| | HE MOOLELO No Ke Kaikamahine 0 Ka Pouli A i Ole
Ka Iliohae Iloko o ka Aahu Huluhipa ame na
Alahele o ka Poe Ino. "Ua hehena anei oe e Mine?" i pane aku ai o Kaloke me ka
hulili o kona mau maka me ka inaina. "Ua nele anei oe i ka
puuwai, i komohia ole iho ai ka manao aloha iloko ou no kou
makuakane, a lawelawe aku i kekahi hana e maopopo ai kona
wahi o ka nalowale ana? Ina ua lawelaweia he karaima pepehi-
kanaka ma kekahi wahi o Pinelana nei, he hana pono loa nau,
e huli aku i ka oiaio, aole o ka po'ipo'i wale iho no, me he mea
la, o oe pu kekahi i komo like me keia kanaka ma ka huna ana
i kekahi karaima puuwai eleele. Pehea kela mau kulu koko a
na kauwa i hoike mai nei ma ka luawai kahiko? E waiho wale
aku anei oe ia mea me ka huli ole i ka oiaio, malia paha he
kulu koko ia no kou makuakane?"
"He manao koho wale aku no kela na keia mau Paele hoo-
manamana, e ike aku ana oe i ka oiaio o keia mea a'u e kamai-
lio aku nei, ma ke kakahiaka o ka la apopo."
"Aohe kakali ana aku ahiki i ke kakahiaka, i keia po no e
huliia aku ai na mea oiaio," alaila huli ae la o Kaloke imua o na
kauwa Paele, a pane aku la :
"Ke makemake nei au ia oe e Kamuele ame Hakala, e kii
i mau ipukukui hele po, i mau kipikua, kaula ame na alapii
loloa, a e hele kakou apau no kahi o ka luawai i keia manawa
ano, me ka hakalia ole. Ina aia maloko o kela luawai kekahi
meahuna kahi i hunaia ai, ma keia po e hua'iia ae ai meahuna
i ke akea, aohe kakali ana aku a ke kakahiaka o ka la apopo,
nolaila e hele koke e hooko i ke kauoha a'u i haawi aku la !"
Hakalia no a pau kela mau olelo a Kaloke o ke kamailio ana
mai i na kauwa Paele, ua hoomaka aku la ua poe kauwa nei
e hoIo no kahi e waiho mai ana o ke alapii, aole nae lakou i
kau aku iluna o na anuu mua o ke alapii, po-ha ana no ka
leo o Mine i ka pane ana mai:
"Uwoki!" wahi ana me ke ani ana ae o kona lima maluna
o ke poo. "Ke kauoha aku nei au ia oukou apau, aole loa e
hoolohe i na olelo a keia komohewa, keia aeahaukae, keia
kaikamahine, o ka laweia ana mailoko mai o ka hale o na
keiki makua! Owau ka haku maloko nei o keia hale, a o ka'u
kauoha wale no ka mea hooloheia e oukou e keia poe kauwa,
aole o ke kauoha a kekahi mea e ae. Ke papa loa aku nei
au ia oukou, aole e lawelawe i kekahi hana, me ko'u kauoha
ole aku ia oukou !"
"Ke papa nei anei oe i na kauwa aole e huli pono aku i
kekahi hana pohihihi i lawelaweia? O ke ano iho la anei ia
o ke kaikamahine i aloha i kona* makuakane, malia paha o
ke pio e waiho mai la iloko o ka luawai kahiko, o kou makua-
kane ia?" wahi a Koloke, me kona hopohopo ole iho, ia Mine.
"Ina ua hana i'o ia he karaima pepehikanaka, heaha iho la
kou kumu o ka papa ana aku i na kauwa aole e huli i ka mea
oiaio?"
"No ka mea o ko'u makemake ponoi no ia, a ma ko'u ano
he haku maluna o na mea apau, o ko'u leo wale no ka na kauwa
e hoolohe mai ai, aole o ke kauoha a kekahi mea okoa ae."
"Aole au e hoopaapaa wale aku ana no kou kuleana, aka
nae aole oe i hoakaka mai nei, i ke kumu, o kou hoole ana, i
ka noii ana aku i na mea e pili ana i kekahi karaima i hanaia
i keia po," wahi a Kaloke, me kona haawipio ole aku ma-
lalo o Mine.
"Alaila aole anei ou manaoio, i na hoakaka a Pilipo Kuaina
i keia po, no kahi i hele aku ai o kou makuakane, pela hoi
me Mr. Kakona kana kakauolelo," wahi a Mine o ka pane ana
mai ma ke ano hoolalau. "Ke ole au e koho hewa, ua kapa
mai nei oe iaia i ka hoopunipuni, aole anei pela?"
" Ae, ua kapa aku nei au iaia i ka hoopunipuni, a ke olelo
hou aku nei au, oia kekahi o na kanaka ino lapuwale loa."
