Ka Oiaio, Volume VII, Number 31, 4 October 1895 — Page 1

Ka Oiaio.

Ka Makai Kiu

Lau Omaomao.

K Kaaea o na kakai pali nihoniho o Misouri.

KA MEA NANA I HOOOKA KA POWA IEKE A ME KONA PUALI HOLOKOA.

A I OLE

Ke Aka kino wailua o ke kuluaumoe

Oihana Kiaaina

Keena ma Nu Ioka,

Aperila, 6 1876.

            O ka Repubarika Nui o Amerika Huipui.

            I ka mea Hanohano

            Haku o ka Hotele

            Helu 222

            Me ka mahalo.

            A no, ke hoike ia aku nei ka lohe ia oe, ua makaukau ke aupuni e haawi manawa lea aku ia oe, a me kou ohana, no kau mau hana ku i ke aloha, no ke kokua ana i ka Makai Kiu Lau Omaomao.  Oiai hoi, e hookau ia aku ana maluna e kou umaumakekahi kea i kinohinohi ia me na pohaku makamae he nui.  A e loaa pu nohoi i ka Makai Kiu Lau Omaomao he kea i kuni ia me kena inoa ponoi, a na ko’u alii koa kiekie e hookau aku i ua mau kea ala maluna o ko olua mau umauma pikahi.

            Ua sila ia keia mau makana ma ko’u keena oihana nei, i kakauinoa ia hoi e ka Peresidena o ka Repubarika nui o Amerika Huipuia.

            Kou Oiaio

            H. R. Water.

Kiaaina o nu Ioka.

            I ka pau ana o kana heluhelu ana, ua kii aku la oia ia Lau Omaomao, a nana pu iho la laua i ua leta ala, a eia iho ka laua leta hoomaikai no keia mau makana.

            Moku aina o Nu Ioka

            Hotele Helu 222

            Aperila, 6 1876.

            I ka mea Hanohano

Ke alii Kiaaina o Nu Ioka nei

            Me ka mahalo.

            A no, ua loaa mai kau leta, a me kau hoike e pili ana no na makana hiwahiwa a ka lahui Amerika ma ou ‘la, i hookau mai ai maluna o maua, kekahi o na makaainana kupa o ka Repubarika Nui o Amerika Hupuia nei.  A no, ke lawe nei maua me ka manao maikai a ku i ka hanohano o ko kakou aina aloha.  A ke pule nei maua i ke Akua e hoomau ia aku ko kakou noho aupuni kuokoa ana, no ka wa mau loa.

Kau mau kauwa haahaa.

            Sila ia, a kakau inoa ia e maua i keia ia 6 o Aperila 1876 ma ka hotele helu 222.

            Mr. G. W. Paka Haku Hotele.

Lau Omaomao Makai Kiu.

            I ka pau ana o ka laua leta i ke kakau, ua hoi aku la laua no ka rumi hookipa a hui aka la me na alii kea.

            I kela wa, ua ku ae la na alii koa iluna, no lakou ka huina o 12, a oia ka wa i ike aku ai na mea a pau i kekahi pahu ili dia, i kinohinohi ia me ke gula, a me na pohaku makamae, i ka wehe ia ana ae mailoko ae o kekahi eke ili hinuhinu.

            Ia wa, ua wehe ae la ka mea iaia ia hana a lawe ae la he elua mau pa gula, a kao iho la iluna o ke pakaukau, a lawe hou ae la he elua ewili silika a kau iho la iluna oia mau pa gula ala, a mailoko ao ona mau owili silika ala, ua wehe ae ia oia a ike ia iho la ua mau kea ala, no laua ka nui o na manamana he 45 pakahi, a ma ke kiko waena e kau ana ke kii o ka Peresidena Wasinetona ka makua o ka lahui Amerika.

            I keia wa, ua kahoahoa ae la ua alii koa nei i na olelo hoomaikai i ke Akua, no ua mau kea ala, a hiki i ka pau ana, oia kona wa i kau aku ai i kekahi kea ia Mr. Paka, a pela no hoi i ka Makai Kiu.

            I ka pau ana o ka hana a ke alii koa, ua pahola mai la ka Makai Kiu i na olelo hoomaikai ma ko laua aoao no na makana i loaa aku ia laua, a hiki i ka pau ana, ua haawi ia na puili lima pumehana ana mawaena o lakou a pau.

            I ka pau ana, ua haawi aku la o Mr. Paka i ka leta i ke alii koa, ma kainoa o ke alii Kiaaina o Nu Ioka, a hoi aku la lakou.

