Ka Nupepa Kuokoa, Volume LXV, Number 47, 25 November 1926 — HE MAMO O LOUISE POHINA NA KEKAHI OHANA MAEMAE [ARTICLE]

HE MAMO O LOUISE POHINA NA KEKAHI OHANA MAEMAE

O Miss Louise Pohina e kaulana nei i keia mau la apuni na moku ke "Kahuli leo le'a o ka Pakipika,"» ka mea nona ka leo i like aku me ko na manu, a i hoike ae hoi i ke akama'i lua ole o Mrs. Edwards, kana kumu, ma ka paka ana i kona leo, a o ka mea hoi nana i hookaulana aku ia Hawaii ukulii ma ke ao holookea a helu pu ia me na aupuni nui ae o ke ao ma keia kaiena, he mamo oia i puka mai kekahi ohana maemae mai. O kona kupunakane oia no o Rev. Daniel Puhi, he kahunapule i lawelawe i ka oihana laa a ke Akua Kiekie Loa no na makahiki lehulehu ahiki i kona hala ana ma keia ao, ma na apana o Hana, Kipahulu, Kaupo, a ma Pauoa, ma Honolulu nei wahioia aku ai kona kino no ka hoomaha ana mai na luhi mai o ko ao no ka manawa mau loa. Mailoko mai o ko Moakeawe puhaka, ka wahinemare a Rev. Puhi, he elima a eono paha mau keiki i puka mai, ua make aku ka hapanui a koe o Mrs. Debora Pohina e ola mai nei ma Pauoa, me Mr. Pohina, na makua ponoi o Miss Louise Pohina, e kaulana nei i keia mau la, ame kekahi mau keiki e ae e ola mai la me laua ma Pauoa. Ina no ke ola nei o Rev. Daniel Puhi ahiki i keia la, a lohe i ko Miss Pohina himeni ana, o hoopihaia aku ana kona naau i ka hauoli, a like me ka hauoli o ka lehulehu i kona himeni ana, a pela hoi me kona mau makua. E malama mau ia keia leo nani e pono ai a e hoonui hou aku i ka ike me ka malama mau i ka inoa maemae, elike me ka maemae o ka inoa o kona kupunakane ame kona mau makua.