"Ina ua kapa aku oe i ke kane a'u e mare aku ana, i ka hoo-
punipuni, alaila ke olelo nei au, ma keia wahi iho la, pau
kau mau hana hoohaahaa iaia, ua lohe mai la anei oe e Ka-
loke? No ka elua o ka manawa, ke papa aku nei au i keia
poe kauwa Paele apau, aole lakou e hoolohe i kau kauoha;
a ke hoole nei au, no ke kiiia aku e wehe kela luawai kahiko
i keia po !"
Aneane e hiki ole ia Kaloke ke pane aku ke ike la oia, aole
he hana maalahi ma kona aoao, ka hoao ana aku e ku-e aku i
ko Mine kuleana ,aka nae mahope o kona noho hamau ana,
oiai hoi kona mau maka e haka pono aku ana maluna o Mine,
pane aku la oia i ka i ana ku :
"Me ko'u nana ole aku i kou mana e Mine, e hele kino ma-
oli aku ana no au no kahi o ka luawai kahiko, a me kuu mau
lima nei, e lawe pakahi ae ai au i na pohaku apau mailoko
mai o kela luawai, ina aole e komo mai ana na kauwa ma ke
kokua ana ia'u."
"Aole loa oe e hooko elike me kau mea e manao nei e Ka-
loke, ke lohe mai la anei oe?" me ka hookiekie ana ae o Mine
i kona leo, oiai hoi na kauwa e nune ana mawaena o lakou
iho, no ko lakou makaukau loa, e haawi mai i na kokua ana
Ia Kaloke. "Ina oe e hoao ana e hele no kahi o kela luawai,
e ike ana oe. aole au e ku wale aku ana a nana, me ka lawelawe
ole aku i kekahi hana nou e poino ai, nolaila e akahele e Ka-
loke, o hoea mai auanei ka la au e mihi ai me ka walania
Ioa!"
"Ke kokua nui loa aku nei au i kena manao ou e Mine,"
i pane mai ai o Matado, ma ke ano hookanaaho, no ko laua
pono, oiai ke ike la oia i ko laua poino maoli, ke heleia aku
ka luawai e huli e Kaloke ame na kauwa Paele. "Aohe hoo-
ponopono hou ana aku e Mine, ua hoao aku kaua ma na ano
apau e hoakaka, i na mea kupono, eia nae aole he hooloheia
mai, o ka hana pono wale no, o ia ka hoohana na aku i kou
mana. O oe e Mine ka mana ame ke kuleana maluna o keia
mau kauwa, he leo mana kou, e kauoha ai, e hoopaaia na
kauwa hookuli iloko o kekahi wahi paa, a ma ka manawa e
huli hoi mai ai o kou makuakane, aole ana e nele kona haawi
mai i na apono ana no na mea au i hana aku ai, oiai nae e
kakali ana kakou a hoi mat oia, e hoopaaia o Kaloke maloko
o kona rumi, me ka hoonohoia o kekahi poe kiai mawaho
o kona rumi, i ole ai oia e holo mahuka."
"Ua pono kena manao ou e Pilipo, kuu kane hoopalau,"
wahi a Mine me ka lamalama ana ae o kona mau papalina,
no ko laua lanakila maluna o Kaloke. "Ma kau mau mea apau
e kamailio mai ai, malaila au e hooko aku ai, a malaila pu na
kauwa apau e hooko mai ai."
"Aole loa e hiki i kau mau kauwa, aole no hoi oe, ame kou
hoa ohumuhumu nei e aa e kau mai i ko oukou mau lima ma-
luna o'u," wahi a Kaloke me ka hele a piha i ka huhu. "Ina
oe e hoao mai ana e Mine e hooko i kou mau makemake ma-
luna o'u e ike auanei oe, i kou ku i ka hoka, no ka mea aole
loa he hookahi iwaena o keia mau kauwa lehulehu, e hoolohe
aku ana i kou leo. I wahi nou e ike pono ai I ka oiaio, e hoao ae
ana oe e kauoha ia lakou e hopu mai ia'u!"
Haawi i'o aku la o. Mine i ke kauoha i na kauwa Paele, e
hopu mai ia Kaloke aohe nae he wahi mea a neeu mai o ua poe
kauwa nei, mai ko lakou wahi e ku ana, koe wale no ka namu-
namu ana mawaena o lakou iho, a he hookahi Paele i pane
okoa mai: | "Aole e hiki ia makou ke hoolohe aku i kau kauoha, aole
loa. Aole makou i hoolimalimaia e Kenerala Rudena i mau
kauwa, no ka hoolohe ana aku i kekahi haku okoa ; aka e ma-
lama makou me ka makaala loa ia Kaloke; nolaila e ike mai
oe e Mine, aole e hiki ia makou ke hooko aku i kau kauoha."
