Ka Oiaio, Volume I, Number 107, 28 May 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

BUKE I.         HONOLULU, MEI 28, 1896.                        HELU 107

 

OIAIO PUKA LA

KA HUA O KA ONA.

            I ka makahiki 1868 he 100,000 ka nui o na keiki makua ole, hemahema ma na alanui o Ladana, e auwana hele ana.  Ua hiki ia'u ke olelo ae me ke kanalua ole he poe makua ona rama ko keia poe keiki makua ole.  Ua ike au ma kekahi nupepa i keia mau la aku nei e olelo ana ua loaa aku kekahi keiki opio ma kekahi alanui o Nu loka e waiho a make ona mau makahiki, a ua ike ia oia e na makai he ona mau.  Ua manao hoi au aia wale no la ia mea e ike ia ai ma Enelani, kahi ano nui ole o ka ike ia o ka ona o na keikikane a me na kaikamahine ma ka umikumalua a ka umikumalima makahiki, i lilo hoi he kauwa paa na ka waiona.  Ua ike hoi au i na alanui o Ladana ua piha me na hua o ka inu rama, na keiki hele wale a malamaole ia e auwana hele ana me ka hoomaopopo ole ia ma na alaloa a me na alaiki o ke kulanakauhale nui.  No iwakalua makahiki kou hooikaika ana ma kekahi o na hale paahao nui o Enelani, a oloko o ka 230,000 a hiki i ka 250,000 kane a me wahine, ke olelo akea hopo ole nei au he ewalu, ke ole he eiwa paha, o loko o kela a me keia umi o lakou ua hiki aku maloko o ia mau wahi e hooko i ka hoopai i ili iho maluna o lakou mamuli o hewa o ka ona rama. - Rev.J.Nugent.

 

            O kekahi o na ninau nui o ka la oia ka paio mawaena o ka manao o kanaka a me ka hoike kumu ma ka Baibala.

            I ka la apopo e kapalulu mai ai ka Ausetralia mai Kapalakiko mai.

            I keia kakahiaka i ku mai ai ka mokuahi Alam@da, a holo aku no i ka auina la hora ekolu.

            I ka la apopo e ku mai ai ka mokuahi Malulani mai Hawaii a me Maui.

            Ua manao wale ia e ku mai ana he moku manuwa Mekiko iloko o Iune.

 

HAAWINA HELUHELU BAIBALA.

KA MILENIA - HOOPAUIA.

1  Heaha la ko Satana kulana a hiki i kona wa e hoopaaia ai? 1 Pet 5:8.

"E kuoo, a e makaala; no ka mea e like me ka liona uwo, pela no e holoholo nei ko oukou enemi o ka diabolo, e imi ana i kana mea e ala ai."

2  Ma ke ano hea la i oleloia ai, ua hoopaaia o Satana he hookahi tausani makahiki?

HAINA - Aia na haipule ma ka Lani (Hoik 20:4,6); ua lukuia iho hoi ka poe hewa ma o ka nani o ko Karisto hiki hou ana mai (2 Tesa 1:7,8; 2:8); a aole hoi e hoala ia no hookahi tausani makahiki (Hoik 20:5); nolaila ua pau ko Satana kuleana.  Ua hoopaaia oia iloko iho no o kahi o kana mau hana.

3  Heaha ka mea e hemo ai o Satana mai kona paa ana?  Hoik 20:5 hapa mua, a me 7.

"Aole i ola ke koena o ka poe make a pau ia mau tausani makahiki."

"A pau ia tausani makahiki alaila e kuu ia aku o Satana mai kona wahi paa."

Aia a hoala ia ka poe hewa, oia ka wa e hemo ai o Satana; a ia wa koke no oia e hele ai e hoopunipuni.

4  Pehea ka loihi ona e hookuu ia ai?  Pauku 3 hapa hope (pauku 7).

"**a mahope iho o keia mau mea e kuu ia aku ia no kekahi manawa pokole."

5  A heaha kana mea e hana koke ai?  Pauku 8.

"A e hele hou ia e hoowalewale i ko na aina, ma na kihi eha o ka honua, ia Goga a me Megoga, e hoakoakoa ia lakon i ke kaua; a ua like ka nui o lakou me ke one o ke kai."

6  O ke kulanakauhale hea kai iho mai i ka honua nei ia manawa? Hoik 21:2.

"Owau no o Ioane, ike aku la au i ka iho ana mai o ke kulanakauhale hoano o Ierusalema hou, mai ke Akua mai ka lani mai, ua makaukau e like me ka wahine mare i kahikoia no kana kane."

7  Heaha ka Satana e hoao ai e hana e heaha aku ka hopena?  Hoik 20:9.

"A hele lakou ma ka palahalaha o ka honua, a puni iho la kahi i hoomoana ai ka poe hoano a me ke kulanakauhale aloha.  Iho mai la ke ahi mai ke Akua mai ka lani mai a luku iho la ia lakou."

E hoopunipuni ana o Satana i ka poe hewa i hoala ia mai ka make, ma ke ao ana aku e lilo pio ana ke aupuni o ke Akua ia lakou.

8  Heaha la ka hopena a keia ahi?  Mal 4:1.

"No ka mea, aia hoi@ ke hele mai la ka la e enaena ana me he imu ahi la, alaila o ka poe hookiekie a pau, a me ka poe hana ino, he mauu lakou: a e hoopau ua la la e hiki mai ana ia lakou, wahi a Iehova o na kaua."

9  Owai mawaho o ka poe hewa ke ike i na hana a keia ahi? 2 Pet 3:7.

"Aka o ka lani a me ka honua o keia manawa, ma ia olelo hookahi no, ua hoana e ia no e ke ahi, ua malamaia hoi no ka la hookolokolo a me ka make o na kanaka aia."

10  Heaha aku hoi ka hopena?  Pauku 10 hapa hope.

"** alaila e lilo no ka lani me ka halulu nui a e wela hoi na kumu mua, a hehee wale, a e pau no ka honua nei i ke ahi, a me na mea a pau i hanaia maluna iho."

11  Heaha aku ka mea e hiki mai ana?  Pauku 13.

"Aka, e like me ka olelo mua ana mai, ke kakali aku nei kakou i ka lani hou a me ka honua hou i kahi e noho ai o ka maikai."

12  Owai ana ke noho i keia honua hou?  Mat 5:5; (Hal. 37:9-11).

"Pomaikai ka poe akahai no ka mea e lilo no lakou ka honua."

E. H. G.

 

BUKE KUAI.

            O ka poe akeakamai ma ka olelo a ke Akua, na wanana, a pela aku, ua hiki ke hoolawaia e like me ia malalo nei

            "Ka Hiki Hou ana mai o Karisto, he wehewehe pokole ana o ka Wanana a ke Akua, ma Mata o Mokuna XXIV."  He 15 keneta no ka Buke hookahi o 80 aoao.

 

            "Na Wehewehe o ka Buke o Hoikeana," ka Wanana e pili ana i ke au Karistiano a hiki i ka hopena.  He 50 keneta o ke kope hookahi.

 

            Ua makaukau makou e hoouna aku i keia mau buke no keia mau kumukuai, a me ka uku lawe leta, no ka poe ma kahi mamao, hooili ia mai ke dala me ke kaouha.

 

            "Hopena o ka Waiona."  He buke liili keia, o 16 aoao, no 5 keneta.

 

J. E. BUSH.