Ka Oiaio, Volume VII, Number 50, 7 February 1896 Edition 03 — Page 4
| This text was transcribed by: | Kelly Murray |
| This work is dedicated to: | Awaiaulu |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
NUPEPA KA OIAIO.
J.E.BUSH, Lunahooponopono.
O KA PONO KA AIALII E OLA AI KA AINA.
_____
POALIMA FEBRUARY 7, 1896.
_____
HE HANA HILAHILA OLE
Ua kahaha nui ko makou manao i ka ike a me ka lohe mau ana i na hana lapuwale a kekahi poe makuakane ponoi maluna o ka lakou mau kaikamahine opio, ma ke kii ana e hana i kekahi mea pelapela loa maloko o ka poai o ka noho ana ohana, a oia hoi ka mokou e hoike aku nei i ka hana a Pahio maluna o kana kaikamahine ponoi, ka mea ana i imi iho ai a loaa mailoko mai o ka puhaka ponoi o ka wahine, i pauaho e mai i kona hanu ola i ke kau iho nei o ka ma'i Kolela.
O keia Pahia, he kanaka hana oia ma na uapo e kakou, a he Poola hoi kona olelo ana, aia kona wahi noho ma Kapalama, ke ole e kuhihewa ka mea nana i hoike mai ia makou. Ua hanau ia mai he kaikamahine mailoko mai o ko laua puhaka, a ua kaa hoi ka malama ana i kekahi mau kahu hanai a hiki i ka wa i make aku la o kana wahine.
A no ia kumu paha, na ulu ae la kona manao e kii e hoopoino i ka maluhia o ka lana kaikamahine, a ua hana io aku la no oia pela, a o ka hope, oia ka poino ana o ka maemae o ka mea ana i imi ai.
I keia la, eia oia ke paa mai nei iloko o ka Halewai, e kali ana no kona hookolokoloia, a o ka hope e kau aku ana maluna ona, oia kona haawe ana i na hoopai o ke kanawai elike me ke ino o kana mea i hana ai.
Liliha maoli no hoi na hana a keia ano kanaka, he nele loaa nei ka mea i kii ai e hoopoino i a ihiihi e kou io a me kou koko ponoi, oiai oia e uwe ana me ka leo kumakana o ka hilahila no kau hana lapuwale. ua like keia ano hana me @ pepehi kanaka, a o kahi kupono e ao ia ai ia poe, o luna o ka amana likanaka, he oi loa aku ia mamua o na mea e ae a pau. O ka nui o na makahiki o keia kaikamahine i hoike ia mai ia makou he 12. He kou ka hilahila ole.
_____
NA MELE ALII.
Mamuli o ko makou manao, he mea maikai ka hoopuka ana aku i na mele i he ku ia e ko kakou mau alii puni mele, noalaila, ma hookaawale ae nei makou i kekahi wahi kaawale o ka kakou @, i wahi no lakou e hoopuka mau ia ai i kela a me keia la, a o na kina'una'u ma o na like ole la o na hoopaa ana me ka mea nana i manawalea mai ia makou, aole maluna o makou ia, no ka mea, o ka hoolaha wale aku no ka makou, a he okoa ka mea nana ia lokomaikai i manuahi ia no KA LEO.
_____
KA MOKUKAUA BOSETONA.
Ua ku mai keia mokukana ma ka auinala Poaha nei, mai Kapalakiko mai, no ke kipa ana mai e hoopiha lanahu nona, wai a me na mea ai, mamua o kona holo loa ana aku no Kina. Aole paha i poina ka lahui Hawaii i ka inoa o keia moku, no ka mea, oia nei ke kumu i paa ai ke aupuni Noho Manawa, a i lilo ae nei hoi i Repubalika. Ua pau kona mau alii mua i ke kauliilii mao a maanei, pela no hoi me koma mau kanaka, a he kakaikahi loa ka poe e koe nei mai na 'lii a na kanaka i ikemaka i na hana hookahuli aupuni a Wil@ a me Kuhina Kuwini i hana ai ma ka la 17 o Ianuari.
