Ka Oiaio, Volume I, Number 1, 1 January 1896 — Page 1
This text was transcribed by: | Lianne Hee |
This work is dedicated to: | Maxine Leinaala Porter Hee |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
BUKE 1 HONOLULU, IANUARI 1, 1896 HELU 1
KA OIAIO PUKA LA
KA MANA O KA KE AKUA OLELO.
I ike pono ai kakou i ka ke Akua olelo he mea kupono e ike kakou i ka mana oia olelo, no ka mea, aia maloko o kana olelo ke Akua e hoike ai i kona manao. Ua hoike ia mai keia mea ia kakou ma ka hana nui kelakela hookahi e hoikeike ana i ka mana o ke Akua, ka mea mau imua o kakou, oia hoi, ka hookumuia ana o na lani a me ka honua. Ua hanaia hoi ka hookumu honua, wahi a David i olelo ai, ma Halelu 33, ma o ka olelo a ke Akua. “I iho la oia a o ka hanaia no@”
“Ma ka olelo a Iehova i hanaia ai na lani o ko laila lehulehu no hoi ma ka ha ana o kona waha.” Pehea la ka nui o kona ikaika? e like me ka mana e hiki ai iaia ke hana @ lani me ka honua mai ka ole mamuli o kana oleio. Pela no hoi he mana kona ma o Iesu Karisto la e hana hou hoi ia kakou (Epeso, 2.10.) e hanaia kakou i mea hou. (2 Kor 5:17) e hoowahawaha ana i ka hewa a e aloha ana hoi i ka pono.
Ua hoike akea ia ae hoi ko Karisto mana, ma Ioane 15:3, e hoomaemae mai na hewa. He poe kanaka no hoi na haumana a Iesu, e like me na kanaka e ae, he kanaka maoli ma ko lakou ano, e makemake ole ana i ko ke Akua mau kanawai, he poe haumia a i hoohaahaa loa ia e ka hewa. Aka na hoopuka ae o Iesu i ka olelo hoomaemae, a aia hoi, ua maemae ae la lakou. Pela oia i olelo ae ai.
“Ano ua maemae oukou ma ka olelo a’u i olelo ai. Ua kipakuia aku ka hewa iwaho, ua hana hou ia ka naau hou maloko, a ua holoiia aku hoi na hewa a pau.” E hoikeike mau ia ana hoi keia mana o ka Karisto olelo maloko o ka moolelo o kana mau lawelawe ana. Ua hoike ia kekahi o keia ano ma Mataio, 8:1 – 3. Iho mai la oia mai ka Mauna mai, he nui loa ka poe i ukali iaia. Aia hoi kekahi lepera i hele mai iona a moe iho la imua ona, i mai la. “E ka Haku a i makemake oe, e hiki no ia oe ke huikala mai ia’u. O aku ia o Iesu i kona lima, hoopa iho la iaia, i iho la ke makemake nei au, e huikala aku hoi ia oe. Ola koke iho la kona ma’i lepera.” I kekahi wa mahope mai, iaia e a’o ana i na mea hohonu aku o ka uhane o ka oiaio, ua kukala aku hoi o Iesu. “O na olelo a’u e olelo aku nei ia oukou, he uhane lakou, a he oia hoi lakou.” Aka iaia i olelo aku ai i ka lepera, ua hooia koke ia hoi ka mana o kaua mau huaolelo. Ua eehia holookoa iho la hoi na wahi a pau o ke kino o ka lepera i na hua olelo, kipaku ia aku la hoi ka ma’i a hooulu hou ia ae na aa, na olona i emi pu mai, me na aa koko i hoopoino ia. Ua hoomaemae ia ka lepera, e like pu hoi me ka hoomaemae ia ana o kana mau haumana mai ka hewa mai, ma kana huaolelo. A pela iho la no hoi o Iesu Karisto e hoomaemae ai ia oe, e ka mea hana hewa, ina hoi oe e hele aku ana i ona la. Ua aloha oia ia oe i haawi ai hoi i kona ola nou; a ua hiki hoi i kona mana ke hooko i kona manao aloha a pau. O keia iho la ka mana o ke Akua Ola-mau.
HE HAAWINA HELUHELU BAIBALA.
1. Heaha la ka Karisto i kauoha ai ia oukou e pili ana i ka Palapala Hemolele?
“E huli oukou i ka Palapala Hemolele, no ka mea, ua manao oukou he ola mau loa ko oukou malaila, a oia ka mea nana i hoike no’u.” Ioane 5:37.
2. Heaha ka hana hiki i ka Palapala Hemolele ke hana?
“A mai kou wa kamalii uuku mai, na ike oe i ka Palapala Hemolele, i ka mea e hiki ana iaia e hoonauao ia oe e ola’i ma ka manaoio iloko o Karisto Iesu.” 2 Tim. 3:15.
3. Pehea la ke kiekie o ko ke Akua hoonani ana i kana olelo?
No ka mea na hookaulana oe i kau olelo mamua o kou inoa a pau. Hal. @8:2, hapa hope.
“He mana nui anei ko ka olelo a ke Akua?” “ No ka mea, he ikaika, he mana hoi ko ka olelo a ke Akua, he oi nui kona mamua o ko ka pahikaua oi lua, e o ana a kaawale ke ola a me ka uhane, o na ami a me ka lolo, oia ka lunakanawai no ka noonoo a me ka naau.” Heb 4:12.
