nei mua aku.

 

LOAA OLE KA LOKAHI I NA KIURE.

 

            Ma ka hihia koi poho a John Ortez ke kanaka hoopaa peleki o ke kaaahi o ka Hui O. R. & L. Co., i ka huina o $25,000 mamuli o kona poino ana ua hiki ole e loaa ka olelo hooholo a ka papa kiure federala. Mamua o ka Lunakanawai John De Bolt o ka aha hookolokolo Federala ka hooloheia ana o keia hihia.

            Mahope o ka hoopaaia ana aku o na kiure maloko o ka rumi no ka aneane eono hora ke kukakuka ana a no na manawa lehulehu no hoi ko lakou baloka ana, a ma ka manawa i hoihoiia mai ai ka hoike imua o ka aha, he eono ma ka aoao apono i ke koi a he eono ma ka aoao ku-e J ka manawa i ninau aku ai ka Lunakanawai De Bolt in a paha e hiki ana e lokahi ko lakou mau manao ke kukakuka hou lakou a o ka pane i haawiia mai aole.

            O John C. Kelly ame William Pittman na kokua ma ko John Ohtez aoao, a ua noi aku lana no ka hoomanawa i hoikeia mai ai e ka lunahoomalu o na kiure ka lokahi ole o na manao o na kiure.

            O Allan T. Steadman ka mea i lawelawe i ka hihia ma ka aoao e ka hui Kaaahi.

 

NA MARE.

 

            Frank Saffra ia Mary Rose Kunukau Feb. 6

            Marciano Emia ia Julia H. Ponee, Feb. 9.

            A.A. Aiu ia Christina Mahoe, Feb. 9.

            D. Makahilahila ia mary Kuleikoa, Feb. 14

            En Fo Leong ia Margaret Keawe, Feb. 16.

            Jack Brown ia Halie Kanakaokai, Feb. 16.

            Daniel Nahinu ia Rose Kanehailua, Feb. 23.

 

NA HANAU.

 

            Na Robert Kauhane âme Pua Kumano, he keikikane Dec. 19.

            Na D. M. Kupihea ame Mary V. Starkey, he keikikane, Jan. 20.

            Na Thomas C. Makiao ame Elizabeth Lewis, he keikikane, Jan. 29.

            Na R. Kaahiwa âme Haruyo Imanaka, he kaikamahine, Feb. 6.

            Na Change Po âme Tom Shee, he kakamahine, Feb. 15.

            Na Joseph F. Hall ame Sarah C. Kaea he kaikamahine, Feb. 19.

            Na Simon Chong âme Annie H. David he keikikane, Feb. 20.

            Na Frank P. Andrande ame Clara K. Keiki, he keikikane, Feb. 23

 

NA MAKE

 

            Cecilia Naki, ma ka Halemaʻi o na Kamalii, Feb.16.

            Mary K. Piimanu, ma ke alanui Alani Feb. 18.

            Kahele Namahoe ma ke alanui Prospect, Feb. 19.

            Agnes K. Paiaina, ma ke alanui Mission, Feb. 19.

            Mealoha Kainulama, ma Waikiki (haleauau), Feb. 21.

            Robert P. Kaaihue, ma ka Halemaʻi Moiwahine, Feb. 24.

            Kala Hao, ma ka Home Minoaka. Feb. 24.

            Piha mau na hoikeike a ka Hui Malu Elks malalo ae noi a Aala Paka, i na po apau me ka hoohauoli pu ia o ka lehulehu i na mea a lakou i ike ai maloko olaila.

 

HOAILONA AEKO WAIU KIA

KAUKANI O NA BEBE I ULU AE ME KA PUIPUI AME KA IKAIKA KE HANAIIA ME KA WAIU AEKO. HE MAEMAE IA ME KA MOMONA

TRADE MARK OF BONDENʻS CONDENSED MILK CO.

GAIL GORDEN EAGLE BRAND

 

PAU PULU AOHE LAU KANU.

 

            Mai ka on a nona ka hale, a na malihini o ke kipa ana aku, he hookahi ka huluiia ana mai e John. H. Wise, ka luna hooko i ke kanawai hookapu waiona ame kona mau kanaka, o Elizabeth Kahele, o ke alanui Hokele e kokoke la i ke alanui Kekaulikem ma ka Poanao aku la i hala, mamuli o ka loaa ana aku o elua mau omole waiona maloko o ka hale, elike me ka hoakaka a Mr. Wise.

