Ka Oiaio, Volume VI, Number 24, 15 June 1894 — Page 4
| This text was transcribed by: | Lawrence Gersaba |
| This work is dedicated to: | Judith Nalani Kahoano Gersaba |
Nupepa Ka Oiaio.
"O KA PONO KA AIALII E OLA AI KA AINA"
NUPEPA KA OIAIO.
J. E. BUSH, Lunahooponopono.
J. K. Penikalaka, Puuku.
POALIMA IUNE 15, 1894.
HE NOOLELO KAAO HAWAII
- NO -
LAUKAIEIE.
Ke Kino Kamahao Iloko
O KA
Punohu Ua-koko.
Ke Kahulileole'a o ke
Kuluaumee o
na Pali
- o -
Waipio Hawaii.
Unuhiia e Mose Manu no "KA LEO."
Ka lealea hope loa a na kaikamahine o Kauai me ke kaikamahine ahi Kalehuamakanoe Haule oia me Hiilawe. Kona naauauwa ana i ke aloha a hiki i kona makeana. Lilo o Kaulaaihawane malalo o ka Laukaieie malama ana me Makanikeoe. E like me ka manao o Laukaieie.
No keia ninau a Koaekea ia Hiilawe, ua pane mai la oia me ke ano o ka leo uwe.
Ua aloha au i ka'u wahine, ka hunona hoi a olua e noho mai la me mama.
Pane aku la o Koaekea, e kali kaua me ka hoomanawanui a pau ka mai wahine, alaila ho mai, aole i manao o Koaekea he manaoio keia o kana keiki e olelo nei, eia ka auanei he hoolalau ke aloha i Kualoa, ma ia mau la ana e noho nei [Hiilawe], ua hele ae la oia ma kahi malaelae e ike aku ai ia kai o Pakaalana kahi a kana aloha e noho ala me keia mau wahi lalani mele kupono.
E ike auanei oe la
I kuu lei alii he aloha la
Aloha ka makemake ke hiki la
Ka nioi weia i Pakaalana la.
Mamuli o ka hana io o ke aloha i ua Hiilawe nei, aia hoi, ua hiki ole iaia ke kali a hoomanawanui iaia iho no ka hoolohe ana i na olelo a Makanikeoe, nolaila, ua hana no oia me ka maalea i kona makuakane, oiai, mamua ae o kona manao ana e hele, ua hana iho la oia i kona kuina kapa a kohu e like me ke ano o ke kanaka e moe ana, he hana akamai hoi keia a ua Hiilawe nei i mea e manao ole mai ai kona makuakane, ua hele oia.
A ma ia hope iho; oiai hoi i kekahi po, na ulu ae la ka manao iloko o ua keiki Hiilawe nei e hele oia no kai o Pakaalana, ka ai hoi a kana ipo aloha e noho aia mea ai haawina hookahi no he aloha, iaia e hele nei i ua po nei me ka awiwi nui me ka halawai ole me kahi mea kino kanaka ma kona alahele a hiki wale no oia ma kahi o kana aloha e hiolani ana me ka manao ole, eia kana ipo mawaho e hoopu aku nei i ke anu a me ke koekoe, ua lilo nae ia i mea ole.
Ma keia hiki ana o ua keiki nei o ka uka mawaho, ua hooholo iho la no kona manao e komo no oia iloko me ka nana ole i kahi mea e kamailio mai ana iaia, i na no ka pono a me ka hewa, aole ana mea e makau ai, nolaila, nolaila, ua komo aku oia me ka ike ia mai no e na kahu ponoi o ka ui nohea o Kauai, a iaia hoi, ua ike mua lakou iaia ma kela po mua i hanaio ai kaua ia Kohala, a iaia i hiki pono aku ai ma kahi o ua ui nohea la e moe ana, aia hoi, ua hu mai ia kona aloha no kana ipo me ka helelel pu ana hoi o kona mau waimaka ma kona mau papalina.
E hoomanawanui iki iho hoi oe e ka mea heluhelu a oili pulelo hou aku i ka la apopo.
