Ka Nupepa Kuokoa, Volume LXIII, Number 10, 6 March 1924 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

HE MOOLELO NO

KEONI MONOTANA

A I OLE

MAIKA AMANA LIKANAKA MAI A I KA LILO

ANA I KANAKA ONAMILIONA

WAIWAI LOA.

 

            "O kela kekahi o na hana naaupo au i manao ai e hooko aku, po ke ake wale no e ike i ka oiaio ame ka pololei o ka moolelo i pili i na pine elua."

            "He hana naaupo paha ia i kou noonoo ana, aka he mea ano nui nae ia ia u."

            "Alaila o kou hoao ana e kuai i kela pine a lilo aku ia oe, @a ka uku ana i kekahi huina dala mahuahua loa, ua like pu ia me ke kiola wale ana i ke dala i ka makani, me ka ohi mai i ka puahiohio."

            "He mau dala wale io paha kela i ka makani i kamanao o kekahi poe, aka he hunahuna wale no ia i koumanao; a *a e hiki ana ia oe ke koi aku i kau kaikamahine, e hoolilo mai i kela pine omou iau, alaila e haawi no au ia oe ma ke ano he uku no kou luhi i hapa miliona dala."

            Ua hoopukaia aku keia mau olelo no ka uku makana o hapalua miliona dala me he mea liilii loa la ia, ke kumu nana i kono aku ia Uilana Ganeki e nana mai maluna o Monotana ma ke ano kahaha me ka piha pu me ke pahaʻohaʻo, me ka pane ana mai nae:

            "Aole loa e ae ana kaʻu kaikamahine e kuai hoolilo i kela pine, in a ia ua loaa aku iaia, ma ke ano he makana mai kekahi mea mai, a o kekahi no hoi, he nue ka waiwai o kana kane, na ka mea nele paha ia i ke dala, e komo ai ka manao e hoolilo aku i kela pine!"

            Ea, e huikala mai oe no kaʻu mau olelo kupono ole i kamailio mua aku nei i a oe, ua pupuahulu loa au i ka hoopuka ana aku nei i kela manao kuai, me kuu noono mua ole, o kau kaikamahine kekahi o na wahine waiwai a kuonoono maloko nei o keia kulanakauhale.

            Mai hele loa aku paha na kamailio ana mawaena o Monotana ame Uilama Ganeki i ka nui, in a aole i komo koke mai o Roiana Kinikala, iloko o kela manawa me ke kunahihi o kona helehelena. o ia no oe o kekahi kanaka i like i ke akua lapu hoomakaʻukaʻu o ka po.

            I kela ike ana aku o Uilama Ganeki, oia pu kekahi i loaa na manao maikai ole, mamuli o na mea ana o ka lohe ana mai ia Monotana aku. i na minuke mamua iho, me ke kau pu o ka weli iaia no kela kanaka. i ke komo ana mai o kana hunona, ku ino ae la oia iluna, a ninau aku la me ka leo pihoihoi"

            "Heaha keia pilikia nui?" wahi ana me ka hopu okoa ana mai ma na poohiwi o Rolana Kinikala.

            "I hele mai la au e hoike aku ia oe, ua nalowale o Mira, aole oia maloko o kona rumi!" wahi a Mr. Kinikala me ka nuku okoa ana mai ia Uilama Ganeki no kona komo pu ana ma kekahi hana apuhi. no ka hoohoka ana mai iaia, ma ka imi ana i ke alahele e mahuka ai o Mira me ka ike ole ia.

            "Ea. ua nalowale anei kuu kaikamahine? Aole e hiki iaʻu ke manaoio aku i kena mau olelo au!" i pane ae ai o Uilama Ganeki me kona hele a piha loa i ke kahaha.

            "Mai hoao oe e hoopunipuni mai iaʻu e Mr. Ganeki, me ko maao e puni wale aku ia oe. Aole he mea e ae i maopopo no kela nalowale ana o Mira. o oe hookahi wale no, a ua hoolala kahiko olua. me ko kaikamahine, e hoohoka mai iaʻu, ke hoihoi hou aku au i kou mau waiwai a pile me oe!"