"Ke lohe pono ae la no oe i ka manao o ko mau kauwa,
aole ou mana maluna o lakou," wahi a Kaloke, me ka noke
ana ae i ka akaaka pahenehene.
"Nele ae la hoi ka hooko ana mai o keia poe kauwa ino i
ka'u kauoha, ke makemake nei au ia oe e Pilipo, o oe ka mea
nana e hoopaapio aku i keia kaikamahine hookano maloko o
kona rumi. Ina ua hiki ole i na kauwa i hoolimalimaia me
ke dala, ke hooko i ko'u makemake, alaila o oe auanei e Pilipo,
;a mea nana e hooko aku. Ua noi mai oe ia'u e lilo aku i wa-
hine nau, a ua haawi aku au i ko'u ae, nolaila i hoike no kou
aloha ia'u, ke makemake nei au, e lawe aku oe i keia kaika-
mahine, a hoopaa maloko o kona rumi, me ka laka ana aku i
la puka a paa."
Aia no o Kaloke ke ku malie la i kahi hookahi me kona
maka'u ole no kona kiiia mai e Matado a hoopaa aku maloko
o ka rumi. I kela lohe ana aku hoi o Matado i ke kauoha a
Mine iaia e hopu ia Kaloke, nee mai la oia imua, no ka hopu
aku i ka laua pio, o ka mea nae i ikeia, ua hopu oia i ka puahi-
ohio, ua ohi i ka makani, no ka mea mamua o ka pa ana aku
o na lima, o ua kanaka nei i ke kino o Kaloke, ua komo e ae
la kekahi mau Paele mawaena o Kaloke ame ia, a iloko no hoi
o kela manawa hookahi, i loaa mai ai ke poo 6 Matado i
kekahi pauku laau i nouia mai, a kikihi ana a pili i ka paia.
"Manao paha oe e keia kanaka ino lapuwale, he hana hiki
ia oe ke kau aku i kou mau lima huluhulu maluna o keia kai-
kamahine," i pane mai ai kekahi Paele wahine, me ka wili-
wili okoa ana mai i kona puupuu imua o Matado, oiai ua ka-
naka nei. e lomilomi ana i kona poo.
"Ua laki maoli i ko'u hoea ana mai nei i ka manawa ku-
pono loa. no ka hoohoka ana aku i keia kanaka limanui," i
hoomau hou aku ai no ua wahine Paele nei i kana kamailio
ana. ''Ua puiwa ko'u hiamoe, i ke kani ana ae nei o ka pele
kahea, pela au i holo awiwi mai nei, no ka ike ana i ke kumu
o kela bele eia ka he pilikia, a he poino ke hoopuni nei ia oe e
Kalohe, Imua o makou na kauwa apau, ua haawi mai o
Kenerala Rudena i ke kauoha paa, e kiai makou a e makaala
ia oe; owai auanei keia mau alauka a makou e hoolohe aku ai
i ka laua mau kauoha?"
MOKUNA XVIII.
Mamuli o kela kupale ana no kona pono, pela hoi na olelo
i kamailioia ae e ka wahine Paele, hookau iho la o Kaloke i
kona mau lima ma na poohiwi o ua wahine Paele nei me ka
pane ana iho:
"Nani wale kou ku ana e Anate Kole a paio no ko'u pono;
aka nae aole no o'u maka'u iki i keia kanaka, no ko'u ike no,
ina aole oe i hoea mai nei, he nui no ko'u mau hoaloha iwaena
o na kauwa, a'u e uwalo aku ai imua o lakou, no ka haawi ana
mai i na hoopakele ana.
"He nani nae ia, ua ku keia mau mea i kahi o ka hoka, a eia
me a'u ka lanakila i keia manawa, ke makemake nei au e lawe
ae i ka mana o na mea apau iloko o ka poho o kuo mau lima, a
hoolilo aku ia laua i mau pio na'u."
"Aole oe e aa ana e Kaloke, e hoolilo aku ia'u he pio nau !"
i puoho mai ai o Mine, me ka leo o ka mea i hele a piha i ka
maka'u.
Aohe hoolohe aku o Kaloke i kela mau olelo, aka huli aku la
oia imua o na kauwa, a pane aku la:
"Auhea oukou e na kauwa a kuu makuakane, na kauwa i
noho aloha pu me a'u ahiki i ka hoea aha mai o keia mau mea
komohewa, ke uwalo aku nei au imua o oukou, e kokua mai
ia'u, iloko o ko'u wa o ka pilikia. Ke manaoio loa nei au, ua
lawelaweia kekahi hana karaima i keia po; o ka paakiki o
keia mau mea, aole e hu eia ae na pohaku oloko o ka luawai
kahiko, he kumu hoohuoi kupono loa kela e kanalua ole ai
kakou, i ke koho ana aku, ua maopopo ia laua na mea i hanaia
i keia po. E hopu ia laua ua lawa ko oukou ikaika ke huiia,
e hoolilo ai laua i mau pio; a mai hookuu iki ia laua, ahiki i
ke kuekaaia ana olaio o ka papaku o ka luawai kahiko!"
