Ka Oiaio, Volume I, Number 44, 3 March 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

KA PUKA LA OIAIO

Hoopukaia i na la a pau koe ka la Sabati a me Lapule no 30 keneta o ka mahina.

BUKE I.         HONOLULU, MARAKI 3, 1896.    HELU. 44

 

OIAIO PUKA LA

-NA-

Keehina io Karisto La.

 

HAKUIA E MRS. E. G. WHITE.

 

KA MIHI.

(Hoomau ia).

            Ua hai aku oia i kona hewa, no ka mea, ua weliweli loa ia oia i ka hoahewa ia ana a me ka maka'u loa i ka hookolokolo ia.  Ua piha loa oia i ka maka'u no ka hope o kana mau hana, aole nae he kaumaha hohonu e kaumaha ai kona naau, @o kona kumakaia ana i ke Keiki kina ole a ke Akua, a me kona hoole ana i ka mea Hemolele o ka Iseraela.  I ka wa o Parao i pilikia ai no ko ke Akua hoopai ana, ua ae aku la ia i kona hewa, i mea e pakele ai o ia mai ka hoopai hou ia ana, aka, hoi hou no oia i ka Lani i kona aa ana i ka wa i pau ai ka ma'i ahulau.  Ua kaniuhu lakou a pau no ka hopena o ka hewa, aole i kaumaha no ka hewa.

            Aka, aia a ae aku ka naau i ke koi ana o ka Uhane a ke Akua, alaila eueu ae ka lunaikehala a ike ka lawahala i kahi o ka hohonu a me ka ihiihi, a me ka nani o ke kanawai hemolele a ke Akua, ke kumu o kona aupuni ma ka lani a me ka honua.  "O ka malamalama io ia, ka mea nana e hoomalamalama na kanaka a pau e hele mai ana i ke ao nei."  Ioane 1:9.  Oia ke hoomalamalama i na keehina huna o ka Uhane, a ua hoikeia na mea huna o ka pouli.  Komo ka walania ma ka uhane a me ka naau o kanaka.  Ua ike ka lawehala i ka pono o Iehova, a ua ikeia ka, he weliweli ke hele aku imua o ke alo o ka Mea i ike ia loko o ka naau, me kona hewa a haumia.  Ike iho la oia i ke aloha o ke Akua, ka nani o kona hemolele, ka hauoli; o ka naau maemae; iini oia e hoomaemaeia, a e hoihoi puia aku oia ma ka Lani.

            Ke hoike nei ka pule a Davida mahope o ko@a haule ana i ke ano maoli o ka mihi no ka hewa.  He oiaio a hohonu kona mihi ana.  Aole oia i hooikaika e pale aku i kona hewa, aole komo mai ka makemake e pakele mai ka hoopai pono o kona hewa iloko o kana pule.  Ua ike o Davida i ka nui o kona hewa, ua ike oia i ka paumaele o kona naau, ua hoowahawaha oia i kona hewa.  Aole no ke kala ia ana mai o kana pule, aka, no ka maemae o ka naau.  Ua iini oia no ka olioli o ka hemolele, i hoihoiia oia i ka lokahi a me ka launa  pu aua me ke Akua.  O keia ka olelo a kona uhane: -

            "Pomaikai ka mea i kalaia kona hala, I uhi ia kona hewa.

            Iloko hoi o kona uhane aole he hookamani."

            Pomaikai ke kanaka maluna ona ka hooili ole ia o ka hewa o Iehova.  Iloko hoi o kona Uhane aole hookamani."

            "E aloha mai oe ia'u e ke Akua, e like me kou lokomaikai;

            Mamuli o ka nui loa O ko'u aloha e hoopau ia ai ko'u mau hala.

            E holoi lea mai ia'u i pau kuu hewa;

            No ka mea ke hoike aku nei au i ko'u mau hala.

            Mau no hoi ko'u hewa imua o kou alo

            O oe, oe wale no ka'u i lawehala ai,

            A i hana hewa hoi imua o kou mau maka

            I pono ai oe i kau olelo ana,

            I hemolele hoi i kuu hoahewa ana mai

            Eia hoi, makemake oe i oiaio ko loko

            A maloko o na wahi nalo e hoikeike mai ai oe ia'u i ka naauao.

