Ka Oiaio, Volume I, Number 48, 9 March 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

BUKE I. Honolulu, Maraki 9, 1896.  HELU 48

 

OIAIO PUKA LA

NA

Keehina io Karisto La.

HAKUIA E MRS. E. G. WHITE.

KA MIHI.

 

            He oiaio no ua hilahila kanaka i kekahi manawa i ko lakou mau aoao hewa, mamua o ko lakou i ke ana, ua kano ia no Karisto la.  Aka, i ko lakou hooikaika ana e huli mai i ka pono, o ka mana a Karisto ka i huki ia lakou.  He mana i ike ole ia e lakou, oia ke hana nei me kauhane, ua hoalaia ka lunaikehala, a ua hoomaikai ia ko waho.  Aia a kauo o Karisto ia lakou e nana i kona kea, e ike i ka mea a ko lakou hewa i hou aku ai, na hoopiliia ke kanawai i ko lakou lunaikehala.  Ua koikeia ia lakou ka hewa o ko lakou noho ana, ka ino hohonu o ka uhane.  Hoomaka lakou e ike i kekahi o ko Karisto pono, a hooho ae, “Heaha la ka hewa, e lilo ai ka mohai e like me ia, i mea e hoolapanai i ka mea hewa?  Ua pono anei ke haawiia keia aloha a pau, keia ehaeha a pau, keia hoohaahaaia’na a pau, i ole kakou e make, aka, e loaa ke ola mau loa?”

 

            E pale aku ana paha ka lawehala i keia aloha, e hoole paha ia e kauoia e Karisto; ina nae aole ona kue aku, e kauoia no ia io Iesu la; e alakai ana i ka ike i ka mea e ola ai a ke kumu o ke kea me ka mihi no kona mau hewa, na mea i ehaeha ai ko ke Akua Keiki aloha nui ia.

 

            O ka manao ano Akua hookahi e hoohana ana maluoa o na mea a pau, oia no ke kamailio nei i ka maau o kanaka, a e hookomo ana i na iini hiki ole ke haiia aku, no na mea i loaa ole ia lakou.  Aole i moana lakou ma na mea o keia ao.  Ke koi mai nei ka Uhane o ke Akua e imi i na mea wale no e loaa’i ka malu a me ka mana, ka lokomaikai a Karisto, ka olioli o ka hemolele.  Ma na mana i ike ia a i ike ole ia, ke hana mau nei ko kakou Hoola e hoopili mai i na manao o ke kanaka mai na lealea hoona ole o ka hewa, i lilo no lakou na pomaikai pau ole.  I keia mau uhane a pau, na mea e imi wale ana e @ mai na kiowai naha o ke ao nei, ua hoounaia mai ka olelo mai ke Akua mai, “O ka mea makewai la, e hele mai ia.  A o ka mea makemake, e lawe wale ia i ka wai o ke ola.”  Hoikeana 22:17.

 

            O oukou, na mea e iini nei no kekahi mea i oi aku mamua o na mea e hiki ai i keia ao e haawi mai, ua hoomaopopo i keia iiui ana, he leo mai ke Akua mai i ko oukou mau uhane.

 

            E noi aku ia ia e haawi mai ia oukou i ka mihi, e hoike mai ia oukou i kona aloha palena ole iloko o kona hemolele kina ole.  Ma ke ola ana o ka Hoola ua hoike maopopo lea ia ko ke Akua aloha i ke kanaka, oia hoi kona hooko ana i ke kanawai O ke aloha o ka haawi pau ia ia iho, oia ke ola o kona uhane.  E like me ko kakou i e ana ia ia, e like me ka pa ana mai o ka malamalama mai ko kakou Hoola mai pela e ike ai kakou i ka hewa o ko kakou mau naau.

 

            Ua hoapono mai paha kakou ia kakou iho, no ka pololei o ko kakou noho ana, no ka maikai o ko kakou ano ma ka naau, a ke manao nei paha aole waiwai o ka hoohaahaa ana i ka naau imua o ke Akua e like me ka lawehala maoli; aka nae ke pa mai ka malamalama mai a Karisto mai iloko o ko kakou mau naau, e ike auanei kakou i ko kakou paumaele; e ike no kakou i ke ano aloha ole o ka makemake, ka iuaiua i ke Akua, ka mea i hoopaumaele i kela a me keia hana o ko kakou ola.  Alaila e ike kakou, o ko kakou pono ua like me na welu paumaele, a o ke koko wale no o Karisto kai hiki ke hoomaemae ia kakou mai ka paumaele o ka hewa, a hoohanau hou i ko kakou mau naau iloko o kona ano ponoi.