Na ia mau kuluwaimaka huihui i pa iho i kona ili i hoala ae i kona hiamoe, a iaia i puoho ae ai, me kona manao ole o kana ipo aloha no keia, ka mea hoi nana i hoau mua ka hoe ana o ka waa hou o Kauai, aia nae i kona hoomaopopo ana i ke ano a me na hiona o ka mea e kalele nei, i kona umauma, ua maopopo no iaia, aole ia he mae e ae, aia i kela wa a ua mau nohea nei e iho la i Waialua, kahi a kela mau lalani mele a Hehena i haku ai no Kaleiopapa Kalani Kauikeaouli Kamehameha III.
Hoe Puna i ka waa pololoa a ka ino, Hooukauka i ke awa o Kookoolau.
Eha - e - eha - la.
Oiai he wa maikai ia no keau o ka moana e hue la iluna, a he wa maikai hoi no ka makani hou o Nuuanu ae nei, he onou; a i ua Hiilawe nei e kupa la i kana waa, ma kona ano he kahuna kalawai no ka uka.
Aole oia a me kona hoa i manao ae aia ke kilo ia mai la e ke kuhikuhi puuone Makanikeoe ka laua mau hana e like me kona ano mau he mana kupua, a ua loaa no ia ike ia Kaulaaihawane, a na olelo iho na Makanikeoe nei, aole ana hana e olelo hou ai, a e hookuu aku ana oia ia laua i kaulaloa a na ka laua hana e hoike ae ia laua i ke akea.
Ma keia po a ua mau nohea nea e hana la i ko laua makemake, ma ke kam ane o ka moa kuakahi, ua ku ae la ua keiki nei o ka uka a hoi aku no kona home noho uka me ka waiho aku i kona hoa ha'iha'i olelo ma kona wahi moe, oiai ua na iho laka lili a ke kuawahino.
Iaia i hiki aku ai ma ka hale aia no kona makuakane Koaekea e moe ana, nolaila, aole ana manao lele ae o kona oili, a ua nihi malie aku no oia a ma kona wahi moe.
E ka mea heluhelu, e waiho kaua i ka olelo no Hiilawe, a e olelo ma keia wahi no ka mea nona keia moolelo Laukaieie, no ka loaa ana he moeuhane iaia.
Ma kela po a Hiilawe i hoi aku la mauka o Ulu, aia hoi, ua loaa iho la ia Laukaieie kekahi moeuhane, no kona kaikunane hanau mua no elua manawa o ia haawina hookahi, a penei ke ano o ua moeuhane nei ana:
Ia Laukaieie i ka-ia loa ia ai e ka hiamoe a lilo loa aku la na noonoo ana no ka aina uhane, aia hoi, ua ike aku ia oia ia Hiilawe e pii ana iluna o kekahi kumulaau ohia hamau, me ka hana ana i ke kepau ma kekahi lala lehua e pua ana, a ike aku la oia i kekahi manu Iiwi Makapolena i ka lele ana mai a pili ma ua lala lehua nei ana i hana ai i ke kepau, a hoi iho la ilalo o ua kumu lehua nei, a nalo aku la iloko o ka nahelehele aole nae i liuliu iho, ua lohe aku la oia i kekahi leo i ka pane ana mai, e Hiilawe aole nau ia manu, aia no kau manu i ka hale, aole nae oia i ike pono aku i ke kino o ka mea i pane mai ai, puoho e ae la oia.
I kona wa i puoho ae ai, ua noonoo iho la oia i ke ano o keia moeuhane me kona olelo aku i kana alii kane a me ko laua kuai Laukieleula, a iaia no i hiamoe hou iho ai, ua loaa hou no iaia ua haawina hookahi nei no, e like no me mamua, ua puoho hou ae la oia me ka noonoo nui i ka paina o ka loaa ana iaia o keia moe, a oia kana i ala ae ai a hele aku la ma ko Laukieleula wahi e noho mai ana, aole oia i hiamoe, oiai, he mua mau no ia laia i na po a pau, aole he hiamoe.
Ia Laukaieie i hiki aku ai ma kahi o ko laua kiai, ua kamailio liilii iho la oia o lohe mai kana kane a ala mai kona hiamoe, a ua hai aku oia i kana moeuhane a pau mai ka mua a ka hope no na manawa elua ua hoike mai la o Laukieleula i ke ano o na moeuhane ia imua o kona haku lani alii me ka oiaio loa, ma na ano a pau, e like me ka mana kamahao o kona kaikunane hanau mua Makanikeoe, a oia kana i hoakaka aku ai me ka pololei loa imua o Laukaieie.