            Oiai na kanaka elua e noke la i ka hoopaapaa, ua hookaawale aku la o Monotana iaia iho mai ia laua mai, a ke ku mai la oia hoolohe. i na mea apau e kamailioia ana, me ka pahola mau o ka minoaka ma kona mau papalina.

            Ua hele maoli o Rolana Kinikala a piha i ka inaina. aia hoi ka hulili ma kona mau maka kahi i nohoalii ai, me kona kamailio hou ana ma me ka leo o ke kanaka i aneane loa e uluhia me ka inaina:

            "He hana keia au âme ko kaikamahine i kukakuka ai mawaena o olua e hoohoka mai iaʻu, aka e ike ana nae oe, maluna iho o ko poo. e ili aku ai ke koʻikoʻi o kau mea i hana ai," alaila huli mai la ua o Kinikala no kahi a Monotana e ku aku ana, a pane hou mai la:

            "E huikala mai oe iaʻu e Mr. Monotana, no kou ike ana mai i kekahi hiona maikai ole mawaena oʻu ame Mr. Ganeki.. aole nae e hiki iaʻu ke uumi iho i koʻu inaina, no ka epa maoli o ka hana a keia kanaka ino."

            "Auhea olua e na keonimana. e aeia mai au. e komo aku e hooponopono i keia pilikia, maila o hoopauia ae no ia me ka maalahi loa." i pane aku ai o Monotana, me kona mau maka hulili, o ia no oe o na puupuu hau, e oliili mai ana mailoko mai o kekahi kiʻowai aliali lana malie. "He oiaio anei na mea aʻu i lohe aku nei ia oe. i ke kamailio ana ae nei ia Mr. Ganeki?"

            "Ae. He oiaio loa na huaolelo apau aʻu i kamailio aku nei iaia. Aole o Mira maloko o kona rumi i keia manawa. Mahope iho o kela maule ana o Mira maloko o ka rumi hookipa, i hoi pololei loa aku ai oia noloko o kona rumi, a aole oia i ike hou ia mahope mai e kekahi mea oloko nei o keia hale."

            "Malia paha aia no oia malokko o kona rumi kahi i noho ai? Heaha auanei kekumu e holo mahuka aku ai oia mai ia oe aku?" i ninau aku ai o Monotana.

            "E ninau aku oe i ka makuakane Mira, oia ka mea nana e pane mai i na haina o kau mau ninau. Ua hele kena kanaka a kau ka weli iaʻu. aka no kana kaikamahine ua piha oia me ka hoowahawaha iaʻu. malalo iho la o keia mau ano aʻu i ike ai no laua nei, ua paa loa kuu manao, ua holo mahuka aku o Mira. no kekahi wahi i hooholo like ia mawaena o laua. Ua hele kino aku nei au noloko o ka rumi o Mira, aole oia maloko olaila. a ua huli au ma na wahi apau. aole nae oia i loaa aku nei iaʻu." wahi a Rolana Kinikala me ka pihoihoi.

 

MOKUNA XIV

 

            Aia o Mr. Kinikala ame Ganeki ke ku la me ka makaukau loa e lele aku kekahi maluna o kekahi no ka umi ana i ke kania i no ka mea ua piha like laua a elua i ka inaina, mamuli wale no o ko laua ike mai ia Monotana. pela iho la i hoohana ole ai ua mau kanaka nei i na aahuki wikani o ko laua mau ima: a ia Monotana e nana aku la i kela hiona, ua hele oia a piha me ka olioli iloko o kona aau; aka ma kona mau ano nae mawaho ke nana aku me he mea la, aia ke kaumaha maluna on a no ka oili ana ae la o kela mea maikai ole, mawaena o ka hunona ame ka makuahonowai. a ua makaukau loa hoi oia. e hoomalielie aku. i wahi e maalili ai ka inaina o ua mau kanaka nei.

            "I wahi e hoopauia ai ko kakou pohihihi no keia mea, ka manao nei au, e hele kakou apau noloko o ka rumi o Mira, malia paha aia kekahi kuhihewa i hanaia," i hoakaka ae ai o Monotana i kona manao, no ka hoopau ana i ka hoopaapaa mawaena o Kinikala ame Ganeki.

            "He mea makehewa wale no ko kakou hele ana aku iloko o ka rumi o Mira, ilaila mua aku nei au, aole oia i loaa iaʻu," i puoho mai ai o Mr Kinikala me kela ano okalakala no on a.

