Ka Nupepa Kuokoa, Volume LXIII, Number 13, 27 March 1924 — Page 6
| This text was transcribed by: | Kamehameha Schools Gift To Dr. Chun |
| This work is dedicated to: | Dr. Michael J. Chun |
Ka Nupepa Kuokoa
KE KILOHANA POOKELA NO KA LAHUI HAWAII.
He Kuleana ko ka Lehulehu e ike i ka Oiaio
Ma na hana noii e huliia mai nei maloko o ke keena o ka lunanana kukulu hale o ke Kulanakauhale a Kalana o Honolulu nei, no ka lawelaweia o kekahi mau hana poholalo ame ka ole maloko o kela keena o ka lehulehu, he kuleana nui ko na makaainana koho haloka e ike ai i na mea oiaio i lawelaweia maloko o kela keena, elike me ia i hua'iia ae ai i ke akea na hana poholalo i lawelaweia maloko o ke keena o ka oihana wai.
Malia paha aia no he awe'awe'a o ke kalaiaina, ma ka aoao o na hoa Repubalika o ka papa o na lunakiai, ma ko lakou koi ana e kuekaaia ae na hana o kela keena, ma ka manawa e noho poo ia ana e Louis S. Cain, ka mea a ka meia i hookohu aku ai ma ke kulana enekinia kalana, a i aponoia e ka papa lunakiai kahiko, he hookahi nae mea maopopo loa, ma keia keehina i laweia ae e na hoa Repubalika o ka papa. o ia no ke kaawale loa ana o Mr. Cain mai na kumu hoohuoi apau, no ka pololei ole o na lawelawe hana ana maloko o kela keena, ina aole i pili ka hewa iaia ; a ina hoi no kona pili i ka hewa, alaila e hookahuaia ia mau ahewa ana, me na hooiaio maopopo loa, e kupono ole ai oia ke noho ma kekahi keena oihana ano nui o ke aupuni kulanakauhale.
Me kekahi mau ike nae i loaa aku i ka Lunakiai Hollinger, no ka lawelaweia ana o na hana apakee maloko o ke keena o ka lunanana kukulu hale, aole pono ia kakou ke hoahewa wale aku iaia, no ke koi ana e kuekaaia na lawelawe hana ana maloko o keia keena, no ka mea ua kohoia oia e na mana koho baloka, me kela manaoio iloko o lakou e hooko pono ia na hana apau o ka lehulehu me ka pololei; ina o ka pololei ame ka oiaio ka i makemakeia e ikeia ae i ke akea.
O ka ninau no ke ku i ka mana a mana ole o ka hookohuia ana o Louis S. Cain i enekinia kalana, a i ku-eia ai hoi kon hookohu e na hoa Repubalika o ka papa lunakiai e noho nei i keia manawa, o ka aha hookolokolo ka mea nana e hoopuka mai i ka olelo hooholo, e hoopauia ae ai ko kakou mau pohihihi; a ina no ke kaa o ka pono ma ka aoaoa o ka meia ame na hoa Demokarata o ka papa, a i ole ia ma ka aoao paha o na hoa Repubalika o ka papa, alaila o ka hopena auanei o na hana noii e lawelaweia mai nei iloko o keia mau la, he mea ia e hooiia ae ai kona mahaloia, a i ole paha mahalo ole ia, elike me na mea oiaio e oili ae ana.
Ka Mana o ka Hoohuihui.
He mea hauoli, no ka manao ka ike ana i kekahi poe Hawaii opio o keia kulanakauhale, i hoohuihui ae ia lakou, ma ke ano e lawelawe like i ka lakou mai oihana, me ka wehe ana i keena oihana, ma kekahi o na rumi, o ka Hale Lincoln, e ku nei, ma ka aoao ma Waikiki iho o ka Hokele Iana.
O no hana i lawelawe mau ia e keia mau opio lehulehu, o la no ka oihana loio, ka huli ana i na aina pohihihi, ke kuai ana aku ame ka hoolilo ana i na waiwaipaa, ka hana ana i na palapala pili kanawai apau, ame kekahi mau ano hana e ae i kamaaina, i ka ikeia maloko o na keena loio, pela ka ohi ana i na aine, a pela wale aku.
