Ka Oiaio, Volume I, Number 108, 29 May 1896 — Page 2
This text was transcribed by: | Toni Lynne Kaefferlein |
This work is dedicated to: | Anake Lolena |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA.
JOHN E BUSH, Luna Hooponopono a me Puuku
HONOLULU, : : MEI 29 1896.
KE MAU ULU NEI.
Ma na moku lawe leta a pau e hiki m@ , ka nu hou io kakou nei no ka ulu mau o kekahe kumupilikia a hoopaapaa iwaena o ua lahui ikaika o ka honua nei. Ua hana ia nae keia mau kumu kuee ma o na lahui a aupuni o ke kulana hapa mai o ka ikaika, aka i ike ia nae he mau pono nui ko lakou e lilo ai he mea hoopoino i kekahi o na mana nui o ke ao ke lilo aku i kekahi o keia mau mana ikaika e apuepue nei i na kulana e hookahua pono ia iho ai ko lakou kulana makaukau no ka wa e ulu mai ai o ke kaua nui e kau kehakeha nei me he pahi wakawaka ma ka lima o ka anela naua e hooahulau a luku i ko ke ao ke hiki mai ka manawa.
O kekahi o na hana hope loa a Rusia i hoohana mai nei, oia no ka ouoonou malu ana i kana mau hana ma o Kina la, ma ka hooliloia ana mai o kekahi pono nui i ka Hui Hookele Mokunahu Moana Rukini, o na aekai o Cheefoo, i hookuleana mua ia e kekahi hui Beritania.
Ua hoike aku hoi ka Hope Kuhina o na Aina e o Enelani, Geo. N. Curzon, imua o ka Ahaolelo Makaainana i ka la 14 o Mei nei, ua hoouna mai hoi ko ka Moiwahine Beritania Kuhina Noho ma Pekina i kekahi olelo telegarapa e olelo ana, ua haawi aku hoi o Kina i kekahi pono i kekahi Hui Kalepa Rukini ma Cheefoo; i lilo hoi he kumu e hoopilikia ai i ke kuleana mua o na Beritania. Ua hoike pu ia mai no hoi i ke aupuni, ua waiho ke Kuhina Beritania e noho la ma Pekina, i ka olelo hoakaka mua, i ke aupuni o Kina, e hoopaaia aku ana hoi maluna o Kina na poho a me na poino a pau e ilihia ana maluna o na pono o na Beritania ma keia ae ana aku i keia pono i ka Hui Rukini.
Ke hui ia aku keia me ka lilo ana o kekahi mahele nui o Kina i kapaia ka mokuaina o Manchuria ma ka Akau Hikina, e lilo hoi i wahi hoolala a hoomoe i na alahao a hana e like me kona ike he kupono, no iwakalua makahiki, malalo o kekahi kuikahi malu; a ke hui ia aku hoi me kekahi mau bana hooni e ae a Rusia e hoohana nei, ma Areminia, Tureke, Peresia, Aigupika, Soudana, a me Abesinia, i kakooia a hui pu ia e ke aupuni Farani, he mea no ia o ke ao e ike iho ai, eia ke ka'ia nei ka maluhia e ke au o ka manao hapuku a lili o na lahui ikaika, a ke kokoke loa aku nei e hookui a uluamahi ae he kaua uluaoa e ku ai i na lahui a pau i ke kaua a me ka Iuku aku luku mai.
NA NU HOU HOPE LOA.
Ua hooholo iho ke aupuni Repubalika Transvaal aole e hooemi hou iho i ka hoopai o na kipi hookahuli aupuni @i @ lele loa @ Cecil Rhodes, ha @ aupuni Panalaau o ka Hui @ ka @ ma
Ke ao ia nei na kanaka o ka Kina i ka @na koa e Konela Leebert, a me iwakalua mau kokua, mai ka oihana puali kaua aku o Peru sia.@
KELA A ME KEIA.
Ke olelo nei na Kauka he ola no ka naio makalii loa iloko o ka io hipi a me na ia i waihoia iloko o ka Hale Hau Auwe ka poe ai io holoholona e!
E malama ana ke Aupuni Repubalika i ka la hanau o ke Aupuni Moi muu o ka Paeaina Hawaii, Mahea la ke kohu? a ma hea la ka pili?
Ua noi ae ke Komite Ma'i Lepera e ae ia o J. Waiamau a me T. K. Nakanaela e hoihoi ia mai ma Kalihi e lapaau ia ai.
Ua lilo ae nei ka Papa Hoonaauao he oihana Kuhina. Ke pii a hihi manu ae la na lala o ke aupuni. O Rev. W. P. Alekanedero a i ole o Rev. S. E. Bihopa aku ana paha ke Kuhina kupono.