            "He keu aku maoli ka hia a ka mea kupaianaha! Ke ninau hou aku nei au ia oe e Mr. Kinikala, heaha ke kumu e holo mahuka ai o Mira mai ia oe aku?"

            No keia ninau a Monotana, me he mea la, ua hoopoina ae la o Kinikala i kona manao inaina no Mr. Ganeki, a kookau mai la i na ahewa ana maluna o Monotana i ka i ana mai:

            "Heaha kou ike e pili ana i keia hana? Aole loa he pilikia i ikeia mamua aku, ahiki i kou hoike ana mai i ko pine omou daimana, mai ia wa mai i oili ae ai keia hana pohihihi, a o ia kaʻu e ninau aku nei ia oe: Owai oe?"

            Aole o Monotana i pane aku no kela ninau a Mr. Kinikala, aka nana maikai wale aku la no oia maluna on a, me kela minoaka mau ma kona mau papalina, ka mea hoi nana i hooi loa aku i ka inaina o Mr. Kinikala, a pane hou mai la:

            "Ke manaoio nei au, ua komo pu oe iloko o kekahi hana ohumu me Mr. Ganeki e hoohoka mai iaʻu, no ka mea mai kela manawa mai au i komo ae ai iloko o ka rumi hookipa, mai ia wa mai ka hoomaka ana e oili ke kulana maikai ole o na mea apau i hoolalaia, ahiki i ke komo okoa ana iloko o ka pohihihi.

            "I kou manawa i komo mai ai, aia na mea apau ke nana pono la maluna ou, a i kou manwa i hoikeike ae ai i ke pine omou daimana, a hoopuka ae i ka inoa o kekahi kanaka, i kupono ole e hooloheia aku e ka poe maikai; ua kaualako aku oe i kuu wahine iloko o kekahi kulana kupilikii ahiki i kona maule okoa ana, a o ka hopena o kau mau hana, o ia no kona nalowale ana mai iaʻu aku.

            "Me ka maopopo ole nae iaʻu o kou wahi i hele aku ai, ua loaa mai nei oe iaʻu e kamailio pu ana me Mr. Ganeki ma keia wahi, nolaila ma ke ola ana o na akua lapu o ka po, owai oe e Mr. Monotana?"

            Me he mea la, ua hooiia ae ke kiekie o Monotana, iaia e hoolohe aku la i na olelo hoahewa e hailukuia mai la e Mr. Kinikala maluna on a. Auhee koke aku la ka minoaka mai kona mau papalina aku, a nohoalii iho la ka inaina ame ke kuoo maluna on a, alaila hapai ae la oia i kekahi lima iluna, a kuhikuhi aku la i kekahi o na manamanalima imua o Kinikala, me ka pane ana aku:

            "Ke huikala aku nei au ia oe e Mr. Kinikala, no kau mau olelo kailuku maluna oʻu, no ka mea ua maopopo loa iaʻu, aole nou ponoi iho ka manao e hana pela, aka mamuli o kou piha i ka inaina, ka huhu ame ka pihoihoi; aia a hoi pono mai kou noonoo maikai, ke upu aku nei au, e loaa aku ka ike ia oe, no ke koʻikoʻi o ka hewa au i hana mai ai iaʻu. a e nonoi mai hoi i kaʻu mau huikala ana aku," alaila kulou aku la o Monotana imua, me ka haalele ana iho ialoko o kela keena, a hoi mai la noloko o ka rumi hookipa, kahi a ka nui o na malihini, e noho ana me na manao pioloke, no kela nalowale honua ana o Mira, me ka pohihihi loa.

            Aia ua o Monotana ke holoholo la maloko o kela keena akea, me ka maalo ana aku imua o na malihini apau, o ka manao mae o kona hana ana pela aole ia no kekahi kumu e ai, aka no kona makemake, e lilo na malihini apau i poe hoike ma kona aoao, ke ala mai kekahi mau hoohuoi ana maluna on a, no ko lakou ike ana iaia maloko o ka rumi hookipa mahope o ka nalowale ana o Mira.