Ma keia hoohuihui ana i hookahi keena oihana, e hoolako mau ia ana keia poe opio Hawaii me na hana i kela ame keia manawa, me ka malele ole aku o na hana iwaho, i na loio, a i na hui kuai aina paha, a mau hui hoaie dala. O ka mea huli i na aina pohihihi maloko o na uke aupuni, e hiki ana i kona mau hoa ma na oihana okoa, ke waiho mai iaia, i ka lakou mau aina pohihihi, no ka huli ana, i na moolelo pololei o ia mau aina, a ina paha he mau aina kuai, alaina o ka poe e lawelawe ana ma ia mahele hana, e lilo ana lakou i poe kokua nui mai ma ka waiho ana aku i keia mau aina, i ka poe makemake, a ina hoi he mau hoopii kanawai, alaila o na loio iwaena o kela puulu, ka poe na lakou e lawelawe imua o na aha hookolokolo, e kauka'i ole aku ai i na hui loio like ole o ke kulanakauhale nei.
No ka lilo o ka hoohuihui ana, i kumu holomua no ka lakou lawelawe oihana ana, pela kakou e ike nei, aole e ku hookahi ana kekahi loio haole a lawelawe oihana oia hookahi wale iho no, aka ma kahi o ka elua, a pii aku mau loio e hoohuihui ana ia lakou, a ma kekahi olelo ana ae hoi, na kekahi ka hana, ua hoolawa like ia kona mau hoa, pela hoi, ina na kekahi hoa o kela hui loio ka hana, e lawa like ana ia hana na lakou apau.
E ukali ana keia hopena, ma keia hoohuihui ana o na ano hana like ole, a maloko o hookahi keena oihana e lawelawe ai. Ma ka hoohuihui ana na haole, na Pake ame na Kepani, ia lakou iho, ma ka lakou mau lawelawe oihana ana, o na ano like ole, ua ike kakou i ko lakou holomua loa; pela aku auanei keia mau opio Hawaii, ke lawelaweia na hana apau me ke kui'o, ka pololei ame ka hoopono, a elike me na kulu pakaua, i hoohuihuiia a lilo i moana wai nui, pela auanei e lilo ai ka lakou mau oihana, i oihana nui ma keia mua aku.
Ka Ma'i Iwaena o na Holoholona
Aia ke laha mai la ka ma'i eha o ka waha ame ka wawae o na holoholona ma Kaleponi i keia manawa, a no ka hoopakele ana ae mai ka pahola ana mai o kela ano ma'i ma Hawaii nei, i laweia ae ai na keehina wikani ma ka aoao o na luna oihana o ke Teritore, ma ke kaupale ana i ka hoohomoia mai o na holoholona ame na ai a na holoholona, iloko nei o ka aina.
He kulana ano kupilikii keia e kau mai ana maluna o ko Hawaii nei poe, aole no ka manao hopohopo wale no, o loaa mai auanei na holoholona o Hawaii nei i keia ano ma'i aka no ka hapa mai o ka loaa ana o na mea i maa i ka hoounaia mai Kaleponi mai i Hawaii nei, a ma ia ano, e pii ae ana ke kumukuai o kekahi mau meakuai ma keia mua aku, koe wale no a hiki ke hoolakoia mai keia Teritore, me na mea i hiki ole ia Kaleponi ke hoouna mai, mai na awa e ae o Amerika. a mai na aina mai i loaa ole na holoholona i ka mai, i kauia aku ai ka weli, e ka poe hanai holoholona apau.
Ua makee kakou i ke ola kino maikai, in a he mea e hoomauia aku ai ko kakou hoohauoli ana ia kakou iho me ia ola ana alaila ua oi aku ko kakou hooneleia, me na mea a kakou i kauka'i aku ai mai Kaleponi mai, ina he alahele ia no kakou e palekana ai.
Ke ike maoli nei kekahi poe Hawaii, i ka waiwai ole o ko lakou noho ana i ke kulanakauhale nei, i kau a mea o ka nui o ka pilikia; me ka lilo o na ukuhana nunui e loaa nei i kekahi poe, i mea waiwai ole, no ka pipii o ke ano o ke ola ana, ame na hale hoolimalima; o ka puuhonua a lakou e kau aku nei na maka, o ia no ka hoi i na aina hoopulapula o Molokai, ke weheia mai e ke Komisina o na Home Hawaii, no ke kanu ana i ka halakahiki.
