Ka Oiaio, Volume I, Number 56, 19 March 1896 — Page 2
| This text was transcribed by: | Tialynn Kawaa |
| This work is dedicated to: | Kulia I Ka Pono Oahu |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA
JOHN E. BUSH, Luna Hooponopono
HONOLULU : : MARAKI 19. 1896.
KA MAKEMAKE O KANAKA.
“Aka, o kanaka hewa, a me ka poe hoopunipuni, e mahuahua ana ko lakou hewa, e hoopunipuni ana me ka hoopunipuni ia mai.” 2 Timoteo 3:13.
Ina he auoai kekahi o ke kanaka i hoike ia me ka maopopo loa, i oi ae i kekahi mau anoai e ae ona, e hoike ana eia ke ao holookoa ke ku nei mamua ponoi o ka ipuka o ka la e wehe ia ae o ka la holookoa o na la hope o ke kanaka; oia no ka mea a Paulo i kakau ai ia Timoteo, i kaua keiki hiapo ma ka hoomana, e pili ana no na la hope, i helu ia ma ka mokuna 3 o ka lua o kana palapala ia Timoteo, i hoike ia ae la ma ka pauku 13: ka hoihoi ole o kanaka i na mea oiaio, aka, he hauoli loa hoi i na olelo makani a me na olelo hoopunipuni waiwai ole, e laa na kaao a me na olelo kuko a kohokoho manao kanaka wale. Ua hooia ia mai keia kulana na ka heluhelu nui ia o na buke kaao a me na moolelo hoopunipuni, na lahui. Eia ke hiki mau nei kekahi mau leta io makou nei e hooia mai ana ua oi aku ke ohohie o kanaka i na kaao a me na moolelo haku wale iho no a ka mea kakau, na mea hoonanea a alakai hewa, e hapai ana i na iini holona o kanaka. He minamina makou i ka ike i ka lahui Hawaii i ka hoi hope i na mea oia ano, a manao oia ano mea heluhelu, pulelehua wale oia iho la ka io, ka waiu, a me ka meli o ka lolo kanaka e hoopiha ia ai, a e hooluhi wale ia ai. Ke uwe nei keia lahui i ka ilihune, i ka piliia, i ka anai pu ia e na lahui e ae, a he mea oiaio no ua pilikia io no lakou a ua ilihune, aka, aole loa lakou i pilikia a i ilihune a i poino i na lahui e ae, aka, i poino no mamuli o ka mauele o ka noho ana; mauele o ka lima a me ka noonoo no ka poe lilo mahope o na lealea kino a me na olelo hoopunipuni. Me he la, ina he olelo hoopunipuni waiwai ole ke hoolaha ia aku, a he aha lealea kekahi, a he paani kinipopo, a hana keaka paha, ua pau koke ka molowa, ke kukule, a me ka palaualelo o kanaka; e moni ana oia i ka olelo hoopunipuni me he waimeli la, a e hele ana oia he mau mile e ike i na hana lealea a e makilo ma na wahi ahaaina, mamua o ka heluhelu ana i na olelo oiaio e pili ana i ko ke ao a me ka ke Akua, me ka imi ole i ola no kona noi o ana kuokoa nona iho. He mea maopopo loa, ina e hoomau keia lahui mahope o na haawina hoohaahaa i ko lakou ano kanaka, e lilo ana no oia he kauwa kuapua, a he mea hooluhi ia e na lahui i hoopono a i eleu i ka malama ana i ka noho ana hoopono e kuokoa ai. Ua ike makou i ka hewa i ka hanai ana i ka lahui i na olelo makani, i keia mau la. Ua oi aku ka pono a me ka pomaikai o ko makou hooikaika ana no ka lahui ma ke kapae loa ana i na kaao waiwai ole, a e hoopuka wale aku no i na mea hou e lohe ia ana, i mea hoonaauao i ka hoakanaka i na mea e kaalo nei ma keia noho ana, a e hoopuka aku hoi i ka olelo oiaio a ke Akua i ai no ko ke kanaka uhane. Ua like ke kanaka e heluhelu ana i na kaao hoopunipuni me ka mea e hanai ana ia ia iho i ke ahe makani a i ole i ka huakai. Ina he aloha io ko ke kanaka i kona one hanau a i kona inoa lahui, hookahi wale no alanui oiaio e hoike ia ai kona oiaio ma ia mea, oia no kona kapae ana i kona ano bepe a lawe ae hoi i ke ano kanaka makua hoopono.