            No kekahi mau minuke kela holoholo ana o ua o Monotana, a hele aku la oia no kahi o ka puka, me he mea la, e huli hoi ana oia no ka hokele, alaila huli hoi hou mai la oia noloko o ka hale me ke komo ana aku maloko o ka rumi a Kinikala ame Ganeki e noho ana, me ko laua noke no i ka hoopaapaa.

            "O oe kekahi kanaka hoopunipuni ino loa," i lohe aku ai o Monotana, i ke kamailio ana ae o Mr. Kinikala ia Uilama Ganeki. "Ua ohumuhumu maoli no oe me ko kaikamahine ame keia kanaka me Monotana e holo mahuka o Mira mai iaʻu aku, no ia hana nae au i lawelawe aku ai, aole loa oe e pakele ana, a i ole e pomaikai paha, no ka mea e kauoha aku ana au i na hale banako apau aole e ukuia mai ia oe i hookahi keneka, o kau mau kikoo dala e waiho aku ai imua o kela mau banako."

            Akaaka aku la o Mr. Ganeki o kela mau olelo kaena a Mr. Kinikala alaila pane aku la:

            "Mai hoopilikia i kou noonoo e Mr. Kinikala e pili ana i na bila kikoo o na banako, ua pau mua kela mau mea i ka hooponoponoia e aʻu. No ka hiki ole no iaʻu ke hilinai ia oe, a hui pu iho me koʻu hoohuoi, e ae mai ana oe, ua hoouna mua aku nei au i na bila kikoo i na hale banako, a ua hoihoiia ae na dala apau ma koʻu inoa, No na mea e pili ana i na mahele iloko o na hui hoopukapuka, ua pau loa lakou i ka hoololiia ma kuu inoa; o kaʻu nonoi wale no ia oe. o ia kou hoike okoa ana mai i ka mea oiaio loa, o oe ponoi no ka mea nana i hoomahuka aku ia Mira, i wahi e hookoia ai kou manao imihala maluna oʻu"

            Hiki hou ole iho la ia Mr. Kinikala ke uumi i kona inaina, mamuli o na olelo a Ganeki o ke kamailio ana aku iaia, nolaila Mr. Ganeki, mamua nae o ka pa ana aku o kela kanaka iaia, ua paa mua mai la kana puupuu i ka hopuia, e na lima wikani o Monotana, a hukiia aku la ia a kaawale, e hiki hou ole ai iaia ke hoopilikia aku ia Ganeki, me ke kamailio ana aku o ua o Monotana.

            "Auhea oiua e na keonimana, ua hopopop mua no au, e hoea mai ana i ko olua manwa e lawelawe lima maoli ai, no ia kumu i huli hoi hou mai nei au, no ka uwao ana. Ua poina anei oe e Mr. Kinikala, no kau mau malihini e kakali mai la ia oe maloko o ka rumi hookipa, a ke hoopau manawa wale nei no oe ma keia wahi, me ka hoolimalima ole i na makaikiu, a i ole kauoha aku i na wauwa e huli i kau wahine."

            "Eia hou no oe-" wahi a Mr. Kinikala me ka hiki hou ole nae iaia ke pane mai. oiai na maka hulili o Monotana e haka pono aku ana iaia. ka mea nana i hookau aku i ka lia maeele o ka makaʻu maluna on a, a o ia ka Monotana o ka pane ana aku:

            "Ua lawa kou kamailio ana mai i na olelo hoohaahaa iaʻu no hookahi manawa e Mr. Kinikala, ke kakali aku nei au o kou mihi mai no ia mea au i hana mai ai iaʻu. Ina aole oe e mihi mai ana ma ka la apopo. e ike no oe, ua hiki loa iaʻu ke hoohilahila ia oe imua o ke akea," alaila  huli ae la oia imua o Mr. Ganeki a i aku la: "He mea hiki anei kekahi iaʻu e hana aku nou?"

            "E noi aku ana au i kou oluolu, in a e ae mai ana oe e hele pu me aʻu noloko o ka rumi o kaʻu kaikamahine, no ka mea aole e hiki iaʻu ke hilinai i na olelo a Mr. Kinikala e kamailio mai nei."

            "Ua like pu no koʻu hilinai ole no na mea apau ana o ke kamailio ana mai nei, aole loa he wahi kanalua iki iloko oʻu, aia no kau kaikamahine maloko o kona rumi kahi i noho ai, a e loaa aku ana no oia ia kaua," wahi a Monotana, me kona ukali ana aku mahope o Uilama Ganeki, noloko o ke keena hookipa.

