Ka Oiaio, Volume VII, Number 4, 29 March 1895 — Page 2

NUPEPA KA OIAIO.

 

J. E. BUSH.  Lunahooponopono.

 

O KA PONO KA AIALII E OLA AI KA AINA.

 

POALIMA, MAKARI 29 1895.

 

            HE OIAIO, no KA LEO O KA LAHUI na manaolana i pahola ia aku ai imua o ka lahui Hawaii a piha he elua makahiki, a he mea oiaio no hoi, i hiki ole ke hoole ia he kumu pololei no ko KA LEO hilinai ana he pomaikai ko ka lahui mai ke Aupuni Amerika mai, a o keia manaolana ua komohia iloko o ka puuwai o na aloha aina a pau, a ua hapaiia e na nupepa aloha aina a pau.  Aka, i ka wa i hiki mai nei o ka hooiaio, ma o na elele o ka lahui, ua hoopahua ia ka PONO a ka Luna Hooko o ke Aupuni Amerika i manao ai e hana mai no keia lahui, a me ka hoonele ana mai hoi a na aupuni nui o Europa, ia wa ua ako iho la makou ua nele ka pono ma ia alanui hele he hoopii i na hoaloha aupuni kuwaho, a o ka hana i koe e hoololi i na imi ana i ka pono kaulike no ka lahui, aole hoi o ka pahola aku i na olelo makani oiaio ole i kumu @ ili hewa ai na manaolana o ka lahui maluna o ka ole, a @ paakiki kumu ole wale iho ai no imua o ka mea i ike maoli ia, e like me ka iakake ka ike i ka wai, he nuha a he moe kaa i ka lepo.  O ke kanaka i pani i kona mau maka i ka malamalama a me ka oiaio, he mea maopopo loa, ua kuko oia i kekahi mea ana i makemake nui ia, a no ka nele ana, ua piha oia i ka manao huhu, a ua lilo kona ano kanaka e like me ko ke Kekake, wahi a ka hoohalike a ka poe naauao no ke kanaka i hoohupo i kona noonoo maikai a ku like me ko ka holoholona.

 

            KE HOOIKAIKA la o Kakina ma Wasinetona e hooholoia ka lokahi mawaana o na Aupuni @ Rusia, Farani a me Iapana, @ kokua i ka hoomoe ana i ka uwea laina telegarapa moana mai Amerika aku a hiki i Asia @ ili ana ma Hawaii nei a ma Iapana aku—a Saiberia.  Aole keia he hoike ana mai i ka oiaio o na olelo makani ua hopuia o Kakina no ke kipe, e like me ia e paholaia nei i kumu @ manaolana kuhihewa ai ka lahui Hawaii, eia no ke aupuni Amerika ke hana mai la i pono no ka lahui Hawaii.  Ua hala ia manao a kakou i kau nui aku ai ma o Amerika, a @a nele no hoi na kokua ana mai a na Aupuni o Europa ia kakou.  O keia maoli ka mea oiaio, ka mea i loaa na hooiaio i ike maka ia.  O na olelo @ ae he mau olelo wale no ia na ka opu manawahua mamuli o ka haule ana o na manaolana, a he ku i ke ano o ka poe kuko a moeuhane kuhihewa.  Aloha no kakou a me na lia o ko kakou mau poo i loaa ma na kuko a me na moeuhane, a i nele hoi i ka puoho ana ao.  Aka, e mihi e na alakai, e pule me ka manaoio, a malia o aloha ia mai ma keia hope aku!  Auwe no hoi e!!  He apu awaawa ka mihi, aka, aole a makou laau e ae e pahola aku a@ i ka poe nona na naau i hoopilikia ia mamuli o ka haule ana o na lia o ko lakou mau poo, hookahi wale no laau he ala mihi!!

 

            Ua hoonoho mai hoi ka Aha Kiekie ia Kale Hapakini i luna hoopopono no ka waiwai o Naki Keolaloa.

 

MAU NO KE KUPAA.

