Ka Nupepa Kuokoa, Volume LXIII, Number 12, 20 March 1924 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

kahi i makemake i nei mea he hoohauoli a he mea pono iaia e hoololi i kona wahi e noho ai i kekahi manawa, aole o ka noho mau loa ma kahi hookahi, no ka mea ua nui kona hooikaika ana i kana mau haawina a maloko mau no hoi oia o ka halekule i ka hapanui o ka manawa," wahi a Mr. Hunatere, me ka leha ana ae o kona mau maka i kahi o ka puka komo.

            "Ina aole oia e hoea mai ana, e hoao no hoi paha oe e hoohauoli ia oe iho ma na ano apau e hiki ana ia oe, no ka mea, in a aole oe e hana aku ana i kekahi mea e hoohauoli ia aku ai na hakuhale e hoohoka loa ia aku ana ko laua mau noonoo, mahope o ko laua hooikaika ana ma na ano apau e lilo na hana o nei po i mau mea e hoohauoli nui ia ai na mea a pau."

            Aia ko Gelade mau maka maluna o kana peahi ia manawa, oiai oia e mili wale la no ia mea; o kona mau papalina ia manawa ua hele a nono ka ula, he pupuku kona lae, kona mau lehelehe ke upiki mau la, a ma kona helehelena e ikeia aku ana aia mau ka ehaeha iloko ona kahi i hana ai.

            No ka mau no o ka noonoo iloko o Gelade no Geofere alawa aku la kana nana ana i ka puka komo, a ia wa me ka leo o ka mea i piha i ke pihoihoi. hooho ae la:

            "Auwe! Aia hoi ha o Geofere la ke ku mai la! O, ke hauoli loa nei au i kona hoea ana mai la!" wahi ana, me ka leo e hoike ana i kona piha hauoli, lamalama kona helehelena ia manawa ia ike ana aku ona ia Geofere me kela helehelena kanaka u'i ona a he kulana kanaka makua no hoi kona ke nana aku i like ole me ko na manawa mamua aku, o ke komo ana mai no ia iloko o ka rumi.

            O kona eu koke ae la no ia a holo aku la me ka mama no ka hui ana me Geofere, me kona noi ole iho ia Mepelasona e hookuu aku iaia, a mamuli o ia hele koke ana aku ana i haaleleia iho ai ka makuakane ame Mepelasona ma kahi a lakou o ka noho pu ana mamua iho, na laua no e hoohauoli ia laua iho.

            I ua o Gelade i holo aku ai. nana aku la o Mepelasona mahope ona me ka aaki o na kui ame ka upiki o kona mau lehelehe. me ka hulili o na onohimaka i piha i ka inaina, elike me ko kekahi liona wahine i makaukau loa e lele mai maluna o ka mea ana e ale ai.

            Ua ike pono aku la o Mepelasona, oiai kona mau maka e nana pono aku ana i kela holo ana a Gelade, i ka hui ana ae a na opio a paa ae la ko laua mau lima, i ka manawa o ko Geofere mau maka e nana ana i kekahi wahi okoa, a i puiwa oia i ka hookomo ana aku o Gelade i kona lima malalo o kona lima, a e nana ae ana hoi iluna iaia me ka helehelena hoomahie, a hoopuka ae la i kekahi mau huaolelo, "hauoli loa iho la au i kona hiki ana mai la, ua manao iho nei au la aole oe e hiki mai ana, eia ka oe ma ke ala e hele mai nei."

            Ua ike pu aku la o Mepelasona i ka hoihoi o ko Geofere helehelena ia ike ana iho ana ia Gelade ma kona aoao, a mamuli o ka hoihoi o ko Geofere helehelena i ike iho ai o Mepelasona ua lilo mua no ka naau o k alede opio i kona hoapaonioni, aka nae, e hooikaika ana no oia ma na ano apau e lilo mai ka noonoo o ka lede opio iaia, ina e hiki ana ia mea ke hanaia.