I keia kakahiaka i ku mai nei o ka Australia.
Ua hoopaahao ia kekahi Kauka Pake hoopunipuni.
Ua hala aku o A. Marques no elua mahina ma ka Alameda.
I keia Poalua e pau ai na la noho o ka Ahaolelo ma ke kanawai.
He ekolu la o na nu hou ma keia Australia mai.
Hora 3 auina la Poaha i holo aku ai ka Alameda.
He 1249 ka nui o na Iapana limahana i hiki mai i ka Poaha ma ke Tai.-wan Maru mai.
Na L. Makaainana Hanuna i waiho m@i ka hoike a ke Komite Nana i na Ma'i Lepara.
Ua hoihoi ia mai kekahi mau keiki a na makua ma'i lepera e ke Komite i keia hoi ana mai nei. Aole o lakou ma'i.
Ua hoonui ia na Kiu Hawaii i keia mau la, a me na Kiu Haole kekahi mamuli o ka hoopuiwa ia o ke aupuni e na leta a na malihini e olelo ana ua kokoke mai he kaua hookahuli aupuni.
Aole e hiki ke hoopaahao a hoopai dala ia na Pake i komo hou aku i Amerika mahope o ka hoi ana i ko lakou aina, wahi a ka Aha Kiekie o Amerika, he kipaku wale no ka mea i ae ia.
I ka la apopo ka la kahiko pua i na ilina kupapau, no ka poe make. Aia a make nui ke aloha, i ka wa ola nui ke kuee o kanaka.
Ka poe i hoopaa ia lakou iho ma ke Keena Hoopaa inoa, penei ka nui: 1292 - i maheleia: Iapana 436; Na haole 362; Hawaii 244; Pake 239; Pukiki 14; Na lahui e ae.
NO NA AINA KA HIKO
NA KULANAKAUHALE I NALOWALE A LOAA HOU AKU.
- - @OO - -
@
MOKUNA. IV
MORIA KA MAU UA KA HALE O KA HALE
Kahi a Aberahama i mohai ai - Ka Papa Hehihehi hua palaoa a Arauna - Kahi i kukuluia ai ka Luakini o Solomona - Pohaku o ke Kumu - honua - Hoohiolo ia e na Roma Koena o kahi Hoano - Luakini o Omar - Na Manao i kupu ae - Luakini el Aska - Na Mookaao Mahomeda.-
O kahi oi loa o ke kamahao ma ke ao nei, a o kahi hookahi i hoohanohano ia e ke Akua no na au loihi o ia "ka hale noho o kona hemolele," oia no o Mauna Moria; kahi hoi i manaoia, malaila o Melesedeka, ke Alii o Salema, i lawelawe ai "he kahuna o ke Akua keikie loa," a Solomona hoi i kukulu ai mahope loa iho i ka luakini mua i kukuluia e ka lima kanaka no ka hoomana o Iehova, kahi hookahi a Iosfa, ka haku moolelo kaulana o ka Iudaio, i kakau ai ma kana moolelo, i kukulu ai o Aberahama i ke kuahu e mohai aku ai i kana keiki hookahi.
O keia hoi kekahi o na mauna eha i kukuluia ai o Ierusalema, i hookaawale ia mai Ziona ma ke komohana e ke awawa o Tairopeoua, a mai a Oliveta ma ka hikiua e ke awawa Ioh@sepaia; a me ke kanalua ole o kahi hoi keia o ke "kahua hehi palaoa a Araana," i kuai ia mai e Davida o Onana, ka Iebusite a kahi hoi ana i "kaumaha aku ai i na mohai-kuni a me na mohai hoomalu i ka Iehova" i ka wa a ka anela luku e ku ana me ka pahikaua e kaukehakeha ana maluna o ke kulanakauhale e hoahulauia ma kona lima.
Aole hoi ko makou manao e hoao aku e hoomakaikai aku me na olelo wehewehe i ke ano o "ka Hale o Iehova," e like me ia i ike'a ai iloko o kona nani nui i ka manawa a ke Akua Ola mau i hoohanohano iho ai i na hale la me kona ano; aka e hoomaopopo pololei iho hoi i ku ai, a e pakui aku hoi i kekahi mau mea hou e kakoo aku ana i ka moolelo o keia hale lua ole i kukuluia ma ka honua nei. Mamuli hoi o ka like loa o na mea e pili ana i ka pai a me ka pa i koe iho e waiho nei maluna o keia mauna, a me ke ano o ke kii a moe ana o ka aina, me na hoike no keia hale kamahao ma ka palapala hemolele, ua hiki ole hoi i kekahi kowa e komo iho ai na olelo hoole hoopaapaa e pili ana i kona maopopo oia no o Mauna Moria.
Aole i pau.