Ua make na kumulau nana i imi iho a loaa na keiki, a oia ia e kakokana nei a hiki i keia la. Ua haawi mai oia i kona mau pu aloha he 21 no ka hanohano o ka @ Hawaii, a pela pu no hoi i panai aku ai ko ka aina nei mau elamakule.
_____
NA AINA O PETERO KAKOI.
Mamuli o ke kauoha a ke Komisina o na aina, oia hoi, o Henry Smith, ua lawe ae ka Lusa Kudala i kona kuleana, oia hoi o James F. Mokana, i kana hamare malalo o kona kuleana, ma ka hora 12 ponoi o ke awakea Poalima nei, ma Aliiolani Hale, i na aina a pau o Petero Kakoi, no lakou ke kumukuai i hiki aku i ka $10,190.
O ka apana 1 -He hale a me ka pa, e waiho nei ma Kapuukolo, Honolulu, nona hoi ka nui o 40-1000 o ka eka, oi aku a emi mai paha. Aia no hoi he apana e pili pu ana malaila, nona ka nui o 78-1000 o ka eka, oi aku a emi mai paha, malalo aku o ke Alanui Moi, e pili pu la me ke Alanui Maunakea. O keia apana, aole i kuai ia, ua hooponopono wale ia no ia no ka pono o na hooilina, a ua kohoia he $2,750.
Apana, 2 -Elua apana aina e waiho la ma Malamalama, Kailua, Koolaupoko, nona na eka 1.28 o ka ek@ oi aku a emi mai paha. He elua no hoi apana ma ia wahi hookahi no, nona na eka 1.20 oi aku a emi mai paha. O keia poe apana a pau eha, eia lakou malalo o ka hoolimalima no elima makahiki, mai Ianuari 1 1894, no $40 o ka makahiki. Ua lilo ia Anela Kakoi no #350.
Apana 3 -Hookahi apana ma Moanalua, he 35-100 o ka eka ua lilo ia Sam M.Damon.
Apana 4 -Hookahi apana ma ke Alanui Liliha, kokoke i na aina o Gaspar Sylva o Waialua, a me Jonathan Shaw, o Honolulu nona ka mai o 91-100 eka, oi aku a emi mai paha.
He elua mau apana aina e pili pu ana, nona ka nui o 548 anana oi aku a emi mai paha. O keia mau apana ekolu, na paa malalo o ka hoolimalima i ke kahu malama waiwai o ka aina, no umi makahiki, mai Ianuari 1, 1895, no $120 o ka makahiki. Ua oleloia, he elua o na hooilina, ua komo ku iloko o keia hoolimalima ana, a no lakou ka ekolu hapalima.
Ua lilo keia mau apana a pau ia Gaspar Sylva o Waialua no na dala he $1,600.
Apana 5 -Hookahi apana e waiho la ma Kaaipu, Manoa, nona ka nui o 2.016 o ka eka, oi aku a emi mai paha. Ua lilo ia ka hoolimalima ia Maria Afai no 10 makahiki, mai Ianuari 1, 1888, me ke $50 o ka makahiki. Lilo ia Maria Afai no ka $950.
Apana 6 -Hookahi apana aina ma Kaloiiki, Manoa, he 2.10 o ka eka, oia aku a emi mai paha. Hookahi apana malaila no 2.76 o ka eka, ma ia wahi no, he apana o 8.18 o ka eka. O keia poe aina a pau, ua paa wale no i ka hooli malima ia, no lakou ke kumuwaiwai o $415 o ka makahiki, aka, o ka hoolimalima o ka apana hope $275 o ka makahiki. O keia mau apana, ua kudala palua ia, e hookaawale ana i ke Alanui o Manoa. O ka apana e pili ana i ke alanui he $2,900 kona kumukuai, a o ka mea malalo o ke alanui he $1,100. Ua lilo kela mau apana a i elua ia James Steward.