            Iloko oia wa, ua liuliu koke ae la lakou a pau no ka naue ana aku ika ke alahele e hoea aku ai i Misouri ka pahu hope hoi o ka huakai a ka Makai Kiu.

            I ka hora 9 ponoi oia kakahiaka ua hoomaka aku la ka huakai e nee no mua, a eia ka poe ma keia huakai, na lala o ka oihana Makai Kiu, o Mr. Paka, a me kona ohana ka ui Kananimaeole, kekahi hapa o na kaawa lawelawe o ka hotele a ne kekahi poe e ae, a ua hiki aku ko lakou heluna i ka 200.

            I ka huakai e nee nei no mua, aia ka ulu mahiehie o ka hauoli iloko o kela a me keia mea pakahi o lakou a pau.

            Ma keia huakai hele, ua hala ia lakou na la he 15 a i ka 16 o na la ia hiki aku lakou a pau no ke kuanakauhale o Misouri, a ua hui pu iku la me ka ui Meliaka kona mau makua a me ka nui o na hoaloha, a ne mau setona hoi ia o kaulu mahiehie o ke aloha mawaena o lakou a pau, a o ka hora 11 ponoi no ia o ke kakahili @ a na ka Makai Kiu hoi i hoola@ aku i ka ui Kananimaeole i ka ui Meliaka, a pela pu hoi ia Pilipo ma, a hoolauna pu ia aku la hoi o Mr. Paka, kana wahine, a me kana mau kaikamahine a he mau setona ia o ka hauoli ma waena o lakou a pau.

            I ka aneane ana aku e kani ka hora 12, aia hoi ua koele koke mai la ka bele a ka aipuupuu, e kono mai ana i na mea a pau e naue aku e kau ke mio iho i na ono mikokolohua o ahu alalakukuiana iluna o ka papaai @ no ka hoopiha ana iho i ka lua o ka inaina, a naue like aku la lakou a pau.

            I ka pau ana o ka lakou ai ana, ua hoi nui aku la lakou hoonanea iki ihola kekahi mau minute ma na kukai olelo ana, a o ka kaua kaeaae hoi e ka moa heluhelu aia oia ke kokoia’la, e na wiliau ana i awalau, oiai, e kaana pono ana oia me kana lei aloha ka ipo lauae ku kamahao o Makana a me kona mau luaui no ko laua hoohui ia aku ma ka pelita maemae o ka makelemonio o ka mare hoano ana, a akahi no a olu pone iho ka noonoo o ka ui Meliaka, ka pua nani kamahao o Misouri, i kona lohe pono ana aku i ka leo o kana ipo aloha kakia iwi, i ka pane ana mai, e kuu aloha poiha ole, ekolu la mai keia la aku e hoohui ia kaua ma ke pelika maemae o ka mare, a o kela ko’u wa a hooko ai i ka’u olelo paa i hai mua aku ai ia oe, e kuu aloha poina ole.

 

E hoomanao e na makamaka ma ka Poakahi, Poalua, a me ka Poakolu o keia pule ae, e kuai aku ai au i keia mau Waiwai ma na KUMUKUAI HOOPOHO; Kasimia o na ano apau.  Na Lole Huluhulu o na ano apau.  Na Lole Makalena o na ano apau a me na Kinamu o na waihooluu like ole.  E kipa mai ma ka HEIAU o ma PAIKINI ma keia mau la i ike pono oukou i ka oiaio o ka, u mea e hoolaha aku nei.

 

LUULUU WALE.

            Me ka naau mokumokuahua a kaumaha makou e hoike aku nei imua eo na hoaloha a me na makamaka o ko makou Luna Nupepa, i pauaho mai la i keia ola ana ma Kalaapapa, Molokai, oia o Paulo Kamaka Waikele, ma ka la 2 o Okatoba nei, a nalo aku la no ka wa mau loa.  O keia kekahi o na luna pepa eleu, a makaala loa o ka Nupepa KA OIAIO, no na makahiki 6 a oi, a he kulana hoopono hoi kona, a makou e hilinai nui loa ai, aka, ua hala aku la oia, aloha no oia a nui loa.  Ma keia ke hoike ia aku nei i na poe lawe pepa a pau o Kalaupapa Molokai, o S. Makua ko makou Luna Nupepa oia Panalaau, ma ma keia ko hilinai nei makou ia oe e S. Makua, e hooko pono ana oe.                     KA OIAIO.

