Ka Oiaio, Volume I, Number 50, 11 March 1896 — Page 2
| This text was transcribed by: | Ululani Victor |
| This work is dedicated to: | Ke Alii Pauahi |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA
JOHN E. BUSH, Luna Hooponopono ame Puuku
HONOLULU. MARAKI 11, 1896.
MR. ROMIG MA KA MIHI.
Iloko o ka nui o na hana lealea a me na hui e ae o ka po Poalua nei, ua nui no ka poe i hele ae e lohe i ka haiolelo a Mr. Romig ma ke kumu olelo ka "mihi ana." Ua hoike mai ka haiolelo i ke ano o ka mihi, oia no, ke kaumaha akua, ka wehewehe ana i na hana hewa i hana ia, ka loli ana o na hana, a me ka hooponopono ana i na mea hewa i hana ia, hoihoi ana aku i na dala i loaa ma ke ano ku ole i ka pono. Ina e mihi oiaio ana i kekahi poe e hoomaikai hou ana oia i ka hewa ana i hana ai e like me ka hiki iaia, ina ua lawe oia i kekahi dala me ka pono ole, e hoihoi hou oia me ka ukupanee pu, ina ua olelo oia i kekahi olelo e hoino ana i kekahi mea he pono oia e mihi koke i ka mea ana i hana hewa ai a e noi aku e kalaia mai. Ina, wahi ana ua mihi oiaio kekahi mea, e aloha ana oia i kona hoalauna e like me kona aloha iaia iho, a e haawi ana oia i kona manawa a me kana loaa no ke kokua ana i kekahi mea okoa aku. Ke poe hoahanau no kekahi ekalesia e puliki ana i ka lakou dala gula a uwe ae hoi ka a ko-kii e kau ana malama o ke dala; e lilo ana ia poe he diabolo mamua o ka huihui ana o ko lakou wawae.
He Kahunapule pahu oolea keia ma kana hoike ana i ke ano o ka euanelio, e hooko ana i ka mea a ka Buke Nui i olelo ai, he like me ka pahi oilua ka olelo a ke Akua. He oiaio, o kona ano no ia, a o ke kanaka e hai ana i ka oiaio, aole oia e wae ana i ka olelo a ma na huaolelo kuhinia e pahee ai a e hoonanea ai, a e hoomaneoneo ai i ka pepeiao. Aole pela o Karisto i ao ai; aole no pela na apokolo, a me na haumana mahope mai; i keia au wale no e ikea nei ka opa ia o ka waha o ke kauwa a Karisto a e puu ai kona leo a hanapilo, i ka h@ ana no Karisto, a no Karisto i kau ia ma ke K@o kanaka aloha ole.
HE HEWA ANEI KO IESU KARISTO? AOLE LOA!
Helu. 2.
Ma ka Helu mua, ua hoike aku la i ko'u manao pane, a me na hoakaka ana e kakoo ana mamuli oia manao pane. Aole maloko mai o ka ike a me ke akamai o ke kanaka ko'u hoole ana i ka hewa ole o Iesu Karisto ma na ano a pau; aka, no loko mai no o ka ke Akua olelo, ka Palapala Hemolele; ka mea no hoi a ke hoa o ka H. K. N. i hoonoho mua ai i kahua no kana hoakaka pili Hoomana e olelo ana penei:
"Maluna o ka olelo mana a ke Akua ka Palapala Hemolele, oia wale no, a oia hookahi ke kahua paa o ka Hoomana Karistiano Naauao." (E nana. Mok. 1 Helu 2, Jan. 1896.) o ka OIAIO PUKA LA.
Ua maikai keia kalele ana iho o ke hoa iluna o ka Palapala Hemolele, ka hoike oiaio loa mai ke Akua mai, ka Pukuiakua hoi. Aka, he wahi hoohuoi nae hoi ka'u i ka hoike ana ae nei o ka hoa i ke akea. "He kanaka hewa ka o Iesu," kekahi hoa hoi o ka Pukuiakua Nui mau loa. A ua maopopo he kanaka ia."
Aole au i ike i kekahi mau puana olelo oia ano maloko o ka Palapala Hemolele: Eia ku'u mea i ike malaila, "He kanaka eha, a ua ike hoi oia i ka popilikia; a ua hoowahawaha ia, hahauia, houia, paopaoia, a pela aku." Isaia 53:3,9. 49:7. Mat. 26:67. 27:30; a pela aku.
