Ka Oiaio, Volume VI, Number 30, 27 July 1894 — Page 1

Nupepa Ka Oiaio.

"O KA PONO KA AIALII E OLA AI KA AINA"

BUKE VI     HONOLULU, IULAI 27, 1894.     HELU 30

HE MOOLELO KAAO HAWAII

---NO---

LAUKAIEIE.

Ke Kino Kamahao Iloko

O KA

Punohu Ua-koko.

Ke Kahulileole'a o ke

Kuluaumoe o

na Pali

-- O --

Waipio Hawaii.

Unuhiia e Mose Manu no "KA LEO."

Ka lellea hope loa a na kaikamahine o Kauai me ke kaikamahine ahi Kalehuamakanoe Haule oia me Huiawe.  Kona naauauwa ana i ke aloha a hiki i kona makeana.  Lilo o kaulaaihawane malalo o ka Laukaieie malama ana me Makanikeoe.  E like me ka manao o Laukaieie.

Oiai na hakoko ana ke aloha kane i loko o kona umauma, a oia hoi kana i huli ae ai a olelo aku la i kona mauahonowai, e ae mai iaia e uwe nui no kana kane kona kuleana i noho ai me laua, a ma keia olelo o ka laua ihunona me ka pane ole ia mai e na makua, aia nae ua lilo e aku la ka olelo ana mai ia Makanikeoe, e ke kaikamahine alii o Kauai, ua hele mai oe me au a me ka lehulehu mamuli o kou manao aloha i kou kaikunane nei Kawelonaakalailehua, e uwe aku ana oe a me makou a molowa wale aku mai kauwe, nolaila noho malie aku no kakou meia a hiki i kona pauaho ana mai ia kakou, he aha hoi ana nei ka hewa na kawaimaka no ia e hana ai kana hana he mea po-o paha ia no koia nei noonoo me ka lele ino o kona hauli oiai, aole oia i make, eia no oia ke ola nei.  Nolaila e kali kakou no kona manawa hope loa.

Ma kela mau olelo a Makanikeoe, eia no ka mea nona keia moolelo Laukaieie ke noho pu nei me kana @hi kane a me na ohana a pau me Kaukini ma. me ko lakou kulu waimaka e hoopulu ana i na papalina me na manao minamina me ka ehaeha walania o ko lakou mau noonoo a pau, a he wa hoi keia no ka hamau o na mea a pau me ka hoolei pau ana o ko lakou mau nanaina maluna o ke kino o ka mea nawaliwali e waiho nei, aia i keia manawa a Makanikeoe e kamailio nei, ua meha like na mea a pau me ka pane wahi leo ole ae ia manawa o ke kapilikii o na noonoo ana, aia hoi ua owaka aela na maka o Hiilawe mai na upoi ana o kona maju lihilihi a au ae la kona mau maka ma o a maanei me na waimaka e haloiloi ana. a puana ae la oia me ka leo nahenahe loa, e neenee mai oe e Makanikeoe, ua nee aku la kana mea i manao ai a kokoke ma kona poo, a pane hou ae la o Hiilawe, auhea aku nei ka haku lani kaikuahine o kaua.

Eia no ke noho nei, wahi a Makanikeoe i pane iho ai, e olelo oe iaia e nee mai maanei.

A no keia mea, ua hai ae la oia ia Laukaieie i ka manao o kona kaikunane, a ua hooko mai la oia i kona makemake, a ia Laukaieie i kulou iho ai maluna o ka umauma o kona hanau mua me ka naau walohia, ua pane ae la o Hiilawe i kana huaolelo, e kuu haku lani kaikuahine ke ike iho la no nae oe iau mamua o kuu make ana, e hele pu no au me kau mau ino a pau i hana ai e like me ko'u makemake.  aole hoi e ili aku maluna ou ia koko a'u i hana ai maluna ou e kuu haku a me na makua o kaua a me ka ohana a pau, a oia mea a'u i aihue ai i ka ui nohea o Kauai, ka mea hoi au i hoolohe ole ai i na olelo a Makani keoe a me Lauikileula, alaila e olelo ia ia mea a lilo i mea kaulana i na hauna ma keia mua aku.  He mai pii alii, alaila e ukali mai ana nei aa mea a pau ma keia hope aku ma ia alanui hookahi au i hana ai he inoa kaula--ne me ka makaikai, nolaila, ina wau a make ana, alaila, e waiho oe iau

