Ka Nupepa Kuokoa, Volume LXV, Number 22, 3 June 1926 — E HAAWIIA NA KOKUA E PONO AI. [ARTICLE]

E HAAWIIA NA KOKUA E PONO AI.

No ka imi ana i kekahi waihona dala, i hiki ai ke kuai i kekahi mau makaukau, no ka pono o na keiki makapo, o keia kulanakauhale, i hoike ae ai he heluna nui o na makaainana ko'iko'i a hanohano o keia kulanakauhale, i ko lakou mau manao ohohia a kokua, no ka ahamele e haawiia ana maloko o ka Misiona Memoriala, ma ka po o keia Poaono iho. Aole he hana kilakiia oi aku, a ko Hawaii nei poe e hana ai, elike me ia o ka hoolalaia ana e keia mau hoaloha o na keiki makapo, o ia no ke ku aku o kekahi halehana, ine kona mau makaukau apau, e hiki ai kela poe keiki makapo ke hana i kekahi mau mea, e kokua mai ai i ka pono o ko lakou noho ana. O na kokua e haawiia aku ana e ko ke kulanakauhale nei poe no keia ahamele, ua haawiia aku ia no kekahi o na hana pookela loa; no ka mea me kela mau kokua auanei, e hiki ai i kela poe makapo, ke hoomaalahi i ko lakou kulana o ke ola ana aku, e hoomamaia ae ai ko lakou mau hoaloha ame na ohana. Huliamahi maoli kekahi mahele nui loa o ko ke kulanakauhale nei poe ma ke Sabati ame ka Poakahi aku nei i hala, ma ka hoohiwahiwa ana i na he kupapau o ka lakou mau mea aloha. Ua hooliloia aku na dala nui hewahewa no na pua me'ka minamina ole, mamuli o ka manao ana o ko ka honua nei poe, o kekahi ia o na hana pono loa a ka poe ola e lawelawe aku ai no ka poe i make. Malia paha he mea oiaio no la, ma ka mea pololei maoli nae ke nana iho, aole 110 he wahi lihi waiwai iki, koe wale no ka hoohalaia ana o kekahi manawa waiwai nui ma kela hana hohiwahiwa; pela hoi ka v hooliloia ana o na dala mahuahua, no ka hooko wale ana no i na makemake ponoi iho o ke kanaka, e maikai ai ka nana ana aku a ka lehulehu, a e loaa pu ai no hoi ka mahaloia mai. No ka pono o na ohana o Hoopuloa, Kona, Hawaii, i hooneleia i na home, ame na pono o keia la ana, mamuli o ka hana a ka pela, i haawi manawalea ae ai na ma'i ma Kalaupapa, Molokai he mau hanen dala; e ukali aku ana mahope o na hana manawale'a a kekahi mau ahahui Hawaii o kakou. O ka ike i loaa i kela poe popilikia ma Molokai, no ko lakou mau popilikia ponoi iho, o na mea ia nana i hoala mai i ka manao aloha no ka hoa-kanaka, a haawi elike me ka mea loaa ia lakou; e pono ai e oi loa aku na kokua a ka poe e noho nei iloko oka hauoli. - — O ka hoihoi hou ana i kela ano kahiko o ka wae ana i na moho o na aoao kalaiaina kuloko o kakou, i na ahaelele, ke olelo mai nei kekahi poe kalaiaina, aole ia he hana kupono; a e hoomauia aku no ke koho baloka wae moho o kakou me keia e hanaia nei. I ka nana aku e hoea mai ana ika hookoia ana o kela manao e kaa na na ahaelele e wae i na moho kupono, no ke kumu, aole he koho pololei o na aoao kuloko o kakou, i ka lakou mau moho ponoi iho, aka.ua kauka'i aku ka lanakila o kekahi mau moho, maluna o. na kokua ana mai a ko lakou mau hoaloha ilōko o ka aoao »kalaiaina okoa aku; ka hana i kaokoa loa mai ka manao mai, i hookahua maoli ia ai ke kanawai koho baloka wae moho.