Ka Nupepa Kuokoa, Volume LXIII, Number 30, 24 July 1924 — MAKE HE WAHINE NO KONA HOOKU'IIA ANA E KE KAA Paa o Solomon Kalima ke Kiakaa o ka Otomobile i ka Hopuia Mamuli o Kela Ulia Poino i Make ai ka Wahine [ARTICLE]

MAKE HE WAHINE NO KONA HOOKU'IIA ANA E KE KAA

Paa o Solomon Kalima ke Kiakaa o ka Otomobile i ka Hopuia Mamuli o Kela Ulia Poino i Make ai ka Wahine

Maloko o ka Halema'i Moiwahine ma ka hapalua o ka hora eono, o ke ahiahi o ka Poakolu, o ka pule aku nei i hala, i pauaho mai ai o Louisa Camacho i keia ola ana, mamuli o na palapu i kau aku maluna o kona kino, ma o ka hooku'iia ana o ke kaa otomobile, e hookeleia ana e Solomon Kalima, mauka ae nei o ke alanui Waiakamilo ame Moi, he hora hookahi mamua aku me ka paa ana nae o Mr. Kalima i ka hopuia. I kulike ai me na hoakaka a na hoike i ikemaka, i keia ulia poino e hele ana o Mrs. Camacho mai ka aoao mauka aku o ke alanui Moi, o ke alanui Waiakamilo ame ka hale paume, a e holo mai ana hoi o Solomon Kalima, mai Kalihi mai no ke taona nei maluna o kona kaa otomobile, a hooku'i ae la ia Mrs. Camacho, ma ke kaualakoia ana aku o kela wahine no kekahi mau kapuai loihi. Mahope nae o ka holo ana aku o ke kaa o Solomon Kalima no kekahi wahi loihi, ua hoopaa iho la oia ka holo o kona kaa, a i kona ike ana mai i ka hookauia ana ae o ka wahine poino maluna o keahi kaa otomobile okoa, ua hoomau mai la no oia i ka hooholo ana i kona kaa. I kinohi, ua manaoia, ua kahi'ohi'o o Mr. Kalima, ma ka manawa e hookele ana i kona kaa, a hooku'i ai me Mrs. Camacho, pela hoi kona noonoo ole e haawi aku i na kokua ana no ka pono o ka wahine poino ua ikeia nae ka pololei ole o kela manao mahope mai. Ma kela manawa o ka loaa ana e ka ulia poino ia Mrs. Camacho, e holo aku ana o Antone Martin maluna o kona kaa otomobile, ma ke alanui Moi no Kalihi, oia ka mea nana i hookau ae ia Mrs. Camacho maluna o kona kaa, a hoihoi ma

la me ka awiwi loa no ka halema'i o na poino ulia, a malaila i lawelaweia aku ai na lapaau ana, no ka hoopakele ana ae i ke ola o kela wahine a mahope iho o kela lapaauia ana, i hoihoi loa ia aku ai oia no ka Halema'i Moiwahine, me kona make koke ana no ke kukonukonu loa, o na wahi o kona kino i poino. Ma kahi kokoke i ka hale o ka oihana kinaiahi ma Kapalama ae nei i paa ai o Solomon Kalima i ka hopuia e Val Cederlof, ka makaininaninau i na kiakaa otomobile, malalo o ke kumu hoopii, he laweola, me ka waiho loa ia ana aku o kona hihia imua o ke kiure kiekie. Ma ka noho ana o ka aha kiure nieniele kumu make, ma ka Poalima mai, i hoopuka ae ai kela kiure i kana olelo hooholo, no ka make ana o Mrs. Camacho, mamuli o ka naha ana o kona poo, i hooku'iia aku e ke kaa otomobile, e hookeleia ana e Solomon Kalima. Ma ke kakahiaka o ka Poaha ana ae, i laweia ae ai ka hihia o Solomon Kalima imua o ka Lunakanawai Hoomalu Steiner, me ka waiho loa ia ana aku imua o ke kiure kiekie, no ka ninaninau pono ia mai. He eha ka nui o na hoike i ikemaka i kele ulia. He wahine o Mrs. Louisa Camacho, nona na makahiki he 56, a ma ka oleloia, me kana kaikamahine oia e noho ai, a o kana kane hoi, me ka laua keikikane. Ua hoaoia na meapaahana o ke kaa otomobile a Solomon Kalima, i hookele ai a loaa kela ulia poino, e ka Makai Lono Mcclum, no ka nana ana i ke kulana maikai a inoino paha, a o kana hoike i hoihoi ae ai ma ka Poalima mai, o ia no kona ike ana, he maikai na meapaahana o kela kaa, e loaa ole ai he mau pilikia, ke akahele ka hooholoia ana o ke kaa.