ma kahi e ike ia ai au e na maka o lehulehu; a lilo au i mea kaulana nie ka maikai, nui ia e ka poe malihini, ma keia mau olelo aua Hiilawe nei.  I kona kaikuahine ua pane iho la o Laukaieie, na Maknikeoe e noonoo a hoomaopopo ia mea, nolaila e hoomanao kaua e ka mea heluhelu eia ka mai a Hiilawe i puka mai ai ke la huaoleo, he mai nii alii e olelo mau ia nei.

I ke kuu malie ana iho o keia mau olelo a Hiilawe, aia hoi kona hanu ke nape malie iloko o kona umauma, a ua manao iho la kona kaikuahine o kona mau setona hope loa ia, nolaila, ua hai ae la o Laukaieie i kana olelo i na mea a pau e akoakoa nei, e hele mai e haaiw iho i ko lakou mau aloha hope loa no Hiilawe, aia ia lakou e lulumi nei, aia hou ua hookuu malie mai la ka hanu ola o Hiilawe i kona hale kino a pio iho l ake kuikui o kona hale a lele loa ae la kona aho hope loa, a kaawale aku la kona uhane mai iaia aku, a o a ka manawa i hooho ae ai na leo makawalu o ka uwe ana o na mea a pau, aia nae ke naauaua mai la makua me ka ohana a pau.

Aia hoi ka ui nohea o Kauai ke uwepaiauma mai ia, ua lawe ae la oia i ka malo o Hiilawe a lei ae la ma kona a-i, aia kona mau lima ke kahiau nei maluna o kona poo, a he manawa hoi ia no ke aloha maeele e hoopuni ana i ke kino, a e uwe helu ana hoi i kahi o ka noho ana a me ka hele ana, a na keia piha uwe makeina i hoopuiwa aku ia Kaulaaihawane me kana kane a oia kana i ninau ae ai ia Laukieleola i ka niha uwe a lakou e lohe nei, ana olelo aku ka ui opio iaia, e kali iki kakou a hiki mai ka huaolelo.  Ia laua e kamailio nei, ua hoouna ia mai la o Kaohaiula e Laukaieie e kii mai ia Kaulaaihawane me kana kane me ka hai pu aku ia laua, ua make ia o Hiilawe, nolaila ua hele aku la o Kaohaiula me kona mau helehelena uwe a hiki ana imua o kona hoa i au pu mai ai i ke kai o Kaieiewaho a me na ale kuehu o Kaiwi a me na ale hanupanupa o Pailolo, a hiki aku i na ale hanupanupa o Alenuihaha, he mea oiaio, ua hiki aku oia me na helehelena kaumaha, a maia ano, ua ninau koke mai la o Kau lanihawane ia Ka haiula, he mea e ke anoe o kou m@ helehelena a he waimaka aha keia.  Pane aku la o Kaohaiula me kona mau lima i ka iho ilalo, ua auhee ka au aohe kane na lilo ke kana i Hiikua i Hiialo, ua hala ua nalohia ua pau ua hele aku la ko kakou kaik@ne Hiilawe i ke ala hoi ole mai, ua ko-o ka hale a ke aloha, ai aku me Niolopua i ka hiamoe ka o ke kau me ka Hooilo.

I ka lohe pono ana mai o Kaulauihawane i keia mau olelo a Kaohaiula, aia hoi he mea e ke anoe ana o kona mau noonoo ana me ka hoomaopoo ana iho, ua make o Hiilawe a huli pono aku la kona alo me kona nanaina me kona waimaka imua o kana alii kane Kalaeohia me ka pane ana aku i kana mau huaolelo nahenahe, e kuu haku kane aloha, ua Iohe pu ae la no kaua i ka huaolelo a ko kakou haku lani alii.