E kuu haku lani, e oluolu oe e hoolohe mai, o ka moe au i hai mai nei ia'u no ka wa mua, aole ie he mea e ae, o ko kakou kaikunane hanau maua no ia o Hiilawe, ua haole oia i ka hewa me kela kaikoeke o kakou. Kalehuamakanoe, oia kela mamu Iiwi makapolena au i ike aku la, na pili i ke kepau ulu, a o kela leo au i lohe aku ai i ke kahea ana mai, aole uau ia manu, aia no kau manu i kauhale kahi i noho ai oia no o Kaulaaihawane, a o ua leo ala i hea mai ai, na ike ia e Makanikeoe, aole nae i hoolohe ia e Hiilawe kana olelo i ka po mua, a no keia po no, ua hana hou no oia i ka hewa me na kaikamahine ala o Kauai, aia nae la ke hiamoe la, oia ka lua o ka manawa o ko moe, ua loaa no ia Makanikeoe ka ike no laua i keia po, a pela no me Kaulaaihawane.
Nolaila, no keia hoike pololei a ko ia kiai Laukieleula, he mea e loaa aloha ia Kaulaaihawane ka mea hoi a ko lakou kaikunane aiwaiwa i lawe mua mai ai, a i kapa ia hoi kona inoa o Pupukanioe elua a oia ka kona mau kulu waimaka i hoopulu iho ai i kona mau lihilihi me ka puuwai walohia me ka manao kaumaha ma kona manao ponoi, ua hooona mai la oia i kona kiai e kii ia Makanikeoe ia po a me ka hele ahu e nana ia Kaulaaihawane aie ka hai ole aku i ka laua mea i kamailio ai no ke ano o kana moe.
I ka pau ana no o na olelo ana ua iho mai la ka makani kolonahe lawe ala o Uli mauka o Waika Laukieleula, ka mea i olelo ia, ka makani nihi aumoe alo pali o Waipio, a oia no paha ka mea e oleloia nei la, moa maa no i ke alo pali.
Ma keia hoouna a ka mea nona keia moolelo i kona kiai ponoi Laukieleula, ua lawe oia i na ano a pau a kona kaikunane Makanikeoe, ka mana me ka piha elua me ka manao paa.
He mea oiaio, ua haalele aku oia i kona mau haku me ka emoole loa, ua hiki aku oia imua o Makanikeoe me kona ano kapukapu maoli no.
Ua hai aku oia i ka olelo kauoha a kona haku alii imua o kona kaikunane ponoi mai ka mua a i ka hope, aole no hoi ana olelo i kona mau hanau mua a me na mea a pau ma kai o Pakaalana, a hoi wale no oia.
Mahope iho o kana olelo ana, ua huli aku la ko laua mau alo no ka uka iuiu anoano eehia o Ihikapukalani, a ma kahi kokoke i ko Koaekea ma hale aohe mauka o Ulu, ua kipa ae la o Laukielehia malaila, a ua ike oia aia o Kaulaaihawane me kona makuahonowai wahine ma ka hale hapinia, nolaila, na kipa aku oia ma o Koaekea me kana keiki Hiilawe, a ua kahea koke ia mai la oia e na mea hale e komo aku maloko, aia nae, ua huli aku kona mau nanaina me na hiona o ka huhu nui me ke ano e no Hiilawe.
A oia kana i pane aku ai me ka huaolelo ninau aku ia Koaekea penei:
E ko makou Papa aloha mahea kau keiki i keia po?
Ma ka hale nei no kahi i moe ai a ao wale a la no, a hiki mai la oe; wahi a Koaekea.
Ua pane aku la o Laukieleula me ka pololei loa:
Ua lilo oe i ka hiamoe, a ua hele keia i kai o Pakaalana i ka lawaia Ulua na olua a hoihoi mai i ka ia nau na ka makua, ole oe i kau keiki, ua ike- a ka noa aia hei Hiilawe, aia i ka pili kahi i moe ai, aole e hala ke anahulu a ike maka no oe e ko makou Papa i ka'u mea e olelo nei.