Kupaianaha no ka paha ke kalaiaina e ikeia nei iwaena o kakou ke loheia ae kekahi mea e paa ana i ka oihana aupuni, ua kakoo aku oia i kekahi moho, e alualu ana no kekahi kulana ano nui iloko o ka aoao kalaiaina, o ka imiia aku la no ia i wahi no kela mea e hewa ai. O ia la hoi, aohe nanaia ae o ke kulana hoaloha, i ka la o ka makemake e loaa ka lanakila no kekahi kulana!
Nuhou Kuloko
Kaa hou i ke kula o Punahou ke eo o ka hapanui o na lealea hooikaika kino, i hookukuia mawaena o na kula lehulehu, ma ka Poaono aku la i hala.
--------------
Iwaena o na Demokarata e loheloheia nei i keia mau la, hookahi no moho ikaika loa no ke kulana komite lahui, o kela aoao kalaiaina oia ka Meia John H. Wilson.
--------------
Ma keia Poaono e hooloheia ai ka James P. Awana pane imua o ka aha, no ka hoopii e ku-e ana iaia, o ia ka lawe ana i na dala o ka oihana wai ma ke ano kolohe.
--------------
Mamuli o na hoohalahala i waihoia ae e ka Lunakiai Hollinger, i paa ae ai ka Lunakiai W. K. Bassett, a lunahooponopono o ka nupepa Honolulu Times i ka hopuia ma ka Poakahi iho nei, no ka hewa laipila.
-----------------
Ma ka hora elua o ka auwina la o keia Sabati iho, e malama ae ana ke kalapu Demokarata o na kane ame na wahine, o ka mahele umikumamakahi, apana elima i ka halawai ma ka halekula o Kaiulani.
------------------
Nui ka mahaloia o ka haiolelo a Senatoa John H. Wise, ma ke anaina hoomanao o ka malamaia ana maloko o Kawaiahao ma ke Sabati aku la i hala, no ke Keikialii Kalanianaole, a nui pu no hoi ka nani o na himeni i meleia ma ia la.
-----------------
Ke kokoke loa mai nei ka manawa e noho mai ai o ka ahaelele a na Repubalika, a ma na mea e hoomaopopoia aku nei i keia manawa, he kulana ano pohihihi ko na moho komite lahui, aole hoi elike me na la aku nei i hala, ka ikaika o kekahi moho i kekahi.
-----------------
Nui na kanaka Hawaii e kakali aku nei o ke aponoia mai o ka lakou mau palapala noi, no ka hoi ana aku e noho ma na aina hoopulapula me Molokai, ma ka manawa e weheia mai ai na eka aina no ke kanu ana i ka halakahiki.
UA OI AE KA MOMONA O KO HILO WAU
I kulike me ka hoike a ke Komisina M.B. Bairon no ka mahina o Feberuari i hala o ka hoike ana ae, au oi aku ka momona ka paa ame ka maemae o ko Hilo waiu mamua o ko Oahu nei.
Maloko o kana hoike o na pipi waiu Jersey wale no ka hapanui a ko Hilo poe uwi waiu e malama mai la a me he mea la, o ke kumu ia o ka oi aku o ka maikai o ka waiu, wahi ana. I kulike me ka hoakaka ma ke kanawai e pono e loaa i nau waiu apau i 3 pakeneka ka momona bata a i 11 pakeneka ka paa o ka waiu, aole hoi e holowai elike me ko Oahu nei e kuaiia mai nei e kekahi poe kolohe. O na hoike o kela ame keia mahina no na mahina o Ianuari ame Feberuari mai Hilo mai au ikeia aneane e pau loa na wahi uwi waiu mai ka eha a ka elima pakeneka ka momona bata a mai ka 12 a ka 14 pakeneka ka paa o ka waiu. No na wahi hana waiu o Oahu nei aneane ka e pau loa ma ke kulana maikai o ka waiu, elike me ka hoike a ke komisina o na meaai M.B. Bairos.
-------------
NA MARE
Geo. K. Kinney ia Heleua Kikaua Mar. 15.