            He mea kamahao ko makou ike ana i ke kupaa o ka lahui ma ko lakou kulana aloha lahui a makee alii, ke hoomanaoia na ano a pau i loohia ia lakou iloko o keia mau makahiki o ka noho ana aupuni o Hawaii nei.  Ua noke mai ka mai malihini o na ano a pau i ka hoemi i ka lahui, a @a hoilihune ia hoi kakou mamuli o na ano ai a me na hooweliweli i hookui mai i ka lahui i keia au malamalama a kakou e noho nei.  Ua apuepue ia a ua lilo mau aku ko lakou mau pono a me ko lakou mau kuleana, aka, ua noho nenea no keia lahui me ka naau i piha i ka lokomaikai no kona hoakanaka, a ua hoolilo ia hoi keia haawina o ke Akua—he aloha kanaka—iloko o na Hawaii i kumu e hoopoino ai iaia ma na ano a pau o keia noho ana.  Mamuli o keia ano oluolu palena ole o ka lahui Hawaii lakou i ilihune ai, i hulihia ai, a i noho nele ai i keia la aole he aupuni, a aole hoi he poo.  E like me na lahui kahiko, he hookahi no po, ua make iho la ke alii, a ua hoopio ia ka lahui, a ua lilo aku la ke aupuni ia hai.  Aka, iloko o keia oluolu, ke ike nei makou i ke kupaa o ka lahui, a no ia mea makou e olelo ae nei, he mea kamahao keia no keia lahui.

            Mawaho ae o ko makou ike kino i keia helehelena loli ole o ka naau aloha aina o na Hawaii, eia ke hiki mau mai nei na leta a ka poe o na kuaaina e hoike mai ana i ko ka lahui kupaa mamuli o ko lakou manao aloha aina.  Eia kekahi leta oia ano e hoikeana penei:

Halaula, March 18, 1895.

            “Ua hookuu ia na paahana o ka Hui Hana Ko o Kohala e hoomaha, a ma ka hora 10 o keia kakahiaka, ua kauoha ia na paahana a pau e hele ae i ka halekuai, malalo o kekahi kumu, no ka wehewehe ia ana o ka nata o ka huila o na kaa bipi huki ko.  Ua pau na kanaka a pau ilaila.  O ka mea mua loa i kahea ia mai, oia no o John Hoopii e hele aku; i kona puka ana aku, ua lawe ia aku la oia a ka Hale Waiho Mea Hana, a ia wa i loaa mai ai ka manao no ia kukakuka ana i kekahi mau paahana, oia hoi keia:  Ua makemake ia e kakau inoa malalo o ka hoohui aina me Amerika.  Oiai ua ike lakou, aole he ohohia nui o na paahana o keia hui no ka hoohui aina, nolaila, ua manao au, he mau hana kolohe keia, me ka aihue i k@ pono pili paa o ke kanaka.  O ka’u i makemake ai, ma ke koho Balota, ke aupuni, e ikea ai.”

            He kuleana paa ko ke kanaka i hanau ia mai me ia.  Aia wale no ia mea i kona noonoo maikai.  Ka na alakai a me na hoaloha wale no e hana aku ai o ka hoomalamalama aku iaia, a nana no e koho.  Eia ka manao o keia hoaloha, ke i mai nei na ke koho balota e hoike mai i ko kakou aupuni.  Ina he mea oluoluia ia mea he koho balota ana e hoike ai i ko ka lahui manao, he mea oiaio, oia maoli no ke alanui e loaa ai ka haina o ka ninau, mai ka lunaik@hala pololei mai o ke kanaka.  Aka, ua maa anei kakou i ka ike e ae mai ana ka mea ia lakou ka mana e haalele i ke kuleana i loaa ia lakou i keia wa, no na manao i ike mua ia e kue aku ana ia lakou.  Aole.  A haeha ka hopena?  E hana ke aupuni i ka lakou mea i manao ai he kupono, a e ku ana hoi ka lahui ma kekahi aoao mamuli o ko lakou makemake.  Aka, o ka hopena aia no ia i ka Makua Mana Loa.  O ka aoao o laua e hoike ana i ke kupono, oia ka mea e lanakila ana ma ka ke Akua alakai ana.

 

            H. B. M. S. Nymphe, o kona la keia e hoopiha ai i ka nanahu, e lawe ana oia he 1,500 tona.

 

E PILI ANA I KA MOIWAHINE.