            Ua heluhelu aku la o Mepelasona i keia mau hoailona o ke aloha mawaena o na opio me ka maopopo loa e hoohewahewa ole iho ai ua lilo mua ka uhane, ka noonoo ame ka puuwai o ka lede opio ia Geofere, elike me ia ana e heluhelu iho ai i kekahi mau lalani huapalapala i kakauia maloko o kekahi apana pepa, a ua ike pu iho la no hoi oia ua lilo k anaau o Geofere i ka lede opio me kona noonoo a pau, a ua lilo keia ike ana ona i mea nona e piha loa iho ai i ka ukiuki kohu ole.

            No ke kamailio ana mai a Mr. Hunatere i ua o Mepelasona ia manawa i pau koke ai kana nana ana ia Geofere ma, a huli ae la oia e nana i ka mea i kamailio mai ai iaia, i ka manawa hope loa ana o ka ike ana aku ia Geofere ma e kaha aku ana laua e hele iwaho mailoko aku o ka rumi, alaila huli ae la e pane ia Mr. Hunatere.

            I na minuke apau a laua e noho ana aia mau maluna o Mepelasona ko Mr. Hunatere mau maka kahi i nana pono mai ai, a ke ike maopopo loa mai la oia i ke kakau o ke aakoko ma ka lae o Mepelasona, o kana mea nae e hakilo loa mai ana, o ia ke kulike loa o ko Mepelasona nanaina me ko Geofere, a o ia kana o ka nalu nui ana iho iloko ona, malia he pili paha ko kekahi o keia mau keikikane a elua ma ke koko, akahi ka hoi ke kulike o ka nanaina o kekahi i ko kekahi, aka aohe nae he mea nana e hoakaka aku e hoopauia ae ai kona manao, aka nae, hooholo iho la oia iloko iho ona e imi mai ana oia i ka mea oiaio i kekahi manawa kupono ana e ike ana, a oia kana o ka hoohele kamailio ana mai.

            "Aohe maopopo o ko'u pili ia Geofere, oiai nae, ma ka olelo mai a kekahi mea ia'u he kulike loa ka ko'u nanaina me ko Geofere. He konela ko'u makuakane no ka oihana kaua o na mokuaina o ka Hema iloko o ka manawa o ke kaua ana o ka Akau me ka Hema, o ko'u home ai ama ka Hema, a he noho no nae makou ma kekahi mau wahi e ae a ma na aina o i kekahi manawa, o ka hapanui no nae o ka manawa maloko o kekahi o na mokuaina o ka Hema," i pane aku ai o Mepelasona.

            "A no ka Hema no anei kou makuahine?" wahi o ka Mr. Hunatere ninau.

            Nee ae la o Everete i ka akaaka no ka mea ua ike iho la oia me ka maopopo i ka manao o keia ninau a Mr. Hunatere, a pane mai la:

            "Ae; no ka Hema no oia, a pela me ko'u makuakane, he mau hoahanau laua. no ka mua o na makua ko'u makuakane, a na kona muli mai kuu makuahine, a i ka 1853 ko laua mareia ana."

            "A, iloko o ka 1853!" i hooho ae ai o Mr. Hunatere," oia no anei ko ke Konela Mepelasona mare mua ana?"

            "Ae; a he mare ana hoi ia ona me kekahi moolelo maikai ole paha au e olelo iho ai ke lohe aku oe.

            "He anakala ko laua a he kanaka waiwai loa no kekahi o na mokuaina o ka Hema, a i kona manawa i make ai ua ikeia mahope iho, ua hana oia i kana palapala kauoha e hooili ana i kona mau waiwai apau maluna o keia mau keiki hanauna ana oia kuu makuakane ame kona kaikuahine hanauna.

            "Ua mahele oia i kona waiwai a like a like mawaena o laua, a ua hoakaka pu ia maloko o kana kauoha i hana ai kona makemake, o ia hoi, e mareia no kuu makuakane me kona kaikuahine hanauna, i ole ai e malele aku ka waiwai i ka mea okoa, aka, e paa no apau loa maluna iho o laua.

            "He iwakalua makahiki o kuu makuakane a he umikumamahiku hoi makahiki o kuu makuahine ma ko laua manawa i hoohuiia ai ma ka berita laahia o ka mare a ma ka manawa hoi i make ai o ka anakala o laua.