Apana 7 -Hookahi apana ma Lualaea, Manoa, nona ka nui o na eka 7.82, oi aku a emi mai paha. Lilo ia John Ena no $1,850.
Apana 8 -Elua apana e waiho la ma Kahoiwai, Manoa, nona ua eka 1.28 oi aku a emi mai. Ua mahelehele liilii ia keia mau apana iloko o 6 apana. O kekahi apana, ua lilo ia Mrs. Kamaiopili nina ka nui o 42-100, no ke kumukuai o $270, a o kekahi apana he 86-100 eka, ia Keakealani no $600.
Apana 9 -O ka akahi hapakolu i mahele ole ia o na loaa o ka aina ma Koloalu, Manoa, nona ka nui o 4.50 eka, oi a ku a emi mai paha. Lilo ia Keakealani no $450.
O ka huina o na kumukuai a pau, ua hiki aku i ka $10,190. Mahope iho o ka uku ana i na hoolilo, e loaa no i ka wahine kanemake ka hapakolu o keia mau loaa, a o ke koena iho mawaena o na hooilina o ka mea i make, he alima ko lakou nui.
_____
PU-PU KE KAI O KE ALALAUA.
Ma ka po Poaha iho nei, oiai, e nana ana o Horaea Lewis i ka maluhia o ka aina malalo e ka oihana makai kau lio no ka po, ua ike aku la oia i kekahi kaa e holo mai ana me ke kukui ole ma kona aoao, a oiai hoi ka mahina e puka ae ana ia manawa, me kona malamalama nui.
E pa ana ka makani ia manawa me ka huihui, oiai kekahi poe e pupue ana ma ko lakou mau hale me ko lakou mau huluhulu moe kehau o ka po o Milolii, me ka auwana ole o ko lakou mau kapuai wawae io a ia nei. Aia hoi ka makani ke pa nei mawaena o na umiumi o ke kanaka kiai o ke aupuni, aka, o kona mau maka aole i upoi iho no ka nona ana i ka poe haihai kanawai.
Oiai oia e nee aku nei imua, ua ike koke iho la oia he mea keia, ua kue i na rula o ka oihana maluhia, a o ke kauoha pa iaia, e hopu aku i na mea a pau e hana ana pela, mawaho ae o Peresidena Dole, ina ia he Luna Aupuni, a i ole he kanaka kulana ole paha.
Ua kahea aku la oia i ke kalaiwa o ke kaa, e ku iho, me ke kahea ana aku i ka poe o luna o ke kaa.
Aia ihea ko oukou kukui? wahi a ke kauwa o ke aupuni, repubalika?
"Owau no o Kakela," wahi a ka haina i pane ia mai, mai na lehelehe mai o ka mea nana e kalaiwa ana i ke kaa, a o ke ano paha o kona hoopuka ana mai pela, no ka mea, he Kuhina Noho oia no Hawaii, ma ke Aloalii o Wasinetona, a he kanaka koikoi hoi iloko o ka aina, e noho ana maluna o ke ulakolako o ke dala.
A o ka hoopuka ana mai i kona inoa ponoi, he kumu paha ia e kuemi hope mai ai ke kiai mai kona hoopaa ana ma kahi paa o ke aupuni, oiai he mea weli ia ka inoa o na kanaka pela.
Aka, ma ka hoomaopopo ana o ke kiai, ua pili keia hana a ke kuhina Noho o Wasinetona (i pau) i ke kue i kona kuleana i haawi ia, nolaila, ua hului pau ae oia i na mea a pau maluna o ke kaa, no ka hale hoopaa lawehala o ke aupuni.
Ua haawi aku oia he $3.00 no ka bela ana, a ma ke kakahiaka Poalima nei i apono ai ko ke aupuni aoao, ma ke komo ana aku oia mau dala ma ka waihona o ka lehulehu.
