Ka Nupepa Kuokoa, Volume LXIII, Number 13, 27 March 1924 — Page 2
| This text was transcribed by: | Kamehameha Schools Gift To Dr. Chun |
| This work is dedicated to: | Dr. Michael J. Chun |
Ka Nupepa Kuokoa
KE KILOHANA POOKELA NO KA LAHUI HAWAII.
HAKAKA ME KEKAHI ULUA NUI MAWAHO AE NEI O WAIKIKI
Ma ka Poalima o ka pule i hala, @@ni i hele aku ai o Hose Demakosa ame William Kalama, i ka lawai'a mawaho ae nei o Waikiki, mawaho pono ae o ka Papu De Russy, i ike akuai laua i kekahi kumu ulua nui hewahewa, i ko laua wa i lele aku ai iloko o ke kai me ka laua mau o, ua ike like aku laua i kekahi lua e pohai ia ana e ka ulua, ua manao mau laua he mano nui e uhai ana i na i'a, eia ka he ulua nui.
Ma ko laua manawa o ka luu ana aku no ke o ana, i holo mai ai ua @lua nei a kokoke loa no 6 kapuai ka mamao, o ka manawa no ia o Hose Demakosa i pahu aku ai i kana o me ka noke okoa ana ae o kela ulua i ke kupaka me ke aumeume ana me ia i'a no kekahi mau minuke ahiki i kona ahai okoa ana aku i ke o no kanalima ia ka mamao mai kona wahi i ku ai i ke o, ia manawa laua i uhai like aku ai no ke pahu hou ana aku i kekahi o o kona manawa ia i ahai loa aku ai i ka moana kaiuli.
Ma ka laua homaopopo ua hiki aku ke kaumaha o kela ulua ma kahi o ka 300 paona a oi, ua haki pu kekahi o iloko o kela ulua.
HOOKU'IIA HE KEIKI E KE KAA A EHA LOA
He keiki uuku o William Fernandez ka inoa, a nona na makahiki he 12, ka i hooku'iia aku e ke kaa otomobile a eha loa, ma ka hora 5:30 o ka auwina la o ka Poalua aku la i hala, maluna o ke alanui Halema'i Pupule ame Kula. E paani ana keia keiki maluna o ke alanui ma kona manawa i hooku'iia aku ai e ke kaa oto e kalaiwaia ana e S. Moehizuki, he Kepani, a no ka eha i loaa iaia, o ia ka haki ana o kona wawae hema ame kekahi moku hohonu ma kona pulima, i laweia ae ai oia no ka halema'i o na poino ulia no ka lapaauia mai o ia mau wahi ona i eha mauwale ai.
O ka Makai August Carreira ka mea nana ininaninau pono i keia uli@, ma kana hoike o ka hoihoi ana ao, e paani ana ka keia keiki me k@@a kaikaina maluna o ke alanui, @ no ka lilo loa i ka paani ua kaa pono oia mamua o ke alahele o ke kaa e holo aku ana. Ua paa o Mochizuki i ka hopuia a hookomoia @@ he hoopii e kue ana iaia no ke kalaiwa ana i ke kaa oto me ka loaa ole o kona laikini kalaiwa.
Ma ia kakahiaka Poalua no, he Pake nona ka inoa o Sun Look Hop, ka mea i haki ka iwihoehoe me ka waawaa pu o kona poo iloko o ka manawa o ka hooku'i ana o kona kaa baikikala ana e holo ana me ke kaa otomobile e kalaiwaia ana e T. Kuramoto ma ke kihi o na alanui Puowaina ame Beritania, elike me ka hoike a ka Makai Joe Lii o ka hoike ana ae, ka mea nana i ninau pono i kela hook'u ana. Ua hopuia o Kuramoto, a hookomoia ae he hoopii e kue ana iaia no ka holonui me ka nana ole i ke ola o @ai.
KUE O HOLLINGER I KEKAHI BURO OHANA
O ka hookumu ana i buro oihana no ke aupuni kulanakauhale elike me ia i hoolalaia a i hoakakaia hoi maloko o ke kanawai kalana a i hookomoia ae ai e ka Lunakiai MeC@ellan ma ka halawai o ka papa o ka noho ana ma ka Poalua o kapule i hala e kueia aku ana e na hoa Repubalika ka hapanui o ka papa, elike me ia a kaLunakiai Hollinger o ka hoike ana ae ma ka Do@lima o ka pule aku la i hala.