            Ua olelo ae la ka P. C. Avataisa, e like me ka mea i lohe ia, ua hiki aku la ka Mana Hooko i kahi o ka lakou olelo hooholo e pili ana i ka Moiwahine.  Ua manao nui ia e ae ia ana oia e hoi hou ma kona home ma Wasinetona Hale.  Ua ninau ia aku kekahi Kuhina o ke Aupuni mahope iho o ka noho ana o ka lakou halawai i ka Poakahi nei, ua pane mai la hoi oia aole a lakou mea hou i hana aku e pili ana i ka moiwahine, oiai ua pau mua no ka ke aupuni hana no ia mea.

 

HE KAUOHA NO KA NYMPHE.

            Victoria, Maraki 16.—Ua hiki mai la hoi ke kauoha ma ke Keena Oihana Aumokukaua Esquimala e hoouna loa ia aku na leta a me na nupepa no ka poe o ka moku kaua Nymphe i Honolulu, kahi ana i holo pololei aku ai mai Sana Deigo aku, e malama i ko Beritania kuleana.

            O keia wale iho la no kahi hunehune mea hou i ike maka ia no keia mokukaua, a kekahi poe e hoonuinui mai nei i na olelo manaolana a hilinai kuhihewa ia hoi e ka lehulehu puni wale.  Aole he mea hou aku, i ike akea ia; a ina he mau mea malu kekahi alaila, ua hewa loa ka poe i lohe i ka hoolaha nuku iki i ka lakou mau mea hou, e oili liiiii nei me he mahu la a puehu aku ana i ke kikiao makani.

 

Kauluwela Honolulu

 

Ikaheleanakeiki Aloha Aina.

 

He mau tausani ka nui o na makaikai.

 

Aohe waimaka paa i ka nui o ke aloha.

            I ke kani ana ae o ka hora 1 o ka auwina la Poalima nei, aia hoi na huina a me na alanui o ke kulanakauhale nei e haiamu ia ana e na ano kanaka like ole, no ke akenui e ikemaka aku i na helehelena hope loa o na pio aloha aina e lawe ia ana maluna o ke Kinau no Kauakanilehua o Hilo, no ka hooko ana i na uku hoopai a ke kanawai maluna o ko lakou mau hokua pakahi.

            O na limahana e lawelawe ana malalo o ko lakou mau haku hana, ua haalele iho lakou no kekahi mau minute, oiai ke aloha e paila ana iloko o ko lakou mau puuwai, e like me ke ana wai mahu, e holo ana hoi kekahi poe maluna o na kaa no ka halepaahao o Kawa, no ke akenui no e hoohiehie pu mai i ka lakou huakai no kai o ka uwapo o ke Kinau.

            I ke kani ana ae o ka hapalua hora ekahi, aia hoi, ua oili mai la ua poe hanai aloha la a ka lahui iwaho o ka halepaahao o Kawa, me ko lakou mau paiki huluhulu e hekau ana maluna iho o ko lakou mau poohiwi, e like me ke ano o na koa e hele ana i ke kaua pela lakou i ma-ki mai ai me ka hiehie launa ole, i loaa ole i na laina paahao mai ke au mai o na Moi, a hiki i ka wa o ke aupuni repubalika, a aole no paha e loaa hou aku kona lua ma keia hope aku.

            Ua hele mai lakou malalo o ke alakai ana a na makai kiai o ka halepaahao, i noho mana ia e Kapena Makai Kamana, a Hope Luna Nui hoi oia Kakela anoano eehia, e naue ana lakou me na manao makee hoakanaka, aole hoi na manao enemi o na la i hala aku.

            Ua hiki mua ae no hoi kekahi mau puali makai ku huina, i noho poo ia e Kapena Robert Parker, a me na Kapena Makai D. A. Kahookano a me Kana-e, no ka malama ana i ka maluhi ma ko ke aupuni aoao.

            I ka laina paahao e iho ana ma ke alo iho o ka Hale Dute, oia ka wa i paa ai o F. J. Testa i ka hopu ia, mamuli o ke kue i ka hana a ka Makai; mamuli o ko makou hoomaopopo aku, aole he wahi ano nui, aka, ua paa aku la nae, oia iho la no hoi paha, no ka mea, eia kakou malalo o ka noho ana hopepe, o ko kakou pono wale no, o ke akahele ma ka kakou mau hana a pau, i ole ai kakou e pa i ka pohaku a Pio.