Pau kana olelo ana, ua huli koi aku la oia no ka home noho o kona mau haku alii, a iaia i hoea aku ai, ua pau iho ka Laukaieie mau olelo me Makanikeoe, ua hoike aku oia i na mea a pau loa, me ka oiaio imua o ka mea nona keia nanea, e like ma na hoakakaka pololei a kona muli pokii kaikuahine, a oia ka haawi ia ana o ka mana piha o ka olelo kauoha ia Laukieleula no ke kia aka ia Hiilawe me ka nu o Kauai.
Mahope iho o ko Laukieleula hoi ana aku no ka home o kona mau haku alii noho uka, aia hoi, na ninau aku la o Koaekea i kana keiki ponoi Hiilawe, e like me ka olelo hoike pololei a Laukieleula, a oia kana i pane aku ai me ka leo haalulu, me ke kaumaha o e ka manao me ke aloha keiki.
E ke kamalei aloha a'u nei me ke makuahine e noho mai la me ko wahine iwaho no ko kaua mai, a he mea nui no hoi oe ia maua mai ko wa uuku mai a nui wale no oe-a loaa kau wahine mai ko hoahanau mai, nolaila, ua lohe pu ae nei no kaua i ka olelo a ko muli pokii kaikuahine oolua, he oiaio auanei kana hoike, oiai, o kana wale no keia, a no keia olelo ninau a ka makua i ke keiki, me kona mau kulu waimaka, ua pane mai la oia me keia mau huaolelo.
E kuu Papa aloha, he mea oiaio na mea a pau ana i olelo iho nei ia kaua, nolaila, mai makau oe e kuu Papa ia mau olelo, aia ia mau hewa a pau loa maluna iho o kau keiki nei.
A oiai no hi, ua hai mai no o mama ia'u, aole no ka i kupaa ka manao o kekahi poe kupuna kahiko o kakou i ka mea hookahi; nolaila mai hoouluhua hou mai oe ia'u e papa, o lilo auanei keia hana i mea e mokuahana ai no ko kakou noho ana maluhia.
I ka lohe ana o Koaekea i keia mau huaolelo kakana a kana keiki, na pau wale ae la no oia i kona manao; aka, o ke aloha a me ka hilahila no keia mau hana a ka laua keiki; ua puapuai ae la ia a haaleale i ke kumu o ka hana, a luai mai la i kana ukana he waimaka; a hoomanao ae la kou mea kakau i keia mau wahi lalani mele kahiko a Kupalu, kela wahine o Puneo, Hilo, Hawaii:
Auhea wale ana oe
E kahi keko apiki
Hilahila ole no oe
Ke olelo kaena
Noonoo ole iho oe
O kahi aina iki
I kipi ai na alii
Puni ai Hawaii nei
O ke aupuni no ia
E make ai ke kanaka
A he alanui ua maa
Moi na kupuna mai.
I ka uhi ana mai o ka eheu o ka po, ua liuliu ae la no ua eueu nei no ka iho no i kahi; a iaia i ka hapalua o ke alahele, ua hookui aku la oia me kaka ehakoni e koele wawae mai ana, me ka manao nui no e hui me kana aloha, a oia iho paha keia mau wahi lalani mele:
I aloha no wau la
Wai a o muliwai e
Wai apa i ke kiina la
Kuu kino kai luhi o
Ka imina i ke hoa la
A loaa i Lehua e
Oia pali nui la
Mea ole ia'u e
Koele wawae la
Ke ola i Keaau e
I ole i Wailua la
Aia i Paliuli e
E noho mai ana la
Laieikawai e
Hoolale na mauu la
Inu ana i ka wai e.
Ma keia hui ana iho la o ua mau nohea nei ia po ma ke alanui, ua hoi pololei aku ia ua mau hoeu nei no ka home o Hiilawe; a ia laua i hiki aku ai, ua ike mai la o Koaekea a ola kana i hookaawale aku ai, no kona hoowahawaha i ka hana a kana keiki.
Iaia i kaawale aku ai, ua hu ae kona aloha no ka laua hunona Kaulaaihawane; no ka mea, aole he mau nana kuee mawaena o lakou a me ka laua hunona, a he mea nui no hoi oia ia laua.