 

HE HANA A MANAONAO.

            Ma ka la 27 o Sepatemaba, ua hana kekahi kanaka i na hana naaupo maluna o ke kino maemae o kana wahine, me ka pepehi ana iaia a make.  Mamua ae o ka hooko ia ana o keia hana manaonao, me he mea la, ua hooholo like no laua, e make like no laua, mamuli o ko laua hoomakaukau e ana i na lole no ko laua make ana.  Ua hooko io ia kela manao mamuli o ko ke kane pepehi e ana i ka wahina a make, hookomo oia i ka lole i hoomakaukau ia nona, a pela pu hoi me kona lole, a hele oia a kaawe iaia iho iluna o kaupoku o ka hale a hiki i kona muke ana.  Aole he poe i ike i keia hana maewaewa a lana.

            O kekahi mau lohe, ua hooholo laua o ka la 28 o Sepatemaba iho nei, oia ko laua la o mare ai, aka, lohe e iho nei nae ka wahine, ua hoolilo mua ke kane i kona waiwai a pau no kana mau kaikamahine, nolaila, ulu na manao inaina iloko o ka wahine, no ka hana a kana ipo, a hoomaka laua e hoopaapaa a hiki wale i kona pepehi ia ana a make loa.  O. D. Beniamina Kamaukoli ka inoa o ke kane, Mele Kamila ka inoa o ka wahine, a no Kamaole, i Kula, Maui keia mau mea, a he 40 paha ka nui o na makahiki o ka wahine.

 

HE MAU OLELO PUPU LE

(Hoomau ia.)

            Ua loaa mai keia pepa nona na manao o M. Lutera, i kakauia ia J. M. Poepoe, a e olelo ana hoi, ua hoike aku oia ia J. Nawahi i kekahi mau mahele manao mua o keia olelo ana, e i nei he hoike mai ke Akua mai iaia.  No kekahi kumu a mau kumu paha, aole i hoolaha akea ia keia wanana ma ka nupepa a ka mea ana i hoouna aku ai i ka mahele mua, a i haawi ia aku i na nupepa Hawaii e hoolaha akea ia ae ma o Mr. Poepoe.  Aka, eia keia wanana ke laha palanehe nei mai ka waha aku o kekahi a kekahi, elike me he pueo la ka makau i ka malamalama, i ka hoolaha akea ia i ike ia ai kona ano e na mea a pau a i hiki ke kaana ia kona ano mamua o ka apo h@po ia mai o kona ano e ka poe e noho ana iloko o ka pouli a me ka ike palaweka i ke ano o na hoopilipili ia ana o ka ke Akua olelo wanana no na mea e hiki mai ana i ko ke ao nei.  Eia ua leta la mahope iho nei.  A oiai ua hala aku nei na mea i oleloia me ke ko ole ana iloko o ka wa i wanana ia ai, ua hiki ke oleloia keia mau olelo wanana, he mau olelo hoopunipuni, a he mau olelo lalau na kekahi mea i hulihia kona noonoo maikai mamuli o ke kuko nui ana i kekahi mea i manao nui ai paha.

            I ka hoa’loha maikai iloko o ka Pono o ka Haku o Iesu Karisto.

            Iosepa Poepoe.  Aloha oe a me na Hoahanau Aloha o ka Hoomana Hoano o na la Hope nei me ka Malu mai ke Akua mai.  Aloha oukou a pau loa.

            Eia no au ke wanana nei i ka Euanelio o Karisto, ma ka Mokupuni o Maui nei, a ke hai wiwo ole aku nei au i ka Nani o ke Akua ma na Luakini a ma ke kulanakauhale o Wailuku nei.  Eia ka mea hai aku ia oe.

            E oluolu oe e hoolaha ae iwaena o na Hoahanau, a me ke ala kai o ka Ekalesia au e ku la, ma ke kauoha a ke Akua Kiekie Loa ka mea e noho ‘lii ana maluna o na kanaka a pau loa, a maluna hoi o na Puali Anela o ka Lani a me ka honua nei, ma o kona, Uhane la; ke hoike mai nei ke Akua ia’u, e kukala aku a e kala aku i ka leo ma ka Waonahele o Hawaii nei.  E hooliloia ka la 6 o ka mahina o October, i La hooke ai no na haipule a puni ka Pae Aina o Hawaii nei, mai Hawaii a hiki i ka welona o ka la i Lehua.