He mea nae keia e ulu mai ai o na hana hoopilikia wale, mamuli o na manao lili o kekahi poe kuonoono o ka aina, ma o ka hoohaahaa ia ana la o ko lakou mau kalana pakahi, pela wale no ko makou manao koho wale aku, koe ka oiaio loa, na ke au no paha o ka manawa e hoike mai i ka mea oiaio, aka, o ka makou keia e hoike nei, a o ka oiaio, he mea ia na kakou e kali ai.
_____
AIA KE LAUAHUE LA I WAIALUA.
Mamuli o na hauwawa e holo hele nei a puni ka aina, ua loaa mai la ia makou ka lono ma ka Poaono nei, aia ka opiuma ke holapu la ma na aekai o ke Ehukai o Puaena, a ua koho wale ia, me he mea la, o kekahi hapa paha ia o na buke Baibala a kahi moku kuna Logana i pakakaa ai mamua aku nei malaila, a i ole, na kahi moku Henerietta no paha. Piha ka aina i ka hohono o keia kumulau hoolaha make a na haole, i lawe mai ai ia nei, e hoopukapuka ai no ke akenui i ke dala, aole he manao ia o ke ola o ka lehulehu.
Nolaila, e hoao wale no ke aupuni e panipani i na wahi nahaha o keia manowai, aole loa e paa a hiki i loa hopena.
_____
KA LUAKINI O KAUMAKAPILI
Mamuli o na lono i hoike ia mai ia makou, eia ka Papa Kahu Waiwai o Kaumakapili, ka makemake nei e hoolilo hou aku i ka luakini laa o ke Akua iloko o ka moraki o $7000, oiai no nae ka moraki mua o $3000 ke ku nei ka puu, liana ka haawe. I na he oiaio keia mau lono, alaila i dala aha keia o ka noke ana a nui i ka moraki, aole anei e hiki ke kaana pono iho ma ka mea kupono, i hiki ai i na hoahanau ke auamo i ke koikoi o keia hana a na Kahu Waiwai e makemake hou nei e hoonui hou aku i ka pilikia o na hoahanau, ma ka hookaa mau ana i na ukupanee a me ke kumupaa.
I kamailio makou i keia, no ko makou ikemaka i na aina a me na hale e pau mai nei i ke kudala ia no hookaa ole ia o ke kumupaa me ka ukupanee pu, ao o kaonakemake ana e u hai mahope o keia alahele pilikia, e hoike mai ana ia, he mea hiki wale no ka heiau o ke Akua, ke kalewa ia me he waiwai kalepa la. E akahele e na makamaka, eia iho ka aie he akua lapu.
_____
Nu Hou Kuloko
Ke pa nei ka makani me ka ikaika, ke kuehu nei ka lepo mao a maanei, a ke u-u mai i na maka, pouli kauhale.
Mai poina i na Kaaahi lawe ohua o Waianae i ka la apopo a me ka la pulo aku, he emi loa ka auhau no kela kula loa.
Ua lilo ka halekuai eanado e ku nei ma ka Alanui Hotele nona ka inoa o Palace Candy, ma ke kukala no ke kumukuai $800.
Eia i Honolulu nei o Biuteona, i Kauai aku nei oia, a ma @ Mikahala o kakahiaka onehinei i huli hoi koke mai a oia mai Kauai mai.
I ka holokaa aku nei o keona ona me peapea i heia kakahiaka nui poniponi, hewa ia la lilo no ke eo ia peapea la haule kahi kapala iuika, aohe nana he mauu hilo.
Ua mahuka aku kekahi koa o ka puali H, o na koa kiai mau, a kepa iluna o ka mokukaua Beninetona, a mahope o ka huli ia ana, ua loaa kau la ka mahuka a eia oia ke @ mai nei no ka hookolokoloia ma ke Kanawai koa.
