Ka Oiaio, Volume I, Number 128, 26 June 1896 — Page 2

Ka Oiaio/Ka Oiaio Puka La

 

JOHN E. BUSH, Luna Hooponopono a me Puuku

HONOLULU. : : : : IUNE 26 1896.

 

LUNA HOU O NA MA`I LEPERA.

            Ua lohe mai makou e hoonohoia aku ana o Mr. McVeigh i Luna Hou no ke Panalaau o na Ma`i Lepera ma Kalawao. Ua noi aku kekahi kanaka Hawaii i kamaaina i ka noho malama ana i na ma`i a i ka hoomaemae ana i kahi o ia ano, aka, ma kona ano he Hawaii i auamo pu ole e luku i kona lahui ua hiki ole i ka Papa Ola ke hookohu ia ia. Ma ke ano uahoa ua pololei ka Papa Ola a me ke aupuni, aka, e like me kau e hana ai pela no e ana ia mai ai, nolaila, he hookamani ka olelo haohao a kekahi poe e i nei i ka laka ole, a i ka hoomau o ke kupaa a hui ole o ka lahui Hawaii. He hookamani keia manao pahaohao. Aole makou e pale ana i kekahi aoao a hoino i kekahi aoae, aka e hoike i ka oiaio i na wa a pau i ike pono ai ka poe manao maikai i ka pono a me ka hookamani Ua uahoa ka lahui mamuli o na kumu a lakou i ike ai he kupono, he haawina kumu ia i loaa i kela a me keia kanaka e koho nona iho, a ina he manao io ko ka lahui malihini, i lawe ae nei no lakou ke kuleana o ke kamaaina me ka mana koa, he mea maikai ka noho oluolu ana, ke i ae nei makou, aole o ka hoohana ana i ka lahui Hawaii i mea milimili i kekahi la i maliu mai ai me na hoomaikai a i kekahi la e olelo aku ia ia, ua pau, e hele me ka maluhi, a e maona oe, me ka hoonaikola ana aku ia ia e like me keia i hana ia i keia Hawaii. Oiai na lakou no i hapai i ka manaolana e noi aku i ka hana, me ke kuhikuhi mai e hele e hoohiki, aka i ka paa ana nae o ka hoohiki i ke aupuni, ua haawi ia aku ke kuekue lima ma kahi o ka lima. He minamina makou i ka hoike ae i keia mea, aka, o ka ike ia o ke kumu o ka paakiki o ka noho like ole, oia ka mea e pau ai o ka like ole, a e maikai ai ka noho ana, ina hoi he oiaio ko lakou ano.

 

UA HALA AKU.

            Ma ka auina la Poaha nei, la 25 o keia mahina, ua hoomau aku la no ka lua o ka manawa, o Hoku Ao, no na Paeaina o ka Hema. I kela pule aku nei no oia i holo ai a ua huli hoi hou mai no keia awa, ma o ka loaa ana o kona malama moku i ka mai, opulepule, a eia oia ma ka haukipila e waiho mai nei. Ua hoopiha ia aku ka makalua o ka malama moku e kekahi kamaaina o keia taona, oia hoi o Mr. Hale Pinao, he kanaka i kamaaina i ka alo ana ia mau kai i na makahiki i hala e aku. Ua haalele iho oia i kona ohana mahope nei a holo aku la, no ke kaawale ana no 9 a i ole he 10 paha mahina.

 

KELA A ME KEIA.

Ua pai ia ma na nupepa, he kanawai e pili ana i ka auhau.

I keia la e hookuuia ai na limahana Pake e hoomalu ia mai nei ma Kahakaaulana.

I ka hora 10 o keia kakahiaka i holo aku ai o Kinau no Hawaii, a e ku mai ana ika la 3 o Iulai ae nei, no ke komo ana o na sela i na lealea Po Kiulai.

Ua hala aku o S. W. Wilikoki me kana keiki no Kapalakiko, ma ka Mariposa.

            Ua hala aku no hoi o Prof. Ingalls no ka Hikina a ua lohea e huli hoi mai ana oia me kekahi hoapili aoao.

            Ma ke ku ana mai a ka Mariposa, he nui na laau kanu i lawe mai no keia awa, a malaila ae o Prof. Koeble kahi i nana ai ina he mau eleao kekahi mawaena o lakou.

            Ke hooponopono hou ia nei ka Okana o ka halepule o Roma, e na hoahanau Bergstron.

            Ma na lono hope, aia o Marsdena ma Kukuiau Hamakua, kahi i pekipeki ai maluna o ka lio.

            He nui ka hauoli o ka mahele ma ka mahiko o Kahuku, no ka puka oia mahiko, a pumehana hoi ko lakou mau pakeke.