Harry E. Johnson ia Susan Kalepa, Mar.15.
Edward Kwam ia Rose Nakahiki Hauoli, Mar. 15.
James K. Awo Jr., ia Esther K. Hauoli, Mar. 15
Thomas Hoopii ia Rose Aiwohi, Mar. 18
Wm. P. Heath ia Mary Ah Lum, Mar. 19
Charles Kiaba ia Martha Kameaaloha, Mar. 20
Allen J. Carzlo ia Mary R. Parker, Mar. 20
--------------
NA MAKE.
Henry K. Dawson ma ka Halema'i Moiwahine, Mar. 18
Kekaikuihala Mahaulu, ma ke alanui Ala Moana, Mar. 20.
Kekauoha, ma ke alanui Miller, Mar. 20
Alice Kealoha Moore, ma ke alanui Notley, Mar. 21
Anita A. Apuakehau, ma ke alanui Lilihe, Mar. 21
Helen Hanakahi I'iimanu, ma ke alanui Alani, Mar. 21
Kalekae Kaaeae, ma ke alanui Young, Mar. 22
Jos. Kaaimau Kaua, ma ke alanui Hobron, Mar. 22
R. K. Palakiko, ma ke alanui Auld. Mar. 22
Daniel Barnal ma ke alanui Alepo Mar. 22
UA HALA I KE ALA HOI OLE MAI, O MRS. EVLYN PIHANA LOAAOLE
Mr. Solomon Hanohano, Aloha kaua: E oluolu mai hoi oe i kau wahi kaawale o ka kaua hiwahiwa nana hoi ia e uwila aku i ka puolo waimaka e kau ae la maluna i ike mai ai na kini makamaka o kuu wahine aloha i hala aku la i ke ala hoi ole mai, a o ka hopena o na mea apau. Mai Hawaii nui akea moku o Keawe ahiki i Niihau ka Mokupuni kaili la, o Mrs. Evelyn Pihana Loaaole, ua hala, i like ai me ka olelo a ka Palapala Hemolele, he mahu ke ola o ke kanaka i pua ae a nalo aku, na ke Akua no i haawi mai, a Nana no i lawe aku. E hoomaikaiia Kona inoa.
Mahope mai o na la he eha o ke kaama'i ana o ka'u wahine aloha i haalele mai ai oia ia'u i kana kane ame ka maua hanai. I ka la 27 o Feb. ua hoihoiia aku oia o ke kauka no ka Haukapila Moiwahine, a ia ahiahi hora 7 oia i pauaho mai ai i keia ola ana, a hoi aku la ka uhane me ka Mea Nana i hana, a o kona kino ua kaa aku la na hooponopono ana malalo o Silva, a i ka la ekahi o Maraki i hemo ae ai kona kino iwaho i ike ai ka ohana, na makamaka ame na hoaloha o kuu wahine aloha.
Ke haawi aku nei au kana kane i ka mahalo ame ka ohana no apau, i ka hui, Ka Hale o na Alii o Hawaii, no ka oukou mau kokua ana mai ame ke ku kiai ana i ke kino o ka'u wahine, me na hoaloha i hiki mai a ala pu me makou a ao ia po, a pela no hoi me ka makana pua.
E oluolu e lawe aku i keia hoomaikai a na ka Haku no e hoomaikai mai ia kakou apau me ke aloha.
Owau iho no me ka luuluu
CHARLES MAKEPA LOAAOLE, âme ka Ohana
HE 25 MAKAHIKA PAAHAO KA HOOPA'I
He 25 makahiki a John Ward, he koa no ka Pakoa o Leilehua, i hoopa'iia e noho ai maloko o ka halepaahao federala, a me he mea la, ma ka halepaahao ma ka Mokupuni McNeill, Washington e hoopaaia aku ai, ina ka hoopa'i paahao i hooholoia ai e ka aha hookolokolo koa nona e aponoia aua e ka Maj. Gen. C.T. Menoher, a e ka kokua hoi o ke keena o ke Kenerala ma Wakinekona.