Aole kakou ma keia olelo e manao ae he mana ko ka Baibala iloko o ko kakou mau hale e kipaku aku i na uhane ino. O na huaolelo a kakou e ike ana, he mea ia i paiia ma ka pepa me ka inika, a he mau mea wale no hoi e hoike ana i ka manao o ka mea kakau. Ua hoolilo ke Akua i ka huaolelo a kanaka he mea hoike i kona manao.
He mana piha ka olelo a ke Akua, a aia wale no a ike maoli kakou i ka mana paleua ole o ke Akua mahope o na huaolelo paiia alaila loaa ia kakou kekahi pono ma ka Palapala Hemolele.
5. Pehea la na honua i hana ia ai?
“Ma ka manaio ua ike kakou ua hanaia ka lani a me ka honua e ka olelo a ke Akua, o na mea i nanaia aole no loko mai o na mea i ikeia.” Heb. 11:3.
Ma ka olelo a Iehova i hanaia aku ai na Lani; o ko laila lehulehu no hoi ma ka ha ana o kona waha. Na ka mea, i iho la oia, a o ka hana ia no ia; kauoha iho la oia o ke kupaa mai la no ia.” Hal. 33:6, 9.
Ua hoopuka wale ae no ke Akua i kana olelo, a mamuli o ka mana-akua iloko o kana olelo i hoea ae ai na honua a pau me ko lakou mau ano ma kahi o ka ole. I ka hana ana i ka malamalama ua olelo wale ae no ke Akua “i malamalama a ua malamalama ae la.” Kin. 1:3. I ka hana ana i aouli, ua olelo ae hoi oia “i aouli iwaena o na wai, a pela io no.” Kin. 1:6,7.
E heluhelu aku hoi i na pauku 11, 14, 15, 20, 24 a me 26.
6. Pehea na mea a pau e kupaa nei?
E hoomau ana i na mea a pau ma kana olelo mana iho. Heb. 1:3.
Ua hanaia na honua a me na lehulehu a pau ma ka olelo mana a ke Akua, a oiai “e mau loa aku ana ka olelo a ke Akua.” (Pet. 1:25), nolaila e hoopaa mau loa ia aku ana no na honua ma ko lakou pohai kulana ma ka lewa lani.
7. Heaha la na mea a ke Akua e hoohana ai e haule mai ai ka hau a me ka huahuapaa, a e pa ai hoi ka makani?
“Hoouna mai oia i kana olelo i ka honua nei holo kiki no kana mau olelo. Haawi mai no oia i ka hau, me he hulu-hipa la, hoohelelei mai oia i ka hua hau paa, e like me ka lehu-ahi. Hal. 147:15, 19.
Na kana olelo i hoomalu i na mea a pau e uhi ana hoi i ka lewa lani me na ao, a hoolako mai i ka ua no ka honua nei. (Hal. 147:16, Ier. 10, 13) O ke Akua ke kumu o na mea a pau.
Ua kulike hoi na olelo ake akamai oiaio me kana mau hana. I na a’o ana pololei a pau e alakai ana ia kakou e malama i kona hoomalu ana.
KA LA KARISIMAKA
Ua kukuluia ka la Karisimaka e ka hoomana Katolika i la hoomanao no ka la i hanau mai, ai he Hoola no ke kanaka, mamuli o kona haule ana malalo o ka hoopai a ke kanawai hemolele o ke Akua. Ma ka hoonohonoho ana a kekahi poe akeakamai ma ka heluna manawa, a me ka hookuku ana me ka helu o na la pouli a me na la e kaalo ai o kekahi honua me kekahi, a me ka la paha, ua ike ia ua pololei i’o no ua hanau ka Hoola ma ka la 25 o Dekemaba.
Ma ka hanau ana o Iesu Karisto, mai ka puha ka mai o ka wahine i launa mua ole me ke kane, a ma na ano kamahao e ae he lehulehu, ua hooia mai ke Akua i kana olelo ma o na Kaula no ka hanau ana mai o ka Hoola o ke ao, a ike maka ko ke ao nei i ka mea nana e pa’opa’o i ke poo o ka nahesa, ma ke kino kanaka. Mai kona hanau ia ana a hiki i kona make ana ma ke kea, ua hookoia na wanana a me na kauoha a pau nona.
Ua hookukuluia ka Hoomana Karistiano ma ona la. Ua olelo mai oia, o ia no ke poo o ka hoomana oiaio, a ma ona la na mea a pau e hele aku ai ma ka manaoio, e ola ai lakou i ke ola mau loa.
Ma kona lilo ana o ko kakou Hoola oia, he oiaio ua kupono loa ia kakou ke hoomanao, aole wale i kona wa i hanau ai, aka e hoomanao i kana mai hana a e hooko i kana mau kauoha a pau. Ua hoomanaoio anei kakou? oia ka ninau a kela a me keia e noonoo iho ai, e like me ka mea i ku i kana mau a’o ana, i loaa ai ia kakou ka hoomaikai i kauoha ia ma ona la. O ka hoohalike ana i ko kakou noho ana ma keia ola ana e like me ia i noho ai, oia ko kakou hoike ana i ke aloha oiaio iaia, ka mea nona ka la hanau. Eia ka makahiki hou ua hoea mai, ina aole kakou i hanau hou ole ia a lilo e like me kona ano, alaila ua hookamani ko kakou hoomanao ana nona, ma na hana kue i kona makemake.
“E hele mai io’u nei,” oia kana kauoha, a nana no e hoomama i ko kakou mau pilikia a pau.