Eia ka Boston i ke awa nei kahi i hekau ai.
O na Wafine aole i hua mai, ka hua mohaha mailoko mai o lakou. He Hoki ko lakou hoa elika ai.
Ma ka moku kalepa S.C. Allen e hoi mai ai o J.Aylett a me Kealakai, ke ku io mai hoi.
O ko makou la leleuwaki keia he hewa ia la holo ka hana.
He paina luau ke haawi ia ana o Mrs. D.McCorriston ma Waikiki. Uwese la leoe.
Ua lono iaia e, e huli hoaku ana o Prof. Musick ma ka Autralia o ka la apopo.
Hora 11 o ka la apopo o holo aku ai o Kinau, hookahi hora ka lohi mahope iho o kona manawa holo mau.
Aohe hihiona ma ka Aha Apana i kakahiaka onehinei, heaha iho la la, he hoomalolo paha, pela no hoi a e paha ka pono.
He wahi ahi hoopuoho ko ka Halepaahao o Kawa a ma.
O ka Poaono paha ka la e haalele mai ai ka Bosetona ia Honolulu nei, a holo aku no C@ina.
Ua huli hou mai ke Komisina Pukiki mai Kauai mai, ma ka Mikahala o ka la pule nei.
Ua hala aku ka mea kanu pua a laau o ke aupuni no Molokai, ma ka Mokelii o ka Poakahi nei.
Ua kuai aku o H.A. Widemanu i kona kuleana a pau iloko o ka Hui Uwea olelo Telepona ia W.G. Irwin.
Ua makemakeia na lala a pau o Ka Ahahui Hoola Lahui e akoakoa ae ma ka Home Hanau Kapiolani apopo hora 2p.m. Feb. 5, 1896.
hope aku i ka po Poaono nei. E ole nae hoi ia loaa iki ka hana a na keiki kinai ahi, he oki loa hoi ke o'i pu wale iho no iluna o na noho.
He 100 a oi ka nui o na Pake i makaukau e hoi aku no ka aina hanau, maluna o ke kalepa Velocity mahope iho o ka pau ana o ko lakou la Hapenuia.
O ka Poakahi ae nei ka la e kudala ia ai ka home noho o Klemme.
Mamuli o ka haule ana mai nei o ke kumukuai o ka raiki nolaila, ua lilo ia i mea hooku ia i ka manao o ka poe nana na wili raiki ma kela a mea keia wahi o na mokupuni, a o ka hope aku ne paha, oia ka hookipu ia oia oihana hoopomaikai o ka aina, mamuli o keia hune nui o ka aina e pahola nei. He keu no paha ke pakalaki o keia maula.
_____
KAHI WAI O ALEKOKI. (Hoohenoia e ka Moi Kalakaua.)
Aole i manaoia
Kahi wai o Alekoki
Hookohu ka ua iuka
Noho mai la i Nuuanu
Anuanu makehewa au
Ke kali ana ilaila
Kai no paha ua paa
Kou manao ia nei
Au i hoomalu ai
Hoomalu oe a malu
Ua malu keia kino
Mamuli o ko leo
Kau nui aku ka manao
Kahi wai o Kapena
Pania paa ia mai
Na mauowai o uka
Ahuwale na kiowai
Na papahele o luna
Maluna ae no au
Ma na rumi liilii
Ma na keena o waho
A waho o Mamala
Hao mai nei ehuehu
Pulu au i ka huua kai
Kai ke'ahe'a i ka ili
Hookahi no koa nui
Nana e alo ia ino
Luoino mai nei luna
I ka hao a ka makani
He makani ahailono
Lohe ka luna i Pelekane
Oia pouli nui
Mea ole i kuu manao
I o ia nei au
Ka piina o Maemae
E kilohi au o ka naui
Na pua i Maunaala
He ala onaona kou
Ke pili mai ia noi
Aole i billwi ia
Kahi pali o Keahi
Ku kilakila i ka lai
Lai hohola i ke pili
Pili paa o Kawaihoa
Hoa oe o ka inoino
O oe owau kekahi
Pau keia pilikia
_____
KA PUA HAU O MALEKA (O keia ke Mele mua a V. Kamamalu i haku ai)
Auhea wale ana oe
E ka Pua Hau e Maleka
Ke au nei ka manao
Pehea o Niagara
Kela wai kamahao
Wai halulu i ka moana
Nene i na moku
Lehe aku nei Rusia
Aohe i hope Ladana
I ka nui o Asia
Hue aku ka moana nui
Laki ka moana luiana
Ehuehu o Enelani
Ke kowa Setokia
Aiala oe e Parau
No'u o Aina Hau
A ka wai o Norewai
Pau mai kou palena
Ilaila au la oki
Lawe au la Linohau
A ai ka manu iluna
U - hoi o ka ihu ia.