            I ka wa i kaalo mai ai ka laina hiehie o ua puali aloha aina la, ma Waikiki iho o ke alanui Papu e kamoe la no kahi o ke Kinau, ia wa i lohe ia aku ai na leo uwe o na makua no ka lakou poe keiki, o ka wahine hoi no kana kane, me na leo paiauma o ka ehaeha nui, e hiki ole ai i ka waimaka o ka mea uahoa ke paa iho, iwaena o keia mau leo makawalu e kupinai ana.

            I ka wa a na epaepa o ke Kinau e kapeku ana malalo ae, no ka haalele ana mai i kona uwapo pili mau, oia ka wa i haawi koke ae ai o John K. Lilikoi, kekahi o ko makou hoa paaua o ka oihana hoonaauao i ka lehulehu i ke mele lahui Hawaii Ponoi, iwaena o na ani hainaka he mau tausani mauka aku nei o ka aina.

            A i ke kuu ana iho o kana, ua haawi koke ae la o John Wise, i na leo kahoahoa noi i ke Akua Mana Loa, e kiai mai ia lakou ma ka moana a ma ka aina, a pela hoi ma ke kahua o ka lakou hana i hoouna ia ai e ke aupuni.

            I ka amama ana o kana pule ua haawi hou mai la lakou he mau leo mele hoonaue puuwai, e hiki ole ai i ko makou mau waimaka ke paa iho.  Ua haawi mai no hoi lakou he mau huro ano, no ka poe e kupenu ana i ko lakou mau maka me na hiona walania o ka ehaeha.

            Aloha no lakou, ka poe i aa e hakoko no ko lakou aina me ka wiwo ole a i kupaa hoi a hiki i ka hooko ia ana o ka uku hoopai maluna o lakou pakahi.  E hahai mau no KA LEO a me KA OIAIO ma ko oukou mau meheu.

 

MAKE O A. P. PETERSON.

            Maluna mai o ka mokumahu Miowe@a mai Kapalakiko mai, ua hiki mai hoi kekahi telegarapa ia E. W. Peterson, me na olelo pokole, e hoike mai ana, ua make kona kaikuaana, ma ka hotele Kaleponi, ma ka la 16 o Maraki nei.  Ua manao ia, ua hiki mai kona make mamuli o ka mai ma ke akemama.

            Ua holo aku o Mr. Peterson maluna o kekahi o na mokumahu o ka laina o Spreckels, i keia mahina iho la no, mamuli o ke kipaku ana a ke Aupuni Repubalika o Hawaii, me kekahi o kona mau hoa i hopu pu ia ai no ka ohumu kipi.  He kamaaina oia no Hawaii nei, a ua noho hoi he mau manawa he Loio Kuhina no ke Aupuni Moi.  Oia ka Loio Kuhina hope loa o ka Moiwahine Liliuokalani, i ka hulihia ana i Ianuari, A. D. 1893.  He kanaka oluolu o Mr. Peterson, a he nui kona mau hoaloha ma Hawaii nei.  He nui kona ohana he wahine a he mau keiki, he makuakane a he makuahine, a he kaikuahine me ke kaikaina, a he mau hoahanau.  Aloha no keia hoakanaka o ka noho pu ana o keia ao inea.

 

NA KUMU E PAU AI KE KAUA.

            Ua makili ae na kumu e hookiia ai ke kaua mawaena o Kina a me Iapana, oia hoi keia:

1.       E waiho aku o Kina i kona mana hooponopono i kona mau kupa ma Iapana.  A e ae aku oia e loaa ia kuleana ia Iapana ma Kina.

2.       Aole hoi e hoonui ia aku ko Iapana kuleana aina maluna ponoi o ko Kina aina ma Asia, aka, e hoolilo loa ia aku hoi ka mokupuni o Fomosa ia Iapana.

3.       E ae ia aku hoi o Iapana, ma ke kuikahi, i ke kuleana e hoomau aku i kona noho ana ma na awa o Port Arthur a me Wei-Hai-Wei, no kekahi mau makahi.

4.       E hoopau loaa hoi o Kina i kana e olelo nei, he kuleana kona maluna o Corea, a e lilo hoi o Corea he Aupuni Kuokoa ma keia hope aku.

5.       Aole e oi aku mamua o $250,000,000 ka nui @ na dala a Kina @ uku ai ia Iapana, no na lilo kaua.

 

E A’O MAI ANA.

