Ka Oiaio, Volume I, Number 52, 13 March 1896 — Page 2
| This text was transcribed by: | Lovey Slater |
| This work is dedicated to: | Edward Manuel Bettencourt |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA
JOHN E. BUSH, Luna Hooponopono ane Puuka
HONOLULU, MARKI 13, 1896
KA AUSETERALIA
I keia Poakahi ae e ku mai ai ka Auseteralia, a malia paha ma ona la kakou e ike ai i na nuhou, ano e e hiki mai ai i haupu mua ole ia. He wa hoohauli noho ana keia, a nolaila, e noho kiai a makaala loa kakou.
EIA KE HANA NEI
Eia na loea o ka aina ke hana nei i na kanawai e like me ko lakou makemake me ke keakea ole ia akuu. Ke hana nei na malihini e like me ke kuko o ko lakou naau; ke ai nei a ke hoonau nei, a ke mare a ke haawi nei no ka mare. Pela na moolelo o na aupuni i haule aku a i ike hoomanaoia ma ka moolelo. He hopena ko na mea a pau o ke ao nei, aka, o ka pono o Iehova ka mea mau loa. Ma ka hoino o Karisto i koho ai o Mose, a haalele aku hoi i ka nani o Aigupika. Pomaikai ke kanaka i like me Mose, ke kanaka naau haahaa, mahope iho o ka pau ana o kona mau kuhihewa. He nui ka poe e kahea ia ana, he uuku nae e hemo mai ana e like me Mose e ku hoike akea ana no ka Haku, a auamo hoi i na hoohenehene ia nona. Aka, he la ko na mea a pau.
HE ALII AI-PAKIKO
Ma na ano a pau he alii-aipakiko a noho na akahai loa ka moi Humebata o Italia. Wahi a kekahi mea kakau e kakau ana no kekahi uupepa, he ai akahai loa oia ma na mea a pau, koe aku ke puhi paka. He uuku loa ke ai mai, a aole hoi ona inu, koe ka wai. E hoolako ana oia i ka waina a me na mea inu o na ano a pau i kana poe malihini, nona iho nae, ua lawa oia i ka wai huiui. He kika kana mea hiaai i na la mamua, aka, mamuli o kona puhi nui, ua lilo hoi ia mea he kumu ma’i nona, a ua naka a haalulu mai na aa; loaa hoi i ka hano, a hiamoe maikai ole, aia a paepaeia me na uluna alaila hiki ke hiamoe. He mau pule i hala aku, i ka wa a keia mea e kakau ana, ua olelo aku la kona kauka iaia i ke kumu o kona pilikia, a i ae la ka moi Humebata penei: “Mai keia la aku aole au e puhi hou ana i kekahi kika a i kekahi paka paha.” O ka hopena o keia, ua pii koke ae la kona ola kino maikai. He kanaka manao paakiki keia, a aole no paha he kanalua no kona hooko ana i kana olelo paa a hiki i kona hopena.
Ua ike aku nei ke aupuni o Amerika ia Cuban, aole hoi i ike o Beritania Nui a me Farani ma ke kana kuloko ana.
KELA ME KEIA
Auwe, pulu oe i ka ua lihauanu e!
Aole e holo ana o Kaena a ka Poakahi.
Ke holoi ia nei ka ma’i a me na ea ino e ka ua.
I keia mahina e ku mai ai ka Monowai i o kakou nei.
Aole e holo ana ka Alden Besse a ke kakaiaka Poaono.
Ma ka auina la onehinei i ku mai ai o Kaala, me ka piha kopaa.
Eia ka moku kuna Mascot Indians mawaho ae nei o ke awa kahi i holoholo ai.
Akahi no a hoomaemae houia ke kulanakauhale e ka ua, no keia mau manawa loihi.
Ua hoohiki ae nei o Thomas E. Evan, malalo o ke aupuni Repubalika.
He paikau ka ke compene D G a me Hi keia ahiahi ma ke Kuea.
Ua ikeia ae o Paulo Numana ma ke alanui i keia mau la.
Ua huli hoi mai ka Ilamuku Brown, ma ka Mikahala o ke kakahiaka onehinei.
Ua hala aku ka Puali Keaka ma ka mokuahi Chiyoda Maru o ke ahiahi nei.
Ma ka S. S. Miowera i loaa hou mai ai kekahi mau waiwai hu loa, a L. B. Kerr; e laa ka Valenciennes lacces, pela aku.
Oiai kakou e hele holoholo ana, e kipa ae kakou ma kahi o Hopp & Co; no kekahi mau mea nani i makaukau no ka hoolilo ana aku.
He card ka ka Luna Nui o ka hale ainaPalace i keia kakahiaka.
He halawai ka ka Puali ekahi o ke compene kiki pololei i keia ahiahi hora 7:30.
Ua hoolaha ia ae ka inoa o ka poe na lakou e hookele nei ka hale wiliko o Waimea.
Hora 10 o keia kakahiaka i holo aku ai ke Kinau no kona mau Awa maa mau, no Maui a me Hawaii.
O ka poe a pau i makaukau no ka paani cricket ana ma keia Poaono ae, e hiki ae lakou ma ka hora 2 p. m.
Ua wehe ae nei o Harry Cannon, i ka halekuai Palama Grocry, ma kahi aoao o ka hale hoolulu kaa’hi a ua makaukau oia e hoolawa aku i ka lehulehu ma na ano a pau.
He kuai hoopau nui ka H. W. Schmidt me Keiki a me W. S, Luce, ma ke Alanui Papu i keia mahina, Maraki 23 me24.
I ke kakahiaka, onehinei ke ku ana mai o ka Mikahala me ka piha kopaa o ke awa mai o Kauai. A holo hou aku la no kona mau awa ia ahiahi no.
Ma ka hora 3:11 p.m. o ka auina la onehinei, i halawai aku ai ke kaa’hi me ke kaa ukana a ke Pukiki. I ke kaa’hi e huli hoi mai ana no Waipilpilo, ua hookani ia ne ke oweowe a me ka bele o ke kaa’hi , aka nae ua hooikaika aku la ke pukiki i ka hili ana i kona lio me kona manao e hoea aku ana oia ma kahi aoao, aka mamua o kona hoea ana, ua loa koke mai la oia i ke kaa’hi a kiola ia aku la kona kaa iloko o ka pa o ka pake, a o ke pukiki hoi ua manao loa aku kona wahi i waiho ai.
L. B. KERR,
ma
NAE O KA HALEKUAI O MOGAN
Alanui Moiwahine Honololu Hawaii
KE KALEPA POLOLEI MAI NA HALE HANA
MAI
E auai ana i kekahi mea okoa a e kuai ai ma ka i a ma ke kumukuai kukaa.
He kupono i na lede e hele mai e nana mua maanei i ko makou puu wai wai nui mamua o ke kuai ana aku i kahi e aku.
O KA HOOKAHI DALA I KUAI IA MA KAHI
O L B KERR UA LIKE IA ME ELUA
MA NA HALEKUAI E AE.
OIA HOI, UA LOAA IA OE NA LOLE
nona ke kumukuai Elua Dala HOOKAHI DALA
WALE NO
NA PAPALE,
Na Lipine
Na Pua Papale
Na Hulu
Na Lihilihi
Na Mikinilima
Na Lole
Na Paku
Na Keokeo Uhi-moe
Na Kihei Huluhulu
ECT ECT
L. B. KERR,
ALANUI MOIWAHINE,
Waikiki iho o ka Hale Kudala o Mogan