I ua mau eueu nei e walea ana, aia hoi ke lawe ala ka alihi pikoi o luna, a ke ohi ala ka alihi pohaku o lalo; me ka manao ole e, eia aku ka makani a hoea iho.
Oiai ua ahuwale loa keia mau hana a laua imua o Laukieleula, a oia kana i hai aku ai i kona mau
haku lani alii, a oia kona mea i hoouna ia mai ai e kii mua ia o Kaohaiola, Lihau me Koiahi a me Pupukanioe me kona mau kaiko eke elua a me na kaikuahine a pau o Makanikeoe e hele ae me ka awiwi mauka Ulua, a malaila e noho ai a hiki i ko lakou wa, e ike pono ai i ka mea e kanaha ia nei lakou a pau e hele mauka o Ulu, a he mea hoi na lakou, i manao ole ai aia i laila ke ahilele o Kamaile ka oi hookelakela o Kauai.
Aia nae i ka manawa o lakou a pau i akoakoa aku ai mawaho o ka hale ponoi o Koaekea ma, aia hoi, ua hoonoho iho la o Laukieleula i kana poe a pau i lawe ai malaila me ka pane leo ole, a ma ia hope iho, ua hele aku la oia ma kahi o ka hale pea o Kaulaaihawane me kona makuahonowai wahine e noho ana.
Iaia nae i kokoke aku ai mawaho o ua hale pea nei, ua lohe aku la oia e olioli ana o Kaulaaihawane ma ke ano hula, e like no me kona ano mau, he paulehia oia ma ia hana, ma keia lohe pono ana o Laukieleula, ua ninau koke ku la oia.
O oe no ia e Kaulaaihawane e oli mai nei?
Ae, wahi ana i pane mai ai.
Heaha ka huakai o ke aumoe i hele mai nei e kuu haku?
Pane o Laukieleula me ka haina pololei.
Ma ke kauoha a ko kakou haku lani Laukaieie ia'u, e like me ka ike i loaa ia'u no kau kane me ke kaikamahine alii o Kauai, ko hoahanau ma ko oukou pili hanauna ma ko oukou mau makua.
Ua kauohaia mai au e kii i ko'u mau hanau mua a me kou mau hoa i hele pu mai ai me ko kakou kaikunane Makanikeoe ma kai o Pakaalana i keia po, a he mea oiaio ua hiki mai lakou a pau, aia ke noho la mawaho o ka hale noho o kau kane me kou mau makuahonowai, e kali ana no ko'u hoi aku, aia kau kaue me Kalehuamakanoe iloko o ka hale kahi i moe ai, a e lohe ae ana oe i na leo o makou i keia po, nolaila, mai hookaumaha i kou mau manao ana no kau kane me kou hoahanau.
I keia lohe ana o Kaulaaihawane o na olelo a Laukieleula no kana kane me kona hoohanau alii, aia hoi, ua kupu ae la na manao aloha i ke kane me kona mau lihilihi e hoomuu ala i kana ukana o ka waimaka a oia kana i olelo iho ai penei:
Ua waele aku la no oe e kuu kane i ke alanui mamua me kuu haku alii, a mai nana mai i ka hele hope, malia hoi, ei aku no hoi kekahi mea i oi aku mamua ou e kuu kane, oiai, aole he mau manao ana aku no ka aina hanau, no ka mea, ua hiki mai nei no ko'u mau makua , aole no hoi he hemahema i ka mea nana i lawe mai.
Ia Kaulaaihawane e nalu ana iaia iho, aia nae, ua huli hoi aku la o Laukieleula no ka hale a ua mau eueu nei e hiolani la, aole no hoilohe mai o Kaholoakuaiwa i ka laua nei kamailio ana, a iaia nei, (Laukieleula) i hiki aku ai ma kahi a kona poe hoa e noho nui mai ana mawaho o ka hale, ua hai aku oia i ke kumu o kana mea i kono aku ai ia oi ia lakou e hiki malaila; oia hoi, e ike maka lakou ia Hiilawe me ka ui kae'ae'a o Kauai maloko o ka hale.
