Ka Oiaio, Volume VII, Number 16, 21 June 1895 — Page 4
| This text was transcribed by: | Sandy Murdoch |
| This work is dedicated to: | Awaiaulu |
NUPEPA KA OIAIO.
J.E. BUSH, Lunahooponopono
O KA PONO KA AIALII E OLA AI KA AINA
POALIMA, IUNE 21, 1895
Mamuli o ka like ole o ka manao o na haole Amerika Hawaii a me ke Kuhina Amerika, Mr. Willis, ua hookauluaia iho la ka noonoo ana no ka hoomanao ana i ka la 4 o Iulai e hiki mai ana. I kela mau makahiki aku nei, mamuli o ka haiolelo ana a ke Kapena Cockrane o ka Piledelepia ma Kuokoa Paka i ka makahiki i hala, a kahea ai oia e huro na mea a pau no ka Repubalika Hawaii, ua akahele loa, ke Kuhina Amerika i ke komo hoohuikau ana i kona aupuni me kekahi aupuni a i ka malama like ana i kahi hookahi i ka la i hookumuia ai ke Aupuni Repubalika o Amerika Huipuia, oiai aole oia i poina i ke ao ia ana o Kapena Cockrane no kana hana ma ka la 4 o Iulai 1894. e kona aupuni. Aka, aole kakou e haohao ana i ka lohe ana i ka hanaia o na hana ano e e kanaka o keia lahui huikau o na ano kanaka.
O KEKAHI hapanui o ka Mr. Dole haiolelo ana imua o ka Senate ua pili no ia i na kuleana aina, a me ka hookuonoono ana i kanaka. He mea oiaio o ka aina ka makua o na mea a pau; mai ka lepo mai kakou a e hoi ana i ka lepo, a o ko kakou ola a pau mai ka makua honua mai no ia, a o ka mea kupanaha, o ka ike ole o ka poe ike i ka oiaio o ka Baibala, aka, e liki ana nae ua poe ike nei i ko lakou ike me ka hai paee me ka hoole ana i ka ike kumu o ke Akua. Malia paha o keia hoopapau o Mr. Dole i keia kumuhana ana mai mua loa mai, oia no kona hooia ana he misionari oiaio oia e hooia ana i ka ke Akua alakai e i ana, mai na mea ulu a me na hua o na laau ke kanaka e ola ai kona kino me ka maikai a e loihi ai kona ola ana maluna o ka aina a kona Makua Lani i hana ai i home nona. Nolaila, o ke kanaka naauao e hoomaopopo ana oia o ka aina ke kumu mai o na waiwai a pau, a o keia waiwai i loaa ia ia mai ke Akua mai, a o ke kanaka e hoowahawaha ana a e hoolilo wale ana i kona aina, ua naauao ole oia a ua hoowahawaha no hoi i ke ao a kona Akua ka Makua Mau Loa.
Ua ike iho mnkou, ma na nupepa o Amerika, aia aku la hoi ka hoopii a Kapena Roke imua o kona Aupuni, a eia ke noonoo nui ia la, a me he la e waiho ia mai ana ke koi poho i keia aupuni mai ke aupuni Amerika mai, ma ka aoao o Kape Roke, no hookahi haneri tausani dala no ka hoopaahao ia ana he kanalima-kumamakahi la ma ka halepaahao. He mau kala no keia a kakou e uku ai i na e pau pono mai na koe a pau a ka poe e hoopii nei.
Ma kekahi nupepa haole o ke ahiahi nei, (Ka Bulletini) ua ike iho makou eia ke manao nei ke aupuni e hook@u i ka paahao pio aloha aina Hawaii a me hookahi haole, ma ka la eha o Iulai. He hana maikai a he hana kupono keia a ke aupuni e hana ai; he hoike no hoi i na Hawaii aole ona manao maoli e hoeha wale, aka, e ao aku i ka poe hahaki kanawai, a e kue mai ana iaia. Ke hui ia keia me na kokua a na luna aupuni a me ke aupuni i naohana o ka poe pio, he mea no hoi keia e hookomo ai i ka noonoo akahele a me ka oluolu i na Hawaii, i na he poe noonoo kanaka lakou.