            "Ma ka manawa i make aku ai o ka anakala ua ili koke mai la ka waiwai apau loa maluna o laua. Maloko o ka palapala kauoha i hanaia ai ina e mare mua ana kekahi o na hooilina mamua o ka piha ana o na makahiki he iwakaluakumamalima i kekahi mea okoa o ka mea e mare mua ana e nele ana oia i ka waiwai a e holo ana a pau loa maluna o ka mea i mare ole.

            "Ina o laua a elua ke hooko ole ana i ke kauoha e hoonele likeia ana laua i ka waiwai, a i ole ina e mare ole ana kekahi i kekahi mahope o ka piha ana o na makahiki i ka iwakaluakumamalima, e ili aku ana ka waiwai holookoa apau i kekahi hoahanau o ka anakala o laua, he kanaka i mare ole i ka wahine.

            "No ia kauoha paa a i mea e hookoia ai ka makemake o ka mea nana ke kauoha, ua mare kuu makuakane i kona kaikuahine hanauna, a o ko'u makuahine hoi nana mai au, nolaila ua lohe pono aku la oe i ka moolelo, he moolelo paha au e olelo iho ai i ke kupaianaha, aka nae, o ia ka mea i hanaia," wahi a Mepelasona.

            "He palapala kauoha kupauaha io no hoi ia i hanaia i ko'u noonoo iho la, aka nae, no ka makee mai no kela o ka mea nana ke kauoha, i ole ai e lilo aku ka waiwai i ka mea okoa," i pane aku ai o Mr. Hunatere.

            "O ia no hoi; aka o ka mea nana ke kauoha ke hooiliia aku na ahewa ana a pau ina he mau manao hoahewa kekahi; no keia kauoha paa e hiki ole ai i kuu mau makua ke alo ae ua hooholo iho la laua e hoohuiia laua ma ka mare ma ia ano i paa mau ai no ka waiwai i ka ohana.

            "A o oe wale no anei ka laua keiki?"

            "Ae; owau wale no. Aohe o'u mau hoahanau e ae a i ole kaikuahine hoi."

            "He mea kamahao no ia ke noonoo iho," wahi a Mr. Hunatere o ka pane ana ae, mahope o kona namunamu liilii ana iho.

            "Ke ike aku la au i kou manao, o ia hoi o kau mea i nalu iho la oia ka like loa o ko'u helehelena me ko Geofere, aole anei?"

            "Ae, oia, no ka mea, ke nana aku i kou helehelena aohe wahi paewa iki mai ko Geofere ae, koe paha ko olua mau makahiki, aka ma na ano apau, ke kiekie, ka puipui no o ke kino, ka helehelena, o ia okoa no a e ao, a nawai no la hoi auanui e nele ke kuhihewa o kekahi mea ke ike mai ia oe o Geofere oe, no ke kulike loa," wahi a Mr. Hunatere.

            "A pehea, aole no anei oe i lohe mahui iki he pili oe iaia ma ke koko?"

            "Aohe mea i maopopo iki ia'u," wahi a Everete Mepelasona.

            "A pehea, aole ka au, mea i maopopo iki nona? O oe hoi kona anakala, a ina he anakala oe nona aole paha e nele ana kou maopopo i kekahi mea no kona kuauhau, oiai he keiki hanauna hoi oia nau?"

            "Aohe oia he keiki hanauna na'u, aohe o'u koko iloko ona."

            "Auwe! A pehea ka oia i kapa mau mai ai ia oe he anakala nona?"

            "No kuu malama ana hoi iaia. Aohe a'u i maopopo nona ahiki i ka ewalu makahiki i kaahope aku nei, ka manawa a'u i lawe mai ai iaia malalo o ka'u malama ana, ma ia ano paha oia i kapa mai ai ia'u he anakala nona," i pane aku ai o Mr. Hunatere.

            "E kuhi ana ka hoi au he pilikoko no la oia nou," wahi a ka Everete pane me ke anoe ae la o kona nanaina ia manawa.

            Alaila, hoakaka aku la o Mr. Hunatere i ka mea i hanaia no Geofere ahiki i kona kaa ana mai malalo o kana malama ana, elike me ia au, e ka makamaka heluhelu, i maopopo ai ma kekahi o na mokuna i hala, a iaia e hoakaka aku ana he hoolohe wale mai no ka Everete me na noonoo like ole e hana ana iloko ona ia manawa.