"He kue loa au ia kaawai no ka mea e lilo ana ia oihana i hana piepiele kalaiaina," wahi a Hollinger. " O ke ano wale no o ka hapanui o na hoa o ka papa e kakoo a e apono ai i kekahi buro o keia ano o ia no ma ke ano o kekahi komisina o elima lala, a iloko o nei papa komisina eia na hoa kupono o James Roth, ka Makua Walentine, Rev Akana ame Sam Robley. O lakou poe kupono e lilo i mau hoa no ia komisina no ka mea e ike ana lakou i ka poe pilikia maoli a i kupono hoi e loaa aku kekahi hana no ke kokua ana ia lakou, ina ma @e ano o ke kanawai i hookomoia ae ai e Lunakiai McClellan, e lilo ana ia buro i maunu kii baloka a i ka hua kalaiaina."
No ka mea e pili ana i ke kanawai no ka holo ana o na kaa i hooko@@@@ ae ai e Lunakiai Bassett ma ka halawai kuikawa a ka papa o ka noho ana ma ka Poaha auwina la, ua hoike ae o Hollinger i kona manao, "he mea pono e kaheaia i halawai akea a e loheia ka manao o ka lehulehu maluna o ia kauawai."
E HOOUNAIA AKU ANA NO WAKINEKONA
O na kini opiuma i hopuia ai ma Hawaii nei a i kauia ka waiwaio ua oi aku maluna o ke $60,000, a o ia no hoi ka heluna nui loa o na kini opiuma i paa ae i na luna aupuni federala maloko o ke Teritore o Hawaii, ua pau i ka hoomakaukauia e ka buro o na loaa kuloko a e hoounaia aku ana i Wakine kona e Herman H. Wuters, ke poo o ke keena hopuhopu opiuma ma Hawaii nei.
He elima kaukani auneki ka nui o na opiuma e hoounaia aku ana. O ke kmukuai ma ke kai liilii aku no ka auneki ma Hawaii nei he $12, wahi a Wouters o ka hoike ana ae, aka nae ma ke ano o ke kuai liilii ana a kekahi poe hoopukapuka opiuma e oi aku ana maluna o ka $100,000 ka waiwaiio o keia elima kaukani auneki.
Iloko o na waiwai kue kanawai e hoounaia aku ana aole o ka opiuma wale no, he coceaine, he morphine ka heroin ame ke codine kekahi, o ka opiuma no nae ka oi aku o ka nui. O na ipupaka puhi opiuma ame na lako e ae, na mea hiki ke pau i ka aia e ke ahi, ke puhiia ana ma keia pule ae, a o na mea hiki ole ke aia e laweia aku ana a kahi hohonu loa o ka moana a kioiaia aku.
o ka heluna o ka poe haihai kanawai i hopuia a mai ia lakou mai hoi na kini opiuma, na ipupaka ame na mea e ae i hopuia ai iloko o ka mahina o Okatoba i hala he 150 o ka heluna nui loa o na kini opiuma i loaa ae i ka mokuluu o ka oihana kaua moana a i haawiia ae ai i na luna aupuni federala he 400.
HOIKE O KE KULA SABATI O KA KALIHI
I ka Lunahooponopono o ke Kuokoa, e anoai auanei: Ma ke Sabati i hala iho hala i malama ae ai ke Kula Sabati Kahauoheremona, ma ka apana o Kalihi, i kana hoike hapaha mua, elike me ia i hoakakaia ma ka hoolaha a ke Kahu Kula Sabati Nui o ka Mokupuni, Sam K. Kahele, me ka holopono a ohohia nui ia o na haawina ame na himeni i hoomakaukauia, a iloko hoi o ke aheahe malie e ka piha hauoli. Malaila ae ka Hope Kahu Kula Sabati Nui, J. K. Nakila, a malalo o kana lawelawe ana na hana hoike o ka la. Ua akoakoa ae ka hapanui o na papa Kula Sabati kumau ame kekahi mau papa Kula Sabati home, kakaikahi loa na papa Kula Sabati home i hoea ole ae mamuli paha o kekahi mau kumu akeakea, aka nae, o na kokua a ia mau papa ua laweia ae no e kekhai mau haumana. He $90 ka huina nui o na dala i loaa ma ka lulu ana a na papa Kula Sabati ke hui pu ia me na lulu a ke anaina.