UA lohe mai makou ua omaimai ia ke Konela hou, ua puluelo i ka wai a ua luhe, a aia oia ke noho hoomalu ia la, o hele anei i ke alanui loaa iho hoi kaupoko o Hanalei i ka la, a loaa i ka lolo kaa. Aka, he wahi haole olelo lealea no ke Konela hou, a me he la he lunaikehala kona, a no ka hookui ia, o kona noonoo maikai, i ka ike kino ana i ka wahine "pegana" a Bihopa i hoolaha aku nei i ko Amerika poe, he wahine puni koko, a pela aku, ua mihi paha kona naau, a no ia keia hookina i ka wai hoomalule kino mai ka la Kulaia mai o ka Nai-aupuni a keia la. E ola loihi ke Konela!
E malama ia ana he la heihie lio ma Kapiolani Paka ma ka la 4 o Iulai, ae nei. He hana hoonanea no keia ke hoohana ia me ka maikai, a he hana lapuwale no hoi i na e ae ia na hana diabolo e komo pu. Hookahi mea ino e ike ia nei, oia ka ulu mau o na hana pili waiwai ke kukuluia ka heihei lio, a o ka mea ano ai loa ia a na kanaka Hawaii, me ka manao kuhihewa he alanui pokole ia e waiwai a e lilo ai he poe ona miliona.
UA lohe mai makou, e hoopuka hou ia mai ana he nupepa puka la Hawaii hou, i keia mau la iho, no ka pomaikai o na mea a pau.
E-A, he keu mai nei hoi keia o ke au aluka nui wale o na hoa hoolaha nupepa, he mea paha aia iloko o ka puniu poo kahi i pokaa ai.
KUU ia ae i ke akea, i ike ia ke au nui a me ke au iki, oia ka nani, aole hoi o ka ula leo wale iho no.
HE halawai ka kekahi poe e manao nei e kahea no ka hookolo, ana i na olelo hooholo hooalohaloha aku i ka ohana o ke Kuhina Nui Gresham i make. He hana kupono no keia, a he kupono no hoi e lawelawe ia e na alakai a ka lahui e noho lanakila nei mai na pilikia, a i lohe mau ia ko lakou leo ma na alanui e hanau ana i ka mea kupono e hana ia a me ka ole mahope o ka hana ia ana e hai.
I KEIA la e huli hoi aku ai ka Adimarala o ke Aumoku kaua o Amerika Huipuia ma keia mau kai, oia hoi o Mr. Beardslee, no kona awa home, Kapalakiko. Ke ku nei ma kona wahi kekahi Kapane malalo o kona mana, ma kona moku ka Bennington. He nui na olelo no ke kumu o keia kahea ia ana mai o ka Adimarala e hoi aku no ka home. Aka, e like me ko makou ike maka i ka hala wale o na olelo a kekahi poe e koho nei, ua waiwai ole ka hoolaha ana aku. Ua lilo na mea i olelo mua ia no ka huakai a Adimarala Beardslee he mea oiaio ole, ma ka aoao o ke aloha aina, a me he la pela no paha ke ano nui o na olelo e pahola ia nei ma ia ano hookahi, i keia mau la.
E HUIKALAIA ANA.
Ua hoike mai la ka nupepa pili aupuni P. C. Advertiser e huikalaia ana kekahi mau paahao pio aloha aina ma ka la 4 o July. Ua like keia poe i molia i ko lakau ola a me ko lakou noho ana lanakila no ka aoao aloha aina, me kekahi mau mea inohai. Mamuli o ka lokomaikai o Mr. Dole a me ka Aha Kuhina wale no e hiki ai keia mea, oiai aia ka mana a p@u ma kona lima ma ke kanawai, aole hoi oia e lawe Kuokoa ia mana me ka ae ole o kona Aha Kuhina. Pomaikai wale ka poe e hemo mai ana mamuli o keia lokomaikai, a he kumu no hoi no ka poe noonoo maikai e hoomaopopo ai i ke ano oia mea, a o ka liki a me ke@kaena e waiho aku no ia na ka aia a na lapuwale, oiai o ka lanakila o na paahao a lakou i manao nui ai e hiki mai ana mai na aupuni mai o na aina e aole hoi i hiki mai. Aka, ua olelo mua aku la makou he mea ia ua hala, mahope o ka la i ike akea ia mai ai ke Aupuni Repubalika; a o na kuko no kekahi pono e loaa ana i na pio aloha aina a me ka lahui Hawaii, he uuku loa ia he hookahi hapa iloko o ke tausani; nolaila makou i olelo kanaka makua aku ai i ka lahui e akahele ka noho ana a e imi i ka pono a me ka pomaikai o ka noho ana ma ka hana naauao a me ka lawelawe pu ana o na lima, maluna o k@ kahua hoopono, a o ke Akua ka mea nana hooponopono mai i na pilikia, ina io he pilikia ko ka lahui, a ua kupono hoi e hoololiia ae ka noho ana. No keia mau ao i ka lahui ua lilo makou he mea ohumuia, a he mea niania ia e kekahi poe kakaikahi, a ua alakai hewa aku la kekahi poe o na kuaaina e hoolohe i keia mau olelo ao hewa a hoopunipuni maoli no, aka, aole o makou kanalua no ka pololei o ka makou mau olelo ao a me ka makou hoike e hoolaha nei. Ua hoao ka lahui i kona ikaika malalo o kona mau alihikaua a ua nele, me ke komo ana o na hoa iloko o ka pilikia, me ka huli ana iho o na alakai a hoomaewaewa ia lakou iho a me na hoa; a ano aole he mea i koe o ka noho malie wale aku no, a o ka nana aku i na mea e hoea mai ana a me ka malama pono i na kanawai a hoolohe i na kauoha ku i ka pono a na poo aupuni e hooholo mai ai i ka pomaikai o ka aina.