Nolaila, ua manao iho la au, no loko mai o ka ike a me ke akamai o kanaka kela manao e olelo ana, "He kanaka hewa o Iesu Karisto ke Keiki a ke Akua. Anoai nae paha, he moowini ko'u wahi ike Baibala, a he huelo loa hoi ko kela poe kaulana i ka naauao o Europa, oia hoi kela poe no lakou na inoa i hoikeia ma Helu 18, i kapaia aku e ke hoa o ka H. K. N., "he poe ike moowini." (E nana helu 19)
Aole o'u hilahila ke kapaia mai au e ke hoa o ka H. K. N., "he wahi kanaka ike moowini." Aka, me ka manao oluolu wale no au e hapai nei i ke kamailio ana ma ko Iesu aoao, no ka hooia mau ana aku i kona hewa ole ma na ano a pau. (Aole i pau).
KELA ME KEIA.
Olai ma Hawaii.
Ua haalele o D. Nape i ke kumukula no ke Puhi Ohe.
Ua pepehiia o Mr. Noorie, Luna Hooponopono o ke Kuokoa.
Ua mare ia o Mr. O. P. Emerson ia Miss Eugenie Homer.
"Ko kakou Anela Kiai" ke poo-olelo a Mr. Romig o keia po.
Ke hele ino nei na mea a pau e kuai i kahi o Mr. Kerr, no ke koho i ka Piano makana ke kumu.
Ua hooholo ka Aha Kiekie o Mr. Holstein ka moho o ka Senate ma kahi o Notley o Hamakua.
Nui hewahewa na hoolilo o ke aupuni no kona hookele ia ana. Aia la i hea ka hopena.
Ua hooholo ka Aha Senate e ike aku i ka poe kipi ma Cuba. He mau olelo hoehaeha kekahi i ke aupuni Sepania.
Ua pau ka moolelo a ka haku Moolelo Hoomana Karisitiano Naauao, aole no ka nele, aka, no ka lilo ana i kekahi hana e aku.
Ua hoahewaia o Kuhina Noho Bayard ma Beritania. Nui na rula o keia aupuni e pili ana i ka hana a kona mau luna aupuni.
I keia Poaono ae e hoike ai o Mr. D. P. Birnie o Kaukeano, i ka moo-olelo no ka Aina Hemolele ma ka Y. M. C. A. i ka Poaono ae nei.
He 360 ka helu kikipu a ka puali koa o Hilo, i ka 421, a Compene B o Honolulu nei, ma ka laua kikipu, hookuku. Ua haule o Hilo.
Ua ku mai ka mokumahu Miowera i ka ponei, ewalu la holo mai Vanekouva mai. Ua hala aku hoi oia no na Panalaau o ka Hema i ke kakahiaka nei.
He 3000 ka nui o na Areminia i lukuia ona Arabkir Ke hopohopo la na kanaka o ke kulanakauhale o Siva a me Cesarea i ko lakou lukuia. He luku lili hoomana keia.
L. B. KERR,
ma
NAE O KA HALEKUAI O MOGAN.
Alanui Moiwahine, Honolulu H., I.
KE KALEPA POLOLEI MAI NA HALE HANA MAI.
E kuai ana i kekahi mea okoa a e kuai ai ma ka i-a ma ke kumukuai kukaa.
He kupono i na lede e hele mai e nana mua maanei i ko makou puu waiwai nui mamua o ke kuai ana aku i kahi e aku.
O KA HOOKAHI DALA I KUAI IA MA KAHI O L. B. KERR UA LIKE IA ME ELUA MA NA HALEKUAI E AE.
OIA HOI, UA LOAA IA OE NA LOLE nona ke kumukuai Elua Dala HOOKAHI DALA WALE O
NA PAPALE,
Na Lipine
Na Pua Papale
Na Hulu
Na Lihilihi
Na Mikinilima
Na Lole
Na Paku
Na Keokeo Uhi-moe
Na Kihei Huluhulu
ECT ECT.
L. B. Kerr,
ALANUI MOIWAHINE,
Waikiki iho a ka Hale Kudala o Mogan