            He leo kanoha keia i na kanaka a pau loa e kahea ana i ka Inoa o Iehova ma Hawaii nei, a e malamaia keia la hoomanao mawaena o na Hoomana like ole ma Hawaii nei.  Nolaila, mai makau oe ke hele aku e hai i @a hoomana Kakorika a me ka hoomana Enelani, Kalawina a pela aku, mai hopohopo oe i keia kauoha mai ke Akua mai, mai kana lua hoi i ka hoike aku i keia kauoha ano nui loa, mai ka noho’lii mai o ke Akua Kiekie Loa.  Eia na rula no ka malama ana i kela la hoomanao.

            1.  E hoomakaia ka hoomana ana iwaena o kela a me keia ohana e noho ana maloko o na home ma ke alakai ana a ke Poo ohana i ka hora 12 o ka po Poaono, ma ka haipule ana me na paipai manao, ma na pule ma ka himeni, no ka hooke ai, mihi o ka ohana ina hewa.

            2.  E hoomaka hou i ka malama ana i ka Halawai kakahiaka Sabati, no ka nonoi ana i ke Akua me ka mihi no ko ko Akua hoopakele mai la kakou mai ka Anela luku ma’i o na popilikia maluna o ka aina.

            3.  E hoomanao i ka haipule a me ka mihi no ka lahui Hawaii, e mihi ka lahui i lo lakou hewa, imua o ke Akua ma ka hora 10 12 o ke awakea.

            4.  Hora 3 a hiki i ka hora 4 p. m. no ka hoomanao ana i ke aupuni honua ma Hawaii nei.

            5.  Hora 7-9 p.m. no ko ke Akua lokomaikai maluna o Hawaii nei.

            6.  Hora 12 o ka po Sabati, e noho’lii mai ai o Iehova Sabaota ma ka hoomalu ana ia Hawaii nei iloko o ka poho o kona lima Mana.

            Nolaila o hoomanao i keia la, e waiho i ka ai, ka I’a, ka wai a pela aku, hooke ai mai ka hora 12 po Poaono a hiki i ka 12 o ka po Poaono Sabati.  O ka pule a me ka ole o a ke Akua oia ka ai.  E hosana, Hoolea, Halelu a pela aku.  Ma ia la e huipu mai ana na puali o ka Lani a me na puali Anela ma ka honua nei, e hoomanao i keia la nui.  E kulou ana na Hoku, e kukuli ana na ao, e hoolea ana ka Mahina, e Halelu mai ana ka La, e mele mai ana na kuahiwi.  O keia mau mea a pau loa a ke Akua i hana ai, e hooke ai ana lakou no ka pomaikai o Hawaii nei.  Nolaila e hui aku oe me na Lunahooponopono Nupepa, i hoolahaia keia manao ano nui loa iloko o ka Paeaina.

            Ua leta aku nei au ia J. Nawahi, aka, aole i pau loa aku nei na rula i ka hoike ia e a’u, no ka awiwi loa o ka moku i ka holo.  E oluolu oe e hoike aku iaia, ina mea i koe aku me keia Papa kuhikuhi hana. 

            Eia ke kumu a ke Akua o kauoha nei i keia la hoomanao e malamaia e na haipule ma Hawaii nei.  E hele mai ana o Iehova, no kona mana a me kona ikaika a me kona nani nui, e kukulu i ke Aupuni Moi o Hawaii nei.  O ka la e hiki mai ana he la weliweli, he la e haalulu ai o na lahui kanaka, a e haalulu ai ka Honua, a e upaipai ana na Mauna, a e kupikipikio ana na Ale o ka Moana iloko o Hawaii nei.  Ioela 2:1—32.  (E heluhelu i keia mokuna holookoa).  Nolaila, o ka la 7 o ka Mahina o October ka la i manao ia e hiki mai ana ia me kona nani nui.  He 24 la ka wanana, mai ka la 14 o Sept. a hiki i ka la 7 o October, piha 24 la, oia hoi ua like ia mau la 24 me hookahi la ia, oia hoi he 24 hora hookahi la ia.  Nolaila, ekolu manawa i hoike ia mai ai ia’u.  O ka piha ana o na la he 24, ua kupono ia i ka hora, ina emi mai malalo o 24 la, he setona ia, ina e oi aku maluna o 24 la, alila, he minute ia.

