Ka Nupepa Kuokoa, Volume LXIV, Number 21, 21 May 1925 — HE HOALOHALOHA NO KUU KAIKUAANA HELELOA MRS. MAJOR MARY BAL. [ARTICLE]

HE HOALOHALOHA NO KUU KAIKUAANA HELELOA MRS. MAJOR MARY BAL.

E Mr. Solomon Hanohano, ka Lunahooponopono o ka Nupepa Kuokoa: E oluolu mai hoi oe e hookomo aku i ka'u wahi ukana luuluu no kuu kaikuaana heleloa Mrs. Major Mary W. E. Bal. Ua hanauia mai o Mrs. Mary Bal mai ka puhaka mai o Mr. Edward E. Bailey ame Mrs. Emily H. Bailey, ma ka la 16 o Iulai o ka makahiki 1861, nolaila ma kona manawa i haalele mai ai i keia ola ana, ua piha iaia na makahiki he 64, o kona hanu ana i na ea hu'ihu'i o keia ola ana. Ua hoonaauaoia o Mrs. Mary Bal, maloko o ka Mills Seminary ma Kaleponi, a i kona hoi ana mai no Hawaii nei, i beritaia ai oia iloko o ka mare me Josie Wilson. Ua loihi na makahiki o ko laua noho aloha ana, a na ka make ana o kana kane, i hookoo ae i ko laua aloha, kekahi no kekahi. He elua mau keikikane, i loaa mai, ma kela noho pu ana o laua, ua lawe mua aku no ka make i kekahi keiki, a koe mai hookahi. No na makahiki eiwa kona noho kane ole ana, alaila ua mare hou oia no ka elua o ka manawa me ia kupa o ka aina me ka Major Willie Bal, a ua loaa mailoko mai o ko laua mau puhaka he ehiku mau keiki, he ekolu kaikamahine me eha keikikane; ua hala aku ka nui ma kela ao, a koe he ehiku e ola nei, me kona kaikaina hookahi, oia o Mrs. Eva Ulamealani Rhods, a owau no hoi ko laua hoahanau (cousin) ponoi.

Aloha kana kane punahele iaia ame kana mau pua aala, kana mau keiki, a ia makou hoi apau e noho aku nei no ko makou mama kaikuaana. He makuahine oluolu, he naau haahaa, he lokomaikai, he aloha i kana kane, me ka laua poe keiki ame na moopuna he nui. Ua pau ko makou ike hou ana iaia, a koe iho la ko makou kaikuaana hookahi e ola nei, oia o Mrs. Eva Rhoads, aloha no! He mea nui he e kuu kaikuaana na makou, he mea milimili na ka pua rose lani pine umauma, auwe no hoi kuu aloha i kaikuaana heleloa e! Aloha oe e Willie, ua pau kou ike hou ana i ko milimili ua hala i ke ala hoi hou ole mai. E ke Paniwai o Iao e, ua pau kou ike hou ana ia Mary Bal; ua pau kona ai hou ana i na opae mahikihiki o ke kahawai, ame na pali uliuli ou e Iao. E Haleakala hoi, ua pau kona ike hou ana i kou hau hu'ihu'i; e Kahului, ke kai holuholu o ka aina, ua pau ka ai hou ana o ko makou kaikuaana i kou mau i'a ono, me ka lipoa aala o Makawelu. Ua haalele mai oia ia mau mea nani o ka aina, aka o ko'u aloha nou, he mea pau ole ia. Ke manao ae e holo aku e ike i ka aina, aole au e ike aku ana i kuu kaikuaana, o ka lepo ulaula ka'u e ike iho ana, aloha no! Aloha na mamo o ka Hale o na Alii, Wehikaahuula, ka ahahui poo, ua pau ko oukou lohe hou ana i kona leo e hea mai ana ia oukou. Ke haawi aku nei makou i na mahalo ame na hoomaikai ana he nui, ia oukou, no ka oukou makana pua i hoohiwahiwa iho ai maluna o kona kino wailua, pela hoi makou a haawi pu aku nei i na hoomaikai ana, i na ohana o kana kane, ame na hoaloha, no ka lakou mau makana pua, pela hoi ke komo pu ana mai me makou, iloko o ko makou mau hora o ka ehaeha. Ke haawi pu aku nei makou i ka hoomaikai piha i na mamo o ka Hale o na Alii o Hawaii, Halau o Liliuokalani, o Wailuku, Maui, no ko lakou aloha piha ma ke ku kiai ana, i ke kino wailua o ko makou makuaaloha. E oluolu mai oukou apau, e lawe aku i keia manao hoomaikai mailoko aku o ko'u puuwai, a maluna o ka Lunahooponopono, ame na keiki o ka papapa'i o ke Kuokoa ko'u aloha nui. Owau iho no iloko o ke kaumaha ame ka ehaeha no kuu kaikuaana heleloa. MRS. ANNIE K. M. KENNEDY, ame ka ohana.