NA PUA OHELOHELO.
He aloha no na pua
Na pua ohelohelo
Ohelo ai a ka manu
Na Lehua ula iluna
Nani wali no ka ikena
I ka ua nui o Hilo
Nui mai nei ke aloha
Ua like me ka wai puna
Kohia iho i paa
I pau ko makemake
O luhi oe la i ka imi
He alu la he ihona
Hakalia ka piina
I ka pali o Maulua
Elua a'u makemake
Ka nanahe o ko leo
Ka nawali o ko kino
Popo hooleilei
E niniu ka Pae opua
Poahi mai kanahele
Haele ae kaua
Oi malu mai na pali
A he la wela Makalii
O ko'u hoa no oe
O na la maikai
A kimo ae ka huhu
Kapakahi ko papale
Ku ae ka iha iluna
Kau ae o ka lae ia
Puunei puu Amaama
U - hoi o ka ihu ia.
_____
LEILEHUA SONG.
Hanohano Hilo-one e waiho nei
Kahiko i ka na Kanilehua
Kuu pua i kuia e na manu
He lei hoohihi na ka malihini
HUI:
Oia kuu home kulaiwi
Kuu aina hanau hoi a nui
A he nui no wau a he milimili
A he lei aloha na ka malihini
Uupu ae nei ko'u manao
E hoi e ike i ka aina
Haila ka halia i hiki mai ai
He aloha i o'u mau pokii
Haina ka puana o kuu lei
He aloha i o'u pokii
Kuu pua Miulana i ka umauma
Omau a paa i ka puuwai
Malama pono oe i kuu aloha
I kuleana hou a e hiki mai ai
Eia mai au pua Vahine
Ko hoa kaana o ka ehukai
Kai no ua lawa ko makemake
I ka iwaiwa o ka ua Haao
O ke kau a ke ao i Malamanui
Kahiko ka ohu i na kuahiwi
O ka leo Kahuli ka'u aloha
Leo hone o ke Anoahiahi
Me he ala e i mai ana ia'u
E hoi mana la e pili
Haina ia mai ana ka puana
I hooipoipo me ke aloha
MRS. LILY KALINO.
_____
Eia no ka mookaula ke hanu hele nei, i wahi kiaha pia.
E loaa ana he pono HAINAKA MANUAHE, i ka mea e piha ai o kela a me keia 10 poe i komo a kuai maloko o ka HALEKUAI HEIAU o na Paikiai, e ku nei ma ALANUI PAPU, Helu 519; ma ka POAONO apau o ka malama o Sepatemaba. No ka manawa KUAI HOOPOHO wale no keia.
_____
Laau @ A LOGAN, @
No na Mai K@;
No na Ma'i Hano,
Na Mai Puala
etc. etc..
He laau @ ole keia no na keiki opio a me na kanaka makua.
[@ wale ia ao e]
BENSON, SMITH & CO.,
jun 10tfd
Na Mea Kahiko Noeau o Iapana.