KE AKUA MA FOMOSA.
Ladana, Mei 21.---Ma ka nupepa Ladana Manawa, penei:
Elike me ka mea i lohe ia mai Hana Kaona mai, ua hooiaio ia ke krua ma ka mohupuni o Fomosa, mawaena o Iapana me na Pake Ripubalika o keia mokupuni. Ua pae aku ua koa Iapana ma Kee Lung, ma ka welelau akau loa o ka aina, i ka la 30 iho a ua hoomaka koke iho la no ke kaua mawaena o na Iapana a me na Pake.
Ua hiki pu mai no hoi ka lohe mai Tien-Tsin mai, e olelo ana, ke haalele awiwi la ka Iapana ia Liao Tong, a e pau loa ana iloko o umi la paha.
Parisa, Mei 30.---Ma ka Senate i keia la, ua pane aku o M. Hanataux. ke Kuhina o ko na Aina E, i kekahi olelo ano nui e pili ana i na hana a ke aupuni ma na ninau Kuwaho, a ma ia pane ana, ua olelo iho oia ua hooliloia ko Farani mau pono i mea hope i ko na aupuni e ae. Ua konoia o Farani i kana i hana ai e pili ana i na hana ma ke kuikahi mawaena o Iapana a me Kina, mamuli o na pono o Faroni ma Heneda-Kina a me na pono o na misiona hoomana ma keia mau aina. Ina e haule, a i ole, e hoonaueue ia paha ko Kina kulana a e uluaoa ana ma ia hana ana, alaila e poino ana ko Farani mau pono pu kekahi. Ua like hoi ko Rusia a me ko Geremania manao ma keia mea.
Nu Ioka Mei 31---Ua hoolaha ae la kekahi hui Telegarapa, aole e hiki ke hilinaiia na Telegarapa a ua kanaka mai ka Mokupuni o Fomosa, e pili ana ia Kee Lung, Tamsui, a me Taiptsfu.
Ladana. June1.---Ua hoike ae la ka nupepa Manawa ma kekahi manao pepa ia kakahiaka, aole e loaa ana ke dala hoaie no ka uku kaua o Kina, ke ole e komo pu aku o Ladana mamuli o ka hookananuha o Rusia. Ma na ano a pau aole loa hoi o Enelani e ae ana e kapaeia oia e komo aku e kaana pu mamuli o kona mau kuleana kupono maoli no iloko o ka ninau hikina e lawelaweia nei. Hookahi wale no kahua hana o ke komo pu ana o Enelani iloko o ka hoaie ana ia Kina, a ina aole alaila, he leo no ko Enelani nona ma keia mea, a nolaila, he pohihihi loa ka hopena e hoea mai ana ma keia mua aku.
Berelina, May 31.---Ua uwea olelo aku la hoi ke kakaunupepa o ka Nu Hou puka la ma Viena, ua hanaia he kuikahi mawaena o Rusia a me Korea, e hoomaluia o Korea e Rusia ma kekahi mau ano ke hoea mai. E lilo ana hoi o Korea he hanai na Rusia me ka pau ole o kona Kuokoa. Ua hoole loa nae ka moi o Korea i keia kuikahi aole e kakau inoa aku. Ke olelo nei o Iapana ina e komo he elua mau kumu hana iloko o kekahi Kuikahi me Rusia, alaila e hoopau ana oia i kona nolaila una maikai ana me Korea. "Ua oleloia mai la au ua ae aku la o Kina e komo mai o Rusia ma kona mau palena aina ke koloheia aku kona mau paahana hana ala hao o na Tatara Kina.