Ha ka hora 10:30 a. m., i hoomakaia ai na hana hoike a na papa mahope iho o ka himeni ana a ko anaina i kekahi mau himeni ma ka Leo Hoonani i alakaiia e ke alakai himeni Mr. Kealalio ame ka pule mai ka hope Kahu kula Sabati Nui mai.
O ka papa nui loa o na haumana ma ka hoomaopopo aku a kou mea kakau o ia no ka papa o na pokii no lakou ka huina he 17, a ma ka olelo Beritania ka lakou haawina paanaau ame na himeni. Paanaau ka lakou mau haawina a nani ka lakou mau himeni, a mamuli o ka paanaau o na pauku baibala ame na himeni i a'oia i na opio ua ikaika ko lakou a'oia ana e ka lakou kumu, i ka nana aku, ua nui maoli no hoi ke ohohia o ke anaina i ka lohe aku i ka ui o ko lakou mau leo ma ka himeni.
No ka papa o na opio, paanaau no ka lakou mau haaawina a nani no ka lakou mau himeni; hookahi nae mea hoohalahala a kou mea kakau o ko lakou himeni mai me na buke, in a i himeni mai lakou me ka buke ole aohe hoohalahala ana a kou mea kakau, aka nae, e pau ana paha ia hemahema no kekahi hoike hou aku. Ma ka manao o kou mea kakau, he mea pono e paanaau i na mea apau na olelo e pili ana i ko ke Akua aupuni ame na mele e hoonani aku ana iaia mamua o ka paanaau o na mea o keia ao, no ka mea e lilo ana ka paanaau o na olelo pili Akua ame na himeni i mea hoomanao na kela ame keia no ke Akua nona mai ke ola ame na mea apau.
O kekahi o na papa Kula Sabati i hoopiha loa mai i ka naau o kou meakakau i ka hauoli, oia ka papa Kula Sabati Kapiolani I, ka papa o na opio kane ame ko na makuahine; he nani no na papa kula e ae mai Kaena a Waialua, aka o keia ae la na papa kula i hoopiha nui ia mai ka naau o kou meakakau i ka hauoli, a ke hoomaopopo iho he poe laeula wale no ko ke Kula Sabati o Kahauoheremona i ka himeni.
O kekahi o na papa ui o ka himeni oia ka papa a na lala o ka Ahahui Kamehameha, he poe laeoo wale no keia i ka himeni, a hookahi papa himeni o na malihini i komo pu ma keia hoike ana. Ha paiia ka lulu ana o ke anaiana a he $90 i loaa.
O ka panina hope o na hana hoike o ia la o ia na manao paipai mai ka hope Kahu Kula Sabati mai ame kekahi o na Kumukula Sabati, o ka hope na manao hoolaha o ke Kahu, Wm. K. Poai.
Hookuuia na hana o ka la mahope o ka himeni ana ame ka pule mai ke Kahu, Wm. K. Poai mai, ma ka hora 1:15 p. m.
Me ka mahalo,
MAKAIKAI,
HOOPUKAIA HE PALAPALA HOOKAPU
I kulike me kekahi palapala hoopi i hookomoia ae i ka aha e W. J. Robinson, ke kokua loio apana Amorika, ma ka Poalima aku la i hala, o Kauka Dai Yen Chang, ka on a nona kela apana aina ma ke alanui Aala, kahi o ke kanawai hookapu waiona i hahakiia ai.
E hookapuia ana ia wahi no ka manawa elike me ka hoakaka a ka Loio Robinson maloko o kana hoopii a i aponoia ae ai hoi e ka Lunakanawai John De Bolt, o ke kumu mai o keia hookapu ana ma ia wahi o Kauka Chang i paa ae ai o Yasutaro Muta, he Kepani, i ka hopuia no ka hana a kuai waiona.
Ua hoole o Fukujido Iwamoto, ka ona o kela apana aina ma ke alanui Kanoa maloko o kana pane o ka waiho ana ae i ka aha federala, i kona ike ia Tama Hiuguu ame Hatzuo Higuchi, na Kepani e noho nei ia wahi ma ke ano hoolimalima, no ko laua kue i ke kanawai hookapu waiona.
Wahi a kana pane aohe ona noho maluna o kela apana aina on a ma ke alanui Kanoa e ike aku ai oia i ka hana a kuai o na Kepani e noho ana malaila i ka waiona, a ua hoole pu ae oia i kona ohi ana i kekahi mau pomaikai ma ke dala mai kela hana kue kanawai mai ka ohana Higuchi, eia nae, aole e lilo ana kana hoole ana i mea e hookapu ole ia ai ia wahi no ka manawa.