I ko lakou lohe ana ia mea, he mea e ka maikai ole o na noonoo o ua poe kaikamahine nei, mai na kamaaina a i na malihini, oiai, aole i ike ia kahi mea pono ole mawaena o ko lakou noho ana, aka, i ka manawa nae i hiki mai ai ka nohea o Kauai, ua loaa iho la he mea e pono ole ai ko lakou noho ana, oia ka Paulo mea i olelo ai maloko o ka Buke Nui.
O ka launa ana aku i ka hewa, hea mea ia e iho ai ka noho pono ana.
Mahope iho o ke Laukieleula mau olelo ana, ua komo like aku la lakou a pau iloko o ka hale, a ua ho-a ia ae la i ko lakou wa e ike pono ai i ka mea e kauoha ia nei lakou a pau e hele mauka o Ulu, a he mea hoi na lakou i manao ole ai aia ilaila, ke ahi hele o Kamaile, ka ui hookelakela o Kauai, aia nae ka manawa o lakou a pau i akoakoa aku ai mawaho o ka hale ponoi o Koaekea ma, aia hoi, ua hoonoho iho la o Laukieleula i kana poe a pau i lawe ai malaila me ka pane leo ole, a ma ia hope iho, ua hele aku la oia ma kahi o ka hale pea a Kaulaaihawane me kona makuahonowai wahine e noho mai ana no.
PAA I KOU MOI
GOSPEL PRAISE BOOK P.209.
E ka lahui e
Oli ae kakou
No ko kakou Moi
Me ka aina pu
A mai puni aku
I ka pelo mai
I ka malimali
A na enemi.
CHORUS:
Paa i kou Moi
Paa no a mau
Paa i kou aina
Paa no a mau
Paa i kou Moi
Paa i kou Moi
Paa i kou aina
Paa no a mau.
E ka lahui e
Paa i kou Hae
Ma na umauma
Ma na puuwai
Kali ahonui
Me na leo pule
A poha ka lama
Mai ka mauna mai.
CHORUS:
Paa i kou Moi
Paa no a mau
Paa i kou aina
Paa no a mau &c. &c.
Hakuia e
* * *
Kalapana, May 7, 1894.
HE LAUNA POKOLE.
Mau ka auina la o ka Poaha o ka pule i hala, ua kipa aku la kekahi malihini kaulana e ike i ko Hawaii nei Moiwahine, oia hoi ke kanaka kaulana o ka hoomana Christiano i kekahi o na ekalesia hoole-pope o ke kulanakauhale o Brooklyn, Mokuaina o Nu Ioka, Nr. de Witt Talmage, ke kanaka i hoohalike ia me Mr.
Beecher a me Mr. Spurgeon o ka poe haiolelo kaulana o ka Hoomana a Karisto ka Haku i kukulu ai. I kona wa i hookipa ia mai ai e ka Moiwahine puana aku la oia i kona hauoli i ka launa maka ana me ke Lii ka Moiwahine, ka ike ana iaia a me ka lohe ana i kona leo, me ka puana pu ana ae, ua hoopahaohao loa ia au i ko'u ike ana aku ia oe me na helehelena oluolu a me ke kino ola maikai, oiai, aole o kou mau ano au e ike aku nei oia ke kulana o ka poe ma kou kulana kiekie i i hoopilikia ia a e noho ana malalo o na noonoo kaumaha nou iho a me kou lahui, ua hoopahaohao loa ia au me ka hauoli. Ua pane aku la hoi ko kakou Moiwahine me ka leo e hoike ana i ka pololei o ke koho ana mai o keia kanaka haipule kaulana i kona kulana ola kino a me na ouli o ka noonoo maikai, a puana ae la oia i kana mau olelo, me keia mau olelo hookumu i kana mau olelo: Hauoli au i ko'u launa a hookipa ana i kekahi o na loea o ka hoomana, me ka pomaikai nui hoi i loaa ia'u, ma keia launa ana e hoike ae i ko ke Akua lokomaikai i ka haawi ana mai ia'u i ka maau mama malalo o na kumu hoopilikia i loohia mai ma ke kumu ole maluna o'u a me ko'u mau makaainana ponoi; e like no me ko'u ike iho ua hala ole au i ka poe i manao ino wale mai ia'u pela no i maikai ai ko'u manao, a eia hoi, pehea la au e hoano e ia ae ai, oiai, eia au iwaena o ko ke Akua nani a me kona lokomaikai nui, ua hoonoho mai oia ia'u iloko o keia home oluolu, a ua hoopuni mai hoi ia'u me na pua aala na laau e me na launahele uliuli, a me na manu e mele nani ana a puni ka la, a iwaena o keia mau hoikeana maa mau o ke Akua i Kona hoopoina ole ia kakou ma keia noho ana, ua hiki ole ia'u ke hookaumaha iho i ko'u naau a e hoololi ae i ko'u helehelena a maka'e aku Iaia, ka mea mai nona keia oluolu a me keia ola ana Aole a aole loa hoi e hiki ia'u ke anoe ae no na hana i loohia mai ia'u iloko o keia mau la, oiai, ua lana ko'u manao e hooko mai ana no oia i ka pono a me ke kaulike maluna o'u a me ko'u lahui, a e hoomalamalama aku ana no oia i ko ke ao a hoohuli mai i ka naau o ka poe koikoi e lilo i mau hoaloha no'u iloko o ko'u noho hoohaiki a hookaumaha kumu ole ia.