            "Aohe no au mea i maopopo iki la nona mamua aku o kela manawa i kaa mai ai oia malalo o kau malama ana?" i ninau mai ai o Everete.

            "Aohe he oki loa; he opiopio loa oia i kela manawa i eha ai oia a i hoonele ia ai hoi oia i ka ike e hoomanao ae ai i kona mau makua. O na mea wale no i hiki iaia ke hoomanao ae oia o Magare, ka wahine nana oia i hanai, ame Keaka, me he mea la, o ke kane paha oia a Magare, eia nae, aohe no i ka mohala loa o kana hoomanao ana no laua. Ma kana moolelo powehiwehi o ka hoike ana mai, me he mea la o Magare kona mea nana i malama mahope iho o ka make ana aku o kona makuahine."

            I ko Everete lohe ana aku i keia mau inoa pii ae la ka ula ma kona papalina, no kona hoomanao ana ae i ka wahine kuai pua i halawai ai oia ma ke alanui, a i hoike mai ai iaia o Magare kona inoa, a o ka wahine no hoi ana o ka noke ana i ka huli, me kona manao mai iaia mai la hoi e loaa mai ai ka moolelo piha e pili ana no Geofere, eia nae, ua hoka ia manao ana ona.

            Ua ulu ae kekahi manao iloko o Everete e kamailio aku ia Mr. Hunatere no kona hele ana aku e huli ia Magare, aka, mahope o kona noonoo hou ana, kaomi wale iho la no oia ia manao iloko ona, mamuli o kona hooholo ana nana ponoi no e hele e huli ia Magare i kekahi la a ina no kona loaa aku, ia manawa oia e noke aku ai i ka ninau ma na mea apau e pili ana i ko Geofere ola ana, oiai oia e malama ana iaia.

            Ia manawa i hoomaka ai e loaa ka hoomaopopo ana ia Everete aia kekahi mea pohihihi loa e pili ana i ke kulike ana o kona helehelena me ko Geofere mamua o kekahi manawa ana i hoomaopopo ai mamua aku, a ina he meahuna ano nui kekahi e pili ana me keia like ana o laua o kona manao e noii aku ahiki i ka huaiia ana ae o na mea pohihihi apau, i mea e maopopo ai ka moolelo piha o kona hoapaonioni ma ia mua aku, ina no kona makemake loa e lilo mai ke kaikamahine a Mr. Hunatere i wahine nana.

            O kona manaoio maoli no ia ina no ka maopopo nei iaia he moolelo pupuka ko Geofere ma kona hanau ana, e lilo ana ia i poka nana e pehi aku ia Geofere, a e lilo ai hoi i mea nana e hoikeike aku ai ia Gelade e hoopau loa ae ai o Gelade i kona noonoo hou ana aku no Geofere, a e haawi mai ai oia i kona hilinai ana maluna ona.

            He manawa pokole ma ia hope iho, i ka manawa a ua o Everete i hele aku ai e huli ia Gelade, a ike aku la e holoholo mai ana oia iuka a i kai maloko o ka rumi nui, a e kalele ana maluna o ka lima o Geofere, a e u noke ana no hoi i ke kamailio me na helehelena hoihoi, a ike aku la no hoi i ka lamaimua o ko laua mau helehelena me ka piha i ka hauoli, mau iho la kona mau kui me ka uwi ana, elike me ka uwi ana o na niho o kekahi holoholona i piha loa i ka huhu, ia manawa hoohiki paa iho la oia iloko ona e hoao ana oia ma na ano apau e hiki ana iaia, e hoolilo i ka launa a hilinai ana o na opio kekahi i kekahi me ke aloha nui, a e wawahi hoi i ka noho maluhia ana mawaena o laua i mea ole, mamua o ka hala ana o ka umikumamalua mahina.

            Ku iho la oia mahope o kekahi uhi weleweka nui e lewalewa ana, kahi e hiki ai iaia ke ike aku ia Geofere ma a e ike ole ia mai ai hoi oia, a hoomaka aku la kana nana ana me ka uwi o na kui, a iaia e ku la, aneane loa oia e lilo i kanaka opio hehena, no ka ike aku i ka hoohehelo mai o kona hoapaonioni me ka ipo ana e kuko nui ana.