I hoouna mai nei keia wahine au i hele mai la e hai i ka lohe ia kaua i kekahi lono mokumokuahua o ko kakou mau manao, no ka mea, oia wale no ka mea mana nui maluna o kakou a pau, a oia wale no ke kumu o ko'u lilo ana ia'u a pela hoi a'u ia oe, nolaila e oluolu a nei ko'u manao ia kaua e hele ma kahi o ka mea i haaleile mai ia kakou?

Pane aku la Ka@eohia me ka leo oluolu me ka ohohia o kona mau ano a pau ke nana aku, a oia hoi kana i puana aku ai i mua o kana alii wahine.

E kuu haku wahine, o kou leo a me ko'u makemake aole o'u kuleana ma na ano a pau e keakea aku ai i ko'u manao.  oiai hoi he noho ana pili aku ko'u mahope o'u. eia nae he haawina pili loa ko'u haku ahi lani wahine o kakou e noho nei ma ke kumu pili ia'u a meia Laukaieie a hiki i keia la, aole hoi o'u mea nana e mawehe ae mai ke kumu mai, nolaila e hele e aku oe mamua me ia nei Kaohaiula a mahope aku nei a'u me Laukaieie, a mai makau a kanalua mai oe no'u nei, ma keia olelo maikai a Kalaeohia, ua ku ae la o Kaulaaihawane me Kaohaiula a hele aku la no ka hale makena, ia laua i puka aku ai mai loko aku o Ihikalani, ua hooho ae la o Kaulaaihawane me ka leo uwe nui me ke kanalili, oiai kona mau lima e puili ana iluna mahope o kona poo me he ala e haehae ia ana ko lakou mau puuwai, aia hoi ka mea nona keia moolelo me na helehelena o ke kaumaha e hoike mai ana kona mau waimaka aloha kaikunane a me kana alii kane kai komohia like iloko oia haawina, a oia laua e noho ana ma ke poo ponoi o ka mea make, aia nae ua huli pono mai la ko laua nana ana i ko laua nana ana i na kaikamahine o Kauai e uwe paiauma aku nei, a ke nanaai pu mai la hoi ka ui nohea alii o ko laua aina oiwi a ke olowalu like ala na leo kupinai o na mea a pau, a me na leo uwe helu, a kaukau o Kaulaaihawane i puana leo nui ae ai me ka moakaka pono e hiki ai ka lohe pono ia mai e na ohana.  A oia kana i puana aku ai ma ka helehelena.  me he leo ala no ka hekili iloko o ikuwa.

ka wa a kaua i kauhale

Hele aku la oe nohe lua,

Koe ko'u aloha i hope nei

Na'u no ia e puolo me ka waimaka.

Kuu haku kaikunane kane o keia uka.

Hoa'u o ka po me ke ao,

O keia uka anoano

E ano wale mai ana no ia'u ko

aloha auwe kuu kane e

Kuu kane ma ka wai o Ulu

ke ulu nei au i ko aloha me he maka wai ala

Ka hanini mao ole i kuu lihilihi.

He lihi mua ko'u ia nei

Na'u no i panaho mai ia'u

Noho aku a'u me ke aloha ia oe

O oe o wau i ka haiki

O wau o ka manu o Kaula

O wau o Kaulaaihawane e ala mai oe

E ala e ka Iwa ana ai ma Kaula.

E ala e Halulu i ka pa kapu o Tahiti.

E ala e ke kaupu au moana,

e ala e-ka Ulili ka Noioaukai

E ala e haulili e ka Pueo nui hoanoano

E ala e ka Moa e ka manu hoolale i ke ao

Ke kau mauli leo o ko kaikuahine e ala mai.

I ke kuu ana iho o keia mau leo uwe helu hoala a kaulaaihawane, ua hoi hou mai la ka hanu o Hiilawe e hapai ana i kona umauma a holo ae la na aa pana ma kona a'i me he leo ala no ka moa ke o-o-o ana ae o ka owaka ana ae o kona mau maka a kaakaa mai ana me ka waimaka.