            Oiai o Mr. Testa (Hoke), e kamailio ana me kekahi poe no ke ano o na mea pili i kana nupepa a e kakau ana i na mea hou e pili ana i ka holo ana o Kinau, ua hookui ae la oia me ka mana aupuni.  O keia mana aupuni he lala wale no, aka, no ka @ahoa o ke kulana hana hoomalu o keia mau la, @a hopu ia iho @a ka Puuku o ka Nupepa Makaainana.  He ao ana keia i ka poe e a@a nei ma ke kua e @hi ka olelo a e akahele ke ao a me ka ahewa wale ana.  I nui no ke kakani o kekahi poe i ka hele ole ae i ka moakaka e ike pono ia ai ke koa a me ka ole.

 

UA HALA NO HILO.

            Ma ka makou hoomaopopo aku i ka Mr. Hikikoki olelo, me he la, ua hoi loa aku la oia no Hawaii.  Aole no oia i punihei i ka oihana, wahi ana, aka no ke kokua ana i kona aoao e lanakila maluna o ka poe hana hewa a alakai hewa i ka Moiwahine, ua hoomanawanui oia, a i ke kuene paa ana iho la o kona aoao i ka mana aupuni, nolaila e like me Garibati, i hana ai ma Italia, pela oia i waiho iho la i ka hanohano a me ka loaa aupuni, no kona home a me kana wahi oihana pili kino ponoi.  Ina no hoi pela na Hawaii nana i ao ko kakou Moiwahine mamua o kona hulihia ana, i na no paha eia oia ke noho nei ma ke Kalaunu o Hawaii aole, he poe puni oihana wale no.

 

HE LOHE MAKANI.

            E like me na nui olelo i ka waha o na alakai makapo a me kaula hoopunipuni, pela na nui olelo i lohe ia no na hana a ka mokumanuwa Beritania Nymphe, oia hoi i hele mai nei e hoihoi hou ae i ke aupuni moi, a o kekahi poe hoi e hookuuia na pio aloha aina aole e hoohana ia, a pela aku.  Aka nae, aole he hooko iki ia o kekahi o keia mau olelo a ka poe ao hewa ina kanaka.  Heaha la ka waiwai o ka hoopunipuni wale ana iho no i na kanaka me ke kahua ole o kahi o ka olelo?  He kuko paha.

 

E HOLO IO ANA NO

            Ma ka Avalataisa o ke kakahiaka Poakahi nei, Maraki 25, iike ia iho ai kekahi itamu e hoike ana, i keia Poalua ae, e holo aku ai ka moku kaua H. B. M. S. Nymphe, no ke ala hele e hiki aku ai i Ekuakemala, ko Beretania Nui, kahua hoolulu moku kaua.

            A oia iho la ka loina e pili ana i ke la hae huipa e kau nei ma kona kia waena, aka, aia no hoi a hiki mai la ia la, alaila ike ia ko @a la.  A me he mea ala, e i ae ka paha i ka moana kona pani e hele mai nei, a kahi hoi ke okalakala mau o keia mau la, e ike ia nei.

 

UA HALA O PALAHU.

            Ma ka la 22 o Maraki nei, ma Kakaako, Honolulu Oahu nei, i kuu mai ai o Palahu (k), i keia ola ana 76 o kona mau makahiki.  O Kohala kona one hanau, ka aina hoi nona ka olelo ia ana e ka poe kahiko, a hiki i keia la, o Kohala nui, o Kohala iki, o Kohala ua a-paa, o Pili o Kalahikiola o na puu haele-lua, ua nalo ke-o-ana o ka inoa o Palahu ko Hawaii nei kaeaea ma ka luu ana ua hala aku la oia, a waiho iho la i na kini, e paiauma aku nona ma keia ka’e o ka lua kupapau.

            Aole oia i make, aka, ua hiamoe aku la oia iloko o ka Haku, a e ala hou mai ana oia i ka wa e kani ai ka pu a Gabeliera, e hoala ana i ka poe make, a o ka poe ola hoi, e hoomalule ia lakou.

            Nolaila, e na kini o ka mea i moe aku la, i ka moe kapu o Niolopua, mai kaumaha ko oukou naau nona a mai luuluu hoi, oiai, e ala hou mai ana no oia iloko o ke ola mau loa, no kela ao mau, ma-o.  A no ia kumu, ke ka-hoahoa ae nei makou mao ka Haku ala, e hoomama mai i na luuluu o keia ola ana.  A oiai hoi, o ke ala ana i hele aku la, oia ke ‘la no na mea a pau.  Ha-i-aka wale oia i niau hookahi aku la, aohe lua.