            Nolaila, o keia ka hora, ka minute a me ke setona a me ka manawa a hiki mai ai o Iehova e kukulu i ke Aupuni Kumu o Hawaii nei, ke Aupuni hoi a ke Akua i hooilina no ka lahui Hawaii ma ka hookumu ana mai o ke ao nei.  Na Iehova no i hoohiolo.  Na Iehova no e hoala hou mai.  E hoonani ia kona Inoa, a e hana ia kona makemake ma Hawaii nei.  Ua haiolelo aku au imua o na kanaka ma Wailuku nei ma na Luakini no na hopena weliweli e hoea mai ana maluna o Hawaii nei, aka, nui ka hoomaloka o na kanaka, ua kapa mai lakou ia’u he pupule.  Ua wanana au e hiki mai ana kawi, kamaiahulau, kapahikaua, e lilo ena ka Mahina i koko, e poeleele ana ka La, e helelei mai ana na Hoku o ka Lani.  E mihi ana na kanaka a pau loa i ko lakou hewa.  Ua hiki mai keia pilikia maluna o ka Aina no ka hewa o ka lahui, a me ka poe nana e hookele ana i ke Aupuni Honua a me ke Aupuni Uhane aole nae hoolohe mai o na kanaka i ka’u ao aku ia lakou.

            Ua hoomaka ko’u wanana ana i ka hopena o Hawaii nei i ka la 7 o October 1894, Sept. e hele nei no ka hopena o Hawaii nei e hiki mai ana, ma na Kona a me ke Kulanakauhale o Honolulu i ka Mahina o June 1895, a pela hoi ma Wailuku nei i keia mau la.

            Eia ka olelo wanana o keia mau la ma Ezeke 17:1-26, mokuna holookoa.  E makaikai oe ina hopena popilikia o Hawaii iloko o keia wanana a ke Kaula Ezek. ua hookoio ia ma Hawaii nei i keia mau la.  Eia keia mau olelo wanana pohihihi a’u e wanana nei i na kanaka.

            1.  Aia kakou a ike aku i ka pua o ka Mamane i ka pala luhiehu mai i kanahele, alaila, e hoomanao iho kakou, ua io ka Wana a me ka Ina o kai.

            2.  Aia kakou a ike aku i ka pua mai o ka Wiliwili i ka ula papa mai iluna o kona mau lala, hoomanao iho la kakou e nanahu mai ana ka Mano o ka moana.

            3.  Aia a ike aku kakou i ka ululaau e hee ae ana i ka moana, alaila, e hoomanao iho kakou, ua kokoke mai oia i ka Ipukahale, alaila, e uwe ai ka wahine i ke kane, a o ke kane hoi i ka wahine, ka makua i ke keiki, ke keiki i ka makua, ke kaikaina i ke kuikuaana a pela aku.

            Eia hou keia olelo wanana, e hiki mai ana ka wa e hanau ai o Hawaii nei i ke keiki kane, a e kapaia kona inoa o ka La Pouli, ekolu kuakoko a Hawaii i hookohi ai.  (1)  Iluna o Leahi.  (2)  Ka wi e pahola nei.  (3)  Ka ma’i ahulau.  Hookahi kuakoko i koe e kali aku nei, alaila, hanau o Hawaii nei i ke keiki.  O ka la e hanau ai o Hawaii nei i ke keiki, he la ano nui ia; he kaumaha, he la weliweli a me ka makau.  E like me ka wahine hapai keiki, i ka wa e kohi ana e hanau, o kona mau hora ia o ka pilikia, akoakoa mai la ka ohana a pau imua o kona alo.  Pela ana no o Hawaii nei ke hiki mai ia la.  O ka la e hanau ai o Hawaii nei, he la haulu he la pouli, he la omamalu.  Ioela 2:2 3.  O ka hora e hanau ai, ku’i ka hekili, olapa ka awila, ne-i ka olai, ua ka Ua-ko-ko, kahe ka waiulani kai, e pii ana ke Kai a ka Hinalii, e popoi aku ana ina makalae, e uhi paapu ana i ka aina.

            Eia kekahi puolo nui (Solomona 16:38) ke lana hele nei iluna o na ale o ka moana.  Elua mahele iloko o ka puolo.  Elua mahele iloko o ka puolo.  (1)  He puolo o ke kauikau, he luuluu, kaumaha, hoi luuluu no i ke one o Hanakahi, o ka loku a ka ua i wailana.  (2)  He puolo no ka hauoli, aia a hiki mai ua puolo la ina aekai o Hawaii nei, a o ka la, a o ka hora, a o ka minute e weheia ai na puolo la, o ka la ia e paniia ai o ka maka o ka la, aole hoi e hoomalamalama mai ka mahina i kona nani, a o helelei mai auanei na Hoku o ka Lani.  Mat. 24:29 30, a mahope o keia mau la popilikia, alaala noho’lii mai ka maluhia maluna ou e Hawaii.

