Ka Nupepa Kuokoa, Volume LXIII, Number 19, 8 May 1924 — HAINA NANE. [ARTICLE]

HAINA NANE.

Ia oe o Mr. Solomon Hanohano, ke kapena a hookele o ka mokulele ka Nupepa Kuokoa; Aloha pumehana kaua: —Eia no au ke mioi a nonoi aku noi i kou oluolu no ke kolu o ka manawa ina he wahi rumi kaawale kokahi o ka 'milimili, ka hiwahiwa hoi a ka lahui, no ka hoike hou ana aku i ka'u haina no ka nane a ka keiki o ka aina lewa, hoolewa i ke kai, elike paha mo Hopoe ka wahine hoolewa i ke kai. Ke hooheno nei ka nanehuna a ua kaeaea nei, penei: He manu kupua kana o ka malama ana a huna iloko o ko kiowai o Waiapuka i ko anahuna o Laieikawai i hanaiia ai e Waka. la'u i hihio ai e moe, iko aku la ko'u uhane i ua manu nei ana i ke o-i ana ae mailoko mai o ke kiowai o Waiapuka i Laie, ua hele a kuululu i ka anu, a opeapea aku la ka lel« ana o ua manu nei ana, a kau i ka winiwini o ka halelaa o Laie, hoomanao ae la au o ka manu paha keia a ko keiki hoopapa 0 ka aina lewa i ke kai. Kuu manu, ekolu ekekeu, he umiumi kona mai na ekekeu mai, aole ona panoo, aole apahu kino, aohe hoi he mau wawae. Ke haawi nei keia makapeni i kona mahalo a nui ia oe e J. K. A. i ka noeau o kau hooheno ana i keia nane, aole he pueo nana e poi ko manu, ua hiki ole ia lakou nei ma ae ke wehewehe i ke ahi milohai au 1 u'o ai a paa. I keia lawe kiani ana nae hoi a kuu penikala e puehu liilil al ka hulu o ka manu, o ia iho keia: Haina. 0 ka inoa o ko manu, Hoomana Molemona. Owai na ekekeu o ka manul 0 ka Peresidena nui. O na Lnnakaahelo a haiolelo. o na Lunakahiko. O lakou nei na ekekeu o ka manu a kaua, pololel paha keia? Owai na umiuml i loaa ai ke ola ika manu? Haina. 0 na hoahanau iloko o ka Hoomana o kaua, na kakou e huli ko dala a haawi no ke ola o keia hoomana, a pela aku. Na ka mea heluhelu 1 ike iho i ke ano nui ma keia halna hope. Me keia mau wehewehe ke hoopokole nei au; me ka lana o ko'u manao ua puehu aku la ka hulu o ka manu a kaua. Me oe e ka Lunahooponopono ame na na keiki ulele hua metala ko'u mahalo me ke aloha poina ole, Kou haahaa mau, JOHN KAHALA, Waiakea Homestead Store, Hilo, Hawaii. Bu i'o mai la kau haina i knla, ua hakihaki ka oi o ka penikala, hookala hou ia ko peni a oi! Aia aku la no ka manu a olua iloko o ke kiowa'i o Waiapuka kahi i koopue aL Huli hou ia mai!—h. H.