Ka Oiaio, Volume I, Number 53, 16 March 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

BUKE I.         HONOLULU, MARAKI 16, 1896   HELU. 43

OIAIO PUKA LA

NA

Keehina io Karisto La.

HAKUIA E MRS. E. G. WHITE

KA HAI ANA I KA HEWA

(Hoomau ia).

            O ka poe i hoo@aahaa ole i ko lakou mau uhane imua o ke Akua me ka hai aku i ka hewa imua ona, aole no lakou i hooko i ka mea mua e ae ia ae. Ina aole i mihi io kakou me ka mihi "e mihi ole ia'u," aole hoi me ka haahaa o ka naau a me ka pepe o ka uhane i hai aku ai i ko kakou mau hewa, e hoowahawaha ana i ko kakou lawehala'na, aole he oiaio ko kakou mihi ana imua o ke Akua; ina hoi aole kakou i imi, aole no kakou e loaa i ka malu mai ke Akua mai. No ko kakou hoohaahaa ole i ko kakou mau naau a hooko i na kuhikuhi ana o ka olelo oiaio, nolaila wale no ke kumu o ka loaa ole i ke kalaia ana o na hewa i hala. He maopopo lea na ao ana i pili i keia mea. O ka hai ana i ka hewa, ina no paha he akea a ina paha ma kahi mehameha, he pono mai ka naau mai, a hai ia me ka aua ole. Aole he pono ke koi ikaika ia ka lawehala e hai i ka hewa. Aole he pono ke hanaia me ka mama wale, aole hoi e koiia na mea i ike maopopo ole i ke ano ino loa o ka hewa. Aka, he pono i maopopo lea ka hai'na; me ka ae ana ku i na hewa au i hana ai.

            I na la o Samuel, ua auwana na kanaka o ka Iseraela mai ke Akua aku. No ko lakou mau hewa ua pilikia lakou; no ka mea ua pau ko lakou manaoio i ke Akua, ua lilo aku ko lakou ike ana i kona mana a me kona naauao e hooponopono i ka lahui; ua lilo aku ko lakou hilinai i kona mana e pale aku i na enemi a e hoopono i ko lakou aoao. Ua huli ae lakou mai ka Luna nui o ke ao nei, a ua makemake e hooponoponoia e like me na lahui e puni ana ia lakou. Mamua o ka loaa ana i malu ua hoopuka aku lakou i keia hai'na maopopo: "Me na hewa a pau a makou, ua pakui makou i keia hewa hou, o ke noi ana i alii no makou." 1 Sam. 12:19. O na hewa la a lakou i hana'i, oia ka lakou i apono ai e hai aku. Ua hookaumaha ko lakou aloha ole i ko lakou mau uhane, a ua hookaawale ia lakou mai ke Akua mai.

            Aole e ae ia ka hai ana i ka hewa imua o ke Akua ina aole he mihi io me ka huli ana mai ka hewa mai. He pono ke hoololi loa ia ka noho ana; e hookaawaleia na mea a pau i kue aku i ke Akua. Oia no ka hope o ka mihi io no ka hewa. O ka mea a kakou e hana ai ua hoike lea ia imua o kakou: "E holoi oukou, e hoomaemae hoi; e waiho aku i ka oukou hana hewa ana; a ao i ka hana maikai, e imi i ka hooponopono, e alakai pololei i ka mea i hookaumahaia; e hoopono i na keiki makua ole, e kokua i na wahinekanemake." Isaia 1:16, 17. Ezekiela 33:15. "Ina e hoihoi aku ka mea hewa i ka waiwai kaohi a ka aie, a ua hoihoi aku hoi i ka waiwai ana i lawe ai, a ua hele hoi ma na kanawai e ola'i, me ka hana hewa ole; e ola io no ia, aole ia e make." Ke i mai mei o Paulo, i kona kamailio ana no ka mihi, "Aia hoi, o na mea la a oukou i hana eha ia ai ma ka ke Akua, he nui ka ikaika i hanaia e ia iloko o oukou, oia, he hoakaka, oia, he iini nui, oia, he manao ikaika, oia, he hoopai! ma na mea a pau, ua hoike mai oukou ia oukou hoi, he hala ole i keia mea" 11 Kor. 7:11.

            Aia a hoomakeia ka manao pono e ka hewa, aole i ike ka mea hana hewa i na kina o kona ano, aole hoi i hoomaopopo i ka ino ana i hana'i; a ina aole i kulou imua o ka mana hoahewa o ka Uhane Hemolele, e noho ana ia iloko o ka powehiwehi, aole i ike pono i kona hewa. Aole i oiaio a me ka manao ikaika kona hai ana. I kela ae ana i keia ae ana o kona hewa ua pakui pu ia he olelo hoolaulea no kana hana, e olelo ana, ina aole oia i hana i keia a me kela mea i hoahewaia ai oia.

            Mahope o ko Adamu laua me Ewa ai ana i ka hua i papaia, na piha laua me ka hilahila a me ka makau. I kinohou ua imi wale no laua i ka pale ana i ko laua hewa, a i pakele laua mai ka hoahewa ana o ka make. I ko ke Akua ninau ana no ko laua hewa, pane aku la o Adamu e hoahewa pu ana i kona hoa: "Na ka wahine au i haawi mai na'u nana no i haawi mai i ko ka laau, a ai iho la au." Kau iho la ka wahine i ka hewa maluna o ka nahesa, e i ana, "Na ka nahesa wau i hoowalewale mai, a ai iho la au." Kinohi 3:12,13. No ke aha la kou ae ana ia ia e komo mai iloko o Edena? Oia ke ano o kana mau ninau i puka mai loko mai o kana olelo pela no kona hewa; pela i kau aku ai oia i ka hewa maluna o ka Akua. Na ka makua o ka wahahee me ia no ke ano o kana mau olelo hoapono ia ia iho, a ua hoikeia e na keiki kane a me na kaikamahine a pau o Adamu. Aohe i hookomoia mai na hai'na o keia ano e ka Uhane o ke Akua, aole hoi e ae ia e ke Akua. E alakai ana ka mihi io e auamo i kona hewa iho, a e hai aku me ka hoopunipuni ole a me ka hookamani ole. E like me ka lunaauhau pepa, aole e hapai ana i kona mau maka i ka lani, a kahea oia, E ke Akua e aloha mai oe ia'u ka mea i hewa." a e hoaponoia na mea hai aku i ko lakou hewa; no ka mea e hoike o Iesu i kona koko i mea e kokua ai i ka uhane mihi.

            Ke hoike mai nei na kumu hoohalike o ka ke Akua olelo i ke ano oiaio o ka mihi a me ka hoohaahaaia'na; aole he manao pale i ka hewa, aole hoi he manao hoapono ia ia iho. Aloe i imi o Paulo e pale aku i kona hewa; ua hoahewa loa ia ia iho, me ka imi ole e hooemi i kona hewa. Ke i mai nei: "Hana paa iho la au i na haipule he nui maloko o na halepaahao, ua loaa ia'u ka mana no ka poe kahuna nui; a ia lakou i pepehiia ai owau no kekahi i hoahewa pu aku ia lahou. Hoopai pinepine aku la au ia lakou malalo o na halehalawai a pau, a koi aku la au ia lakou e olelo ino; a no ko'u ukiuki loa ia lakou, hoomaau aku la au ia lakou a hiki i na kulanakauhale o na aina e." Oihana 26:10,11. A ke olelo mai nei ia me ke kanalua ole, "Ua hele mai o Karisto Iesu i ke ao nei, e hoola i ka poe hewa; owau no ko lakou mea oi." ITom. 1:15.

            Aole i pau.