Aole kela he manawa no ke kukakuka ana i kekahi alahele
e palekana ai laua, a mamua o ka maopopo ana ia Mine ame
Matado, na mea e kau aku ana maluna, o laua, ua hoopuni
koke ae la na kauwa Paele ia laua, a lilo iho la i mau pio, na
ke kaikamahine a laua i kapa aku ai i na ano inoa haahaa
apau.
"Heaha ka manao o keia hana au e Kaloke?" i pikanana mai
ai o Mine, i ka manawa i hopu aku ai kekahi mau Paele i
kona lima, no ka hoopaa ana i ke kaula, me kona ike pu ana
aku i kana kane, e noke ana i ke kupaka, i wahi e pakele ae
ai mai na Paele mai, e nikiikii la i kona mau lima, me ke kaula.
"E ike ana oukou e keia poe Paele i ka hoopauia e a'u, mai
ka noho kauwa hou ana mai maloko o keia home! E ike ana
oukou e keia poe Paele ino, i ko oukou uku, i kekahi uku
hoopa'i ko'iko'i loa, ke loaa hou ia'u ka hele lanakila ana !"
"Aohe a makou nana no kau mau olelo hooweliweli," i pane
ae ai o Kamuela, me kona hoopaa ana iho i na lima o Mine
i ke kaula. "Aole i ike iki ia kekahi pilikia ma keia wahi mai
ko makou noho ana me ko makou haku wahine nei, aka i koa
hoea ana mai me keia kanaka o ka wa ia i ala ae ai keia pili-
kia; nolaila e lohe pono oe e Mine ea, ina e ku ana ko makou
haku wahine a hele mai keia hale aku, o makou pu kekahi e
ukali aku mahope 6 kona meheu."
Ua olowalu like mai la na kauwa apau e haawi mai ana i ko
Iakou apono i na hoakaka a Kamuela, aia hoi o Mine ame Ma-
tado, ke hookuoo wale la no, oiai nae, ke opoopo wale la no ko
laua oili, no ka loaa pono aku o na kino make elua maloko o
ka luawai.
"Auhea oe e Kaloke, ina oe i hoolohe mai nei i ko'u manao,
aole au e lokoino loa ia oe, aka e hookipa mai no au ia oe ma-
loko o ko'u home, a e hoolako aku hoi i na mea apau e oluolu
ai kou hoho ana ; aka no keia hana nae au i hookau mai ai
maluna o'u ame kuu kane hoopalau nei, e hoonele loa aku
ana au ia oe ma na ano apau, a e ku aku ana oe a hele mai
keia home aku."
"Aohe loa a'u kauka'i ana aku e loaa mai kekahi mea ia'u
mai ia oe mai, aole loa!" wahi a Kaloke me ke ku ana ae a
maloeloe iluna. "No kau mau mea i kamailio mai nei i ko'u
kulana haahaa, ke manao nei au, aole i oi iho ko'u ino, mamua
o kou. Mamuli o kou komo pu ana aku me keia kanaka, ma
ka hooikaika ana e hooko ole ia na hana a'u i makemake ai e
hanaia ma keia po, ua kono okoa ia mai au e olelo ae, aia ke-
kahi hana ekaeka loa i lawelaweia, me ko olua ike like ia hana,
a o olua maoli no na mea na laua i hooikaika ma na ano apau
e kaawale loa aku o Kenerala Rudena ame Mr. Kakona, mai
ko olua alahele ae.
"Ke nonoi nei au ma ka inoa o na lani, e huikalaia mai au ke
olelo ae, me he mea la, o oe ponoi no e Mine, ka mea nana i
pepehi i kou makuakane, a kiola aku i kona kino kupapau
iloko o ka luawai kahiko, i wahi e nalowale ai ke karaima
ekaeka i hanaia e oe; nawai kou paakiki ino loa, aole e huliia
oloko o kela luawai !"
Ua hele na papalina o Mine a haikea, i ka wa a Kaloke e
kamailio aku la i kela mau olelo, oiai hoi o Matado e hoolohe
mai ana, me ka pinapina'i o kona hanu ana, e hoike mai ana,
i ka loaa pono o ka laua meahuna, oiai nae he manao koho
wale aku no kela o Kaloke.
"Ke manaoio loa nei au, mamuli o na hoailona a'u e ike aku
nei maluna o keia mau mea, ua hana i'o ia no ke karaima
pepehikanaka; nolaila e kaualako aku e kuu mau kauwa ia
laua no kahi o ka luawai kahiko, ina aia i'o ma kela wahi, kahi | i waiho ai o na kino make elua, alaila e lilo laua i mau hoike
ikemaka, no ka laua mea i haoa ai."