O keia ke koa nona ka moolelo i hoopukaia aku ai ma kekahi mau mahina aku nei i hala a i hopuia ai ma na la makamua o keia makahiki, no ke komo ana e aihue i na waiwai o kekahi mau hale he 16 ka nui, he 13 ma ka Pakoa o Leilehua a he he 3 ma Honolulu nei. O ka huina waiwaiio o na waiwai i aihueia eia, he $1065, ua paa oia i ka hopuia ma ka manawa ana o ke komo ana iloko o kekahi hale mauka ae nei o ke Awawa o Manoa.
Ma ka Poalua o ka pule aku la i hala kona hoahewaia ana no na kumu apau i hoakakaia maloko o na kumuhoopii e kue ana iaia, oia hoi ka wawaahi ana i na hale ame ka lawe ana ma ke ano aihue i na waiwai mailoko aku o ia mai hale ana o ke komo ana.
-------------
KAPALAKIKO, Mar. 20. O Curtis D. Wilbur i waiho ai i ke kulana lunakanawai kiekie no Kaleponi no ka lilo ana i kakauolelo no ka oihana kaua moana no ke pani ana ma kahi o Denby, ma keia la oia i lawe ai i ka hoohiki oihana. Mahope iho i hoolaunaia aku ai oia i na aliikoa kiekie o ka oihana kaua moana i hoonohoia maanei. Aole lono i hoikeia ae no kona manawa e holo aku ai i Wakinekona.
Morris, Mar. 23
Julia Kaimi, ma ka Halema'i Moiwahine, Mar. 23
Leua Ellano Akoloka, ma ke alanui Kalani, Mar. 24
Hattie Kaili, ma ke alanui Moiwahine, Mar. 25
Noa Kaheaku, ma ke alanui Waiakamilo, Mar. 24
Nuhou Kuwaho
WAKINEKONA, Mar. 20. O ka hila haawina o ka oihana kalaiaina, elike me ia i hooholo hope loa ia ai, e lawe ana ia he $7000 no ka ukuhana o ke Kiaaina o Hawaii.
--------
KUWAHO
WILLEFRANCHE, Palani, Mar. 20. He koa marina mailunamai o kekahi moku hahai topido Amerika ka i make loa ma keia la i kekahi luina mailuna mai o ka mokukaua Pelekane, iloko o ka hakaka ana i hoohanaia ai na pu panapana.
----------
ROME, Italia, Mar. 20. He hoike mai ke kauka pili kino mai o ka Pope Pio ke hoakaka ana he maikai loa ke ola kino o ka Pope, a e hoole ana i na lono lauahea e ae. Wahi hou a ke kauka, "He nanaina maikai ko ka Pope i nei manawa i like aku me umi a umikumamalima makahiki i hala hope aku nei.
----------
TOKIO, Iapana, Mar. 20. Ua hanaia he kelepona e hoohui ana me na kanaka i hoopaaia maloko o ka mokuluu Kepani 43 e waiho mai la i ka papaku o ka moana ma kahi he 26 anana ka hohonu maloko o ke awakumoku Sasebe, mahope iho o ka hooku'i ana me ka mokukaua Tatsuta.
-----------
WAKINEKONA, Mar. 20. Ua aponoia e ke senate i keia la he olelo hooholo i hookomoia ae e Thomas J. Walsh, he Demokarata no Monotana, e noi ana i ke Kakauolelo Weeks o ke keena kaua no kekahi hoike piha e pili ana i ke kuai ana i na lako kaua i ke aupuni o Mekiko iloko o ke kaua hookahuli aupuni i kekahi manawa kooke i hala aku nei. Ma ka Senatoa Walsh hoakaka o ka hoike i nei manawa aole i pili me ka mea o ka ninauia ana iloko o ka hoolimalima o na wahi i hookoeia o ke kahua aila o ka oihana kaua moana.
ELIMA MAKAHIKI KA HOOPA'I I KAUIA
No ka pili o ka hewa hoomoemoe ia Henry R. Danner, o ia ka hoomoemoe ana i kana wahine ame elua mau wahine hou ae mawaho, i ka poe makemake wahine, ma ke ano kue i ke kanawai, i kauia mai ai ka hoopa'i hoopaahao maluna ona e ka Lunakanawai Federala Rawlins ma ka Poalua nei, e noho oia maloko o ka halepahao na na makahiki elima.
