Ka Nupepa Kuokoa, Volume LXIII, Number 47, 20 November 1924 — PIHOLO HE KEIKI KEPANI ILOKO O KA MULIWA A MAKE [ARTICLE]

PIHOLO HE KEIKI KEPANI ILOKO O KA MULIWA A MAKE

Oiai kekahi keiki Kepani o eono makahiki nona. ka inoa o Katsumi Sasaki e paani ana me kona kaikuahine ehiku makahiki, Ycno. Sasaki, ma kapa o ka Muliwai o Wailuku, ua pakika aku la oia a haule ana iloko o ka muliwai mahope aku o ka halekoa o Hilo ma ka auwinala o ka Poaha o ka pule aku la i hala a make, elike me ka hoakaka ma ka lono o ka loaa ana ae mai ka Buro mai o ka Advcrtiser ma Hilo. Ka Moolelo A Ke Kaikuahine Ma ka moolelo o ka loaa ana ae mai ke kaikuahine mai o ke keiki i make ai, e paani ana laua ma kela auwinala ma kapa o ka muliwai, a mamuli o ka pakika ana o na wawae o Katsui i walawala aku ai oia a haule aku la iloko o ka muliwai, o kahi kiekie loa no hoi ia o ka pali mahai o ka muliwai. Mahope iho o kela haule ana o ke kiekie iloko o ka muliwai ua holo ke kaikuahine iuka a i kai no ka huli ana i kekahi kanaka no ka hele mai e kokua, a he Kepani lawaia nona ka inoa o Araki ka i loaa aku ma kekahi wahi aole no i mamao loa a hoike aku la iaia no ka haule ana o ke kaikuanane iloko o ka wai. Ua hele mai la o Araki no kahi o ke keiki i haule ai aohe nae oia i ike iho i ke kino o ke keiki i ka lana ae, no ia ike ole ona, ua holo ae la oia i ka hale o ka oihana makai a hoike ae la no kela ulia: I ka lohe ana o ke Kapena makai Peter N. Pakele Jr. ua hoouna ae la oia i kekahi poe no kahi o ke keiki i haule ai, a ua huli lakou mai uka a i kai o ka muliwai aohe nae lakou i ike iho i ke kino o ke keiki. Ua hoonohoia kekahi poe e kiai mahai o ke kahawai ia po me ke kauia o na kukui uwila no ke kokua ana i ka poe huli aohe no nae he ike iki ia. Loaa Ke Kino Ma ke kakahiaka nui loa o ka la 14 ae elua mau.Hawaii i hooholo i ko laua noonoo e luu ahiki ilalo o ka papaku o ka. muliwai no ka huli ana i ke kino, mahope o ko laua luu ana ma o a maanei ua loaa aku la ia laua ke kino, ua.paa loa ke kimono o ke keiki e komo ana i kekahi mau pohaku malalo o ka papaku o ka muliwai. Ua kaheaia ke Kauka Yamananuka e hele mai e nana, a wahi ana o ka hoike ana ae, o ke kumu o ke keiki i make ai no kona piholo ana iloko o ka wai. Mamuli o ka hoike a ke kaikamahine i hooholo ai ke koronero Martin he mea makehewa ka malama ana i aha nieniele. Ma ia auwinala la i hoolewaia ai. ++* No ka inu ana i ka laaumake ma ka auwina la o ka Poaono aku nei i i hoihoiia aku ai o Mrs. Henry J. Andrews no ka Halema'i Moiwahine, a ma na mea i hoikeia ae, ua kaawale aku ka poino mai iaia ae.