 

KE BIHOPA O SALISBURY.

            Ma ka mokumahu lawe leta e ku ana ma Aperila 1, e holo mai ai keia kauwa o ka hoomana o ka hoomana Enelani, no Vitoria, ma ka Warrimoo mai.  Ke hiki ia e haiolelo ana oia ma ka luakini St. Andrews.

 

KIAI PAA.

            No ekolu mahina a makou e noho hoomaluia ana ma Kawa, ua ike pono makou i ka noho kiai makaala loa o Mr. Low a me kona mau hope i ka lakou hana ma ka Hale Paahao ma Kawa, i ka po a me ke ao.  E noho ana keia poe iloko o keia manawa me ka ike ole i ko lakou mau ohana, a ua kohu like no hoi ka noho ana me ko na paahao.  I ke ao e kiai ana i na paahao e malama ana ia lakou, a i ka no hoi e noho makaukau ana me na pu e kiai i na enemi owaho mai.  Nolaila, o keia poe kekahi i kupono e ike ia e na mana aupuni a me ka poe kuonoono.

 

KE HOOMAAMAA HOU NEI.

            Eia ka hope Ilamuku Brown, a me Kapena Parker, o ka puali Makai ke hoomaamaa hou mai nei i ke kiki pu, makai ae nei o Kakaako, ma ke kakahiaka o ka Poakahi nei ko lakou hoomaka mua ana.

            Ilaila ko makou Makai Kiu Lau Omaomao kahi i hakilo ai, i ko lakou mili ana i ka lakou mau elau @u, a ua hoike mai la oia, hookahi wahi paewa iki ma ka@a nana ana, oia hoi o ka imo o ko lakou mau maka i ka wa e poha ai o ka Wai-ki-poha.  A ma ko lakou kulana nanaina nae, he hiehie a ma-lo pono na a-u.

            E mahalo ia no ko lakou kulana eleu, a e hoomau aku no i ka malama ana i ka maluhia.

 

ILI I KE AWA.

            He elua minute i hala ae o ka hora 2 o keia auina la, ua ili iho la kekahi kalepa hao America, nona ka inoa T. F. Oakes, Kapena Reed.

            O keia moku, oia kekahi o na moku nunui i komo mai iloko o ke ia Awa a ua piha pono kona kino i na mea hookaumaha.

            Mai Kapalakiko mai nei oia i holo mai nei, no ka halihali kopaa ana no Nu Ioka.

            Ua kolo ia mai la oia iloko nei o ke awa, o ka moku kolo o ke aupuni.  Eleu, a oiai hoi ka makani e pa ana me ka ikaika iloko nei o ke awa, ua ili iho la oia ma ka aoao malalo o ka Hale Ipukukui, iluna o ke ahua one.

            I kela wa, hookahi wale no mokuahi holo pili aina e ku ana i kela wa, oia hoi, o Kimo Maki, ua hoomaka koke ia ka baila o ka mahu, no ka hele ana aku e kokua i ka Eleu, malalo o ka hooponopono ana a ka Luna Hoohana oia laina mokuahi.

            Ua haalele koke iho la ka mokuahi Kimo i ka uapo Pakipika, he 20 wale no minute mahope iho @ ka ili ana o ka Oakes, ua lawelawe koke ia na hana e hiki ai ke hoopakele koke ia ka  moku ili me ka poino ole, ua holopono na hana me ka poino ole, eia oia iloko nei kahi i hekau ai ma ka uapo o ka Ona Miliona kahi i pili ai.

 

HE BUKE MOOLELO HOU.

            Eia ke hana ia mai nei kekahi buke moolelo, ma ka olelo Hawaii e pili ana i ka hookahuli aupuni kaulana o ka la 6 o Ianuari, malalo o ka nowelo ana a ka makapeni kaulana a Gaberiela Lenoa, kela konela kaulana i ka hoopahu-a i na hoolala kaua kaulana a ka Emepera Napoliona o Farani.

            Ua wae ia a ma na mea momona kuhina wale no, e hiki ole ai ke aua iho i na koii koi a na makemake, no ka mea o kana makapeni ma ia hana, he kakaikahi loa ka poe e uhai aku ana ma kona meheu.

