Ka Oiaio, Volume I, Number 4, 7 January 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

BUKE 1.  HONOLULU, IANUARI 7, 1896           HELU 1

 

KA OIAIO PUKA LA

 

HE MEA IKE IA KE ANO O KA BAIBALA E NA MEA A PAU.

 

            Ma ka imi ana i ka palapala Hemolele kakou e ike ai i ke Akua, a me Iesu Karisto, ana i hoouna mai ai. Aole ka Baibala i haawiia mai no ka pomaikai o na Kahunapule wale no; he buke hoi ia no ka lehulehu; he buke hoi e hoolaulea ai i ke kanaka ilihune. He hana kuhihewa loa ia a na kahunapule, ke ao ana e manao ai kekahi o ka lehulehu, aole lakou e kupono e heluhelu i ka Baibala, no ka mea, aole ka lakou e ike i kana mau ao ana laahia, a e kupono no hoi ia lakou e lawe i ka wehewehe ana a ka poe na lakou ia hana he wehewehe i ka olelo a ke Akua. O na kahuna e ao ana pela i ke lehulehu, ua kuhihewa loa hoi lakou. Ua hana ia ka Baibala a me ka Uhane, kekahi no kekahi, a mamuli o ka hana ana a ka olelo a me ka Uhane Hemolele, ke Akua e hooni ai i ka naau. I ka mea e apo ana i ka manao aloha o ka oiaio ua lilo hoi ka olelo a ke Akua he lamaku e a ana ma kahi pouli, e hoike ana hoi i ke alanui me ka moakaka loa e hiki ole ai i ka mea ma ke alahele, ina no ia mea he hupo, ke hele hewa. Ua ike hou oia o ke komo ana o ka olelo a ke Akua ka mea haawi i ka malamalama; e haawi ana i ka naauao i ka mea ano ole. Ua hiki hoi i ka mea i ao nui ole, e ake nui ana kona uhane, iloko o ka haahaa a me ke akahai, ke loaa aku ma ka heluhelu ana i ka baibala na olelo hooluolu iaia mamua  o ke kanaka i hoonaauao ia a hookiekie ia paha. Malia paha aole e  hiki iaia ke hoike aku ia hai i na hoike o ka haawina a ka olelo e like me ka ka mea i hoonaauao ia, aka, ua hiki nae iaia ke hoike ma kona ano i kekahi hoike o ka ikaika, e hoike akea ana ma kana mau hana, i na hooia i ka mana o ka oiaio. Ua manao no ke Akua e loaa kana olelo i ka mea ilihune a hoonaauao ole ia, kana olelo malamalama maopopo a he alakai ma ke alanui o ka pono. Ina lakou he oiaio e makemake io ana e ike i ko ke Akua makemake, aole lakou e haalele ia ana iloko o ka pouli.

            He kuleana no na mea a pau e naauao nona iho ma ka heluhelu ana i ka palapala hemolele. Aole hoi e hiki i kekahi kanaka ke waiho a@u me ka maalahi, i kona pono uhane i ke kahunapule, a i ke kanaka paha i ao ia a he naauao maoli kona.

            Ua olelo maoli aku no o Iesu, i na kahunapule a me na luna kiekie, ka poe i manao ia aku

he poe naauao ma ka palapala hemolele he poe hupo kakou ma ka palapala hemolele, a ma ka mana o ke Akua. (Mat. 23:29)

            O ka poe a ke Akua i waiho aku ai i na talena, ua kau aku no ke koikoi oia mea maluna o lakou e like me ka lakou hoohana ana aku ia mau haawina, a he kupono ia lakou e ho@pau i na olelo o ka Baibala i hiki ai ia lakou ke ike i kona ano. Ina poe ilihune a i hoonaauao ole ia i hiki ole ke ike i ke ano o ka Baibala, alaila, ua lilo he makehewa ka Misiona i ko kakou honua nei, no ka mea, “maluna iho nei o’u ka Uhane o Iehova; no ka mea, ua poni mai la oia ia’u e hai aku i ka enanelio i ka poe ilihuhune; ua hoouna mai kela ia’u e kapaau i ka poe ehaeha, ma ka naau, a e hai aku i ka hoola ana i ka poe pio, a me ka ike hou ana i ka poe makapo, a e hookuu i ka poe i hooluhihewaia.” (Luka 4:18). Aole wale hoi o ke kauoha a Karisto, e imi i ka palapala hemolele, he kauoha i na Paresaio a me na Kakauolelo wale no, aka, e olelo ana oia i ke anaina kanaka nui i akoakoa hoopuni mai e lohe iaia. Heaha hoi ka waiwai o keia kauoha imi, ina ana aole e ike ia ka mea e imi ia ana.”

E.G. W.

