Ka Nupepa Kuokoa, Volume LXIII, Number 28, 10 July 1924 — HE PANE I KE AKEA. [ARTICLE]

HE PANE I KE AKEA.

Mr. Solomon Hanohano, Aloha oe: —E oluolu e hoike ae i ko makou manao i ke akea, ma ke ku-e ana i kekahi hoolaha i hoopukaia ma kau Nupepa ke Kuokoa o ka la 26 o Iune, aoao elua, kolamu ekahi, nona ke poo, He Leo Hea E Hea Nei, a malalo aku o keia, e olelo ana, e noho ana ka Ahahui Euanelio Paeaina o ka Hoomana Naauao o Hawaii, ma Kaimuki, Alanui Eha, ma ka la 21 o Iulai 1924; ma ke kauoha a W. S. J. O. Makekau, peresidena o ka Paeaina o ka Hoomana Naauao o Hawaii, i hooiaioia e Mrs. Kuapalahalaha, hope kakauolelo o ua aha la: O ka makou e ku-e nei, penei no ia. Aole loa he wahi kuleana iki ma na ano apau o W. S. J. O. Makekau, ame kona pohai i ka inoa o ka "Hoomana Naauao o Hawaii" o ka pohai wale no o Rev. J. K. Kekipi Maia, makua, na hooilina oiaio o ka inoa o ka "Hoomana Naauao o Hawaii", i ku ma ke kanawai imua o na aha apau a keia Teritore aole e ae. "O ka mea pii ae ma kahi e, he aihue ia me ka powa. ANDREW KEAUNUI, •Kakauolelo o ka Paeaina o ka Hoomana Naauao o Hawaii. Koula Honolulu; Iulai 8, 1924.