Ka Oiaio, Volume I, Number 98, 18 May 1896 — Page 2
| This text was transcribed by: | Alika Olsen |
| This work is dedicated to: | Cousin-in-law Hatsu Uesugi |
Ka Oiaio/Ka Oiaio Puka La.
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA.
JOHN E. BUSH, luna Hooponopono a me Puuka
HONOLULU, MEI 18, 1896.
AOLE WAHI MALUHIA.
Mai ka mea i kahi kiekie a ka mea i kahi haahaa, aole he mea lanakila i ka make. Hookahi wale no alanui e manalo ai ka make, aole ma ka hoao ana e alo i ka iho lawe ola a ka anela o ka make, oiai i keia kino aia i kona lima na, aka, ma ka hoomanalo ana i kana hoomake ana i keia kino ma ke ola ana mai keia make ana ma o ke ola io Karisto la. I ka wa o Karisto i ala mai ai mai ka halepaahao a ka make i manao ai e hoopaa loa aku iaia, ua hooko oia i ka puana olelo. "E ka make auhea kou huelo awa? E ka lua kupapau auhea kou lanakila.
Ua ulu ae keia mau manao kaanaana no keia mea he make, a me ka palena o kona mana maluna o ke kanaka, oiai ke ike mau nei kakou i ke ako ia ana o na mea a pau, a mimino hoi a mae me he mauu la. O ua 'lii hoi i piha i ka mana, a me ka poe waiwai i piha i ka lako, a kakou i manao aku ai e pakele ana, aka, o lakou kekahi mea muimuia loa ia e ka make.
Ma ka moku lawe leta Miowera mai i hiki mai nei ka lono, ua make iho la hoi ka moi kapu mana nui o Peresia, ke 'lii mai ka puhaka mai o Solomona a me moiwahine o Seba, wahi a kona mookuauhau, Nazra-ed-din, ka Shah o Peresia, i ka la 1 o Mei, ma ka auina la, i ka poka a kekahi kanaka powa i kiai hele ia ia no elua mahina, oiai oia e komo aku ana i kana hoomana ma kekahi o na luakini hoomana o ke taona o Teherana, He hookahuli aupuni ke kumu o keia kana ana. Pela ma Hawaii nei, aole he maluhia mai ka 1887 i ka wa o Kalakaua i upu ia ia e powa, a hiki wale i ka pio ana oia manao i ka mamo alii o Hawaii ma ke ko ana o ke kumu, e like me ka olelo a ka Buke-no ke kuko hewa o ka naau o kanaka mahope o na pomaikai o keia ao, a malie paha e kuko ia nei no hoi paha i keia wa i ka mea e noho ana ma ke poo o ke aupuni Hawaii. E hoao mau ia ana e powa ia ke ola o na moi o Europa, a aale no hoi i hemolele ko Amerika mau alii koho a he hana mau loa hoi ia ma ka mahele poepoe honua o Amerika Hema.
Aole he alii i like ka waiwai ma na momi a me na pohaku anapanapa e like me ka Perusia ma keia ao aole hoi he alii i oi ae ka mana, oiai, ka olelo o ka buke baibala e i ana, he kanawai loli ole ko na Media a me Peresia, na hoomauia ma o kana olelo hookahi. Aka, aole hoi keia mau mea a pau, he mana i hiki ke kaohi aku i ka lima a me ka mana kakauha o ka make, no hookahi kekona ke hiki mai ka hopena. Pomaikai ka mea i lawe i ka pono ma o Karisto la, no ka mea, ma o kona mana hookahi wale no e hiki ai ke kanaka ke lakakila maluna o ka make a e paopao ai hoi kona poo. He ole na mea e ae a pau, koe o Karisto ke alii o na 'lii ka Haku o na Haku, ka mea hookahi i hoohua ia mai he makamua o ua mea a pau, a nona hoi ke ola ma ona iho mai ka Makua Ola Mau Loa mai, a aole hoi he make iloko ona. Ma ona la kakou e oi ai maluna o ke alii o ko make, a e like ai he hoakanaka maluna o ke kulana hookahi me na 'lii a me ka poe waiwai o keia ao nei.