 

HAAWINA HELUHELU BAIBALA

 

UA HIKI ANEI I KE ANO O KA OLELO KE IKEIA

 

1 Heaha ka Iesu i kauoha ai? Ioane 5:39, mahele mua.

“E huli oukou i ka Palapala Hemolele.”

2 Ua haawiia mai anei keia kauoha i na kanaka a pau?

--Ae, ua haawi mai i na mea a pau ma ka honua nei. i hiki ke loaa iaia ka palapala hemolele

3 Ua olelo mai anei o Karisto he hiki no ka palapala hemolele ke hoomaopopoia? Mat 24:15

“Aia a ike oukou i ka mea ino e hooneoneo ai e ku ana ma kahi hoano, ka mea i olelo ia mai e ke kaula e Daniela: (o ka mea heluhelu e pono e hoomaopopo iho oia).”

4 Pehea ka nui o ka Baibala i kupono e hoopomaikai ana ia kakou ke ike? 2 Tim 3:15

“A, mai kou wa kamalii uuku mai, ua ike oe i ka palapala hemolele, i ka mea e hiki iaia ke hoonaauao ia oe e ola ai, ma ka manaoio iloko o Karisto Iesu.

5 Ua hiki anei i na keiki ke ike i ka palapala hemolele? Mat 11:25.

“Ia wa la, olelo aku la o Iesu, i akula @. Ke aloha aku nei au ia oe, e ka Makua, ka Haku o ka lani a me ka honua; no ka mea, ua huna oe i keia mau mea i ka poe akamai a me ka poe maalea, a ua hoike mai oe i na keiki uuku.” O na keiki i manaoio i ke Akua, ka poe i oi aku o ka malamalama i na mea pohihihi o kana olelo mamua o ka mea piha i ko na mea o keia ao, na kanaka akamai hoi e hilinai ana maluna o ko lakou naauao.

7 Ma ka olelo hea la ke Akua i kauoha aku ai i na makua e ao aku i ka olelo a ke Akua i ka lakou poe keiki? K@. 6:6.7.

“O keia mau olelo @ e ao aku nei ia @ i keia la, @ waiho ia maloko a kou naau @ a e ao pono aku oe ia mau mea i au mau keiki a e kamailio aku ia mau mea i kou noho ana ma kou hale, a i kou hele ana ma ke ala, i kou moe ana ilalo, a me kou ala ana iluna.” Pehea la e hiki ai i na makua ke ao aku ka olelo a ke Akua ina aohe ia mea iloko o ko lakou naau iho?

8 Pehea la ka ke Akua olelo i hiki @ ai i na kanaka? 2 Pet.1:21

“No ka mea, i ka wa kahiko, aole no ka @ o kanaka ka na kaula, aka ua olelo mai na kanaka hemolele o ke Akka i uluhia mai e ka Uhane Hemolele.”

9 Pehea la e ike ia ai ke ano oia olelo? Ioane 14:26 (1 Ioane 2:20, 27)

“Aka, o ke Kokua o ka Uhane Hemolele ka mea a ka Makua e hoouna mai ai, ma ko’u inoa. nana oukou e ao mai i na mea a pau, a e hoike mai ia oukou i na mea a pau, au i olelo aku ai ia oukou.” Ma ia Uhane hookahi no.

10 E alakai ana anei ka Uhane iloko o na Oiaio a pau? Ioane 16:13 (pauku 11, 15)

“Aia a hiki mai keia o ka Uhane oiaio nana oukou e ao mai i ka oiaio a pau: no ka mea aole nana kana olelo ana; aka, o na mea ana i lohe ai, oia kana e olelo ai, a e hoike no oia i na mea e hiki mai ana.”

11 Pehea la e ao ia ai ka k@ Akua poe keiki? Isaia 54:13.

“E ao ia no hoi kau mau keiki a pau e Iehova, a e nui loa auanei ka pomaikai o kau mau keiki.”

12 e ao anei kakou i ka Buke o Hoikeana? Hoik 1:3.

“Pomaikai ka poe helulelu a me ka poe lohe i na olelo o keia wanana, a malama ia i na mea i palapala ia maloko, no ka mea, ua kokoke mai ka wanana.

E. H. G.

________________

            Ua hoolala na alakai o na hui koa puwalu National, na koa mailoko mai o na hoahanau Katolika, e akoakoa ae na puali ma Bridgport, Conn, malaila e hookahakaha ai. Ua hoike ia aia ka nui o na koa o keia hui ma kahi o ka 700,000 a 1,000,000 e noho nei maloko o America Huipuia, a o na opio o keia aoao hoomana ma na kula a i hemo aku, eia ke ao ia nei i na ike makaukau kaua. O keia lala kakauha eia no oia malalo o ka leo o ka Pope. I hakalia wale no a kuonoono iho keia makaukau, a ku kona manawa, alaila kakou e ike hou i na hana maewaewa i hanaia mamua maluna o ka poe manaoio, e like me ia i ala mua ai i ke keneturia elima