            Aia na ninau lehulehu, mai na malihini mai, ke waihoia mai la imua on a, aole nae he wahi mea a hoolohe aku o Monotana ia mau ninau, a i ole nana aku paha i kekahi o lakou, aka ke ukali la no oia mahope o Mr. Ganeki, me ko laua pii ana aku no ka hale maluna, aia hoi na malihini ke hahai mai la mahope o laua iloko o na manao pihoihoi.

            I ka hoea ana aku o na mea apau no ka puka o ka rumi o Mira, kikeke aku la o Mr. Ganeki mawaho o ka puka, aohe nae he pane mai o kekahi mea maloko. Kikeke hou aku la oia no ka elua o ka manawa, aole no he pane leo mai o kekahi mea, a i ole weheia mai paha ka puka, no kela kumu, i wehe okoa aku ai oia i ka puka, a e anehe aku ana oia e komo iloko, aia hoi, oili mai la ke kaikamahine lawelawe a Mira, a akeʻakeʻa mai la iaia, a o ia ka Mr. Ganeki o ka pane ana aku:

            "Eia ihea o Mira kuu kaikamahine?"

            "Eia no oia maloko nei o kona rumi," wahi a ke kaikamahine lawelawe, a i ka lohe ana aku o ka lehulehu i kela pane, akahi no a hoomamaia mai ko lakou noonoo pihoihoi, a mai huli hoi hou aku paha lakou noloko o ke keena hookipa, in a aole o Rolana Kinikala, i komo koke aku iloko o ka rumi, a paa aku la ma kekahi lima o ke kaikamahine lawelawe, me ka hoopuka ana aku i na olelo ikaika:

            "He keu oe a ke kaikamahine hoopunipuni! Maloko mua iho nei au o keia rumi, aole nae oʻu ike i kuu wahine!"

            "Eia i hea ke ki e hemo ai ka puka o keia rumi?" i kamailio ae ai o Rolana Kinikala, aole nae he mea i pane ae no kana mua, a ua paa ka puka i kiia.

            Ua komo aku la ka nui o na malihini i loko o kela rumi, aia hoi he rumi hou aku maloko o kela rumi, ninau me kona hopu okoa ana aku i ka lima, o ke kaikamahine lawelawe, a kamailio aku la me na olelo o ke kanaka i piha i ka huhu:

            "E wehe koke oe i keia puka a hemo!"

            "Aole e hiki iaʻu ke wehe i ka puka, no ka mea aole aʻu ki; a ua lakaia ka puka maloko mai. E kuhihewa ana au la o oe pu kekahi me kuu haku maloko o ka rumi!"

            "Iloko iʻo au o keia rumi, aole nae kuu wahine maloko olaila."

            "Maloko mau no kuu haku o kona rumi, a ua loaa mai no oia ia oe, i kou komo ana mai. Aole oia i hemo hou mai nei iwaho, mai kela manawa mai ana o ke komo ana aku iloko, a o koʻu manao maoli, o oe pu no kekahi me ia iloko o ka rumi, pela au i akeʻakeʻa aku nei ia Mr. Ganeki, aole e komo iloko."

            "Pehea i maopopo ai ia oe, ua lakaia mai ka puka maloko? Iaʻu i haalele iho nei i keia rumi, aole i kiia ka puka, a ke ike nei au ua paa i ke kiia."

            "No koʻu manao, aia no oe me kau wahine, pela au i hoomaopopo ai, ua kiia mai ka puka maloko."

            Hoao hou aku la o rolana Kinikala e wehe i ka puka, aole no he hemo, me kona noke ana aku i ke kuʻikuʻi i ka paia, aole wahi mea a loheia aku kekahi leo pane maloko mai.

            No kela hemo ole o ke panipuka, kamailio okoa ae la kekahi o na malihini, o ke alahele maalahi wale no e hana ai, o ia ke kii ana i kekahi kanaka hana ki, a nana e hele mai e hoao i kana mau ki, malia o hemo kela puka.