Vitoria B. B., Mei 31.---Ua kanoha aku la ke Aupuni Beretania e hana aku ma ka hoopii ana i ke Kuna Selby, i hopuia e ka moku kaua Amerika, no ka hele ana ma na kai i papaia.
Wasinetona, Mei 31.---Aole he manao awiwi o Peresidena Cleveland e hoopiha i ka noho Kuhina Nui no ke Aupuni Amerika.
OIA MAU NO KA OHAHA.
I ke au o Parao, ke aliihoohuli o Aigupika, ua I-a-loa ia kekahi poe waiwai a alii no lakou ka huina, he 25, mahope i@o o ko lakou make ana, a waiho ia iloko o na hale lua pa'o.
Ua hooleiia keia poe me na lei pakahi e kahiko ana ia lakou a pau.
A he 3,000 makahiki a oi i hala ae nei, ua wehe ia keia mau lua pa'o, a ike ia oia mau no ka ohaha o na pua, me he ala inehinei iho la no ka hana ia ana.
E-a, he keu ke kupanaha o keia ano pua, aole paha he pua e loaa ana e like me keia ano ma keia hope aku, a hiki i ka wa e puhi ia ai ka Lani a me ka honua i ke ahi e Iohova o na kaua, no ka hoomaemae hou ana.
NA KAUHALE KA@IKO
LOAA HOU I KEIA MANAWA
KA IMI HOU ANA MANA AINA KAMAILIO IA MA KA BAIBALA.
MOKUNA V
O THEBES, KA NO-AMONA O KA BAIBALA.
O Thebe o na Ipuka he Haneri---Aole ona Mau Pa aole hoi he mau ipuka---Aina o ka Poepoe Honu Eheu---Na Heiau Kelakela o Karnak a me Luxor---Ano like me ka luakini o Solomona---Na Kii o Aigupita---Na Moolelo Ka hiko i kalai ia ma na pohaku---Medeenet Haboo---Ka Ramesium---Kii Nui o Ramese II.---Ke Kii Leo Kani Memmon---Na @na o na 'Lii.
O ka nui o keia kii pohaku i kalaiia o Ramese, ke alii a Iosepa i noho pu ai, i kona mau la opio i kahi olulo aku ai ma Aigupika, he koho kupua, he iwakalua-kumamalua kapuai a me eha iniha kona laula ma na poohiwi, a i kona wa helelei ole, me he la, he kanahiku-kumamalima kapuai kona kiekie. Aka, e like me na ha na a ke kanaka, ua lilo oia i keia wa he mea ole; ua kulai ia iho oia ilalo a ua waiho makahi na apana o keia kii, me he la, ua lalau ia iho oia e kekahi lima mana a ka ia iho i ka honua me he la he mea ole loa, a eia ma na museuma hoikeike o na mea kahiko a puni o Europa ke waiho nei kona mau apana liilii i hiki ke lawe ia.
Ke nana iho i keia kii kino kupua ua lilo hoi he mea noonoo nu@ kona hiki ana ke lawe ia mai kahi i kalai ia ai a hiki i kahi i kukuluia ai, me ka loihi o ke ala i lawe mai ai, oiai aole hoi he mikini ia wa, e ike ia nei e kakou e hiki ai i keia pali pohaku, a e hiki ai hoi ke hapai a hoonohoia iho maluna o kona kahua i kipapa ia ai nona e ku ai. Aka, i a'u hoi, o ka mea oi loa aku o ka pahaohao oia no ka nahaha ana o keia kii pohaku paa a liilii, mamua o ka ike ia ana o na mea hoopahu o keia wa, me ka ike ole ia ana o kekahi maka a hoailona hoi, o kekahi mea e wawahi ia ai, e kau ana maluna o kona kino i ani ia a laumania a hinuhinu. Ua manao hoi kekahi poe na ka lahui Peresia i wawahi i keia kii, aka, nae aole hoi he hookahi hoailona i hooia ana ia manao. Ua olelo hoi kekahi poe na ke olai i luku oia a akoakoa, aka, aia no ke ku la kona kahua i hoonohoia iho ai, oia mau no aole he wahi i oni a i meheu ae. Me he la, keia kii i ka nana iho i kona mau apana e waiho mokaki la ua pa i kekahi lapa uwila, a oiai he mea ike mau ia ia mea ma keia mau wahi, ka ino me ka uwila ikaika, aole anei e hiki ia kakou ke hoomanao iho ua luku ia keia hana a ke kanaka i kukulu ai i mea e hoomanao ia ai oia e ko ke ao, oia e kue ana ia i ke kanawai laahia o ke Akua, mai ka lani mai ma o kekahi lapa uwila?