MAKAIKAIIA KA HALE PUHI PALAOA HOU
He umikumamalima haneri kanaka, na kane ame na wahine apau pu me na kamalii, i moe kaoo i kai o Iwilei ma ka po Poaha aku nei no ka ikemaka ana i ka hoohana ia ana o ka hale puhi palaoa hou o Love Bread & Biscuit Co., nona na hoolilo he $350,000, a ua wehe hamamaia ia hale no ka makaikai ana a na kanaka apau i hiki aku.
O na hoolilo no na mikini o keia hale he $150,000, a ma ka manawa o ka hoohanaia ana ua ikeia ka holopono elike me ka hana i makemakeia, a he mau kaukani omoomo palaoa i hoomoaia a i hemo mai hoi iwaho mailoko mai o ka oma iloko o ka manawa pokole.
Ua nui ka makemake o na kane i ka holopono o ka hana ana a na mikini, a ua piha hoi na wahine i ka hauole i ka ike ana aku i na omoomo palaoa i hemo mai me ka mo'a maikai, me ka wai nui o na waha i ka ua mea o ka ono, a no na kamalii hoi e nana aku ana a ike i ka hemo mai o ka palaoa lelo maikai, ua moni ko lakou mau haae. "O! ina hoi e loaa ana kekahi waiubata maanei, i meaai pu ae me ka palaoa!" i ka manawa o ka ike ana aku i ka palaoa a hoomaka ka ono.
Mamua ae o ke kani ana o ka hora 7 o ia po ua piha mua owaho o kela hale puhi palaoa hou e ku nei ma Iwilei, ma ke kahua o ka halepaahao mua o Kawa, i na kanaka, na waine ame na kamalii, no ka makaikai ana i ka hana a ia hale hou, e kakali ana o ka aeia mai e komo aku iloko, a i ka manawa i hemo mai ai na puka ua alakai ia aku la kela ame keia e kekahi mau alakai, me ka hoakaka pu mai i ka hana a kela ame keia mikini, a aole i haalele na kanaka ia hale ahiki i ke komo ana aku iloko o na hora kuliu o ia po.
He ua liilii hoanuanu ili ke ke helelei mau iho ana ma ia po, he mea ole wale ae la no nae ia ua ame ia anu i ke kono a ka makemake. O keia ka hale puhi palaoa maemae loa no ka mea mai ka manawa e ike ak;u ai oe i ke kalanaia mai o ka palaoa a aeae, a komo aku i kahi e kawiliia mai ai ahiki i ka hemo ana mai iwaho ua mo'a, na ka mikini wale no na hana apau, e noonoo ole iho ai ka mea e ai ana ia ano palaoa no ke kapuluia, a i ole ke komo paha iloko o ka palaoa o kekahi mau mea e lilo ai i mea hoopilikia i ke ola kino.
E hamama mau ana na ipuka o ia halehana mai ka hora 7:30 a ka 9:30 o kela ame keia po no hookahi pule, mai ka Poaha mai o ka pule i hala aku la.
KA MANA O KA NAAUAO.
He mea mana ka naauao, a no kona mana, ua hookiekie ae ia i ke kanaka e nohoalii maluna o na mea apau a ke Akua i hana ai.
O ka mana o ka naauao, ua loaa ia ma ka imi ana aku o ke kanaka, a o ka mea e loaa ai, o ia ke noho alii maluna o na mea apau o ka honua ame na mea o ka lewa.
I ko kakou ike ana i ka uwila e anapu ana, a e holo ana ma ka lewa akea o ka lani, me kona leo nui, i kapaia he hekili, e hiki anei ia kakou ke manao, e hoolohe mai kela ia kakou ke hoounauna aku. Aole hiki, aka, o ke kanaka naauao, hiki no iaia ke kahea aku e hele mai, a lawe aku i kona mau manao ma kela aoao o ka honua, iloko o ka manawa pokole, e lawe i kona kino ame kana mau ukana, e huki i ka wai mailoko mai o kona luawai, e hoomalamalama i kona hale, a e hoomo'a i kana mau meaai, e hookaa i na mikini o kona halehana, a e hooholo i na kaa me ka lio ole, a pela aku.
Pela hoi ka wai, ka makani ame ke ahi, ua lilo lakou apau i mau kauwa hoounauna na ke kanaka naauao.
Na ke kanaka naauao i wehewehe mai na mea o ka lewa, elike me ka la, ka mahina ame na hoku. He kanaka naauao o Akimeda, oia ka i wehewehe mai i ka mana o ka ume.
