Ka Nupepa Puka la Aloha Aina, Volume I, Number 32, 7 November 1893 — Ka Adimarala Irwin. [ARTICLE]

Ka Adimarala Irwin.

O Adimarala Irwin, oia ke Aliimoku kiekie e lana ana ma na kapakai o Asia, no kekahi mau manawa loihi i hala ae nei, ua hiki mai oia a me kona ohana ma ka mokuahi Kina o ka la inehinei, no ka hoopiha ana i ka hakahaka o Adimarala Skerrett, i hoi aku nei maluna o ka mokuahi Kina o keia kakahiaka. O kona hoea ana mai i na kapakai o Hawaii nei ua hoopahaohaoia ko ke kulanakauhale nei no kona hiki ana mai, aka, no makou iho, aohe e kala kahiko o Kaahupahau i hoike mua mai ai ia makou i aona wa no e lana ana no ma na wai o Asia.

Ua loaa aku iaia ke kauoha e awiwi koke mai no ka Paeaina o Hawaii, no ka hoopiha ana i ke kulana o keia Adimarala i hoi aku la. Ua kipa mua aku oia e ike ke Kuhina Noho o kona aupuni, a mai iaia mai ke kauoha e hoi koke oia no luna o ka Piladelapia, a e huki ae i kona hae Adimarala, a ua hooko oia i ke kauoha a kona poo maluna iho ona, a malaila oia kahi i hoaumoe ai i ka ponei. Ua ukali ia ka Adimarala e na Lutanela Adams a me Parmenter.