Ka Nupepa Kuokoa, Volume LXIII, Number 38, 18 September 1924 — KUU KANE ALOHA, UA HALA. [ARTICLE+ILLUSTRATION]

KUU KANE ALOHA, UA HALA.

E Mr. Lunahooponopono o ke Kuokoa, Aloha oe: —E oluolu mai oe i kekahi rumi kaawale o ka hiwahiwa a hookomo iho i keia mau hopunaolelo e kau ae la, i ike mai ai na kini na lehulehu o kuu kane aloha i hala, Mr. Keawepooole, mai ka la hiki ma Kumukahi ahiki i ka welona a ka la i Lehua moku au i ke kai oiai ua oluolu i ka Makua Mana Loa, ka lawe ana aku i ka hanu ola o kuu kane i aloha nui ia, mai ko maua home aku ma Pauoa i ka hora 12 awakea o Sept. 3, 1924, a waiho iho la i ke kino e moe oni ole ana imua o'u me ka maua lei aloha Miss Pearl Mahealani Keawepooole. Ua hanauia kuu kane aloha mai

ka puhaka mai o Mrs. Lilia Moakeawe (w) me Mr. Keawepooole (k) ma Pauoa, i Oct. 9, 1859; ua piha iaia na makahiki he 64 11 mahina, me 28 la o ka hanu ana i na ea huihui o keia ola honua ana. He kupa, he kamaaina oia no Kalikolehua o Pauoa, he kamaaina i na poe apau o keia kulanakauhale, mai ka poe kiekie a ka poe i like meia oiai oia e noho ana ma kana oihana mua he luna pena hale a mahope mai i ka lilo ana o Haalilio ilamuku nana i hookohu ae i kuu kane aloha, (Keawepooole) i makai kula, ma ia oihana oia i noho loihi ai he mau makahiki a pau o Haalilio noho mai o Kale Loke i Ilamuku, nana i hookohu hou ae i kuu kane i wiliki - o ka halepaahao kalana, a malaila oia i ku iho la ahiki i kona pauaho ana mai la. E kala mai ia'u, ua loaa mua no oia i keia ma'i i Mei 1922, mailaila mai a Iune makahiki 1923 pau, he ma'i he nae, me ka paupauaho. Mai ia wa mai ola maikai mai oia, ahiki iho la i Iune 24 1924 loaa hou no ia ano ma'i mua ona, a hala wale aku la i Sept. 3, 1924. Auwe kuu kane e kuu hoapili hoi o na wa apau; kuu makuakane, kuu mama, auwe aloha ino oe, haalele iho la oe ia'u me na keiki lehulehu a kaua, na moopuna lehulehu, me na hunona oiai na'u keia ohana nui me ka'u kane mua, eia nae, ua luhi pu no keia kane aloha a'u i ka'u mau keiki a mau moopuna, pela no hoi ia'u kana wahine, pela pu i na ohana apau. O kuu kane aloha he puuwai hamama, ina poe apau, he oluolu he palena ole kona lokomaikai, a'u i ike pela no kekahi poe mawaho aku. O kuu kane he hoahanau kahiko no ka Ekalesia o Kaumakapili, he luna no ia ekalesia, he lima akau no ka ke Akua hana, he makua e hookipa ana i na Kula Sabati, ma ua mea e oluolu ai ke kino, he makaala oia i na hana a ke Akua ua pau iho la. I Aperila 1924 iho la no hoi pu mai la me a'u kana wahine he hoahanau no ka Ekalesia o Kawaiahao, oiai au ma ia ekalesia. Ua hoohuiia maua ma ka berita maemae o ka mare i Iulai 4, 1913, a ua piha ia maua na makahiki he 11, me elua mahina o ko maua pili pu ana, a waiho iho la ia'u e u aku mahope nei me ka naau manawaino. Ma keia, ke haawi nei au i ka'u hoomaikai nui ia Kale Loke ka mea nana i haawi mai i kana hana i

noho pu iho la me William Punohu a me kona mau hoa paahana (makai) na makamaka na hoaloha na ohana apau a me ka Ahahui Poola wahine e hoomaikai nui aku ia lakou, i ko lakou ku kiai ana no ka'u mea aloha, a me ke kai pu ana i ka huakai hope a kuu mea aloha he kane, pela pu me ka poe apau i lawe mai i ka lakou mau poke pua pela pu me na Kahu Ekalesia, Rev. H. Poepoe ame Rev. Akaiko Akana, na keia mau makua i puana hope i na olelo a ka Haku maluna o ke kino wailua o kuu mea aloha ma kahi o Silva a ma ka ilina o Nuuanu a pela pu me kuu Aahui Poola (w), ke hoomaikai nei au ia lakou no ko lakou ku kiai ana a me ko lakou kai pu ana ma ka huakai hope loa o kuu kane aloha. Na ke Akua e hoomama mai i kuu naau luuluu a kaumaha. Ke hooki nei au me ka waimaka a maluna ou e ka Lunahooponopono me na keiki o kou papapa'i ko'u welina hope loa. Owau iho no me ka luuluu, MRS JULIA S. KEAWEPOOOLE, Me ka Ohana. Pauoa, Honolulu,

•LAPANA KEAWEPOOOLE,