Ka Nupepa Kuokoa, Volume LXVI, Number 28, 14 July 1927 — PUKA HOU KA PELE MA HAWAII [ARTICLE]

PUKA HOU KA PELE MA HAWAII

Maliope o ka hoomalolo ana no na makahiki ekolu i hala ae nei, i oili hou ae ai ka pele ma Hawaii, e lilo ai kela ike hou ia ana. i nuhou hoohauoli i ka manao o koonei poe. O ka a mau o ka pele ma Hawaii, iloko o na makahiki ae nei i hala, kekahi o na kumu koi ikaika i ka manao o na malihini makaikai honua e holo mai no Hawaii nei; nolaila aole he kanalua ka olelo ana ae, e lilo ana keia oili hou ana mai la o ka pele, i kumu hoomahuahua loa ae i na malihini makaikai iloko o keia mau mahina e nee aku nei. Eia ke holomoku mai nei na malihini i Hawaii nei i keia manawa, mahope iho o ka waiho ana ae o James D. Dole i ka makana o kanakolu-kumamalima kaukani dala, 1 ka mokulele mua loa ame ka mokulele elua e hoea ana i Hawaii nei; ua hoomahuahuaia ae hoi kela heluna, i ka manawa a na Lūkanela Maitland ame Hegenberger o ka hoea ana mai i Honolulu nei, me ka maalahi loa maluna oko laua mokulele; nolaila ma na mea maopopo loa, e hoopihaia ana na nupepa o na aupuni mamao, me na nuhou pili i na mokulele ame ka pele e holomoku mai ai ke kipa ana o n amalihini ma keia mua aku. Ma ke kipa nui ana mai o na malihini i keia teritore, e ohi ana o Hawaii nei i kekahi pomaikai nui; o ia ka hoopomaikaiia aku ona oihana lehulehu iloko nei oka aina; aka poe' e ohi ana ia mau pomaikai nui, e pono ai e haawi ae i na mahalo ana ia James D. Dole, ka mea nana ka uku makana hoohoihoi, i na mokulele, e kipa mai i Hawaii nei; pela hai i ka Madame Pele, no kona kipa hou ana mai e ike i kona home kahiko.