He mea makehewa wale no ia Mine ame Matado ke hoala
mai i na ku-e ana, oiai ua like ko laua ikaika ke huiia, i mea
ole loa imua o kela poe kauwa lehulehu, he hookahi no hana
poao, ma ko laua aoao, o ka ae aku e alakaiia me he mau lawe-
hala la, a e kakali aku hoi o ka hoea mai i ka hopena o na mea
a Kaloke i manao ai e hana aku.
No ka makee no nae ame ke aloha o na Paele no Kaloke,
kii okoa aku la kekahi poe o lakou i. kuka hoopumehana me
kekahi kihei, a hoomaka aku la ko lakou hele ana no kahi o
ka luawai, iloko o ka hu'ihu'i ame ke anuanu o ka po.
I ka hoea ana aku o na mea apau no kahi o ka luawai ka-
hiko, kii aku la na kauwa i ka wahie, hoakoakoa mai la i kahi
hookahi, a hoomaka ae la e ho-a no ka hoomalamalama ana
i kela luawai, a no ka hoopumehana ana mai hoi i na mea
apau:
"Aole he kumu e ae i hiolo ai na pohaku iloko o keia luawai,
i hoohiolo maoli ia no e ke diabolo," i pane ae ai o Kamuela, me
kona kuhikuhi ana aku i kahi o ka puna i hamoia ai mawaena
o na pohaku.
Me ka hoohakalia ole iho, hoomaka aku la na Paele e
wehe i na pohaku mailoko ae o ka luawai, aia hoi o Matado
ke ku malie la, me ka pane ole ma ka'e o ka luawai, hookahi ana
hana, o ia ka nana ana aku i ka hapai pakahi ia mai o na po-
haku iluna, ame ke emi mau iho o na Paele iloko o ka luawai,
aia nae iloko ona na manao hopohopo, no ka hoea mai i ka
manawa e loaa pono aku ai na kino elua o kela mau Paele,
a ke nalu la oia, no ka hiki ole e pakele mai ke kau ana aku o
na ahewa ana a ke kanawai maluna ona ame kana wahine.
No na hora lehulehu kela hooikaika ana a na kauwa Paele
e wehe ae i na pohaku mailoko o ka luawai, aia na mea apau
ke kakali la me na manao pihoihoi, no ka hoea mai i ka manawa
a lakou e ike aku ai i kekahi hiona ku i ka menemene.
Me na manao piha inaina nae, ame ka hoonaukiuki, ke noke
mau la o Mine i ke kamailio i na olelo hoinoino maluna o Ka-
loke ; aia nae iloko o kona puuwai, ke maka'u loa la oia ia Ma-
tado, no ka loaa pono o ka epa ana i hana ai, o ia ka loaa ole
aku o ke kino o Pilipo Kuaina oiaio, maloko o kela luawai.
"Auhea oe e Kaloke, aole, oe he kaikamahine na Kenerala
Rudena, aka he wahi kaikamahine, haule wale oe, i laweia mai-
loko mai o kekahi Hale o na keiki makua ole, nolaila aole loa
ou wahi pili iki ia Generala Rudena, ua like no oe me keia
poe Paele e noho kauwa kuapaa nei. Ina owau ma kou wahi,
he keu aku maoli a ko'u hilahila, pela keia ikeia ana ae, he
keiki makua ole oe," wahi a Mine o ka noke ana mai i ke ka-
mailio i na olelo hoinoino maluna o Kaloke.
Aole i pau aku na mea a Mine i makemake ai e kamailio
mai no ka hoohaahaa ana i ka mea nana i hoao aku e hoohoka
iaia, ia wa i loheia aku i ka leo o Kamuela i ka pane ana mai-
loko mai o ka luawai :
"Aohe pohaku i koe maloko nei o keia luawai, o ka mea
apiki nae, aole kekahi kino make maloko nei, aole he kulu
koko, amau hoailona e ae paha no ka hanaia ana o kekahi
karaima pepehikanaka. O keia ka mea oiaio loa a'u e kamai-
lio aku nei, elike ka oiaio me ka ili o ko'u mau lima."
r kela lohe ana aku i na olelo mai ia Kamuela mai, holo like
aku la o Kaloke ame Mine, no ke ka'e o ka luawai, ua hoea
mua aku la nae o Matado malaila, a ke kiei ha-lo ilalo o ka
loko wai, o ia no oe o kekahi kanaka e kilohi ana maloko o ke
aniani, ina paha no kona ike aku i ke aka o kekahi meakino.
Aole i'o he mea i loaa aku maloko o ka luawai, ma kela huli
ana a na kauwa Paele, eia nae iwaena o kela poe apau e nana
la nolalo o ka luawai, he elua wale no mau mea kino, i maopopo
i ke kiolaia ana o Kenerala Rudena iloko olaila; a i ka loaa ole
ana aku o kona kino, ua hoopiha loa ia aku laua me ke kahaha
ame ka hopohopo pu no ka loaa o ke karaima a laua i hana ai.
