Ka Oiaio, Volume I, Number 38, 24 February 1896 — Page 2
| This text was transcribed by: | Kahikina De Silva |
| This work is dedicated to: | Awaiaulu |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA.
JOHN E. BUSH, Luna Hooponopono a me Puuku
HONOLULU. FEBERUARI 24, 1896.
KE KOPAA.
E like me na hiohiona o ke kulana o ka makeke, pela i hoea mai ai ka nuhou, ua pii ae ke kumukuai o ke kopaa, a ka $80 o ke tona, a e pii hou aku ana no. Ma keia e pomaikai ana na mahiko, oia hoi, e pii ana ko lakou loaa, a e oia mau ana no hoi ko na lima hana. Ua puhi ia hoi na mahiko a pau o Cuba, a ua emi iho ka mahiko (beet,) uwala pake, na kumu nui o keia pii ana.
NA MOKUKAUA HOU.
Ua hoolala iho ke aupuni e hoolilo he $47,000,000 no na mokukaua hou o Enelani. No keia mau dala, e kukuluia ana he eha mau mokukaua i kukuluia me na palehao, he eha mau mokukaua holo o ka papa helu ekahi, eono papa helu elua; a he 26 mau moku luku i na topedo, nona ka holo he 33 mile o ka hora. A o na mokukaua palehao, e kukuluia e like me ko ke Renown ano, i hooloihi a hooakea iki ia ae. He 4 mau pu kuniahi nunui, 10 iniha ke anawaena o ka waha, he 29 tona kaumaha; he umi pu kuniahi ki-kupinai, o eono iniha; he ewalu, a me umikumamalua, mau pu kuniahi, ki-kupinai, malalo mai. He nui kona mau ohe kitopedo, a he 18 mile kona holo o ka hora. O keia iho la ke ana weliweli o na mokukau ahou o Enelani no keia makahiki ae.
NA KUMU E ALOHA IA AI.
Ina kakou e makemake e aloha ia, e hoomanao ia me na manao oluolu, e hoohalike kakou e like me kiea ano.
1. Mai imi hala.
2. Mai kue wale aku.
3. Mai nieniele wale i ko hai aku.
4. Mai hoohaahaa wale i ka hai no kou nele ana.
5. Mai manao ua oi aku ka hauoli o ko hai naau i kou
6. Mai hoolohe i na olelo hoino.
7. Mai lawe hele i na olelo io a ianei.
8. Mai kapulu ia oe iho.
9. Mai pakike a hoohaahaa i ka mea malalo iho ou ma ak noho ana.
10. Mai hooi wale a hooemi hoi i kou kahiko ana.
11. Mai hoopaakiki i kou mea e kamailio ai ke ole oe i maopopo pono i kau mea e kamailio ai.
12. Mai hoino wale aku i ko hai hoomana ana.
13. Mai poina i na wa a pau o ka oluolu, ke akahai, a me ka hoohaahaa, oia ke ana o ke keonimana a me Karistiano.
KELA ME KEIA.
Ua emi ka luapele o Kilauea a aneane e nalowale io Milu la.
Ke kuemi hope nei ka hoohui-aina ma Hawaii nei, a pela no ma Amerika.
Ua hiki mai o Theo. H. Davies me kana mau keikikane; Fred, Harrison, a me C.F. Horner.
He paina aina awakea Farani ko ka Hotele Hawaii i ke ahiahi Poaono nei.
Ke pii mau nei ka aie lahui, ua hiki aku i ka ekolu miliona a me ehiku haneri tausani.
Apopo ku mai ka Malulani i o kakou nei, a nana e hoike mai na mea hou o Hawaii a me Maui.
Eia i Honolulu nei ke keiki lalawai o Waikapu W.H. Cornwell, a me ka ona o Lahaina, P. Isenberg me ke ola kino maikai.
Ua hoike ae o Hope Ilamuku Hitchcock, e hoopauia no na makai e uku ole ana i ko lakou auhau, i ka wa kupono.
E hiki mai ana o J.D. Hayne me kana buke ma ka mokumahu mua e hiki mai ana mai Kapalakiko mai.
Ua loli ka wa holo o ka mokuahi Mikahala, malia o holo i keia la, a i ole apopo paha, e makaala e pono ai.
Ua lele ae o Porofesa Price ma kona baluna, ma Ewa, a hoi hou iho i ka honua me ka poino ole, ma ke ahiahi Poaono nei.
I ka hora 12 o ka Poaono nei, i haawi ae ai ka mokukaua Bennington i na kipu ana no ka hoomanao ana i ka la hanau o Wasinetona.
O Harry Evans, oia aku ana ka makai o ke awa, a o Kapena Hilbus, oia aku ana ke Kapena o Eleu ma keia hope aku, e hoomaka ana i ka la 1 o Maraki.
O na mea kakau nupepa i ike ia ma Ewa i ka Poaono nei, oia ka Lunahooponopono o ke Aloha Aina, ka mea kakau o ka Bulatina, a me ka ka Leo a me ka Oiaio.
Ua koho ia he eiwa haneri ka nui o ka poe i hiki kino ae ma Ewa, no ka nana ana i ka baluna a ina oia ka huina oiaio, ke hui ia na makua me na keiki, alaila, ua loaa na dala he $622.50; nui kela!
Ua nui ka hoohalahala o kekahi poe hookaa auhau i ke Kauka o ka Papa Ola o keia wa, no ka nana pono ole i ka ma'i o ka poe i loohia i ka pilikia nolaila, e pono ka Papa Ola e nana i keia pilikia.
Ma ka hoike a ka nupepa Avataisa, ua hoikeia o ka hapanui o na olelo hoahewa ma ka hoike a Mr. Blount, no ke aupuni Moi, no ka opiuma no ia. Aka, eia iho kekahi Bila e laikini ana ia mea, e like me ka mea i ahewaia ai ka Moiwahine.
A ka Poakolu puehu aku ka Australia no ka Ipuka Gula, a e hiu pu aku ana oia i na tona kopaa a me na ahui Maia, no @@@ o Kapalakiko.
I ke kakahiaka la Kapule nei, ua hoihoi hou aku la kekahi wahine i kana i-a i ka Makeke i ka mea nana ka i-a, oia hoi ka Pake, o ke kumu ua palahe ka i a, e makaala e na kiai o ke aupuni i neia ano hana.
L.B. KERR,
ma
NAE O KA HALEKUAI O MOGAN.
Alanui Moiwahine : : : : Honolulu H,I.
KE KALEPA POLOLEI MAI NA HALE HANA
MAI.
E kuai ana i kekahi mea okoa a e kuai ai ma ka i-a ma ke kumukuai kukaa.
He kupono i na lede e hele mai e nana mua maanei i ko makou puu waiwai nui mamua o ke kuai ana aku i kahi e aku.
O KA HOOKAHI DALA I KUAI IA MA KAHI
O L. B. KERR UA LIKE IA ME ELUA
MA NA HALEKUAI E AE.
OIA HOI, UA LOAA IA OE NA LOLE
nona ke kumukuai Elua Dala HOOKAHI DALA WALE NO.
NA PAPALE,
Na Lipina
Na Pua Paple
Na Hulu
Na Lihilihi.
Na Mikinilima
Na Lole
Na Paku
Na Keokeo Uhi-moe
Na Kihei Huluhulu
ECT ECT.
L. B. Kerr,
ALANUI MOIWAHINE.
Waikiki iho o ka Hale Kudala o Mogan.