            E huikala mai oe ia'u me ka huasopa a e maemae no wau.

            E holoi mai ia'u, a e oi aku kuu keokeo i ko ka hau.

            E haawi mai e lohe au i ka hauoli a me ka olioli;

            I hauoli hoi na iwi au i uhaki mai ai.

            E huna oe i kou maka i ko'u mau lawehala ana,

            A e hoopau i ko'u mau hewa a pau.

            E haawi mai i naau maemae no'u e ke Akua;

            E hana hou mai hoi i uhane kupono iloko o'u.

            Mai kiola ae oe ia'u mai kou alo ae;

            Aole hoi e lawe aku i ko'u Uhane Hemolele mai o'u aku nei.

            E hoihoi mai ia'u i ka hauoli no kou ola;

            A e kokua mai ia'u me kou uhane lokomaikai.

            Alaila, e ao aku au i na lawehala i kou mau aoao;

            A e hoohuli ia na kanaka hewa ia oe.

            E hoopakele ae ia'u i na koko e ke Akua, e ko'u Akua e ola ai;

            A e himeni leo nui aku au i kou pono."

Halelu 32.1,2; 51:1-14.

            O ka mihi like me keia, ua oi aku mamua o ko kakou mana e hooko aku, ua loaa no mai a Karisto mai, ka mea i pii ae maluna, a ua haawi mai i kana makana i ka lahuikanaka.

            Ma keia wahi no e kuhihewa ai na mea he nui, a nolaila aole o lakou i loaa i ke kokua a Karisto i makemake ai e haawi ia lakou.  Ke manao nei lakou aole hiki ia lakou e hele io Karisto la ina aole mihi mamua, a ua hoomakaukau ka mihi i ala no ke kalaia ana mai.  He oiaio no, o ka mihi ka mua a mahope mai ke kalaia'na; no ka mea o ka naau pepe a me ka naau haahaa wale no i ike i ka pono o ka Hoola.  Aka, he pono anei ke kali ka lawehala a mihi, mamua o kona hiki ana ke hele io Iesu la?  Ua kau pale ia anei ka mihi mawaena o ka lawehala a me ka Hoola?

            Aole i ao mai ka Baibala he pono ke mihi mamua o kona hoolohe ana i ka leo kahea o Karisto, "E hele mai oukou a pau loa io'u nei, e ka poe luhi a me ka poe kaumaha, na'u oukou e hoomaha aku."  Mataio 11:28.  O ka mana e puka ana mai a Karisto mai ka i alakai i ka mihi maoli.  Ua hoike maopopo mai o Petero i kana olelo i na kanaka o ka Iseraela, i kona i ana'e, "Oia ka ke Akua i hookiekie ae ma kona lima akau, i Alii, i Ola hoi, e haawi mai i ka Iseraela, i ka mihi, a me ke kala ana i ka hala."  Oihana 5:31.  Ina aole ka Uhane o Karisto e kokua mai ia kakou, aole no e hiki ia kakou ke mihi, aole no hoi e kalaia mai ko ole o Karisto.

            O Karisto ke kumu o kela me keia makemake pono.  Oia wale no kai hiki ke kanu iloko o ka naau i ka inaina i ka hewa.  O kela me keia iini ana no ka oiaio a me ka maemae, o kela me keia hoomaopopo ana i ko lakou a@ hewa, ua hoike mai i ko ka Uhane hana iloko o ko kakou mau naau.

            Ua olelo mai o Iesu, "Ina e kaulia au iluna, mai ka honua aku, e kauo auanei au i na kanaka a pau i'ou nei."  Ioane 12:32.  He pono ke hoikeia o Karisto i ka lawehala oia ka Hoola e make ana no na hala o ke ao nei; a i ko kakou ike ana i ke Keikihipa a ke Akua ma ke kea o Kalivari, hoomaka ka mea huna o ka hoolaia'na e hoikeia i ko kakou mau uhane, a alakai aku ka lokomaikai o ke Akua i ka mihi.   Aole i pau.