(Aole i pau.)

 

ALOHA PAUOA I KA LIKOLEHUA, KA IINI PAU OLE A KA MAKEMAKE, O SAMUEL KAAUMOANA KALAMA.

            Mr. Lunahooponopono, Aloha oe: - E ae oluolu mai oe ia'u kekahi itamu kaawale o ka Nupepa Kuokoa.

            Owau o Kealohapauole Apuakehau o Laie ke kaikuahine ohana o Sam Kaaumoana Kalama, mai na makua mai. I ka nunui like ana ae malalo o na kahuhanai; ua hoi makou a noho pu.

            No ka makani kaili aloha o Kipahulu mai makou, a noho a kupa i ka Likolehua o Pauoa; a mare wa hine, a mare kane a hanau mai na laua ae, he 19, make 12 koe 7, hanau no hoi ka'u he 15 make 11 koe 4, a ua nui like no ka maua mau moopuna o ola nei, no Pauoa like no ka maua wahine, a kane ma Pauoa no i mareia ai makou mamua loa laua, mahope mai hoi au.

            Feb. 2 au i pii aku ai no Honolulu no ke kii ana aku ia moopuna a'u a hoi mai no ia la, hui halawai pu iho la me Mr. Aki, ke kaikunane ponoi keia o Mrs. Kanoe Sam Kaaumoana Kalama, nana i hai mai ia'u, ua make o kunane Kaaumoana, ua kelekalapaia mai nei, ua hoopuiwaia ae la, a oiai o nanea ana i ka holo a ka otomobile, he minuke ka hoi keia a ka luuluu. Ua uwe haole ae la, oiai ko makou kaa i hele a piha pono.

            Ma ka Nupepa Hoku i ike iho ai maua ua kahaia ma Hilo, i kekahi pule mai e hoike ana ka nupepa, ke pii ae la ka maikai, a mahope koke mai no ka lono kaumaha.

            Aole au i pii hou aku e ike ia oe e kunane ame kuu kaikuaana hoi. O ke kumu o ka Poakahi ae hele na moopuna nunui i ke kula, a koe na moopuna liilii, a he bebe loa kekahi, aohe na makua aia lakou i Honolulu o ka hanai ka kupuna a nunui, o ka hanau mai ka lakou ua hele na moopuna ma ke kua ma ke alo, aole he mea kokua, aia he Poaono a Sabati, kaa aku la i na moopuna nunui pela au i pii aku ai.

            Ua uwe wale ae la no i ka makani a hoomanao mau ae la ia Pauoa, kahi o ka noho ana, a nunui a kupa a kamaaina i ke alo.

            He awawa o Pauoa i muia i na po kula himeni Kula Sabati, halawai ahiahi Sabati, i kela ame keia mahina, John Naone, Raika Poku, o Sam Kaaumoana Kalama no ko lakou poo alakai ma ia mau hana, he lala Kula Sabati no Kaumakapili, he piha kamalii maoli no o Pauoa mai mua loa mai no.

            Mamuli o ko laua hoi ana i Hilo, pau loa iho la ka noonoo ana no Pauoa, aole paha ka Liko Lehua, kahi wai mapuna o Kawaiki i Kupanihi, kela wahi awawa i puia i ka nahele lipo awapuhi, pala apii o Kilohana, e nana la i ka pehia a ka ua liilii ia Manoa, a o oe e kunane, ua hele oe a lilo maoli no he kupa a kamaaina ia kanahele paoa i ke ala Liko Lehua.

            Ke hoohuli ae hoi au i ko'u noonoo ana ma kekahi mahele ano nui, ua hoomama loa ia ko'u noonoo ana nou e kunane, nani hoi ia, ua hele aku la oe ilaila; Petero 3:19.