I aku la oia i kana mau haumana; "Ina e loaa ia'u he wahi kupono mawaho aku o keia honua a kakou e noho nei, e kukulu ai i wahi no ka une e ku ai, hiki ia'u ke olepe i keia honua me ke kolopa, no ka mea, aohe kumu o kona paa, he lewa wale no. O ia ka mea nana i imi i ke kanawai o ka une i kapaia he hoeueu ikaika.
Ina e nana iho kakou ma ko kakou noho lahui ana, e ike no kakou i ka oiaio o keia manao. He lahui nui o Inia 300,000,000 paha ka nui o kona lahui. Ua lilo ka hoomalu ana ia Beritania, he wahi lahui uuku loa,, he nui nae ka ike ame ka naauao, ua oi aku ka mana o ke koa naauao hookahi mamua o na koa naauapo he 10.
Owai ke lanakila ma ka mahi ana@ O ka mea naauao no. Owai ka i kohoia i mau luna aupuni@ O ka mea naauao no.
Ma na aina apau o ka honua nei, ua lilo ka poe naaupo i mau kauwa na ka poe naauao. Nolaila, he olelo oiaio loa keia. Aole nae i like ka naauao o ke kanaka me ko ke Akua, aohe naauao i koe iaia, aohe ike i koe iaia, aole hoi akamai i koe aku.
O kekahi ano nani no keia o ke Akua. Aole nae pela ke kanaka, he hapa uuku loa kona wahi ike a o ka mea i mahuahua iki kahi ike, ame kahi naauao ua kapaia oia, he kanaka ike hohonu loa.
Ka Hope o ka Naauao
O ka naauao ka mea e mahuahua ai ka pono, a i ole o ka hewa no, e like me ke ano o ka mea i hoonaauaoia, pela no kana hana, in a he maikai ka naau o kekahi kanaka, a lilo oia i kanaka naauao, alaila nui ae kona maikai ame kona pono, a mahuahua kana mau hana maikai e hana ai. Nui ae kona aloha i na kanaka apau, a ake no oia e kokua a e hoopomaikai aku ia lakou.
Aka, ina ua maa kekahi kanaka ma ka naau kahiko, a lilo oia i kanaka naauao, e mahuahua ae auanei kona hewa, a nui wale kana mau hana ino, paakiki kona naau, hoomaloka loa i ka pono, palaka, nanea wale, a komo aku kela hewa keia iloko o kona naau, a paa loa ke pio i hoopaa ia i ke kaulahao.
No laila ke kupono o kela olelo a Iesu: "E imi e aku i ke aupuni o ke Akua me Kana pono. Eia ke ano o ia olelo.
Eia e imi e aku i ka naau hou. He mea maikai no ka naauao, aka, aole e ola ka uhane malaila, no ka mea he mea hookiekie ka naauao ke ole e hanau hou ia.
He mea naauao loa ke diabolo, ua oi aku kona naauao mamua o na kanaka apau, a he kumu hoolaha ia i ka hewa maluna o ka honua holookoa.
O kona ike ka mea i nui ai kona hewa; o ia ke ano o kekahi poe ma na aina naauao; he naauao ko lakou, aka, no ka hui pu ole me ka pono, ua nui loa ko lakou hewa, he hapa iho ka hewa o ka poe naaupo.
Pela no kekahi põe naauao ma Hawaii nei, na lakou i hoolilo i ka la Sabati i la lealea, e hoopau ana i ka maluhia o ia la i malamaia mai kahiko mai, a e hoolilo ana ia la i la lealea me he la noa la.
S. H. ONI,
MRS. MARY J. AKINA, UA HALA
Mr. Lunahooponopono, Aloha nui oe: E oluolu mai oe ia'u, ma o ka'u wahine i hala aku mao, oiai he Pake piha au, he hapa ka'u wahine.
Ua hanauia ka'u wahine ma Laie Koolauloa, Oahu, nei mai ka puhaka mai o Mrs. Anna Haaheo, ame Au Kam Chee, kona papa. Ua hanauia mai lakou he 12, elima i make, he 7 e ola ana o ka helu 3 o keia ohana oia o Mary i hala pu aku la mao.
Ua mare keia ohana helu 1 he Pake, helu 2, 3, 4, he Pake wale no ke kane, a make aku la ka'u wahine he 24 makahiki, Iune 24 ae
MRS. MARY J. AKINA
nei, e pia ai o kona 25 makahiki.