No kekahi mau la ae nei i hala, i hooloheia ai ka hihia o keia haole imua o na kiure federala, a ma na oleloike i waihoia ae ma ka aoao o ke aupuni i lokahi ai na kiure, ma ka lakou olelo hooholo, e ahewa ana i ka mea i hoopiiia, no kona pili i ka hewa, elike me ia i hoopiiia mai ai oia.
Mamua o ke kau ana aku i ka hoopa'i maluna ona, ua kamailio ae ka Lunakanawai Federala Rawlins, i kekahi mau olelo ikaika loa, e hoakaka ana o ka hewa i lawelaweia e kela haole, o kekahi ia o na hana ekaeka loa, ana i ike ai.
Oiai he elima makahiki ke kiekie o ka hoopa'i a ke kanawai i hoakaka ai no kela ano hewa, ua hookaumahaia aku ka manao o ka Lunakanawai Rawlins, no ka uuku loa o kela mau makahiki hoopahao, a wahi ana, ina he mana kekahi i loaa iaia malalo o ke kanawai, alaila o ka umi makahiki hoopaaho ke kupono o ka hoopa'i e kauia maluna o ka mea hana hewa.
Ma na mea e pili ana i ka hewa i hoopiiia ae ai o Danner, ua lawe aku oia i kana wahine, ke kaikaina o kana wahine, ame kekahi wahine okoa aku, he hoaloha no kana wahine, nolalo o Waimea ae nei, no ka hana hoomoemoe.
Oiai ma kela wahi, ua kukuluia he halelole no na wahine e noho ai, me ka hoolimalimaia ana o kekahi kiakaa otomobile, i mea nana e kii i na kane makemake wahine, e lawe mai, no kahi o ka halelole, a e hoihoi hou aku no ko lakou mau wahi.
O na wahine ekolu na hoike ano nui ma ka aoaoa o ke aupuni, pela me ke kiakaa i hoolimalimaia.
Ma ka aoao hoi o ka mea i hoopiiia, ua hoole loa oia no kona pili i ka hewa, a wahi ana, he huakai holoholo wale no kela aua i hele ai i Waimea me na wahine ekolu, a in a ua hui aku kela mau wahine me na kane, ma ke ano haumia, me ke kue i ke kanawai, na lakou ponoi no i ae aku ia hana, aole mamuli o kona makemake.
Mai ka hora umikumamakahi me umikumamalima minuke ka noonoo ana o na kiure i ka lakou olelo hooholo, ma kela hihia, ahiki i ka hapalua o ka hora elua akahi no lakou a lokahi e ahewa ana i ka mea hoopiiia, a i ka wa i lohe ai o ka wahine a Danner, no ka pili o ka hewa i kana kane, ua maule okea oia.
HIKI KE LAWELAWE I NA HANA PILI OIHANA
Ua hoohuihui ae nei kekahi poe kanaka opio Hawaii ia lakou iho, e lawelawe oihana nei ma keia kulanakauhale, ma ke kukulu ana i keena oihana no lakou, no ka lawelawe ana aku i na hana like ole, malalo o ka inoa Cosmopolitan Business Agency.
Aia ke keena oihana o keia poe opio Hawaii ma ka Hale Lincoln, ma ka rumi Helu 5, e ku nei ma ka aoao mauka o ke alanui Moi, mawaena o ka Hokele Young ame ka Hale Kapiolani.
O na hana pili kanawai apau, o ia hoi ka hana loio, ua makaukau kekahi Hawaii, no ka lawelawe ana imua o na aha kanawai apau; o na aina pohihihi, na hooiaio palapala, ka hana ana i na palapala kuai, hoolimalima, a mau ano palapala e ae: kuai aina, a hoolilo ana i na aina; ka ohi ana i na aie, a mau hana e ae paha i makemakeia, ua hiki loa i keia poe Hawaii ke hooko aku i ka manawa pokole loa.
HE HOOMAIKAI
Ma ka aoao o ka Ahahui Hooikaika Kristiano makua o Waianae, mao kona mau komite la, ke pahola aku nei i na hoomaikai ho nui ina makamaka, na hoaloha, ame na haipule oiaio, no na kokua aloha i haawi ia mai no ka holomua ame ka pomaikai o ka hana a ke Akua.