            Ma keia pauku i hoike ae ai o Iesu, he wahi ia o na uhane e noho hoomaluia la. He wahi paahao ia wahi, ma kekahi mahele. He wahi (hoomalu ia) o na uhane apau. Ilaila o Iesu i a'o aku ai i na uhane, Petero 4:6. Nolaila, o hai hou ia ka olelo maikai o ia hoi (Euanelio) i ka poe make. Ke hai nui ia la ka Ekalesia o Kristo i na uhane wahi a Iesu, aole paha au e hewa ke hoike ae penei:

            O Sam Kalama, ua komo oia i ka ekalesia o Iesu Kristo o ka poe Hoaono o na la Hope Nei, o kekahi no ia o ka laua keikikane i mare i ke kaikamahine a J.W.H. Makahanohano o Laie. (Ma keia mahele hou) o ia keia halelaa e ku nei, ua hiki kana keiki ke hooko aku i keia olelo kauoha ma ka Baibala.

            Ke hoomau nei no o Paulo ma kana hoike oiaio ana penei: A i ole loa e ala mai ka poe make, pehea la e hana ai ka poe i bapetizoia ai no ka poe i make? O kana keiki ponoi o Sam Kalama ka mea nana o hooko i keia kauoha, a nolaila, e kuu kaikuaana Mrs. Kanoe Kalama, aloha no kaua, a hoomaha iluna o ka kakou mau hana pono, ke malama kakou i kana kauoha.

            Ua nui ke aloha o ko Hilo poe no olua. Ua puka hou mai nei ma ka Hoku o Hawaii, ka na makuahine hoalohaloha ma ou la ia Samuel K. Kalama, oiai, ua hoohoaloha aku olua ma na hana pono pu me lakou iloko o ka berita mau loa. Aloha no kaua.

            E hui mau aku ana no kaua ma keia ola ana; ua hoohanau aku kaua a nui na keiki, a nui pu na moouna, aole he mea hou aku mao;

 

HE AHAMELE NUI.

            Elike me ia i hoolala ia ai, a ua manaoia e holopono loa ana ia.

            Ma ke ahiahi Poaono la 22 o Maraki, 1924 hora 7:30 p.m., e wehe ae ana ka Ahahui C. E., makua o Waianao he ahamele nui iloko no o ia kihapai.

            He nui na mea maikai i hoomakaukauia no na rana oia po, e laa me na mele nani loa, na meakani like ole o keia au holomua e noe nei.

            E loheia ana na mele Hawaii oiaio maoli, ame na leo ano (pep) o keia au hou, o ia hoi ka (Jazz.

            Ua oluolu i ka Meia ame ka Papa Lunakiai ka ae ana mai i ka Hawaiian Band Glee Club, a na lakou e hoolako aku i keia mau nani i hoikeia ae la.

            O na Mrs. Julia K. Chilton ame Mrs. L. Alohikea ana kekahi, a mai ia laua mai e loheia ai kekahi mau mele kaili puuwai.

            O Jack P. Heleluhe, a i ole o Prince Heleluhe i ike nui ia ma na aina haole, oia nei kekahi e hoike aku ana i kana mau talena, he loea ma na leo mele, elike me ia ano ana i kaahele ai i na aina mamao, puni o Amerika Huipuia iaia.

            He po mahina lailai ana keia, a e na makamaka ame na hoaloha, e lualai mai la i ke aheahe a ka makani kaulana o ia aina, ka makani ke Kaiaulu, i ka nape olulau niu o Pokai, a hala loa aku i ka uka uluwehe o Lualualei, hele mai apau, koe ole kekahi, i lohe pono, a ike kumaka, he ole hoi ka lohe pepeiao mai ia hai.

            He pomaikai nui keia i haliia aku imua o ke alo, hoolohe pono ana, lena ana, a i ku no hoi i ka i i he haaloulou kolaila, a i ano maloo haha no hoi, alaila no Malokai no hoi ia, ma kela huli o Kepuhi.

            Ua lawa kela mau hooaiai ana, me ka lana o ka manao, aole no na mea nani wale no e paholaia aku ana imua o oukou i kela po, aka no ka oukou kokua aloha no ko ke Akua aupuni.

            Me ke aloha haahaa,

GEORGE MALUNA,

 

o ka malama i ke kauoha ka mea nui i koe ke hoomau loa aku, ahiki i ka hopena amene.

            Ke haupu ae no kunane, ala pu mai la me ko maua uhane, ame na makua i hala mua aku ma ia alanui hookahi. E hiki hou mai ana ka la o ka hauoli, ke loaa ka uku no ka pono ke pau ka hookolokoloia ana, ka pono, ka hewa o na lealea he pau wale, o ka oiaio he mau loa ia ma keia ao, ua moku iho la ka berita mare, aole mao aku.