He Leo Kahea.
Ke hoike ia aku nei ka lohe nu Lnna lawe pepa a pau o KA NUPEPA KA OIAIO, ina he mau helu koe o ka Helu 1, 3, 4, me 5, ma ko oukou lima, e hoouna koke mai oukou i keia Keena, me ke kakau ana penei:
NUPEPA KA OIAIO
Alanui Pai Palapala Honolulu Oahu,
Oiai, ua nui na kauoha nupepa i hiki mai i o makou nei, a no ia kumu keia e kauoha ia aku nei ia oukou.
MA KE KAUOHA.
Haule, a i ole aihue ia Paha.
Ke hoike ia aku nei ka lohe i na mea a pau, i na o ka mea, a mau mea paha iaia kuu pine gula niho puaa i haule, a i ole, i aihue ia naha, he pono ke hoihoi ae ma ke Keena o KA LEO. I ka po Poaha a ao ae Poalima, ka lilo ana mai ko'u hale noho aku. Ua hoailonaia keia pine gula niho puaa me keia mau hua palapala: H. M. A., a ina hoi aia i kekahi o ko'u mau hoaloha, e hoihoi ae ma ke Keena o KA LEO, a na'u e uku kou luhi o ka malama ana, a me keia hoolaha ana.
A ke noi pu ia aku nui na hale hana gula a pau, i na e ike oukou i kekahi pine gula niho puaa, me kela mau hua inoa i hoike ia ae la, ua loaa ka mana ia oukou, a i kekahi paha o oukou, ke hopu mai i ka mea nana e lawe aku ana ua pi ne 'la.
Owau iho no, MRS ANE HULI.
Apua, Iune 17, 1895.
jun17 1wkd.
KAUKA
Wong Nin Ching
(AKINI).
Alanui Hotele Helu 30
KAUKA LOEA O KA AINA PUA
Ua hiki ke hoolaia keia a me keia ano mai, mai ko na kane, wahine, a me na keiki liilii. O na ano mai hano ua hiki oa ke hoolaia; a pe@a pu hoi me na ma puuwai a me na ano mai e ae no a pau pela pu hoi na mai lele. Kolera, Hebera, Fiva Lenalena, Lepera (Maialii). Ua hiki ke oki a hoola ina palapu o ke kino me ka oluolu lea ma ka hoomaemae pu ana i na koko ino. Ua hiki i ka'u laau ke hoohemo i ka lepo paa me ka hoohemo ana ina keiki e ka wa e nahunahu ana me ka poino ole. He laau no kekahi no ka hooponopono hou ana i ka waihona keiki, a i ka wa e inu ai i keia laau; e malama loa ia na rula o ka inu ana e loaa no ko keiki i ka poe i loaa ole he keiki mamua aku.
E naue mai i ike maka, he pomaikai nui keia no na makamaka i hooueleia me ia haawina makamae.
E hauoli no au ke ike aku i na makamaka e kina mai ana e kuka pu me a'u ma na ano a pau e pili ana i ka'u oiha na. E kipa mai e ka poe i hoolualuuia me na haawina pilinua a ka ma@, a nau oukou e hooluolu aku.
KAUKA WONG NIN CHING.
Alanui Hotele, Oct 1 9@ 6m@@
Olelo Hoolaha.
I ka manawa e hiki mai ai o na mokumahu o ka @ui Mokumahu Waila, (i kaunale@ai@) aole @ ae ia kekahi mea e p i aku iluna o ka moku a paa mua na ohua iuka o ka aina, me ka loaa ole o ka palapala ae mai ke Keena aku: ke ole hoi ua loaa ka ae ia e na hana moku.
C. L WRIGHT
Peresidena o ka Hui Moku Waila
jun12 tfd.
Mau Aina Kuai.
Aia he 32 apana aina ma Kalihi, no ke kuai aku, he 50 kapuai ka laula a he 100 kapuai ka loa pakahi; ua maemae maoli, a e lilo ana i mau Home maikai mahope aku; ke pi awiwi loa nei ke kula@a o na aina ma Kalihi; a e lilo ana ia wahi i ha pa no ke kulanakauhale.