E haloiloi ana a huli ae la kona mau kiionohi a ike i kana aloha mua hapai ae la kona lima a peahi aku la ia Kaulaaihawane e hele mai e haawi iho i kona aloha iaia.  Nolaila, @a hele aku la oia a haawi aku la oia i kona ihu i kana kane, a hai ae a o Hiilawe i kana mau olelo; Ina aole e loaa ko'u uhane i kekahi wahine ui launa ole, ua like no kona ui a me kona nani me kuu haku lani hanau mua e noho ne me Laukaieie, ike aku nei au i ka ino ana mai nei ma ka lewa iloko o ke anuenue, a nana i hopu mai nei ko'u uhane a hoihoi mai nei, a he oi aku ka makau o o'u uhane i ka hamama ae o ke kino ne me he ana ala, a he mea pio loa no ko'u uhane ka lohe ana i ko oukou leo uwe no'u, aole nae au i ike i ke komo ana mai nei o ka uhane, a lohe koliuliu anei au i ko leo uwe, a oia au i ola hou ae nei, a pomaikai au i ka ike ana ia oe, nolaila ke manao nei au he wahi manawa pokole wale no ko'u e kamailio pu ai me oe a haalele au he wahi manawa pokole wale no ko'u e kamailio pu ai me oe a haalele au ia oe, nolaila ina au e make hou ana, eia kau olelo kauoha ia oe mai hoonele oe i ke kipa ana mai ina makua o kaua.

Aole hoi o kuu haku lani alii hanau mua he mea nui oukou a pau loa iaia, a ua ike oe i ke kumu o ko'u pilikia ana.  na'u ponoi iimi ke kumu o ka pilikia a me ka poino a i maemae ae ai o ka noho ana me ka mea nana oukou a pau i lawe mai imua o Laukaieie, a e make au me ka'u maju hana pono ole a pau i mea e waia ole ai ko oukou noho ana ma keia ao.  I ka pau ana o keia mau olelo, ua puana ae la oia i kana olelo hope loa me kona mau kulu waimaka.

E kuu aloha, mai poina ia Hiilawe ke hiamaoe pu nei au me ke aloha, a oili pulelo hou aku la kona uhane mai ke kino aku.

Ma keia make ana o Hiilawe a ola hou mai la, ua olelo ia ia make ana he maule, a o kekahi olelo ana a ka poe kahiko, he ola naka aumakua, a he mea mau no ia i keia lahui, ua nui wale ka poe i make a hala kekahi mau hola a he hapalua o ka po a me ke ao, a he mea mau no ho hoi kekahi e waiho a make ai, alaila ola hou mai la a maia ola hou ana mai la, e kamaiho no ka mea make i ke ano o kona make ana a me ke ano o kona ola hou ana mai, e like me ko Hiilawe ola hou ana mai a make aku la.

Aole i pau.

He oia mau no ka paa o Kauai aole he hoohiki aku.

"HE Moolelo Hoonanea

---No---

Don M. Maseka.

Ka Opio Iloko o na wi-

liau ana a ka Pahi-

kaua,

Ka Omole Laau Hamo

Kupaianaha.

A O Na Makana Hiwahiwa

Ekolu.

Ke Kavalia Maluna o ka Lio

PUAKEA me na hao kila Mageneti

ME NA

KIAI PUKAUA EKOU.

MOKUNA X.

Ka Umii iole o ke Keneturia Umi-

kumamahiku,

"Ke ae aku nei au e hooko me ka lawe ole ana a homo aku i ka inoa laahia o oe Akua mana loa ma ka hoohi@i ana aku imua ou no ka hooko ana aku i ka'u mea i ae ai e hana, ina ia he wa no'u i makemake ia ai e hana aku i kekahi hana no ke Alii ka Moi a e waiho pu aku hoi ia'u malalo o na kapuai wawae o ke Alii ka Moiwahine no ka hoohana ana aku ia'u iho e hooko i kona leo a me kana mau kauoha.  Ina oe i ike he wa kupono ia no'u e hooko ai i kekahi hana no ka Moiwahine--e hoohana aku ia u me ka hakalia ole."

"A i hea oe i manao ai e hoonoho ia'u no keia manawa."

"Aole anei ou mau hoaloha i kahi kupono no hoi au i manao ai e hiki ana ia M. de la Pote ke kii mai ia oe."

"Aole paha e hiki, Aole loa au e hiki ke haawi i kekahi manao o ka hilinai i kekahi mea okoa aku."

"Alia," wahi hou a Don Maseka "eia kaua mawaho ponoi o ka ipuka o Atosa.  Ae, pela io paha au e hana aku ai ia oe."

