Ka Oiaio, Volume I, Number 63, 30 March 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

BUKE I. HONOLULU, MARAKI 30, 1896. HELU 63.

 

-NA-

K@eh@na io Karisto La.

-oo-

HAKUIA E MRS. E.G. WHITE.

 

KA HOOIA ANA I KE ANO O NA HAUMANA.

(Hoomau ia).

            "E pai iho au i ko'u mau kanawai ma ko lakou mau naau, a e kakau iho hoi ia mau mea ma ko lakou manao." Heb. 10:16. A i na i kakauia ke kanawai ma ka naau, aole anei e hoohalikeia ka noho ana? O ka hoolohe-oia ka hookauwa a me ka hana o ke aloha-oia no ka hooia ana i ke ano haumana. Pela, ke i mai nei ka olelo a ke Akua, "Eia no ke aloha o ke Akua, o ka malama aku i kana mau kauoha." "O ka mea e olelo ana, ua ike no au ia ia, a malama ole oia i kana mau kauoha, he mea wahahee ia, aole he oiaio iloko ona." I Ioane 5:3; 2:4. Aole i hookuuia ke kanaka mai ka hoolohe mai, aka, o ka manaoio, a o ka manaoio wale no ka i hookomo ia kakou iloko o na pomaikai a Karisto, a e hooikaika mau ia kakou e hoolohe.

            Aole he uku ke ola no ko kakou hoolohe ana; no ka mea he makana ke ola i haawi wale ia mai e ke Akua, i loaa mai ma ka manaoio. He hua ka hoolohe na ka manaoio. "Ua ike no oukou, ua hoikea mai oia, i lawe ae ia i ko kakou mau hewa; aole hewa iloko ona. O ka mea e noho ana iloko ona, aole ia e hana hewa. O ka mea e hana i ka hewa, aole ia i nana ae ia ia, aole no hoi i ike ia ia." I Ioane 3:5,6. O keia ka hooia maoli. Ina i noho kakou iloko o Karisto, ina i noho ke aloha o ke Akua iloko o kakou, alaila e ku like ko kakou mau makemake, ko kakou mau noonoo, a me ko kakou mau hana, me ka makemake o ke Akua i hoikeia ma kona kanawai hemolele. "E na pokii, e malama o hoopunipuni mai kekahi ia oukou; o ka mea i hana i ka pono, oia ka i pono, e like me ko ia la pono ana." Ioane 3:7. Ua hoomaopopo ka pono mamuli o ka ke Akua kanawai hemolele, oia no na kanawai he umi i hoopukaia ma Sinai. O ka mea i kapaia he manaoio, iloko o Karisto, me ka manao e hookuuia kanaka mai ka malama ana i ko ke Akua makemake, aole ia he manaoio, he manao lalau ia. "E hoolaia oukou i ka lokomaikai ma ka manaoio."

            "Pela no hoi ka manaoio, ina oia wale no aole ana hana, ua make ia." Epeso 2:8; Iakobo 2:17. Ua i mai Iesu nona iho mamua o kona hele ana mai i ke ao nei, "Ke hauoli nei au i ka hana aku i kou makemake, o ko'u Akua; oiaio, o kou kanawai hoi eia iloko o ko'u naau." Halelu 40:8. A mamua ae o kona pii ana ae i ka lani ua olelo mai ia, "E like me au i malama ai i na kauoha a ko'u Makua, a e noho iloko o kona aloha." Ioane 15:80. Ke i mai nei ka palapala, "Eia ka mea e maopopo ai ia kakou ko kakou ike ana ia ia, ina e malama aku ana kakou i kana mau kauoha.

* * * O ka mea e olelo ana, ke noho nei oia iloko ona, he mea pono nona ke hele e like me ko ia la hele ana." I Ioane 2:3-6. "No ka mea, ua hoinoia o Karisto no kakou, a ua waiho oia no oukou i kumu hana, i hahai aku ai oukou ma kona mau kapuwai." 1 Petero 2:21.

