Ka Nupepa Kuokoa, Volume LXVI, Number 2, 13 January 1927 — KA HOIKE A KA AHA O NA OPIO NO KA MAKAHIKI I HALA [ARTICLE]

KA HOIKE A KA AHA O NA OPIO NO KA MAKAHIKI I HALA

Iloko o ka 1926 i newa aku he 356 mau hihia o na keiki kolohe a a-i oolea i hooloheia e ka Lunakanawai John R. Desha o ka aha hookolokolo o na opio, iloko o ia heluna he 263 mau hihia o na keikikane a he 93 no na kaikamahine, elike me ia i ikeia maloko o ka hoike makahiki a ia aha i hoopukaia ae ma ke akea ma ka Poaha o ka pule aku ia i hala e Mrs. Ellen Dwight Smythe, ke kakauolelo o ia aha. lloko o ka makahiki i hala 177 mau keikikane a he 84 mau kaikamahine i hoopiiia ae no ka hookuli, ka lalau, ke pakike a pela aku; 134 mau keikikane ame 10 mau kaikamahiane i waihoia ae no ka hoao ana; hookahi keikikane ame eiwa mau kaikamahine i waihoia aku malalo o ka malama a alakai ana a kekahi mau ohana; elua mau keikikane ame 55 mau kaikamahine i waihoia aku malalo o ka malama ana mai a na hui manawalea; he 40 mau keikikane ame 18 man kaikamahine i hoihoiia aku e hoopaa maloko o na kula ao hanalima, a hookahi kaikamahine i hoihoiia aku i ka halekula o na keiki kamehai, a nawaliwali o ka noonoo. No ia mau keiki ma na lahui o ia keia: Na Hawaii, he 52 mau keikikane a he 36 mau kaikamahine; na keiki haole, he 40 mau keikikane a he 17 mau kaikamahine; na Kepani, he 17 mau keikikane a he 7 mau kaikamahine; na Pake, he 14 mau keikikane a he 1 kaikamahine; Pilipino; 6 keikikane a he 2 kaikamahine; Poko Riko, 2 keikikane a he 6 mau kaikamahaine; Korea, 5 keikikane, a no na lahui huikau like ole he 39 mau keikikane a he 26 mau kaikamahaine. O ka aihue ke poo o na hihia kiekie i hoopiiia ae ai na keiki; no keia hewa he 71 mau keikikane ame 5 mau kaikamahine i hoopiiia ae. No ka hele po a oi aku mamua o ka manawa kapu he 81 mau keikikane; no ka paakiki a a-i oolea hiki ole ke hoohulihuliia ma ka pono, he 24 mau keikikane a he 20 mau kaikamahine; no ka auwana, he 18 mau keikikane, a he 20 mau kaikamahine; no ka hana hewa o ke ano haukae, he 4 mau keikikane a he 38 mau kaikamahine; no ke kue i ke kanawai e pili ana i ka holo ana o na kaa oto, he 19 mau keikikane a hookahi kaikamahine; no ka hoeha he 11 mau keikikane; no ka piliwaiwai 7 keikikane; no ka haalele kula, 6 keikikane, no na hanaino, 3 keikikane; no ka hookuli, elua mau kaikamahine, a no

na hewa e ae he 19 mau keikikane a hookahi kaikamahine. Malalo o ke poo, na keiki e kaukai aku ana na hai e malama mai he 88 mau hihia o keia ano i hooloheia e ka Lunakanawai Desha, he 28 no na keikikane a he 60 no na kaikamahine iloko o ka 1926, a ua hoakaka mai ka aha he 26 mau keikikane ame 40 mau kaikamahine o lakou na keiki i kupono e kaukai aku na hai e malama mai ia lakou. He ekolu mau kumuhoopii e kue ana i kekahi mau kaikamahine ekolu i hoopau waleia e ka aha. He ekolu mau keikikane ame eono mau kaikamahine i waihoia aku malalo o ka malama ame ka hoomaln ana a kekahi mau ohana; he 9 mau keikikane ame 24 mau kaikamahine i hoihoiia aku maloko o na home manawalea, a he 13 mau keikikane ame 11 mau kaikamahine i hoihoiia aku i ka home o na keiki kamehai a nawaliwali o ka noonoo.