He keu aku maoli keia a ka mea kupaianaha!" i hooho ae
ai o Kaloke me ka hoomamaia ana aku nae o kona noonoo ma
kekahi ano, no ka loaa ole ana aku o ke kino make o kona
makuakane ame ko Mr. Kakona. "Me keia mau kulu koko
e kihe'ahe'a nei ma ka'e o ka luawai, ua hoopohihihi loa ia mai
ko'u noonoo, i kahi o ka hoea ana mai o keia koko !"
"Aohe he mea maloko o ka luawai!" i kamailio ae o Mine,
nia ka olelo Paniolo e lohe mai ai o Matado."Aole i maopopo
iki ia'u ke ano o ka nalowale ana o kela kino," alaila huli aku
la oia imua o Kaloke, a kamailio aku la, ma ke ano kuoo, o ia no
oe o kekahi moiwahine, i hoihoi hou ia ae noluna o ka noho
kalaunu, a i mai la :
"Auhea oe e ka Momi o ka Poe Lo-pa, ua pau iho la anei
kou kuhihewa, no kou mau manao paakiki ? Pehea, ua loaa
aku la anei ka ike ia oe he kuleana nui ko'u o ka hoole ana, no
ka huliia oloko nei o keia luawai. Pehea aole anei ua hoopauia
aku la kou kuhihewa, a na pololei na olelo a Mr. Kuaina i ka-
mailio aku ai ia oe, no kahi i hele aku ai o kuu makuakane ame
Mr. Keoki Kakona?
"Ua papale ae oe i ka'u mau kauoha, ua ku-e aku hoi i na
olelo a'o maikai apau a kuu kane hoopaiau, i uwalo aku ai
imua ou. Ua lawe ae oe i ka mana iloko o kou mau lima, e
ku-e mai i ko maua mau makemake apau, a ua komo mai na
kauwa Paele, ma ke kokua ana ia oe ; o ka'u wale no e hoike
aku nei, e hooko aku ana au i na mea a'u i kamailio mua aku
ai ia oe, no kou huli aku i wahi hou nou e noho ai.
"Ua kapa mai oe ia'u i na inoa maikai ole, ua hooili mai i na
hoinoino he nui, me ka hoohaahaa ana ia'u, no ia hana nae au,
ame ke komo ana mai o na kauwa e kokua ia oe, ke kauoha
aku nei au ia oukou apau, e ku a hele mai na palena aku o
Pinelana nei, a aole e kiei hou kou poo, maloko o kuu home.
E lohe hou oe e keia kaikamahine kama ole, i keia manawa no,
e huli aku ai oe i wahi hou nou e noha ai, a mai hoao e hele ae
mamua o ko'u alahele, o ike auanei oe, aole he hana paani wale
no, ka hoao ana mai e ku a paio imua o'u."
"Ke hoomaopopo nei au i kau mau mea apau i kamailio mua
mai ai ; aka no na mea e pili ana i keia luawai, ua like no ko'u
kahaha, elike me kou, no ka loaa ole ana o kekahi mea maloko
olaila Ke hoomaopopo pu nei au i kou olelo ana mai ina nei
no ka hiki ia'u ke hooiaio i kou mau ano ino a lapuwale,
alaila e kipaku no oe ia'u mailoko aku o ka home o Kenerala
Rudena ; a ke hooko nei oe. ia mea, nolaila e ku ana au a hele
mai ka home a'u i noho aloha ai mai ko'u mau la kamalii mai,
a na ke au auanei o ka manawa, e hoike mai, o oe ana paha ke
noho haku maluna o kela home, aole paha."
"Aole oe e hele kuewa ana e kuu lei ma ke ala me
ka waimaka, aka aia he home ke kakali mai la nou, o ia no ko'u
home, ka home i haawiia mai no'u ponoi, e ka makuakane o
Kenerala Rudena, ua hiki ia'u ke hookipa mai ia oe maloko
olaila e ike ole ai oe i ka pilikia ame ka poino," i pane ae ai
ka wahine Paele nona ka inoa o Kole, a o ke kahu hanai no
hoi o Kaloke i kona wa bebe.
"Ea, aohe au hookololohe hou ana iho e Kaloke, ua pa mai
la kaua i ka leo, e hoi mai oe maloko o kuu home e noho ai."
Mamua nae o ka hiki ana ia Kaloke ke pane aku i kela mau
olelo, ua hoea mai la kekahi o na kaikamahine Paele lawelawe,
a i mai la:
"E Kaloke ke kaikamahine maikai Ioa, iwaena o na kaika-
mahine apau, he leka ka'u i lawe mai la nau, na kekahi keiki i
lawe mai nei me ka awiwi Ioa, a kauoha mai nei, e lawe koke
inai au a haawi aku ia oe."