KELA ME KEIA.
Ua hala aku la o Rep. A. McBryde no Kauai.
Ua huli hoi mai o J. F. Mogan ma ka Malulani.
He Geremania kai hopu ia ae ma ka ponei no ka ona rama.
He halawai ka ka Papa Ola ma ka auina la onehinei.
Ke kudala mea kanu a Luce’s i ka hora 10 o keia kakahiaka.
O na lole silika a Iwakami e kuai nei ma ke alanui Hotele, eia no ia ke kau la.
Ma ka halawai o ka ponei i koho ia ai o Murry i Kapena no ke Compene H.
Ua hoahewa ia o Maui a me Kekoa, e ka Lunakanawai, a o laua hoopai he $125.
Ua hala aku ka mokuahi Iwa, no Honoipo ma ka auina la onehinei.
Eia ka moku Kenilworth ke hoopiha ia nei i ke kopaa e Kauai a me Ke Au Hou.
Ma ke ahiahi nei ke ku ana mai o Kaala me 1084 eke kopaa mai Kahuku mai.
Mamuli o ko Geo Sea omaimai i hoonee ia aku ai o Hammer me kona wahi, he Kupakako no ka halewai.
He aha mele ka ke Kula o Kamehameha e malama ana ma ka malama o Aperila ae nei.
Ua hoi mai o Senator Baldwin mai Maui mai, a eia oia ke noho nei ma kona pakaukau.
Eia i ka lai o ka ua kukalahale o Porofesa Zamloch, mai kana huakai kaahele aku nei no Kauai.
E huli hoi aku ana ka wiliki a me ka malama-moku o ka Hoku Ao Auseteralia no ka hauoki o Kapalakiko.
E wehe hou ana o Price a me Burn’s i ka laua hana hoomakeaka i keia Poaono ae ma ke kahua kahiko, ma ke kihi o Alanui Papu a me Beritania.
Ikaika ka makani waikoloa i keia mau la, aka, he makani hoomaemae nae i na ea mai a ka makani kona i hoopunohu iho ai i na hebedoma i hala aku.
He pepehi kanaka ko Maui i keia Iapana a make loa, a o ka mea nana i lawe ke ola o ka Iapana eia oia malalo o ka hoomalu ana a ko Maui Ilamuku O ka makou lohe keia.
L. B. KERR,
-ma-
NAE O KA HALEKUAI O MOGAN.
Alanui Moiwahine, : : : : Honolulu H., I.
KE KALEPA POLOLEI MAI NA HALE HANA
MAI.
E kuai ana i kekahi mea okoa a e kuai ma ka i-a ma ke kumukuai kukaa.
He kupono i na lede e hele mai e nana mua maanei i ko makou puu waiwai nui mamua o ke kuai.
O KA HOOKAHI DALA I KUAI IA MA KAHI
O L. B. KERR UA LIKE IA ME ELUA
MA NA HALEKUAI E AE.
OIA HOI, UA LOAA IA OE NA LOLE
nona ke kumukuai Elua Dala HOOKAHI DALA WALE NO.
NA PAPALE
Na Lipine
Na Pua Papale
Na Hulu
Na Lihilihi
Na Mikinilima
Na Lole
Na Paku
Na Keokeo Uhi-moe
Na Kihei Huluhulu
ECT ECT.
L. B. Kerr.
ALANUI MOIWAHINE.
Waikiki iho o ka Hale Kudala o Mogan