            Eia kekahi pau kupapau ke lana hele nei iluna o ka moana, o ka pae wale mai no koe i Hawaii nei, he wahine ke kino make oloko, aia a poe mai na pahu la ma na aekai o Hawaii nei.  He Liona me na Manu Aeko ka mea hou nana o hoola hou i ua wahine la i make iloko o ka pahu, e like auanei ia, me ka Iesu hoola ana ia Lazaro mai ka make mai.  Malak. 4:2, Hoik. 5:5, Kinohi 49:9 10, Solomona 23:5, Ioha 9:27, Kanwai I 29:49.

            Nolaiala, ua like o Hawaii nei iloko o keia mau la popilikia, me ka moku e holo ana maluna o na ale kupikipikio o ka moana a e alo ana hoi iloko o na makani puahiohio o keia ao a me ka lauwili o na manao o na keiki a kanaka, aka, e hoolana kakou i ka manao, aia no he wa e pau ai o na ino.  Eia no o Iesu ke ku nei ma na aekai o Hawaii nei.  E nana i ka himeni H.A.N. 287.

            Eia hou no keia huaolelo wanana.  E hele mai ana o Iehova maluna o na ale o ka moana, maluna o na kaa’hi, e hele mai ana oia maluna o na lio ahi, e holoholo mai ana oia ma na eheu o ka makani a hiki loa mai i na aekai o Hawaii nei.  Halelu 104:4 5 Isaia 66:15 16.  Nolaila, ua hala ekolu auwe.  (1)  Iluna o Leahi.  (2)  Ka wi.  (3)  Ka ma’i ahulau.  Hookahi auwe i koe, a oia ka weliweli a kakou e kali aku nei.

            Nolaila, me keia mau olelo wanana pohihihi a’u e hoike aku nei imua o ka kanaka e kapaia ai au he pupule, a o kuu aahu ana i ka Hae Hawaii, aohe he poo i ko’u wa e haiolelo ai, a manaoio no lakou he pupule, aka, aole lakou i ike i ka lakou mea e kamailio ai.  Nolaila, e hooponopono mai ana o Iehova i ke aupuni honua, a pau kona hooponopono ana i ke aupuni honua, alaila, e hooponopono mai ana oia i ke aupuni Uhane. 

            Eia ka olelo paa a ke Akua i hoike mai nei ia’u, e like me ka inoino o ke aupuni honua, pela no hoi ka inoino o kona aupuni aole loa e maemae ke aupuni honua a me ka aupuni uhane, a holoiia ka aina i ke koko a me ke ahi.  Weliweli maoli o keia mau olelo a ke Akua iloko o keia mau la.

            Nolaila, e ka hoa’loha maikai iloko o ka haku aloha nui  Ua kokoke mai ka pua ana o ka wiliwili a me ka pua o ka Mamane.  Ua hiki mai ka pilikia oia i ka ipukahale.  Nolaila, he mau la kanikau keia no ka aina, he mau la luuluu, he mau la mihi, he mau la kulou me he kanikau la ma na kapa muliwai, a puka aku la kakou ma o o keia mau la ino, alaila hauoli ka lani, hauoli ka honua.  Eia na puali Anela o Iehova ma na aekai o Hawaii nei kahi i hoomoana ai e kali ana i ka hora a me ka la e hiki mai ai o Iehova o na Kana.

            Kou Oiaio,

            M. LUTERA.

 

Halekuai Kamaa

o

MAKANANI,

Alanui Papu.

            Okeia iho ke Kamaa haahaa hila Kiani nani loa o na Wahine i kapaia “Oxford Tie.”

            O ke auo kuea a me ke ano uuku oioi o mua no $2.50 wale no.

            O keia iho hoi ke kamaa ili Kae Farani o na Lede e pihi ana ma ka aoao.

A he $3.00 wale no kona kumukuai.

            He $4.50 ke kumukuai o keia ka maa mamua.

            Ma kahi keia e loaa ai o ka

            jun 13 tfd.

 

MAI POINA!  MAI POINA!

I KE

KUAI HOEMI

KUAI HOEMI

KUAI HOEMI

NO KANALIMA-KUMAMAKAHI LA, MAI IULAI 13 AKU

Ma kahi o

            J. J. EGAN,

            Alanui Papu.

jul13 tfd