Ka Nupepa Kuokoa, Volume LXIII, Number 20, 15 May 1924 — KANONO KA HOOPA'I PAAHAO O YAMANAKA [ARTICLE]

KANONO KA HOOPA'I PAAHAO O YAMANAKA

Kanono ka hoopa'i a ka Lunakanawai William T. Eawlina o ka aha federala o ke kau ana mai maluna o Soichi Yamanaka ma ke kakahiaka o ka Poaono aku la i hala elua makahiki ame hapa e noho ai me ka hana i ka hana oolea maloko o 'ka halepaahao no ke ku-e i oa kanawai hookapu opiuma, a mahope o ka pau ana o kona hoopa'i e kipakuia aku ai oia mai Hawaii nei aku a hoi aku i lapana, kona aupuni. He jnau la kakaikahi aku nei i hala ka hooloheia ana o keia hihia o Yamanaka imua o ka papa kiure a ka aha federala i noho kahuia e William T. Rawlins, a hoahewaia e ia papa kiure a ma ke kakahiaka o ka Poaono aku la i hala ke kauia ana mai o ka hoopa'i maluna ona. "He lehulehu loa na kanaka o keia ano maloko o keia kulanakauhale e hele laula mai nei," wahi a ka Lunakanawai ka manawa nna o ke kau ana mai i ka hoopa'i. He manawa aku nei i hala ua hoopiiia ae o Tamanaka no ka waiho ana 100 hunahuna opiuma iloko o ka ume o ka mikini humuhumu maloko o ka hale o Aki laihii, he wahine Kepani. Ma ka manao o ka aoao hoopii, mahope iho o ka hoopa'i paahaoia ana o ke kane a keia wahine Kepani no ka hewa hoowalewale e hookamakama, a o keia wahine e hoomau aku i ka hookamakama ana. Ma ka oleloike i hookomoia ae imua o ka aha iloko o ka manawa 0 ka hookolokoloia ana ua ukali aku keia Yamanaka i ka wahine ahiki 1 Molokai a ua hooweliweli aku i keia wahine ina aole e hooko mai ana oia i kona makemako alaila e pepehiia aku ana oia a make. He leka ka i hooiaioia ae na Yamanaka i kakau, a e hoakaka ana o Yamanaka i kekahi mau olelo hooweliweli maloko, a o ia leka kekahi ike ma ka aoao hoopii i waihoia ao imua o ka aha. Ua ike pu ia ma ka manawa o ka hookolokoloia ana o Yamanaka, he Kepani oia i loaa ole kekahi mau palapala hooia ma kona aoao e hoike ae ana h« kuleana kona e komo mai i Hawaii nei. Mamua aku ua hoopiiia ae oia no elua mau kumuhoopii e ku-e ana iaia.