Ua wehe ae nei au i na mea hou iaha mua ole maanei hoi mai Iapana mai.
Na pahu iwi-ea maikai loa.
Na kahi iwi-ea iho Pane lauoho
A pela aku, kumukuai haahaa Loa.
_____
No Keahai Hanaia ai?
Maloko o kekahi mau Halekuai aole hoi he haawiia i na kanaka maoli na hookipa ana elike me ua hoa kuoi haole. He hewa loa keia. ua hooikaika loa makou e hookipa i na hoa kuai Hawaii ma na ano a pau e like me ia i hoohanaia i na haole. Oia ka mea pono. Ua like no ka maikai o kau kala. Ua kalama keia manao iwaena o na kanaka, aole hoi he loaa ia lakou na mea kuai elike me ia i na haole. Malia paha he oiaio keia. He hapakue no ka ike o kekahi poe kalepa i hana ai i keia mea. Aole o makou manao, a aole loa no hoi mamua i manao, he mea pomaikai ka hahai ana i kekahi ano hana elike me ia. Ua kaena iho makou, i ke ano o ka mau mea kuai, O keia ho kekahi o na mea koikoi loa e pili ana i ka oihana kalepa laaa laaaau, E hoopaakiki ana makou e loaa ka mea maikai i na manawa a pau, mahope mai na mea e ae.
OKA UKU ANA I KE KUMUKUAI.
I kakau ia ma ka omole a opepaha he mea mau ia no na makahiki i hala a hiki wale i ko makou komo ana mai i ke kahua kalepa. O ko makou makemake e lilo i oihana kalepa nui ka makou. Ua hiki wale no ia makou ke hooko i keia, aole ma kekahi alanui e ae, mawaho o ke kuai emi ana mamua e na halekuai e ae. O keia ka makou e hana nei. Oia ka makou mau kumukuai e kuai nei e kamoe ana mai ka 10 pa haneri a ke 30 pa haneri ka emi ike malalo o ka uu halekuai e ae. E haawi ana makou i na hoakuai dala kuike e 10 pa haneri o ka lakou mau kua ana i niki i ke 50 keneta a pii akui. He hoomakaulii nui keia. Aole makou i manao ua ike ka nui kanaka Hawaii i keia hoemi a makou, oiai aole makou i hoike akea aku i keia mea mamua ma ka olelo Hawaii.
MA HAAWINA LAAU LAPAAU
E ma'i ana i kekahi manawa! A e hele ana hoi i ke Kauka. E haawi mai mai ana ke Kauka i kekahi palapala o ke ano o na laau. E lawe mai i ua palapala 'la ia makou e hoopiha aku. E pomaikai ana oe a e kuhikuhi aku ana makou ia oe i ko kumu. Ma na kulanakauhale e ae he hana maa mau ka haawi ana i ke kauka i kekahi uku komisina. He maa oiaio, o oe ana ka mea nana e uku keia uku kaulele. Aole o makou ae e uku i kekahi kauka i kiea uku kaulele. E kaki ana makou i ka uku kupono, e hoohala ana i na laau lapaau maikai loa, i hoomakaukau ia e ka poe akamai loa i ka hana ana i na laau lapaau,. He mea ole ke Kauka a oukou i hele ai, e lawe ma i ka palapala o ka laau ia makou, a na makou e hana aku, Ina e hoopaakiki mai ana e hele oe i kekahi halekuai laau e ae e hilinai iho o keia kekahi o ma "Kauke, uku pa haneri" a e uku kaulele hou iho ana oe he 50 keneta, a pela aku.
Ua ao aku la makou ia oe. E kuohana ma ia ao ana. no kou pomaikai ia mau hoaka ana, a no @ kou pu iho hoi.
HUI KUAI LAAU LAPAAU HOBRON.
KA HUI HANA LAAU HOEMI.
KUMUKUAI.
dec@tfd.