"Owai ia mea o Atosa."

"O kekahi ia o ko'u mau hoa'loha pilikino"

"Aole anei e ike mai ia'u ina aia no oia i ka hale i keia manawa?"

"Aole oia i ka hale i keia wa.  E lawe aku ana au ia oe a hoonoho iloko o kona rumi, alaila, lawe pu mai au i ke ki o ka ipuka."

"A ina ia e hoi mai ana, pehea iho la au?"

"Aole loa ia e hoi mai ana, aka ina no ia e hoi mai, aole no e nele ana kona ike iho ua lawe mai au i kekahi wahine a hoonoho iloko o kona rumi."

"Aole anei oe i manao he mau hana keia e hoike lea aku ana ia'u iho no ke komo ana iloko o keia mau hikikau ana?"

"Heaha kou mea e makau a a e hopohopo ai hoi no ia mea, oiai aole mea i ike ia oe."

"A ina hoi ha pela kou manao e hele ia kaua i ka hale o ko hoaloha.  Aia oia ihea kahi i noho ai?"

"Aia i ka Rue Ferou--he mau wahi kaina wawae wale no mai keia wahi aku."

Ae, ua haalele like iho la na kino elua ia wahi a hoohiki aku la ko laua alahele no ka hale noho o Atosa.  I ko laua hiki ana aku, ua lawe koke ae la ka kakou opio i ke kulana o ka wehe ana aku i ka ipuka o ka hale a hookomo aku la ia Madama bonasiua iloko o ka rumi a kakou i kamailio mua ae nei me ka pane ana aku:

"Eia oe i ka hale i keia wa, a e ki mai i ka ipuka maloko, a mai ae wale aku i kekahi mea e komo mai iloko nei, koe wale i@o no ina oe e lohe ana he ekolu kikeke ana, a penei--hoomaka aku l@ oia e kikeke he elua kikeke ana e like ka halulu me ka hekili a hoomaha iho la me ke kali ana he mau sekona, alaila kamumu hou aku la."

"Ae, ua maopopo iho la ia u," wahi a Madame Boansiua i pane mai ai, "a e hoolohe mai hoi oe i ka'u mau kuhikuhi ana."

"Eia au me an pepeiao i makaukau no ka moni ana mai i kau mau huaolelo."

"E hoohiki aku oe i kou alahele no ka Louvere. ma ka aoao e pili pu ana ma ka Rue de l'Echelle, a e ninau aku ia Geremaina."

"Ua hiki ia manao ou, a heaha hou ae kekahi mea au i makemake ai?"

"Aole no auanei e nele ana kona ninau mai i kou makemake i hiki aku ai, a e pane aku oe me keia mau huaolelo:  'Tours a me Berusela' a oia koke no auanei kona wa e haawi mai ai iaia iho malalo o kau mau kauoha."

"A heaha ka'u e olelo aku ai iaia e hana?"

"E hele aku oia e huli ia M. de la Pote, ka aipuupuu o ka moiwahine."

"A ina oia e hiki mai, heaha ka'u e kamailio aku ai?"

"E hoouna koke mai oe iaia i o'u nei."

"Ua pono.  A i ka wa hea, ma hea, a pehea la wau e ike hou ai ia oe?"

"Ua makemake loa anei oe e ike hou ia'u?"

"Ae no hoi paha."

"Ina pela, e waiho malie mai no oe ia mea me a'u, o ko'u kuleana no ia,"

"Ke hilinai nei au maluna o kau mau olelo."

"Aole wale o ka hilinai, aka, o ka paulele pu.:

Ua haalele aku la ka kakou opio ia Madame Bonasiua me na hiomona o ke aloha kakia iwi, a oiai oia e iho ana i ke alapii, ua lohe aku la ia i ke kani o ka puka i pani ia mai mahope ona, a holo koke ae la hoi ke ki o ka laka.  A he elua a ekolu paha lehei ana a ka kakou opio hiki ana i ka Louvere, a ma kahi hoi ona i makemake ia ai e hele.