Ua mareia maua, Feb. 18, 1917, alaila 7 wale no na makahiki i nohoia e maua. Ua hoao au no ka'u wahine, ua kahaia e ke kauka ka'u wahine, a mahope mai pii mai na ma'i like ole. Ua hoomau aku no ka imi ana i ke ola, he hiki no ke hana kupono he hele no oia ma Honolulu i kekahi manawa, aia no nae kona ma'i iloko, a ua hoomau aku no nae ka imi ana i ke ola, ahiki i kona pauaho ana mai ma Pauoa, Honolulu nei, i Maraki nei, 1924.
Aole au i ike i kona lalau, he opiopio kupono ma ka home, he ohana i lohe ole ia ko lakou moolelo. Ua nui ko makou mahalo no keia ohana malama i ka home.
Ua hanauia au o J. Akina ma Kahuku, aina lewa. He Hawaii ponoi au elike me oukou, a he kupa ponoi nou e Hawaii aina, a lahui; o ka helu 4 like no oia me a'u auhea la na ono au e Hawaii i koe i hiki ole e aiia e maua, ke koko Pake piha, i lilo i Hawaii imiloaa.
Ua huli mua ka naauao a loaa, imi aku ka hana, a loaa ke dala, imi ka wahine, o ia ke ano o ka Pake, a pela no keia ohana hapa pua o Kina, aia no malalo o ke a'o ana a ko lakou papa.
Pela au e inoino ai ke noonoo ae i ke kaumaha maoli o ke aloha, aole ka e lilo i ka waikahe nui. Pupule ke poo ka lolo, kaumaha ko maua aina hookuonoono, kahi a maua i pili ai ka home aloha no ia. Hala oe pehea au? Ua hiki anei ia oe ke hele mai e hui pu hou kaua?
Ua hoihoiia mai kuu aloha i kona aina hanau o Laie, nui ka poe i hele mai o uwe like, he nui ka ohana na hoaloha na makamaka ame na kumu Moremona.
Ua kaheaia ka halawai haiolelo haipule imua o ka poe i kohoia ame na alakai nui ke aloha mai na haiolelo mai, oiai, he poe i maopopo ke ano o keia ohana, aohe he waimaka paa oiai, o na hora hope ia e nana iho ai i ka helehelena o kuu aloha, ame ka ohana, na makamaka.
Nui ko'u hoomanao poina ole no na kumu kane o ka Hoomana o na La Hope, ame na wahine i hui pu ia me ka ohana, na luna na hoa makamaka apau loa.
Ke haawi pau ole aku nei au i ka'u mahalo no oukou ame ka poe apau i ka'i like no kona lua kupapau.
O wau me oukou, a owau pu me Mr. Lunahooponopono ame kou mau lima kokua o kou keena pa'i. O ke kii keia o kuu wahine. Aloha kakou!
J. AKINA,
Laie, Oahu, Maraki 16, 1924.
NO KA HALE O NA KEIKI MAKUA OLE NA DALA E LOAA ANA
O na dala a pau e loaa mai ana ma ke kuaiia ana aku ma ke kudala o na pohaku momi ame na daimana o ka Moiwahine Liliuokalani e hooliloia aku ana a pau loa no ka hale o na keiki makua ole, i kulike me ka ke Konela Curtis P. Iaukea, ka luna hooko kauoha a kahu hoi o ka waiwai o ka Liliuokalani Trust, o ka hoie ana ae ma ka Poakolu aku la o ka pule i hala.
O na mea gula, na pohaku momi a me na lei daimana o ka Moiwahine Lydia Liliuokalani ame kekahi mau waiwai e ae, aia maloko o ka halekuai mea gula o Wall & Daugherty, ma ke alanui Bihopa kahi i hoahuia ai no ka makaikai ana a na mea apau, a ma ka Poalua nei ame ka Poakolu mai i kuaiia aku ai ma ke kudala e ka luna kudala J. H. Fisher maloko o ka rumi hulahula o ka Hokele Iana, a ua manaoio oia e hoaa ana he mau kaukani lehulehu mai ia mau waiwai mai ke pau loa i ka lilo.
Mamua iki iho o ko ka Moiwahine Liliokalani holo ana aku i Wakinekona D. C., no ka waiho ana aku i kana koi i ka Aupuni Federala i ka 1909, no kona poho no ke kailiia ana aku o ka nohoalii ma ke ano limaikaika mai iaia aku, ua hana mau oia i kekahi palapala e haawi ana i kekahi hapa o kona mau waiwai malalo o ka malama ana a kekahi kahu i hoamanaia, no ka pomaikai o ka home o na keiki makua ole.