"Na'u anei keia leka?" wahi a Kaloke me ka manao, he leka
paha kela mai kona makuakane mai, a i ole mai ia Keoni Ka-
kona mai paha, aka iaia nae i nana iho ai i ka lima kakau ma-
waho o ka w-hi. ike iho la oia, he mea okoa loa ka mea naa
i hoouna mai i kela leka.
(Aole i pau.) | HE MOOLELO KAMAHAO.
No Ko Geofere Lanakila Ana A I OLE
KE KEIKI MAKUA OLE I PALUA KA HANA EPAIA. "Aole o'u makemake la oe e Hoopoina ia mau olelo, e Gelade,
a no ka mea ua pahaneri ko'u aloha ia oe i keia po mamua o
na manawa e ae, a he mea pono ia'u e huai aku i ko'u mau
manao a pau imua ou i mama ae ke kaumaha, a ina aole pela
e naha ana ko'u puuwai no ke aloha ia oe."
"Owai auanei ka mea minamina aku ia oe ina e naha ana
kou puuwai no ke kumu ole. E Mr. Mepelasona," me ka eu
ana ae e ku iluna mai kona noho ae, me ka hulili o kona mau
maka i ka ua mea o ka piha loa i ka inaina; aole ou kuleana
iki e kamailio mai ai i kekahi mea e pili ana i ke aloha no u, he
aloha i hiki ole ke panaiia aku, me kou ike no aohe ou wahi
pikineki iki ia mi nei."
"E hoole mai ana oe i ke aha, he kuleana ko'u?" wahi o ka
pane kanaka a ke kanaka opio i piha i ka wela kohu ole," he ku-
leana ko'u mamuli o kuu aloha make ole me ka iini uni iloko
o'u e lilo oe na'u i panai no kuu aloha."
"Aohe ou wahi lihi iki ianei ; aiole mea hiki ia oe ke liana
mai e lilo aku ai kuu aloha ia, oe he oki loa ; pehea la oe i aa
ai e kamailio mai ia u me kena mau huaolelo no kou aloha?
Ehele oe pela ma'i o'u aku nei," i pane hou aku ai o Gelade,
eia nae, aole ae mai o Everte e lanakila aku kana mau olelo
maluna ona.
"Pehea au i aa ai? No ke kumu, e pono au e aa, a i ole pela
e make ana wau. O, e Gelade aloha ole no hoi, ua hele a hae-
hae kuu puu i ke aloha ia oe. E nanamaka wale mai ana no
anei oe me kou haawi ole mai i kekahi pane oluolu Ioa e hoo-
maaliliia ae ai kuu aloha nou? Aole ana anei oe e aloha mai
ana ia'u? " wahi a Everete o ka pule ana aku, he ole nae ka
maliu ia mai.
I keia manawa ua hele ae la ko Gelade helehelena a haikea
loa, e naka wale ana no kona kino holooko ia manawa; aka
nae, ua hoaano mai la no oia imua o ke kanaka opio me ka ma-
kau ole, me ka paio mau mai imua ona me he liona wahine la,
a ke noho la no hoi me ka pololei o kona kino, me ka nana
pono mai imua o kona enemi. "Aohe ou lihi o onei, au i hoo-
kohu mai ai! Aole oe he keonimana no kou kamailio mai i
kena mau olelo i ka mea e lilo aku ana na ke kanaka e maloko
o elua pule mai keia la aku; no ko ike paha ua kaawale aku
la ko'u mau hoaloha ma kahi e kamailio mai la oe i kena mau
olelo i kuapue wale iloko o kou naau, a i kou ike ana o ka ma-
nawa kupono loa keia e hoike mai ai, huai mai la i ka mea huna
iloko ou imua o ka mea i kulike ole loa ka makemake me kou
Ua like keia mau olelo a Gelade i pane aku la me he kuikele la
e lilo ai no i mea ehaeha no kekahi, mea, aole nae no Everete,
no ka mea ua paa kona manao e lilo o Gelade nana, a i mai la
"O, aole hiki ia'u ke alo ae; aohe o'u manawa hou aku; ua
nui na manawa maikai mamua, eia nae, e hoomamao mau aku
ana oe ia oe iho mai a'u aku, o keia ka manawa kupono maikai
loa i loaa ia'u," wahi a Everete me ke kakau o ke aakoko ma
kona lae.
"Aohe manao koho iki iloko o'u nou; o kou nanaina, kau
mau hana ua lilo i mau mea konakona loa na'u, aohe wahi lihi
hoihoi iki iloko o'u nou, he oki Ioa; ua koiia mai au e kau mau
hana e hookaawale loa ia'u iho mai ia oe mai no ka manawa-
mau loa."
