Ka Nupepa Kuokoa, Volume LXIII, Number 37, 11 September 1924 — HOPUIA HE POE WAHINE NO NA HANA HAUMIA [ARTICLE]

HOPUIA HE POE WAHINE NO NA HANA HAUMIA

No ke kinai ana aku i na hana hookamakama e malamaia mai nei ma kekahi mau wahi o keia kulanakauhale, i hoomaka ae ai na makai, e hopuhopu i na wahine i hoolilo i ko lakou mau kino ame na uhane no na hana haumia, ma ka po o ka Poaono aku nei i hala, mamuli o ka hoea kino ana aku o na makaikiu, ma kekahi mau wahi ekolu, he elua nae o kela mau wahi, ma ka oleloia, he keu aku a ka nui o na hana haumia i lawelaweia. O kahi mua a na makaikiu o ke komo ana aku e hopuhopu, mauka ae nei no ia o Kalihi, ma kekahi hale, i oleloia ae, e nohoia ana e Freeman Rosa ame Helen Martinez. Ua hopuia keia mau mea a elua, e ka Makaikiu Eddie Ross ame mau kokua, pela pu ka poo apau i loaa aku maloko o kela hale, a iwaena o ka poe i hopuia mai, he kaikamahine opiopio kekahi. Oiai o ka hana i lawelaweia maloko o kela hale, ua ku-e ia i ke kanawai federala, e hui pu aku ana ka Makaikiu Kellett, me ka Loio Amerika Carden, no ke kukakuka ana no na mea e hana aku ai, ma ka aoao o ke aupuni federala. O kekahi hale a na makaikiu o ke komo ana aku e hopu, mauka ae nei no ia o ke alanui Nuuanu. He elua mau wahine i paa mai i ka hopuia maloko o kela hale, no laua na inoa o Golda Bruce ame Billie Douglas; Ua hookuu hou ia nae laua, mamuli o ka waiho ana ae i ka bona o $250 pakahi. - E haiolelo ana o Lunakahiko Williams o ka Ekalesia Hoonohonoho Houia o lesu Kristo maluna o ka ninau, "La Sabati," i keia Lapule ae, hora 7:15, me kekahi kii hoakaka. Owai ke Sabati pololei—o ka La Mua a i ole, o ka Hiku o ka La?