O kekahi mau waiwai ua hookoe no oia nona iho, aka nae, ua kauoha oia, in a no kona make e hooliloia aku ia mau waiwai apau no ka pono o ka home o na keiki makua ole. He manawa kokoke wale aku nei no i hala ka pau ana o ka waiwai o ka moiwahine i ka hooponoponoia, mamuli mai keia o ka lehulehu o ka poe paio a kue mai i ka palapala hooilina o ka moiwahine i hana ai, oiai ua olelo kekahi poe o lakou ka pili loa ma ke koko i ka moiwahine, a he kuleana lakou i kona waiwai; o Mrs. Theresa Wilcox ame Kealoha pu kekahi i owili pu ia iloko o keia hihia. I keia manawa ua malaelae ke alahele no ka hookoia ae o ke kauoha a ka moiwahine, a ua hoike ae o Mr. Iaukea o na hana e hoolalaia mai nei no ke kukuluia ae o kekahi home nona keiki makuaole, ke holomua loa mai nei.
He mau makahiki lehulehu i kaahope aku nei o na mea i hoolalaia i kinohi o kela home o ka moiwahine ma Waikiki i ikeia ma ka inoa o Paoakalani oia ka hale e hooliloia i home no na keiki makua ole, aka nae, mahope mai ua hoopau loa ia ia manao i ka manawa i hooholoia ai e elia i alawai hookahewai ma Waihiki, o ia kela alawai i eliia ai a e moe nei i keia manawa. Aole kahua i maopopo no ka home o na keiki makuaole e kukuluia aku ai i nei manawa, elike me ia a Mr. C. P. Iaukea o ka hoike ana ae.
David P. Keawehaku
HE AGENA HOOKO MARE
Ua hiki ia'u ke mare i ka poe apau e makemake ana e mareia.
743 KANOA LANE, KOULA,
Honolulu, Oahu, T. H., Mar. 12, 1924
6599 Mar. 13, 20, 27; Apr. 3, 10, 17, 24; Mei 1.
HOOLAHA LULU MANAWALEA.
Ke hoikeia aku nei ka lohe i na lala apau o ka Ahahui Kokua a Hookuonoono o na Wahine Oiwi Hawaii, e lulu koke mai i ka manawalea no ko kakou mau hoahanau i haalele mai i keia ola ana, oia o Abigail Kaleikoa ame Kalanimaulo@ Johnson.
MRS. WAHINEMAIKAI KALEO.
Kakauolelo Ahahui Kokua a Hookuonoono o na Wahine Oiwi Hawaii.
6598 Mar. 6, 13, 20, 27.
OPEN A CHARGE ACCOUNT AT THE MODEL CLOTHIERS FORT ST.
HOOLAHA I KA POE PAA AIE.
Ma keia ke haawi aku nei ka mea nona ka inoa malalo iho nei, i hookohuia i Kahu no ka poe paa aie ame ka poe paa mahele o ka HONOLULU BREWING AND MALTING COMPANY, LIMITED, he hui Hawaii i hoohuiia, i hoopauia ma ke kauoha a ka Puuku o ke Teritore o Hawaii, i hanaia ma ka la 21 o Feberuari, 1924,, i ka hoolaha i ka poe paa aie apau o ka hui i oleloia, e waiho mai i ka lakou mau koi iaia, ke Kahu i oleloia, ma kona wahi lawelawe oihana, 916-26 Alanui Papu, Honolulu, iloko o 90 la mai ka la aku o ka hoopuka mua ia ana o keia, o hoole mau loa ia aku no ia mau koi.
Honolulu, Feberuari 22, 1924.
TRENT TRUST COMPANY, LIMITED, Kahu no ka Poe Paa Aie ame ka Poe Paa Mahele o ka HONOLULU BREWING AND MALTING COMPANY, LIMITED.
WATSON & LYMER, na Loio no ke Kahu i oleloia, 517 Hale Kauikeolani. Honolulu.
6597 Feb. 28; Mar. 6, 13, 20, 27.
CITY MILL CO.
KEKAHI O NA HUI KAHIKO LOA MA HONOLULU NEI.
Poe kuai Papa, Pilihale, na @ako Paipu, na Laau Puka Aniani me Panipuka, lako Pili Hao; na mea no apau no ka home ma ke kumukuai oluolu loa.