I kona wa i hiki aku ai, ua lohe aku la oia i ke kani-ke ana mai o ka uwati e hoike mai ana o ka hora 10 ponoi ia o na po ala, he wa hoi a ka@a e ka mea heluhelu e hoomaopopo iho ai.  ua hana ia keia mau hana a ua pau i ka hooko ia iloko wale no o ka hapalua hora.

Ae, ua pau na mea a pau i ka hana ia e like no me ka Madame Bonasina i hoike mua aku ai.  ua lohe mai la o Geremaina i ka huaolelo ku-kiai, a hoohiki mai la oia i kona alahele imua o ka kakou opio me ka mama nui, a me ke kulou no hoi o kona poo ilalo o ka makaukau maju i ka hooko kauoha.

Ua hoike aku la o Don Maseka i na mea a pau a laua i kuka pu ai me Madame Bonasiua, a me kona wahi e noho ana ia manawa.

Ua hiki aku la keia kanaka imua o M. de la Pote, a oia kana i hoike aku ai i kona wahi i makemake ia ai.

Ua huli ae la ua M. de la Pote nei a hele aku la no umi kanuai, a oia kana i huli hou aku ai i hope a pane aku la i ka kakou opio i ka i ana aku:

"E ka opio," wahi ana, "he mea pono paha ia'u e ao mua aku ia oe."

A heaha kau i makemake ai e kamilio mai?

Ua manao wale no au mahope paha oe komo iloko o kekahi poino no keia mau mea.

Ua mano anei oe pela?

Ae.  Aole anei ou hoaloha i loaa kekahi uwate hele lohi loa?

A i ke aha la?

E hele koke aku oe e ike iaia i keia wa ano, i wahi nou e manao ia aku ai ilaila no oe i ka hapalua o ka hora 9 nei.

Ua haawi koke aku la ka kakou opio i kekahi nana ana no kekahi mau minute, a oia koke no kona wa i huli ino ae ai a hele awiwi aku la no ka hotele o M. de Terevile.

I kona hiki ana aku, aole loa oia i komo aku, ua komo aku la oia ma ka rumi kuka o ua kapena la, me kona hoike ana aku hoi i kona manao o ke ake nui e ike i ua kanaka la.

O keia ake nui o ka kakou opio e ike ia M. de Terevile, ua hoohauoli ia mai ia manao ona mamuli o ka hiki ana mai o ua kapena la imua ona iloko o elima wale no minute.

Heaha la ka mea hiki ia'u ke hana aku nou e kuu Don Maseka?  A heaha hoi keia huakai au o ke aumoe? wahi a Terevile mai ai.

Mamua ae nae o ko M. de Terevile hiki ana mai, ua lalau mua ae la keia i ka manamana kuhikuhi hora o ka uwati a hoopoepoe ae la a he iwakalua kumamalima minute i hala ae o ka hora 9, a oia kona wa i pana aku ai:

E kala mai oe ia'u, oiai he iwa-kaluakumamalima wale no minute i hala o ka hora 9 i keia wa, a no ia kumu, ua manao au aole no hoi paha i hala hope ka'u huakai mahope o ka wa kupono.

He iwakalua-kumamalima minute i hala o ka hora 9 aole anei oe i kuhihewa ma ia mea? wahi a Terevile.

Aole loa au e kamailio aku ia oe no kekahi mea ina aole i maopopo mua i ko'u lunaikehale ka pololei o ka'u mea e kamailio aku ana. e huli ae e ke kapena a e nana i ka uwati me ka hoomaopopo nou iho.

Na keia mau huaolelo a ka kakou opio i hoohuli ae i ke kania-i o ke kapena e nana i ka uwati, a i kona hoomaopopo ana aku, ua ike iho la oia ua pololei e like me ka Don Maseka i hoike aku ai, e laa hoi ke kau pono o ka manamana kuhikuhi hora i ka iwakaluakumamalima minute i hala o ka hora 9, a oia kana i pane aku ai.

Ua pololei oe e ka opio, ua manao khihewa loa ia au eia la i kauwahi o ka waena po.  E hoike koke mai ia'u i kou makemake o ka hiki ana mai nei?