            Pela no hoi au i mareia ai no keia ola ana wale no, a iloko o ka halelaa, he mea i hana ole ia e na ekalesia, aole no ke Akua e kue, i na hoomana apau e hoi ana na ekalesia apau i hookahi Haku, i hookahi manaoio i hookahi bapetizo.

            Nolaila, o hauoli ana ka honua a lokahi elike me na holoholona ko lakou kuikahi like ana, Isaia 11:6-9.

            Ke pule nei au i ke Akua, e hoopomaikaiia na la o ko kaua ola ana, a e hoomama mai i na manao u o keia honua, e uhai pu ia me na pomaikai kino a uhane, a ke lokahi pu nei ko'u manao, me ia no e ka wahine kane make.

            I ko'u hoohuli hope ana ae a nana aku, i ka oluolu pauaho ole o ka Lunahooponopono i na hoounauna mai na kihi mai o ka aina, a i na luina noeau o kona papapa'i pu, ua like no ia me ka moana kai akea, i haliiliiia a laumania, pela k alike o ka puuwai i hoomohalaia mai i ka lahui.

            MRS. KEALOHA APUAKEHAU, Kahuku.

 

HAINA NANE.

            Mr. Solomon Hanohano, Aloha kaua: - E oluolu mai kou ahonui e hookomo iho ma kekahi wahi kaawale o ka kaua hiwahiwa, ke Kuokoa, no ka haina o ka nane a J.K. Kahuku, i kukulu mai ai, o ia hoi keia:

            He nane: - Kuu manu ekolu ekekeu, he mau umiumi kona mai kona mau ekekeu aku, aole kona panoo, aole pu kona apahu, aole loa no kona apahu, aole no kona mau wawae. Ua loaa no kona ola i kona mau umiumi aku, a owai la kuu manu, nona ka makana; 25 poo, 2 ope wahi 2 buke laina ole, me 1 penikala.

            Nolaila, ka ninau: Owai kuu manu? O ka Haina no keia, he Waa. Canoe, wahi a ka haole.

            Penei: Na ekekeu o ua manu la, o ia no na iako, elua, ame ke ama, o ia iho la no na ekekeu ekolu.

            Na umiumi o ua manm la, o ia no na kaula hauhoa, a i ole na kaula lanalana ma kahi olelo ana ae.

            O ka mea no ia e ola ai keia manu ina aole keia mau kaula lanalana, a o ua umiumi la no ia, a o ke kumu no ia i kapaia ai ka waa he manu, no na laau manu omua ame hope.

            Ke manaolana nei au, ua hei aku la kahi manu a J.K. Kahuku i ka upena kuu a Kaukini.

            Me ka haahaa,

            L.K. LUAIKAI,

            Paniwai o Helani, Kaupo, Maui.

 

            O ka puapua o ka manu ka i puehu mai la, pakele aku la no ka manu a ke keiki o Kahuku, ho ala iki ko kahuna. Pau pu mai la olua o ka Uiokalaokekomohana i ke poholo i ka lua hookahi, oiai o ka olua haina like ai. Huli hou ia mai! - L.H.

 

HAINA NANE.

            E Mr. Sonomon Hanohano; Aloha kaua a nui loa: - E oluolu oe e haawi mai i kekahi rumi kaawale o ka kaua hiwahiwa, ka Nupepa Kuokoa, no keia mau anoai, nana o uwila aku ma na paemoku o Hawaii nei.

            E pane aku ana i ka haina nane a J.K. Kahuku, penei no ia:

            Kuu Manu he ekolu ona ekekeu, he umiumi kona mai kona ekekeu aku, aole ona panoo, aole apahu, aole loa kona wawae.

            Haina he Lupe. Eia no ka'u wehewehe ana. O ka lupe e hooleleia ai e kamalii penei, e hana ai, hana oe i ka pepa a ekolu kihi mai keia mau kihi ekolu oe, e hoopaa mai ai i ka lopi alaila hoopaa keia lopi i hookahi lopi, alaila hoolele, aia nae a he la makani.