Mamuli o keia launa ana, ua loaa koke iho la no he naau i hoolilo ia i hoaloha no ko kakou Moiwahine a me Kona lahui, oiai, he hookahi uhane iloko o laua mawaena o keia kipa hoolauna ana, oia hoi ka Uhane o ka Lokomaikai, ka makua o ke aloha a me ka oluolu. Ua hooia ia ae no hoi keia mea, oiai iaia i hele aku ai mai ko ke Alii rumi aku a ku iho la oia mahope koke iho e poolelo aku, ma ka awai o ka luakini kalawina ma kai koke iho o Wasinetona Hale, ua kukulu iho la oia i kana haiolelo maluna o ka ":manao aloha" a i ka hele ana o ka olelo a ke kahunapule a kahi e olelo ana ma ka euanelio "o ka mea hala ole o oukou, oia mua ke pohi aku i ka pohaku iaia," ma keia wahi e ike ia iho ai ke kaona e ka poolelo ao a Rev. de Witt Tulmage, a ma keia wahi no hoi i wili ai ke poo a i olelo ino iho ai ka naau o na mamo misionari. Pomaikai ka launa ana o keia malihini haipule maau maikai, me ko kakou Moiwahine, mamua o kona hoopiha ia ana a piha i na "pohaku" a ka poe kina nui e pehi nei i ka Moiwahine a me Kona lahui. E hoomaikai ia ke Akua no Kana mau hana aloha ia kakou, a ke poloai ae nei makou i ka lahui e hoomau e malama i ka maluhia a e hilinai ia IEHOVA o na kaua. Nana e nooponopono ko kakou mau pilikia a pau, a mai puni aku i na pahele e hoao ia nei e kekahi poe, e ao ana e komo kino aku ka lahui Hawaii me ka lima oolea e imi ai i ko lakou pono - waiho loa kela, ua maikai kulana, a aole he kumu hookahi e oni ai a e hoeha wale ai i ka ili. Waiho aku me ka manaoio i na mea a pau, ma ka pule, maloko o ka lima o ko kakou Akua, oia, a oia hookahi ka ka lahui hana, a o na alakai e ae na ka poe kolohe no ia o ka poe hoopunipuni o na aoao elua, e hoao ana e hoouluku i ka lahui i haulehia ai ko lakou kulana imua o ke Akua a imua o ka limahana a ke Akua i waiho ai nana e hooko mai ka pono - oia hoi o Peresidena Cleveland.
KA LA HANAU O KAMEHAMEHA.
Ma ka Poakahi nei, June 11, ka la hanau o ka Moi Kamehameha I ke alii nana i hoohui i na mokupuni a lilo i hookahi. Ua malama ia ka la me na lealea like ole, a o ka oi aku no nae oia mau lealea, oia no ka heihei lio ma Kapiolani Paka. He umi ka nui o na heihei, a ua holo ia no a pau pono me ka maikai. He ekolu heihei i eo ia Senate Stanford, ka manu Kolohala o ka ehukai o Puaena. O ka manawa holo loa i holo ia ma keia la he 1 minute me 58 sekona e Amarino.