 

            Hookahi kukuna o ka nani o ke Akua hookahi wahi olino mai ka maemae o Karisto, oia ke hoike mai me ke akaka lea i kela a me keia kiko o ka pelapela, a hoike lea mai i ka inoino a me na kina iloko o ke ano o ke kanaka.  Ke hoike mai nei ia i ka makemake hemolele ole, ke ano ai’a o ka naau, ka pelapela o na lehelehe.  Ua hoikeia na hana kipi o ka lawehala i kona hoonoa ana i ke kanawai o ke Akua, a ua hoehaehaia a hoopilikia’a kona uhane malalo o ka mana o ka Uhane o ke Akua.  Ua hoowahawaha oia ia ia iho i kona nana ana i ke ano maemae me ke kina ole o ke ano o Karisto. 

 

            I ka ike ana o Daniela, ke kauia, i ka nani e hoopuni ana i elele mai ka lani mai, ua pauhia oia no kona nawaliwali a me kona kina iho.  I kona hoike ana mai ia mea kupaianaha, i mai la ia, “no ka mea, ua lilo ko’u helehelena me he keokeo make la, aole ikaika i koe iloko o’u.”  Dan. 10:8.  O ka uhane, i paia e like me ia, e inaina no ia i kona alunu a e hoopailua i kona aloha ia ia iho, a e imi, ma ka pono o Karisto, i ka maemae o ka naau i ku like me ke kanawai o ke Akua a me ke ano maoli o Karisto.  Ke olelo mai nei o Paulo, “ma ka pono o ke kanawai,” – oia hoi ma na hana o waho – “aole o’u hala;” Pilipi 3:6.  Aia nae a ike’a ke ano uhane o ke kanawai, ua ike oia ia ia iho he lawehala.  Ina i hookolokoloia ma ke kanawai e like me ko ke kanaka nana ana mawaho, aole oia i hewa; aka i kona ike ana i ke ano hohonu o ke kanawai hemolele a me kona ao ana, a ike ia ia iho e like me ka ke Akua nana ana ia ia, kulou iho la ia me ka haahaa a ae aku i kona hewa.  Ke i mai nei oia, “Ola no au mamua me ke kanawai ole, a hiki mai ke kauoha, ala ae la kahewa, a make iho la au.”  Rom. 7:9.  I kona ike ana i ke kanawai mamuli o ka uhane, ike’a ae la ka hewa ma kona ano ino Ioa, a ua pau kona hoomaikai ana ia ia iho.

 

            Aole i like ka nui o na hewa ma ko ke Akua nana ana; he oi aku kekahi mau hewa, a he emi mai kekahi ma kona noonoo ana, e like no me ka noonoo o kauaka; aka nae ina no he liilii ka hewa ma ua maka o kanaka, aole hewa liilii ma ka maka o ke Akua.  He kapakahi ka hooholo ana o kanaka, aole he pololei loa; aka ua nana mai ke Akua i ke ano maoli o na mea a pau.  Ua hoowahawaha ke kanaka ona, a ua oleloia, e hookaawale kona hewa ia ia iho mai ka lani mai; oiai aole i papa pinepine ia ka hookano, ka alunu, ke kuko i ka hai.  He mau hewa hoonaukiuki loa ia mau mea i ke Akua; no ka mea @ kue i ke aho lokomaikai o ke Akua, kue i ke aloha alunu ole, ka mea e puni ana i na ao hewa ole o ka lani.  E ike ana paha ka mea haule iloko o na hewa io o kahaumia i kona haumia a me kona waiwai ma ka lokomaikai o Karisto; aka, @ ike ka haaheo i kona pilikia, a nolaila ua pani akua oia i ka ipuka o kona @ ia Karisto a me na pomaikai palena ole ana i hele mai ai e haawi mai.

 

            Aole i pau.