            Eia ae ke au mai nei he elima wiliko i ka moana no Hawaii nei. He lua gula maopopo keia na ka poe ona mahiko.

            Ua hoi aku no kona home ma Virginia, ka wahine a Kanikela Amerika Mills, ma ka mokumahu Mariposa.

            Piha pono ka uwapo i na ahui maia, e kali ana hoi no ke ku mai o ka Mioweia.

            I kela mau la aku nei, ua paani ae la kekahi keiki Pukiki, me ka pu panapana a kona makuakane a kani aku la me ke ku lihi ana o kona kaikuahine. Mai mihi keia mau makua ina i lilo ke ola o ka la ua kaikamahine.

            Nui ka maikai o na lole o kahi o L.B. Kerr, a mai poina i ke kipa ana aku malaila.

            Ua mare ia iho kekahi mau opio ma ka home o L.K. Kelekona, a he luau nui kai haawi ia mahope iho.

            Ma na la hope o ka mahina o Mei ua hoonaue mau ae ke olai ia Samoa.

            Mai poina i ka Hale Kuai o L.B. Kerr. He oia mau na mea emi a makamaka hou hoi o na mea kuai ma kona halekuai.

            No ka poe pena a pia i ka helehelena e loa ano ka pia aala Roma ma kahi o Hobron ma.

            He mau la mahele wale no keia no ka puka o ka poe mea mahele ma na mahiko, a ua hauoli na helehelena o kahi poe.

            Ua hoike ae o Mr. Dilinahama, e hoomaka aku ana ke kanu ana e ke ko no ka mahiko hou, malalo aku o keia mahiko o Ewa ae nei. Eia ae na pono oia hale wili ke lawe ia mai nei mai na aina e mai.

            Maikai na haiolelo a Prof. Dillon e hai nei ma ka halepule o alanui Alakea, a he piha mau na halawai a pau.

 

MOHO REPUBALIKA.

            Ua hoho ka Aha Elele koho moho o ka aoao Republaika ia Mr. McKinley no ka Peresidena. Ua ano lokahi keia koho akea ana, aka ua ulu mai @@@ ke kue o na hoa o ka Ahaolelo o ka aoao repubalika, nolaila ua komo mai ke kanalua ia no kona lilo he Pesesidena i ka manao o na kilokilo kalaiaina, oiai ma ke kono ana a ka Aha Koho Peresidena ua manao ia e holo ana kekahi mau luna Repubalika ma ka aoao Demokarata.

 

HALE KEAKA PAKE.

HEE CHANG……LUNA NUI.

MA AALA, MAUKA O ALANUI MOI.

Po Poalima e hoomaka ana i ka hora 7, a hora 11:30.

            E hana keaka ia ana na mea ano hou loa, e na hoa hana keaka, akahi no a ike hou ia i keia mau la.

            He mau kuwalawala, na hana Lele Kuwale, hele malu na o ka uwea, maluna o ka laau e hooniniu ai, hana keaka iluna o ka aho ohe, na hana hooniniu pa kupua.

            E ike ike ana no maanei kekahi keiki opio, e hana ana i na hana hoolu kino.

            Na hana kamahao me na lina hao poepoe.

            He 25 keneta ka uku-komo ma na wahi a pau.

 

Kastola * *

HE LAAU HOONOHA KUP@ NO M@OL@.

            Aole ke Kastola he mea okoa, aka o ka aila hoonoha no, me kona maikai ole i lawe ia ae. Ua hiki keia ma ka makou hana hou ana a me ka hoomomona ana. Ua like hoi me ka ai ana o ka waimeli. Ua like no ka hoopena me ko ka aila hoonoha.

            Ua ike hoi na Kauka i ke ano nui o ke aila hoonoha, ma kona ano he laau hoonoha mai ai. Hookahi wale no ona kumu i kuihe ia ai, oia ke okaikai mai, a oia wahi ano ka makou i hoopau ae, a ma o ae Kastola hoi ke waiho aku nei makou i kekahi laau hoonoha i hiki ole ke ike ia iho kekahi ano.

NA KUHIKUHI.

No na Keiki-1 a ka 6 mahina 1-4 a 1-2 punaki

  “    “     6 a ka 12  “    1-2 a 1     “

  “    “     1 a ka 5  mak    1a  2    “

  “    “     5 a ka 15  “      2a  3    “

No ka poe oo, hookahi puna nui.

No ka hoonoha olulu keia mau ana.

Kuaiia ma na wahi kuai a pau.

Hoomakaukauia e

Ka Hui Kuai Laau o Hobrona Ma.

Alanui Moi, Honolulu.

.