Nui no ka poe makaikai i hiki ae ma Kapiolani Paka, a ua hookuuia na hana me ka maikai.
HAIOLELO A O. P. EMESONA.
Ua hoikeia mai ia makou, ua hoike ae ke kakau leta o ka Papa Hawaii, imua o ka halawai o ka Aha Hui o ka Paeaina, he poe Kahunapule lawe waiwai kipe kekahi, a ua aneane e hoike mai oia i ka inoa, kaua e ia aku hoi e Alapaki ma.
O ka ke Akua keia e kuai pau nei. He mea pono ia Emekona e hoike ae i ke akea i ka ia ia o keia poe Rev., @ng lepo i ike pono ia ai keia poe lawe i ka waiwai pilau.
MAE WALE KA PUA.
MR. LUNAHOOPONOPONO,
Aloha oe:
O kela poo maluna ae, he Lei Momi ua hala e.
Ma ka la Sabati, Mei 27, hora 10 a.m., ua piholo iho la ke keiki muli loa a Mr. a me Mrs. Namauu i ka wai o ka muliwai o Wailoa, ma kahi kokoke i ka makaha o ka loko o Waiakea, hookahi makahiki a oi o keia keiki, ua mama no i ka hele, ke kumu i poino ai, ua hele keia makalii me na kaikuana ma kahi kokoke i ka lihi wai, malaila na hanau mua i paani ai, lilo loa na hanau mua i ka paani, ike ole i ka wa i poholo ai. O kona mama ua hele i ka pule, o kona papa, e ma kaukau ana no ka hele i ka pule; oiai ka makuakane e makaukau ana no ka hele aua i ka pule hoea aku nei ka hiapo he 10 makahiki a oi, ninau mai la ka makuakane, aia i hea o pepe, ua lawe aku nei o kupuna Mrs. Kahalekaa, pau ae la ka noonoo ana o ka makuakane, me ka manao kuhihewa ia hoi he oiaio ka ke keiki, hala aku nei i ka pule oia ka hoomana o na la hope, eia ka i ka muliwai kahi i hoaikane ai me Niolopua, na Mrs. H. Nakahina i ike, i hele aku oia e kala i kona mau hala i ka wai, loaa e ka makana, he pepe e lana hele ana i luna o ka ili o ka wai, a nana i paholo ae i ka lona a lohe aku la na makua i ka poino i loaa ia laua nolaila, ua holo ino mai la laua e ike i ka haawina o ka luuluu i loaa ia laua.
Ma keia e makaala loa oukou na makua mea keiki ia lakou, oiai ko oukou mau home ma na kapa muliwai, o ka elima iho la keia o na keiki i poino i keia muliwai ma ke piholo i ka wai, nolaila, e makaala pono i na pua, o poho wale na manaoina.
Owau iho no me ka haahaa.
D. KAAIWELA.
Hilo Town, Mei 28, 1894.
Hale Kuai Lako Hale Nui!
E Hanaia no na Lako Hale o na ano a pau
Na Lako Hale i Makaukau mua mai na Aina e mai.
Na Bela Moe o na ano a pau.
Na Moe Oka a me na pono Lumi Moe e ae o ke ano hou loa o ka
HOIKEIKE NUI O KIKAKO.
Na Uluna Helumauu i uhiia me na pale Silika o na ano like
ole a me na Uluna Mauu
O Kela a me Keia Ano.
Na Pela Moe Lauoha, Lumi, Huluhipa, a me na Bela Moe Mauu
i makaukau mua i na manawa a pau.
Na Noho o na Ano a pau.
He mau noho hoolimalima no kekahi no na anaina hoolaulea a
ahaaina paha, he oluolu loa ka uku hoolimalima.
He oluolu loa na kumukuai o na pono lako hale o na ano a pau
e waiho nei maloko nei o ko maua HALE KUAI.
ORDWAY & PORTER.
Alanui Hotele ma ka Hale Pohaku o Robikana mauka mai o ka Mele Koiauuu Hou
Telepona Bele 525 lmn 12-1y dty. Telepona Miulalu 645