Ua hoomaka aku la ka kakou opio e kamailio i na mea a pau e pili ana i ka moiwahine, ka moi a me ke Kadinala, me ko ke Kadinala opu kekeue i ke Duke o Bakinahama, a me ka li'u wale ole o na la e ulu ae no auanei na popilikia mawaena o ke Kadinala, ka Moi a me ka Moiwahine.

A oiai ka uwati apuka i kani-ke ae ai, e hoike mai ana hoi o ka hora 10 ponoi ia o ua po la, ua ku ae la ka kakou opio iluna no kona huli hoi aku, iwaena hoi o na hoomaikai a me na olelo ao o ke kiai makaala loa i ke alii ka moi a me ka moiwahine mai ke kapena mai.

Aka, oiai oia e iho ana ilalo o ke alanui pii, ua hoomanao ae la oia i kona kookoo ua poina ia iloko o ka rumi kuka o Terevile, a oia koke no kona wa i huli ae ai a pii hou iluna me ke komo ana aku iloko.

Ua huli ae la ka kakou opio a nani ma o a maanei, a i kona wa i ike ai oia wale no ko loko o ka rumi, ua lalau ae la oia i ka uwati a hoopololei hou i ka manawa, a puka aku la oia hoi no kona wahi.

MOKUNA XI.

Haualoaoa na Hoomahie o ke Alo-

alii.

I ka wa a ka kakou opio e huli hoi ana no kona home, ua lawe ae la oia i ke alanui loihi loa.  i hiki koke ole aku ai oia i kona hale. a i wahi hoi nona e hoapaapa hele aku ai i ke alanui.

Aka, heaha hoi kona manao a me na hauli o ka manawa oiai oia e hele malie ana me na mino aka ana e hoalii ana ma kona mau papalina oiai hoi e hakukoi ana kona puuwai me ka hanu nanahe malie ana i ka nana iho o na hoku o kalani a mino aku maluna o ke kulanakauhale alii o Parisa.

O keia mau hiona a pau e hoalii nei i ua po ala ma ke kulanakaukauhale o Parisa, oia ka kakou a pau e ninau iho, heaha la ke ano o keia mau mea, a heaha hoi ke kumu a me ka mole?

Ae, o ke kumu a me ka mole o keia mau hiohiona kupaianaha a kakou e heluhelu nei oia no na koiikoi hoohihi o ka Madame Bonasiua i ka kakou opio, a o ka kakou opio hoi, eia oia iloko o na moeuhane pahaohao o ka hoomanao ae i kana hana o ke aloha i ka hoopakele ana i kela lede mai ka lima mai o ka poe e ake ana e umiapuaa a e hoomaewaewa iaia.

A pela iho la ka paukiki o ka holo ana o ka hauli o ka manawa o ke kakou mau manao koho, aka, aole no nae i hoohalawai ia mai ie mau manao koho ana me ka makapaa o ke pakalaki, oiai oia i ike iho ai iaia iho ua lilo i pulakaumaka no ua Madama Bonasiua nei. mamuli o ka hiki ana mai o kekahi elele mai ua Madame nei e noi mai ana iaia no kekahi kukai olelo me ia i kekahi manawa, a e makana pu mai ana hoi iaia i kekahi kaula gula a me ke daimana.

He mea maui na mea ola uhane a pau o keia ola ana, i kona mau ia ui, he lei makamae nana na makana hiwahiwa a kekahi lede, @ela iho la ka kakou opio i hooniua ia ai a poluluhi kona mau noonoo mai kai iloko o la mau hora a ke kupo uli nui, a lawe ae la oia i keia mau makana hiwahiwa i lei makamae nona.

Iloko o keia mau hoopoluluhi ana, ua hoomaopopo iho la oia i ke kupilikii maopopo okona kulana me ne mea la aia oia iloko o kekahi uluaoa nui o ke kaua, a i kona hoomaopopo iho, ua like no a like, ina oia ma Falauna a ma Parisa kahi i nohe ai.  Oiai, ma Falauna e komo aku ana oia iloko o ka uluaoa o ke kaua kue aku i na Sepania, aka  ma Parisa hoi, e komo aku ana oia iloko o ka ulua@­­­­ o ke kana me na ui no kona pono kino, a oiai hoi he mau enemi wale no a elua ke kono mai ana i kekahi mea a hakoko a hiki i ka pau ana o ke ola kino.