            Ua hopuia o Mrs. Elizabeth Kahele, no ke ku-e i ke kanawai hookapu waiona a ua hopu pu ia hoi kana mau malihini ma ke ano he mau hoike ma ka aoao o ke aupuni he ewalu ko lakou nui.

            Ma ka hoakaka a Mr. Wise i ka wa ka e hookokoke aku ai naka o ke aupuni no kahi ka hale ua ki maiʻa o Mrs. i ka puka a paa me ka na aku he elua mau omole na o kahi holoi pa manawa o @ ana ak o ka puka i na @@@ ko i ke kanawai hookapu @@@.

 

NA LETA I KII OLE IA MAI AHIKI I FEB. 23, 1924.

 

            Aloiau, Mas Ralph keoho, Kaawaloa, Chas. Kaiwiaea, Mrs. Rachel Kaua, Lemi Kaui, Mrs. Kealohapauole Kauhane, Mrs. Hanalei Kama, Peter Kapihe, David Kekuewa Phillip.

            Keoho, Mas. Chas. Kimeona, Mas. John Kuliona. Miss Nora Liwai, mrs. Puna Mahulu, Mrs. Milii Naeha, Miss Maryann Nakea. Robert Nowalu, Miss Ivy.

            E ninau mai na leta i hoolahaia ke ki mai.

            D. H. mae ADAM, Lunaleta.

            Ua wehe ae nei or Mrs. K he Peek, he pakauiau@@@ meaai Hawaii like o @@@@ Makeke, ma ke pakaukau @ Alanui Moiwahine. M@@@ ai na laulau, ke huilole ka iʻa maloa ake pipi @@ na meaai e ae.

 

OPEN A CHARGE ACCOUNT AT THE MODE CLOTHIERS FORT ST.

 

HALE O NA ALII O @@@ (AHAHUI POO)

 

            E makana aia ana ka @ mau o ka (Ahahui @@@ o na LAii o Hwaii ma k@@ Hall. i keia Sabati @@@ 1824 ma ka hora 2 @@@

            Ma ke kauoia a ka @@@

            W. J @@@

            @@@@

           

E HANA MAU ANA KEKAHI MEA I NA MINUKE APAU MA KA HOIKEIKE A KA ELK NANA IA ODIVA AME KANA MAU UWALO LUU KE KEAKA $100.000 MAKANA KUIKEWA MA KA PUKA NA PO APAU

 

AOLE O KA MEA I LOAA IA OE KE HELUIA, O KA MEA AU I HOAHU AI. WEHE I MOOHELU HOAHU I KEIA WA MAI KALI A KA LA APOPO. THE BANK OF BISHOP & CO., LTD. KA BANAKO KAMAAINA I NA HAWAII.

 

HE HALE HOU? AOLE-KOHU HALE HOU

AOLE WALE NO I LIKE ME KA HALE HOU AKA HE 100% PAA -HOOMAU I KONA WAIWAIIO -NO KA MEA UA HOOPAKELEIA E

KE PENA MAEMAEWALI MUA A FULLER

I KA WA E NOONOO AI O KEKAHI MEA KUAI I HOME E LILO ANA KENA KULANA I 90 PAKENEKA NO KANA OLELO HOOHOLO.

O KA HALE I PENAIA ME KE PENA MAEMAE WALI MUA A FULLER E MAU ANA KONA MAKAMAKA HOU. HE HANA HIKI KEIA NO KA MEA O KE PENA KEOKEO MAEMAE WALE NO KA METALA WAIHOOLUU AME KA AILA HOOWALI KA IHOOHANAIA ILOKO OLAILA E NAKAKA OLE AI A KAAKAA-PAAKIKI ME KA UAUA-HOOPAKELE IAWAHO UA HOOPAKELE OE APAU LOA.

LEWERS & COOKE, LTD.

@@@ LOEA MA NA LAKO KUKULU HALE MAHOPE MAI O KA 1852 169-177 ALANUI MOI HEMA