Kukulu makou i na hale ma ka uku liilii ana, me na hookaa liilii.
O KA OI LOA AKU NO KA POE HOOKUONOONO.
Mai Poina --- Hele Mai la Makou
Kihi o na Alanui Moiwahine me Kekaulike. Honolulu, T. H.
PALOLO
The Kaimuki of Tomorrow
For investment consider Palolo. Values here are closely following toss of Kaimuki and Ocean View of two year ago.
Watch Palolo Grow
$750 - Lot 13,721 sq. ft. $20 down, $10 per month.
$1500 - Lot 26,702 sq. ft. 9th Ave., $50 down, $20 per month.
$750 - Lot 25,439 sq. ft. 10th Ave., $20 down, $10 per month.
$5500 - Twenty-seven acres 27 with house. $1000 down, $100 per month.
Easiest terms in town. prices the lowest consistent with market values
Ask C. W. Carpenter, with PAULO KALAUKA (P. E. R. STRAUCH)
Alanui Moi, Helu 74, Mawaena o na Alanui Pap@ ame Betela.
Keena Hawaii
NO NA
Lako Hana Mahiko
Hapuku Kila Oliver
Chilled âme na Palau
Na Katapila Cleveland
Na Katapila Fordson
Na Kaa Kalaka White
Na Kaa Kalaka Federal
Na Kaa Kalaka Ford
Na Hana Pili Amala
HANA I NA KINO O NA KAA UKANA ME KALAKA ME KA HANA HOU ANA
Schuman Carriage Co., Ltd.
Na Paionia o na Hana Halihali o Hawaii nei
KA VICTROLA
Ka Meakani Mele Kilakila - he meakani e pono e loaa ma kou home. Kauoha mai i na buke hoakaka o na Pahuolelo ame na Papa Leo Mele.
NA PIANO PAANI
NA ROLA PAANI
NA PEPA MELE HOU
NA PILA AHA
âme na mea apau pili i na mele.
Bergstrom Music Co.
1020 Alanui Papu Honolulu
HALE UWI WAIU
MAPULEHU
PUKOO, MOLOKAI
E Hooholo Ana i ka
MOKUKUNA GESOLINA
LELEIONA
Mawaena o na Awa o Honolulu me Molokai
Geo. P. Cooke, ONA
Poe Lawe Hau me Waiu
E KUAI I KOU MAU
Pono Hale ma ka Hawaii Furniture Co.
Helu 469 Alanui Moi
kokoke i ke kihi o ke Alanui Liliha
He oluolu na kukai olelo ana.
Keolanui ame Bridges
Mau Mea Kahakii Hale, Lawe Aelike Kukulu Hale, Ame Huli Dala no ke Kokua Ana no ka Hale, Hana Alanui ame Kuai Aina
Eia me maua he mau apana @@@@ kupono no ka hoolimalima a kuai ana no ke kumukuai haahaa.
Mau mea huli i ka moohelu aina me noteri no ka lehulehu.
E komo mai e ike ia maua. Rum@ Helu 1, Commercial Bank Building.
Alanui Moi. Kelepona 3339
T. O. MURATA FURNITURE STORE
(Na noho hoolimalima me lako pa maanei.)
Na Lako Hale Hou me Kahiko. Hoolimalima me Kuai Hoolilo.
715 Alanui Hema, Honolulu, T. H. Kelepona 1695.
Kakela & Kuke
(KAUPALENAIA)
Poe Kalepa ma ke Komisina
Poe Agena no na Mahiko Lehulehu
PAPA NA LAKO KUKULU HALE
No ka hoahu ana i kou wai ma na Pahu Wai Papa Ulaula o 5000 a 10000 Galani.
E hoolakoia aku no na kumukuai ame na hoakaka ia oe ke noi mai.
ALLEN & ROBINSON, LTD.
Honolulu, T. H.
Nupepa Kuokoa
No ka makahiki (one year) ….$2.50
O na Dala âme na hoolaha apau e hoouna pololei mai i ka ADVERTISER PUBLISHING CO., LTD., wale no, P. O. Box 3110, Honolulu, T. H.
217 Alanui Moi, ma Waikiki o ke Alanui Alakea; ka Nuepepa Advertiser.
Entered at the Post Office at Honolulu, T. H., as Second Class Matter.
SOLOMON HANOHANO, Lunahooponopono.
CHARLES S. CRANE, Luna Nui.