            Ua hoike ia ae, he Ekolu Hapaha ka auhau o ka buke hookahi, a me he mea ala, e puka ana i ka pule hope o keia mahina.

            Nolaila, e hoouna ae i na kauoha ia Thomas P. Spencer (Kamaki) ma ka Halepai o ka Press, ma ke Alanui Betela.  E pono e ike ae ia hoa kanaka o kakou, he ole hoi ka ike i ka ilio, ma ka huelo ka onioni.

            Me he mea ala, e puka ana ua buke moolelo la, i ka pule hope o keia mahina, a i ole i na la mua aku paha o Aperila.

 

KA OIHANA MAHIAI.

            O ka oihana kanu pua, oia kekahi oihana nana e hoike mai i ko ke kanaka kulana makaukau a ma ka ala hoi ma ka hana, a me kona ike pono i na loina a pau, e pili ana i ka hooulu ana i na pua, i ole ai hoi e pohowale kona luhi, a ua helu pu ia hoi keia oihana iloko o na oihana hana lima akamai.  Aia mauka Auwaioilimu aia malaila kekahi kanaka Hawaii ponoi nona ka inoa S. Kenui Nakapaahu, k@ lawelawe nei oia i ka oihana mahiai kanu-pua, a ua hele a lehau kona pa i na pua kanu like ole, o kela ano keia ano, a he hewa hoi ka maka ke ike aku i ka nani o na pua e luhiehu mai ana i loko o kona kihapai, a ua ku hoi i ka hoeha i kou puuwai e ke kamahele, oiai, ke ala waianuhea like ole o na pua e mapu mai ana i ou la.  Ua makaukau maoli no keia Hawaii oiaio i ka hooulu ana i na pua kanu, a ua kupono oia e kapaia, ka loea o ke kulanakauhale ‘lii nei.  Oiai, ua kipa aku la makou e makaikai i kona kihapai pua a ua ike kumaka makou i ka hoike oiaio o kona loea ma ia hana.  Aole hoi oia wale, aka @ kona home kekahi, he noho ana u-lakolako maoli no, he puuwai hamama oia, a pela pu no hoi kona mama, a me kona ohana pu, he ehaeha, he hookipa, a pela wale aku.  A ke haawi nei makou i ka hoomaikai i na mea a pau, e lawelawe ana i keia hana maikai, o ka mikiala hana.

 

NA HANA ENEKINIA KAMAHAO.

            Ma ka nui o ka ike a me na mea e puapuai wale mai nei no me he wai mapuna la, ke hooiaio loa nei makou i kela olelo a ke kaula i olelo ai no na la hope o keia noho ana, e i ana penei:  “He nui ka poe e holo ana io a ia nei, a e mahuahua ana no ka ike.”  Mawaho o na mea ano e hoike ia nei i kela loea kaulana, ia Edison, e pili ana i ka uwila, ke ike nei ko ke ao i na hana kaulana a na Enekinia, ma na oki ana i na alawai, na alahao, na palekai, ke kalai ana i na pali a me ka eli ana i na mauna, a pela aku; eia hou hoi kekahi hana nui e kukulu ia aku ana e kekahi hoi no ia hana oia hoi he ala lewa maluna iho oka leina a ka wai o ka Wailele o Niagara, i hiki ai ke ike pono iho ka poe makaikai ia Wailele kaulana.  Ua hoolala ia keia hana penei.  E hoomoe ia kekahi nau kaula-kila mai kekahi aoao aku o ka muliwai St. Lawrence a kekahi aoao, he 35 kapuai maluna ae o ka iliwai, a ma ia mau kaula e hoolewalewa ia iho ai na holowaa-ohua, i huki ia aku e ka uwila.  He kila na holowaa, i houhou ia me na puka i ike ai ka poe makaikai i ka nani a me ka weliweli o Niagara, a i hiki ole ai hoi i kekahi ke haule a lele paha mai luna aku o keia holowaa-kila, ua hoopaa ia na wahi a pau me na ipuka peapea hao, e ike aku ai, aole nae @ oili ke kino i waho.

 

            Ke noonooia nei e imi ia aku kekahi Colonela no ka Puali Koa o ke Aupuni mai loko mai o na loea @ ka oihana kaua.