A elike me ia i hookakaia maloko o na tikiki i kuai ia aku ina hoaloha, o ia hoi ma kela ahiahi Poaono aku la i hala, Maraki 22, 1924, e wehe ia ai he ahamele ma Waianae, no ka pomaikai o ka C. E., o Waianae, a ua hooko i'o ia ia hana ma ka wehe ia ana o au ahamele nei iloko o ka Waianae Theatre.
Ua hoea ae na kini lehulehu e ike kumaka ina hana o ia po, a i ka hora 7:30 p.m., i hoomaka ia ai na hana, a i ke kuupau ana mai o na loea puukani o ka Bana Hawaii me ka lakou mau meakani e kikoni palamimo iho ana me ko lakou manamanalima maluna o na kaula o uwehone me ka paulehia nui, ua oho like ae la ke anaina mai o a o me ka olioli nui, me na leo huro, na paipai lima, na hehihehi wawae, me ke kahea okoa ana mai, hana hou, a au hookoia aku no.
Mamuli o ka nani, a ku no hoi i ka ii, a o ke ano kaili puuwai i mele ia mai e Mrs. L. Alohikea, ua paiakuli ae la ka hale holookoa, me na leo huro, no ia ano ulumahiehie o ke anaina, ua ku ae kekahi hoakanaka i pii kona mau kekele (ana hauoli) i ka 104, a hele mai la e hui pu me na lala o ka Bana Hawaii, e hoonui a hoomahuahua aku i na mea e hoohauoli, a hoakaaka aku ai i ke anaina.
Ua lawa maoli ka makemake i pane mai ai kekahi hoaloha haole o kela apana me ka piha i ka hauoli no na mele ame na meakani nani ana i lohe ai i kela po.
Ua lawa keia mau hoakaka, a e na lima aloha hoomohala mai i na kokua no ka holomua o ka hana a ke Akua, ua wehe ae oukou ina hipuu, a haawi mai la i ka ke Akua a au'a aku la no hoi i ka Kaizara.
Na ke Akua e hoomaikai mai ia oukou apau, a e hoopiha mai i ko oukou waihona piha a palena ole.
No oukou e na Lede ame na Keonimana o ka Bana Hawaii Glee Club, na hoomaikai nui, no ka oukou kokua a kakoo nui no ka holomua o keia hana.
Na ke Akua e hoomaikai a e hoohua nui mai a e hooloihi i ko oukou mau la e ola aku ai, kolopupu a haumakaiole, he ola ia na ke Akua,.
Welina haahaa,
GEORGE MALUNA
Lunahoomalu o ke Komite.
NA HANAU
Na Mr. ame Mrs. Wm. N. Kekoa, he keikiane, Mar. S.
Na Pimonte âme Helen K. Holi, he keikikane, Mar. 5
Na George Rosa âme Edith Crane, he keikikane, Mar. 16.
Na Mr. ame Mrs. Wm. Fred Kaae, he kaikamahine, Mar. 19
Na Mr. ame Mrs. Rogers Kekuewa, he kaikamahine, Mar. 19
Na Mr. ame Mrs.Jos. M. Kekauoha, he keikikane, Mar. 20
Na Mr. ame Mrs. Chas. M. White, he keikikane, Mar. 20.
Na Mr. ame Mrs. David Kahanu, he kaikamahine, Mar. 20
Na Mr. ame Mrs. Abraham Amoy, he keikikane, Mar. 21
Na Mr. ame Mrs. Wm. Kaha, he keikikane, Mar. 24.
NA LEKA I KII OLE IA MAI AHIKI I MAR. 22, 1924.
Iha, Mrs. Gana Kekoa, Mrs. Jno.
Halalii, G. W. Kealoha, Mrs. Solomon
Huihui, Mrs. Bernard Makue, Mrs. Jack K.
Kaai, Mr. Kainea Makekau, Mrs. Mileina
Kauhoka, Mas. John Malailua, Mrs. L.
Kauhane, Mrs. & Mr. Joe Naihe, Mrs. Ida
Kapepa, Mrs. M.K. Namahoe, Mrs. Chas
Kapepa, Miss Amoy Paahao, Albert (3)
Paka, Mrs. John
E ninau mai ma na leta i hoolahaia ke kii mai.