Aka, oiai hoi keia mau hiohiona e poluluhi ana, e huli ae hoi kakou a ninau iho, auhea o M. Bonasiua a he wahi hauli no anei kekahi o ka hoomano ae o Don Maseka no kana mea i haawi aku ai i ka lima o na kanaka o ke Kadinala no kona hoopaahao ia?  Aole loa!

A no ke kamailio ana ae hoi no M. Bonasiua, aole i hamama ko kakou kolamu i keia wa nona, aka. e huli huli aku ana ko kakou alo a kamailio nona i keia mua aku.

Oiai ka kakou opio iloko o ka ulupuni o ka noonoo nui no kona komohia ana aku iloko o ke kulipo o ke aloha me Madame Bonasiua, a e namunamu hele ana hoi ia iloko o ua po ala ana e kuoe hele ana me na mino aka e hoalii ana maluna o kona mau papalina, ua kaalo ae la oia mawaho o ka hale o Aramisa, a oia koke no kona wa i haunu ae ai e komo oia iloko e hoike aku iaia i ke kumu nui o kona hoouna ana aku ia Palani ilaila no kona hoohikiwawe ana mai i kona alahele no ka hale o ka umii-iole.

Ke hoomaikai aku nei makou i ka poe e hoino eni ia makou no ka pule aku i ke Akua o ka Lani a no a no ka hilinai ana iaia.  Pela no o Moses i haalele ai i ka nani o Aigupika, no ka hoino ia o ka Haku.  Aole no keia o ko makou Aupuni i kau nui ai.

Olelo Hoolaha.

E ike auanei na ano kanaka a pau, owau o HUSMAN, ke papa a ke hookapu loa aku nei au i na halekuai a pau aole e ae i kuu wahine mare Mrs. Luika Husman e hoaie ma ko'u mea, o ka mea, ua haalele kumu ole mai ola ia'u me na keiki liilii a maua hookahi keiki ekolu makahiki, a o kekahi, hookahi makahiki.  O ka eha keia o kona haalele ana ia'u, a ke manao nei au e hookaawale ia maua imua o ke kanawai, no ka mea, aole e hiki ia'u ke hoomanawanui me keia mau keiki oiai au e noho wahine ole ana.

Owau no me ka oiaio,

HUSMAN,

Hamakua, Iulai, 23, 1894.

NUPEPA KA OIAIO.

---O---

E HOOPUKAIA ANA E

KEKAHI HUI HAWAII PONOI

I kela a me keia Poalima.

Ka uku o ka nupepa hookahi  No eono

malama, $1.00, no hookahi

makahiki $2.00

KUIKE KO MAKOU RULA.

He uku emi mai no hoi ko na hoelaha oihana, na hana kelepa, na hale kuai o kela a me keia ano.  O na hoolaha mai na apana, mawaho aku o ke kulanakaua hale nei, e hoouna pu ia mai ka uku.

E hoouna ia mai na manao ma ka inoa o John E. Bush Ailuene Buki, o n akauoha nupepa a me na hookaa dala a pau ma ka mea o ka Puuku John Kapamawaho Prendergast.

John E. Bush

LUNAHOOPONOPONO.

John K.Prendergast.

HOOLAHA.

I na Luna a me ka poe lawe pepa pakahi, a me na makamaka eae o ka NUPEPA KA OIAIO  a me KA LEO o ka LAHUI ma keia ke hoike ia aku nei ia oukou apau, e palapala pololei mai ma ko'u inoa no na kauoha nupepa, na hoolaha a me na hoouna kala ana mai a pau.  Aole e mana kekahi palapala hookaa ke ole e kakauinoa ia e a'u ma ko'u inoa ponoi elike me ia malalo iho, i na ua hiki ole ke kakau mai ma ko'u inoa haole, alaila, e kakau mai makou inoa Hawaii elike me ia e puka aku nei; a i ole ma ka inoa o na "NUPEPA KA OIAIO a me KA LEO O KA LAHUI"

John K.Prendergast.

KAUAMAWAH

Puuku o ka NUPEPA KA OIAIO a me KA LEO O KA LAHUI.

Honolulu Jan 12th 1894.