He $25000 no ka apana; a e ae ia no e hookaa pau loa; e hookaa hapalua a hookaa hapaha paha i ki nohi; a i ole ma ka hookaa i kela a me keia malama.
Ua hoomoo ia ke paipu wai Aupuni ma na wahi e pili ana i keia mau apana aina.
He mau alanui maikai.
E wiki mai i loaa ona mau Home no oukou me ka oluolu.
Aohe uku no ka hana a@a o na palapala; no na mea i koe e ninau ae ia William Charles Achi (Kale Aki).
Boroko o na Waiwai Paa.
Honolulu, Mei 23, 1895.
mei 24 tfd.
KE
Kii Makana
A ka Nupepa Ka Oiaio
I ka poe uku mua i ka uku makahiki, o ka Buke VII e hele nei, e hiki mai ana @a ka Auseteralia o ka ka la 27 o keia mahina.
He Kii keia o ka Moiwahine e noho ana me kona kahiko alii piha maluna o kekahi noho me ke Kalaunu.
E loaa no keia kii maikai o ka Moiwahine i ka poe aloha io iaia, e ake ana e malama i Kona mau helehelena ma ko lakou mau home, ma ka uku mua ana i ka uku makahiki o ka nupepa i ka pau ana o ka la 30 o Iune, 1895.
JOHN E. BUSH, Luna Nui o ka L. a me K. O.
C. E. Williams & Son
Helu 611 : : : Al. Moi
Mauka mal o ka pa Kuai Papa o Lui me Kuke.
Na mea kuai ma na
LA@O HALE a me na Moe
o n@ ano a pau ma na
KUMUKUAI HAAHAA LOA.
Na Mea Hana Pahu Kupapau a me Ialoa.
Na P@hu Kupapau hookomo ia mai iloko nei o ka aina, i oi ae ka nani mamua o na pahu kupapau hanaia maanei no ka $3.00 a p@ aku iluna.
Kaa Kupapau no ka hoolimalima a o ka oi aku o ka naui ma keia kuni ma keia kulanakauhale no ka $5.
Na He Kupapau a me na Kia Hoomanao.
Telepone 179.
jun12tfd.
Halekuai Kamaa
o
MAKANANI,
Alanui Pap@.
O keia iho ke Kamaa haahaa hila Kiani nani loa o na Wahine i kapaia "Oxford Tie."
O ke auo kuea a me ke ano uuku oioi o mua no $2.50 wale no.
O keia iho hoi ke kamaa ili Kao Farani o na Lede e pihi ana ma ka aoao. A he $3.00 wale no kona kumukuai.
He $4.50 ke kumukuai o keia kamaa mamua.
Ma kahi keia e loaa ai o ka jun13 tfd.
KAUKA
Yong Kam Pung
[APANA.]
Helu 306 Alanui Hotele
KAUKA LOEA O KA AINAPUA.
Ua hiki k@ hoola ia kela a me keia a@
ma'i, mai ko na kane, wahine a me
na keiki liilii. O na ma'i ha-no
ua hiki loa ia ke hoola ia, na
mai Akemama a me na
mai Puuwai a me na
ano mai no a
uau. Pela
pu hoi na mai
lele, Kolera, Hebe-
ra, fiva lenalena, lepera
Maialii ke oki a me ka ho
oia ana, @@u pu me na koko ino.
Ua hiki i ka'u laau ke hoohemo kei-
ki i ka wa nahunahu me ka poino ole.
He laau no kekahi no ka hooponopono
hou ana i ka waihona keiki, a i ka wa
e inu ai i keia laau me ka malama loa
i ka rula e loaa no he keiki i ka poe i
loaa ole he keiki mamua aku
E Naue mai i Ike Maka
He pomaikai nei keia no na makamaka i hoonele ia me keia haawina makamae. E hauoli no au ke ike aku i na makamaka e kipa mai ana o kuka pu me a'u ma na ano a pau e pili ana ka'u oihana?
E KIPA mai e ka poe hooluuluuia me na haawina pilihua a ka ma'i, a na'u oukou e hooluolu uku,
KAUKA YONG KAM PUNG.
J.na18.19@. 1y-dtf
Halawai Nui!
E ELEU MAI NA HOA.
Ke kauoha ia aku nei na Lala a pau o ka Hui Kuai Aina o Wainiha, e akoakoa ae ma ka hale noho o D. Nuuhiwa, ma Wainiha, ma ka hora 9 A. M. o ka la 12 o Iulai, o keia makahiki.
R. PUUKI, Luna Nui o ka Hui.
jun 10.