"O, aole hiki ia'u ke alo ae, i kuu manawa e kokoke aku ai
ma kou aoao ua poina ae la wau i na mea a pau, o kuu aloha
wale no nou ka mea iloko o'u" wahi a Everete ma kana noi no
ke pale ana ae iaia.
"O' hilahila wale! Auhea ka kou noonoo maikai no kou
hanohano ; o kena mau olelo au a pau ua kue loa aku ia i ka
pono o ka mea i kuleana ia'u i nei manawa," i pane aku ai o
Gelade me ka nui o ka hanu.
"Ua palua kou kiola ana mai i kena mau huaolelo awaawa
imua o'u mamua, a ke kiola hou mai nei no oe i ka mea like
me ia," i pane kikoola aku ai o Everete me ka piha loa i ka
inaina, me ka hiki ole iho la iaia ke kaohi i ka inaina iloko
ona. "Aohe anei he hilahila iloko ou no ka hoike okoa ana
mai Ia ia oe iho he wahine hoopalau no kekahi kanaka opio
inoa ole?"
"Aole oia he kanaka opio inoaole, he inoa kona, aole loa ou
kuleana iki e kapa aku ai ia Geofere he kanaka kuewa," i pane
aku ai o Gelade me ka piha i ka inaina i hiki ole iho la iaia ke
uumi on ka kapaia ana mai la o kona aloha na i haaheo loa ai
he kanaka inoa ole.
"Aole o'u kuleana e kapa aku ai iaia ia inoa, no ke aha?" wahi
a Everete. "Hoolohe mai, ua huli au i ka moolelo e pili ana
i ko Geofere hanauia ana ame kona mau makua, mai kela
manawa a'u o ka ike hope ana ia oe. Ua hookolo aku au ahiki
i kona wahi i hanauia ai. O kona makuahine he wahine ili-
hune loa, he ui nae, me ka nele i kekahi opu malumalu e malu
ai kona poo, a ua nele hoi i na hoaloha.
"He ipo kana i aloha ai, he kanaka waiwai, i hiki ole nae
iaia ke mare ia wahine me kona hoolilo ole aku i kona mau
waiwai hooilina a pau i hooiliia mai ai maluna ona, a oiai he
kanaka makemake nui oia i ke dala e hiki ole ai iaia ke hana
pela, nolaila ua haalele aku oia i ka wahine i manaoia mai ai
nana a lawe aku la i ka makuahine o Geofere i ka aina mamao
loa, he wahi eli gula, a malaila i huna ai ia wahine mai ka ike
ana aku a ka poe i kamaaina ia wahine.
"No ka makahiki hookahi wale no ko laua noho pu ana a
make aku la ua wahine la ma ka manawa hookahi wale no
mahina o ke keiki mai kona hanau ana mai. O ua keiki la oia
no a Geofere Dela ; o ka inoa o kona makuahine oia o Ane
Dela aohe ona kuleana i ka inoa e ae, koe wale no ka inoa i
kapaia mai ai iaia ma kona manawa o ka hookamaia ana. He
kuleana anei kou e haaheo iho la no ka inoa o ko kane hoopa-
lau, e Miss Hunatere ?"
"O, ua haaheo loa wau nona !" wahi a Gelade o ka pane ana
ae me ka hookoikoi ana iho i kona leo. "Aohe au mea hou ao
o ke kamilio ana mai la, e Mr. Mepelasona, koe wale no aohe
mau hoaloha o kela kaikamahine opio aohe no hoi ona home,
a o ke kanaku nana ilawe iaia i Nu Mekiko he kanaka waiwai,
a ua hana oia i kekahi hewa koikoi Ioa ia wahine opio mamuli
o kona makemake. Ma ka mea oiaio loa, i lohe oe, ke oi aku
ka'u mau mea i maopopo nona mamua o kau mau mea i
kamailio mai la ia'u i nei manawa."
"Ua oi aku kau mea i maopopo! Ehai mai ana oe la i ka
inoa o ka makuakane o Geofere?" i koi mai ai o Everete.
"Aole au e hoike aku ana, aohe no o'u makemake e hoike aku,
ina ua hewa ia kanaka no ka moekolohe e like me ia au i ka-
mailio mai nei. Ina ua hana oia ia hewa e hoi aku no na ahewa
ana a pau maluna iho o kona poo ; no'u iho aole ia he mea e loli
ae ai o kuu manao mai ke kanaka opio ae a'u i ike ai i kona
hemolele, kona oiaio, kona naauao a hoopono oiaio." wahi a
Gelade me ka paa o kona manao e hiki ole ai ke hoololi ae.
"Alaila, me ia ike no ou i ka maikai ole o kona moolelo hoo-
paakiki no nae oe i kou noonoo maluna ona ma ke ano e lilo
aku i wahine na ka mea he inoa hilahila ke kau ana maluna ona
mai ka hora mai o kona hanauia ana?" i nui ae ai ka leo o | |