            He manao maikai iʻo kela, aka iloko nae o ia manawa hookahi, i hawanawana aku ai o Monotana ia Uilama Ganeki i keia mau olelo:

            "Malia paha, o Mr. Kinikala ponoi no ka mea nana i ki i ka puka o keia rumi, iaia i hemo mai ai iwaho, me ka hookomo ana i ke ki iloko o ka pakeke o kona kuka, a no ka nui loa o kona manao pihoihoi, pela oia i poina ai i ka mea i hanaia eia."

            Mamuli o kela mau olelo a Monotana o ke kamailio ana aku, me ka lohe ole ia mai nae e kekahi mea, koe wale no o Mr. Ganeki, ia wa i pane okoa aku ai o Mr. Ganeki i ka i ana aku:

            "Malia paha aia no ke ki o kena puka, iloko o ko pakeke e Mr. Kinikala e nana iho ana oe?"

            Ua hookahahaia aku ka manao o na mea apau no keia ninau a Mr. Ganeki, a o Mr. Kinikala nae ka mea oi loa aku o ke kahaha me ka hoonaukiuki pu, no kela hoonaukiuki, aole e hiki iaia ke pane mai, aka hookomo iho la oia i kona lima maloko o kekahi pakeke o kona kuka, ana no i ike mua ai aole he ki iloko olaila, aole no ka huli ana i ua ki nei, aka no ka hooko ana aku i ke kauoha, ka mea hiki ole iaia ke pale ae, oiai na maka hulili o Monotana e haka pono mai ana maluna ona.

            Ma kela manawa o ka hookomo ana iho o Mr. Kinikala i kona lima akau maloko o ka pakeke o kona kuka, pahola ae la ka nanaina kaumaha ma kona helehelena, me ka maopopo loa i na malihini apau, aia iʻo ke ki maloko o ka pakeke o ke kuka, a oiai na mea apau e kakali aku ana o kona unuhi hou ae i kona lima iwaho, aia hoi, wehe ae la ua o Mr. Kinikala, i kekahi ki, me ka paa ana iloko o kona lima.

 

MOKUNA XV.

            No kekahi mau sekona, mahope iho o kela paa ana ae o Mr. Kinikala i ke ki iloko o kona lima, aole e hiki i kekahi mea ke pane mai, aole no hoi he leo i puai ae mai ia Mr. Kinikala mai, o ka meha ame ke anoano ke halii la maloko o ka rumi.

            Aia iloko o kela ame keia mea i hoea aku mamua o ka puka, o ka rumi moe o Mira, na manao hopohopo no ko lakou halawai mai me kekahi hion ku i ka menemene ame ka manaonao, nolaila i ka manawa ikeia ae ai aia he ki iloko o ka pakeke o ke kuka o Mr. Kinikala, ua hooiaio loa ia mai la kela manao hopohopo o lakou, koe wale no ke kakali aku, o ko lakou ike me na maka maoli, i ka hopena o ka mea a lakou i hoohuoi mua ai.

            Aole he maopopo iki ia Mr. Kinikala kana mea e hana ai, mahope iho o ka loaa ana o kela ki, a iaia i kamailio mai ai, ua loli ae kona leo, mai kela leo mai o ke kanaka noonoo maikai, i ka pane ana mai:

            "Oiai o ke Akua o ka lani koʻu hoike, ke kamailio aku nei au i ka mea oiaio loa, aole i maopopo mua iaʻu, aia maloko nei o ka pakeke o kuu kuka, ke ki o keia puka. He oiaio maloko au o keia rumi i na minuke ae nei i hala, a iaʻu hemo mai ai iwaho nei, aole au i pani i ka puka, a e kau ana no ke ki i ka puka: o ke ano nae i hoea mai ai malalo o koʻu malu, o kekahi ia o na mea pohipohi loa i kuu noonoo."

            "E wehe koke aku i ka puka!" i pane mai ai kekahi leo maiwaena ae o na malihini.

            "Ae. e wehe koke aku i ka puka i keia manawa!" i olowalu like mai ai na leo maiwaena mai o kela puulu kanaka.

            "Mamua o kuu wehe ana i keia puka, ke makemake nei au e hoomaopopo mai oukou-" i kamailio hou ae ai o Kinikala, me ke kahamahaia ana mai nae o kana mau mea i manao ai e hoakaka mai, i kau a mea o ka hele o na malihini a piha me ke pihoihoi, me ka hookikina ana mai iaia e wehe aku i ka puka.