D.H. MaeADAM,
Lunatieta.
POE LAWELAWE OIHANA ma ka inoa COSMOPOLITAN BUSINESS AGENCY
Oihana Loio, Huli i na Aina Pohihihi; Noteri Hooiaio Palapala, Kakau i na ano Palapala apau; Akena Kuai Aina; Ohi Aie ame na hana e ae.
Keena Oihana: Rumi 5 Hale Lincoln, aoao mauka o ke Alanui Moi, mawaena o ka Hokele Young ame ka Hale Kapiolani, Helu 178. Kelepona 6310. 6601-1m.
MA KA HANA O KA HOOPAU ANA I KA PAUWELA LA STORE LTD.,
Hoolaha i ka Poe Paa Aie
Ma keia ke hoikeia aku nei ka lohe i ka poe paa aie apau o ka Pauwela Store, Ltd., e waiho mai i ka lakou mau koi i ka mea nona ka inoa malalo iho nei ma Wailuku, Maui, T.H., iloko o kanaiwa la mai ka la aku o ka hoopuka mua ia ana o keia hoolaha, o hoole mau loa ia aku auanei lakou.
La o ka hoopuka mua ana. Maraki 27, 1924.
K.O W@@@
Kahu no ka põe @@@@@@ põe paa mahele @@@
PAUWELA STORE @@@
6601- Mar. 27, Apr 6, @@@@
KAHEA HALAWAI
E noho ana ka halawai a@@ @@lapi Demokarata o ka M@@ Apana Elima, ma ka la S@@@@@ 30 o Maraki, ma ke alanui o @@@@@ kokoke i ke alanui Nuuanu @@@@@ koho ana i na lunanui @@@@@@@@ lana ame ka hoomaopopo @@@@@@ komite Teritore, a u am@@@@@ na lala apau e akoakoa ma @@@@ la. Ma ke kauoha a ka po@@@
JOHN K. MA@@@
6601- Mar. 27
HOOLAHA AHA MOKUPUNI HOOMANA NAAUAO O HAWAII
He leo hea i na hoahanau @@@ Hoomana Naauao o ka ma@@@@@@ Oah nei, e hoouna ae @@@@@ kihapai, me ko lakou mau @@@@@ ma ia aha e malamaia ana @@@@ Alaula o ka Malamalama H@@@@@ Nauao o Hawaii. 746 Kanoa @@@@@@ Honolulu. ma ka Poakolu la @ o Aperila. 1924 hora 10@@@ @ @@@@ ma ke sabati aku a 20 o @@@@@@@ ai he hoike Kula Euane@o M@@@@@@ i.
E alu mai e na keiki o ka @@@@@@ i kupaa ma ka pono me p@@@@@@ Rev. John K. Maia ame @@@@@@@ H.K. Maia i moe.
DICK. K. DIAMOND Hope Pres. Aha M@@@@@@@@ 6601-Mar.27, Apr. 3, 10
Hoailona AEKO
Waiu Kia
No 64 makahiki ke ku ana he ai maikai na ka bebe ka ai kupono i ka wa e nele ai ka waiu o ka makuahine.
E Hookaawale i Kekahi Hapa o Kou Ukuhana
ma o ka hoahu ana maloko o ka Banako i loaa ai ka hauoli i kou ohana. O ka hoomakaulii o ia ka mole o ka noho na ulakolako ana.
Ua makaukau mau makou e lawe mai i kau mau hoahu liilii.
CHINESE-AMERICAN BANK
Kihi o na Alanui Moi âme Nuuanu.
Pahu Leka 2000
Honolulu T. K. Kelepona 6119
KA MAKEKE BIPI METROPOLITAN MEAT CO.
Ka Home o na lo Bipi Momona no ke Kumukuai Haahaa Loa
Na Io Kamano Momona i Loaa Ole Ma Kekahi Mau Makeke e Ae.
Ka Waiubata Maile He 60c Wale no o ka paona.
E Hele Mai e ike ia makou. Mai Hoohilahila
Metropolitan Meat Market
Ma ka aoao Waikiki o ke kihi o na Alanui Bekela ame Moi