            O ke ano o ke komo ana iloko o ke ola mau loa i keia wa ua like no me na wa i hala e like me ka noho ana o ko kakou mau makua mua ma Edena mamua ae o ka hana hewa ana, oia hoi ka malama pololei loa ana i ke kanawai a ke Akua, ka pono kino ole. Ina ua loaa mai ke ola mau loa no kekahi mea emi mai i keia alaila ua pilikia ka noho'na o ke ao holookoa. E hamama ana ka ipuka no ka hewa me na poino a me na pilikia e hahai ana, e hoomau loa ia aku.

            Ua hiki no ia Adamu mamua o kona haule ana, ke noho me ke pono ma ka malama ana i ka ke Akua kanawai.

            Aka aole oia i hana i keia mea a no kona hewa ua haule kakou iloko oia ano hewa aole hoi i hiki ia kakou ke hoolilo ia kakou iho he poe pono. Oiai ua hewa kakou ua hemolele, ole aole e hiki ia kakou ke malama i ke kanawai hemolele. Aole o kakou pono e ku ana i ke koi ana o ke kanawai o ke Akua. Ua hana nae o Karisto i alanui e pakele ai no kakou. Ua noho oia ma ke ao nei iwaena o na hoao ana a me na hoowalewale ana e like me na mea a kakou e halawai ai. Ua noho oia me ke kina ole. Ua make oia no kakou, a ua makaukau e lawe aku i ko kakou mau hewa, a haawi mai i kona pono.

            Ina e hoolilo aku oe ia oe iho nona, a ae aku ia ia i Hoola, alaila, oiai ua hewa loa kou noho ana, ma ona la ua aponoia oe. E ku ana ko Karisto ano ma kahi o kou ano, a ua ae ia oe imua o ke Akua me he mea la aole oe i hana hewa.

            E oi ana no hoi i keia, e hoolilo ana o Karisto i ka naau, a e noho ana iloko o kou naau me ka manaoio. E hoomauia keia noho ana me Karisto ma ka manaoio, a ma kou koho mau ana ia ia; a e like me ka loihi o kou hana ana i keia mea, e hana no ia iloko ou e hooko a e hana aku ai e like me kona makemake maikai. Pela e loaa ai ia oe, "A ke ola e nei au iloko o ke kino, e ola'na au ma ka manaoio i ke Keiki a ke Akua, nana au i aloha mai, a haawi mai la ia ia iho no'u." Gal. 2:20. Pela i olelo ai o Iesu i kana mau haumana, "No ka mea, aole na oukou e olelo aku, na ka Uhane no o ko oukou Makua e olelo ana ma o oukou la." Mat. 10:20. Alaila me Karisto e hana ana iloko ou, e hoike no oukou ia uhane hookahi, a hana ia mau hana,-na hana o ka pono a me ka hoolohe.

            Nolaila aohe mea iloko o kakou e kaena ai. Aohe kumu e hookano ai. Aia wale no ko kakou kumu e manao lana ai iloko o ka pono o Karisto, i hooiliia no kakou, i hanaia e kona Uhane iloko ma o kakou la.

            I ko makou kamailio ana no ka manaoio he pono ke hoomaopopo i ke ano. He manaoio okoa loa i ka manaoio maoli. Aole e hiki ke hoole o Satana a me kona mau puali i ke Akua, i kona mana, a me ka oiaio o kana olelo. Ke i mai nei ka Baibala, "Pela no ka poe daimonio i manaoio ai, me ka haalulu iho." Iakobo 2:19. Ina he manaoio i ke Akua, me ka ae ana ia ia; ina i hooliloia ka naau nona, me ke kau ana o ke aloha maluna ona, oia ka manaoio,-ka manaoio e hana ana mamuli o ke aloha, e hoomaemae ana i ka naau.

            Aole i pau.