 

(Aole i pau.)

 

HE MOOLELO KAMAHAO

No Ko

Geofere Lanakila Ana

A I OLE

KE KEIKI MAKUA OLE I PALUA KA HANA

EPAIA.

 

            "Ina ua lilo ke kulike loa o kona helehelena me koʻu i mea hoopilikia aku i kou noonoo, auhea oe, ke nonoi aku nei au i kau huikala ana mai, a e noi pu aku ana ia oe mai lilo kou kuhihewa i mea hoopilikia aku i kou noonoo, e hoopoina loa aku oe ia mea mai nei manawa aku, no ka mea he mea mau no ia i na mea apau, aole ia oe wale no, o ke kuhihewa. Ia maua maloko o ke kula ua kahea mau ia mai maua ma ko maua mau inoa pololei, a maloko no o ia kula, no ka like loa o ko maua mau helehelena ua kapaia mai maua na kanaka opio mahoe pohihihi."

            I na manawa apau a ke kanaka opio e noke mai ana i ke kamailio iluna wale no o na maka o Gelade kona mau maka e haka pono mai ana, a ke hana pu la no hoi ia manawa kekahi manao makemake iloko on a. Nawai no la hoi e nele ke koiikoi, no ka mea, iaia e nana mai ana pali ke kua mahina ke alo. i ke ku aku a ka wahine ui, me he mahina piha la o Mahealani.

            Ia Gelade i kamailio ae ai no Geofere ke ike mai la o Mepelasona i ka pii ae la o ka ula ma na papalina o ka wahine opio. a no ia mau hiohiona o ke kaikamahine ana e ike maopopo mai ana i loaa iho ai ka noonoo iaia o geofere ka, "ka eha a ka manao."

            "He mau hoahanau laua, aka nae, aole paha he mau hoa hanau o ka papa mua, a ua aloha keia kikamahine i kela keiki. a pela hoi me kela keiki i nei kaikamahine, aka nae, aole o ko laua pili ana kekahi i kekahi he mea ia e nele ai koʻu hoao i koʻu laki. Aole au i uku iki aku i kela manao huahuwa oʻu no kela keiki, o keia ka manawa aʻu e uku aku ai iaia, "wahi a Everete iaia iho.

            Aohe o gelade i ike mai i nei mau hana a ke kanaka opio e hoolala ana ia manawa e lilo ai kona hauoli ame ko Geofere o ia mua aku i mea hoopuhiliia, nana wale mai la no oia i na maka o ke kanaka opio me ka helehelena minoaka a i mai la:

            "He mea oiaio, ua like ko olua mau helehelena ma ka hapanui, aka nae, ma ko olua mau leo ka like ole. Ua ike koke no au i koʻu kuhihewa i ko manawa i huli mai ai a kamailio mai iaʻu, ua kuhihewa au, a me he mea la, pela koʻu manao, ua lilo no koʻu kikaho o ke kamailio ana aku ia oe ia manawa i mea hoohikilele aku i kou noonoo," wahi ana i hooki iho ai, me ka mau o ka ula ma kona mau papalina iaia i hoomanao iho ai i kona hele ana aku a kau iho la i kona lima maluna o ka lima o Mepelasona ma ke ano mahaoi.

            "O, aole oe i mahaoi, mai kaumaha kou manao no ia mea, aole ia oe wale no ia mea o ke kuhihewa, ua hoakaka mai nei hoi oe i ke kumu o kou hana ana pela mamuli o kou ike mai ua kulike kou mau ano apau me ko gerofere, a in a ua manao oe he hana hewa loa ia au i hana ai, ea. ke kala aku nei au ia oe; e ole nae ia hele ana mai au imua oʻu loaa ana ka hauoli iaʻu o ka halawai ana me oe i keia la," wahi a Mepelasona.

            Ia Everete Mepelasona e kamilio mai ana ia Gelade ua hoike mai oia i kona ano keonimana miomio no hoi kana mau olelo e ku ai no i ka mahaloia aku, no ia mau ano maikai on a i punihei loa iho ai o Gelade he kanaka opio maikai maoli oia a aohe pilikia iki e hanaia mai ana iaia mai ke kanaka opio mai ma ke ano he hoaloha.