            Ina e moku ka lopi, alaila e make ana kela lupe.

            O ka umiumi, o ia no ka lopi @ hoopaaia i na kihi.

            Me keia mau wahi mamalaolelo, ua hiu a wela ke kaikamahine o ka Waiakea House Lot.

            Ua lawa kaua maanei. Me ka Lunahooponopono ko'u anoai, me na keiki oniuhua kepau ko'u mahalo.

            KA UA KANILEHUA GIRL,

            Hinano Road, Hilo.

 

            Hihia mai la ke kakaiapola o ka lupe i ka lala kiawe, ke hene haa lo'ulo'u mai la ka aka a kahi manu kolohe a olua, ua wehe aku o Uwahi a noho i ka nahele. Hiki hou ia mai a kanono! - L.H.

 

David P. Keawehaku

HE AGENA HOOKO MARE

            Ua hiki ia'u ke mare i ka poe apau e makemake ana e mareia.

743 KOULA LANE,

Honolulu, Oahu, T.H., Mar. 12. 1924

6599 - Mar. 13, 20, 27; Apr. 3, 10, 17, 24: Mei 1.

 

HOOLAHA LULU MANAWALEA.

            Ke hoikeia aku nei ka lohe i na lala apau o ka Ahahui Kokua a Hookuonoono o na Wahine Oiwi Hawaii, e lulu koke mai i ka manawa lea no ko kakou mau hoahanau i haalele mai i keia ola ana oia o Abigail Kaleikoa ame Kalanimauloa Johnson.

            MRS. WAHINEMAIKAI KALEO

            Kakauolelo Ahahui Kokua a Hookuonoono o na Wahine Oiwi Hawaii. 6598 - Mar. 6. 13. 20. 27.

 

OPEN A CHARGE ACCOUNT AT The Model Clothiers FORT ST.

 

HOOLAHA I KA POE PAA AIE.

            Ma keia ke haawi aku nei ka mea nona ka inoa malalo iho nei, i hookohuia i Kahu no ka poe paa aie ame ka poe paa mahele o ka HONOLULU BREWING AND MALTING COMPANY, LIMITED. he hui Hawaii i hoohuiia. i hoopauia ma ke kauoha a ka Puuku o ke Teritore o Hawaii, i hanaia ma ka la 21 o Feberuari, 1924., i ka hoolaha i ka poe paa aie apau o ka hui i oleloia, e waiho mai i ka lakou mau koi iaia, ke Kahu i oleloia, ma kona wahi lawelawe oihana, 916-26 Alanui Papu, Honolulu, iloko o 90 la mai ka la aku o ka hoopuka mua ia ana o keia, o hoole mau loa ia aku no ia mau koi.

            Honolulu, Feberuari 22, 1924.

TRENT TRUST COMPANY, LIMITED, Kahu no ka Poe Paa Aie ame ka Poe Paa Mahele o ka HONOLULU BREWING AND MALTING COMPANY. LIMITED.

WATSON & LYMER, na Loio no ko Kahu i oleloia, 517 Hale Kauikeolani, Honolulu.

6597 - Feb. 28; Mar. 6, 13, 20, 27.

 

E Hookaawale i Kekahi Hapa o Kou Ukuhana

ma o ka hoahu ana maloko o ka Banako i loaa ai ka hauoli i kou ohana.

 

O ka hoomakaulii, o ia ka mole o ka nohona ulakolako ana

 

Ua makaukau mau makou e lawe mai i kau mau hoahu liilii.

 

CHINESE-AMERICAN BANK

Kihi o na Alanui Moi ame Nuuanu. Pahu Leka 2000

Honolulu, T.H. Kelepona 6119

 

KA MAKEKE BIPI

METROPOLITAN MEAT CO.

Ka Home o na Io Bipi Momona no ke Kumukuai Haahaa Loa

Na Io Kamano Momona i Loaa Ole Ma Kekahi Mau Makeke e Ae.

Ka Waiubata Maile He 60c Wale no o ka paona.

E Hele Mai e ike ia makou. Mai Hoohilahila

Metropolitan Meat Market

Ma ka aoao Waikiki o ke kihi o na Alanui Bekela ame Moi