KELA A ME KEIA.
Ua huli hoi mai o W. H. Conuela mai Maui maluna o ke Calaukina i ka kakahiaka la Kapule nei.
Ua huli hoi mai ke kauka McGettigan a me J. Grace mai Maui mai maluna o ke Calaudina i ke kakahiaka la Kapule nei.
E haalele ana ka mokuahi Mikahala i keia ahiahi hora 5 no kona mau awa ku mau.
E hoomaha ana na kula aupuni i ka la 26 o Iune aole e ae ia na haumana e noho mamua o kela manawa koe ke oma'ima'i ma ke kino.
Mai poina na makamaka i ke kuai hoopau mak ka hale kuai o L. B. Kerr. He 30 i-a kalakoa paa no hookahi dala.
No ka poe pena a pia i ka helehelena e loaa no ka pia aala "Ramona" ma kahi o Hobron ma.
Ua huli hoi mai o H. S. Townsend ke kahu kula kaapuni no kana huakai makaikai i na kula o Molokai; maluna mai oia o ka Mokolii i huli hoi mai ai no ke awa o Kou i ke kakahiaka Poaono nei.
He halawai ko keia ahiahi no ka hui H. A. A. C. o ka Y. M. C. A. Hall i ka hora 7:30 o keia ahiahi.
Ua ku mai ka Chitagong, kekahi mokumahu o ka hina mawaena o Portand a me Asia, i keia kakahiaka.
Ua hopuia kekahi mau aliikoa Rusia e kahakaha ana i ke kii o na Papu o Hanakaona, Kina.
Hookuuia o Mr. Cowan no ka hoopii kolohe, no ka lua o ka manawa, nolaila, ua hoopau loa ia kona hihia.
A ka hoomaka ana o keia mahina e hoemi aku ana makou i ka uku o ka Puka La Oiaio, a he hapaha ko ka Mahina; a he hookahi dala a me hapalua o ka Puka Pule, ke uku mua ia.
Ke hoohenehene nei ka Avataisa i ka Ahaolelo.
Ua ao ia aku ke anaina ma ka Halepule Christiano, aole e hehihehi i na wawae no ko lakou hoihoi.
Eia o L. A. Anaru o Maui i ke taona nei, mai Maui mai, ma ke Caladine onehinei.
Ua make ma ka home o kana keiki Edmund Hart o Mores K. Awailua, a i keia la e hoolewa ia aku ai oia.
Ua haule iho la iloko o ka poho o ka muliwai Nuuanu kekahi wahi keiki Iapana uuku, a e ole e ike ia aku e kekahi Hawaii pakele ai kona ola.
He halawai akea ka na Pukiki i keia po ma ke kuea o ka paalii.
I ka la apopo e ku mai ai ka Maluhani mai Hawaii mai.
I keia po e hookahi ia mai ai e ka bana ka leo mele hou i haku ia iho nei e Miss Matilda Walker, ma Ema Kuea. O Liberty March ka inoa o ua leo la.
I ka po Poaono nei, ua mare ia o Sarah Naone me T. W. Rathborne e H. H. Pareka. He ahaaina nui kai haawi ia mahope o ka mare ana, a ua nui ka poe i kono ia.
Ua make no ka mai akepau, kekahi haole malihini ma ka Hotele Richekieu i ka auina la Poaono nei, a ua hoolewa ia no Nuuanu.
I keia la e lawe ia mai ai ka hihia apuka o L. V. Redpath imua o ka Aha Jiure.
KUAI HOOPAU NUI.
Ma na Mahele a pau o na ano mea kuai ma ka Halekuai o
L. B. KERR,
ALANUI MOIWAHINE.
He 30 i-a Kalakoa no $1.
Papale Ie Laiki 25 keneta pakahi.
12 Ia Lole Huluhulu Pulupulu no $1.
Na Lipine 18 ia no 25 keneta.
Na Lole Makalena Keokeo kikokiko a me pohaka, 15 ia no $1.
E hele a e makaala mai, a e lawe ae i na kuai holopono ana.
L. B. Kerr.
ALANUI MOIWAHINE.