            Eia nae, ke mau la no kekahi manao iloko on a aohe no he kupono iki o kona launa ana me ke kanaka opio i maopopo ole kona mau ano apau iaia. no ia kumu i makaala loa ai oia i kana mau mea apau e kamailio aku ai.

            "He hauoli mau au i ka halawai me na hoaloha o Geofere." i pane aku ai o Gelade, me ka helehelena hoihoi, in a paha i maopopo mua iaia na aoao apau o ke kanaka opio in a ua huli koke aku oia a hele me ka hoomau ole aku i ke kamailio me ia, no ka mea, aia mau iloko o ka naau o ke kanaka opio ia wa ka inaina ame ka hoomauhala e hoonaku mau mai ana, oiai he makemake mau ke kanaka opio e loaa he manawa maikai hou nona ame Geofere e lawelawe lima ai.

            Ia Gelade e nana aku ana ma na maka o Everete Mepelasona, he maikai wale no oia mawaho e hiki ole ai iaia ke hoohuoi iho aia kekahi manao hoomaau iloko o ia la e hoopue mai la. o ka hinuhinu mawaho wale no kana e ike aku ana, a ia Everete e makaukau ana e pane mai i kekahi mau olelo maikai kupono ua huli koke ae la o Gelade a huki aku la ia Ade Lorina a pili ma kona aoao, me ka i pu ana aku:

            "E ae mai oe e hoolauna aku au i kuu hoaloha nei, Miss Lorina ia oe; o Mr. Mepelasona keia, a o Miss Lorina keia," a haawi ae la na opio i ko laua mau lima no ke aloha ana me na helehelena minoaka ma ko laua mau papalina pakahi ia manawa.

            "Aole oia e nana iki mai ana iaʻu, in a i maopopo iaia kekahi mea i hanaia mawaena oʻu ame Geofere," i noonoo iho ai o Everete iloko iho on a in a no kona lohe aku ua halawai au me ke kaikuahine on a e huai pau mai ana oia i na mea apau i hanaia mawaena on a ame aʻu i ke kaikuahine.

            "Me koʻu nana ole aku nae i kana mea e hana mai ana. e hoao ana au i koʻu laki ma na ano apau, e hana ana au i ka mea maikai loa e hoohauoli ia ai koʻu me keia kaikamahine noonoo mamua o ka loaa ana aku o ka ike ia Geofere ua halawai au me ia nei; he kaikamahine ui a kupono maoli keia i koʻu manao a e hoao ana au e hoohoka aku iaia ma na ano apau i mea e kaawale loa ai oia mai keia kaikamahine mai."

            O keia ka Everete i nalu nui iho ai iloko on a me ka paa o ka manao e kaili i ko Gelade noonoo mai ka nana hou ana aku ia Geofere he ipo nana; "o keia ka manawa kupono loa e oki ai i mauu maloo oiai ka la e papa ana, wahi ana.

            No kekahi mau minuke lehulehu ko Everete hookamailio ana mai i na lede, i mea e kumau aku ai laua imua o kona alo. mamua o ko na lede kaawale ana mai iaia aku, i loaa i manawa nui nona e hookomokomo mai ai i kana mau olelo pahele i na naau o na led opio. ia Gelade no nae, ka mea ana e kaunui ana. kana mea i makemake loa ai e noho mau aku me ia, no ka mea ua loaa iaia ka mana o ka hana ana mai ma ke ano hoohoihoi a hoonanea i na noonoo o na lede opio elike me kana i koho ai, a i ka ike ana o ka lede opio Miss Ade Lorina e aneane aku ana laua e komo iloko o ka upena a ka Nananana, huki ae la oia i kana wahi uwaki pakeke i kinohinohiia me na pohaku momi, a i ae la i kona hoaloha, me ka helehelena pihoihoi:

            "Ea, e Miss Hunatere, ua olelo aku nei kaua ia mama e hoi aku ana kaua i ka hale i ka hora eha ponoi, a ua kokoke loa e pau ka hora ekolu i nei manawa, a he nui hou aku no hoi ka kaua mau halekuai e hele aku ai, aole i pau ka kaua mau mea