Ka Wai Ola - Office of Hawaiian Affairs, Volume 13, Number 5, 1 May 1996 — Na Kuʻukamalani Ho ka lei o ka lanakila! [ARTICLE]

Na Kuʻukamalani Ho ka lei o ka lanakila!

Na Manu Boyd Ho'omaika'i aku iā Ku'ukamalani Ho o ka hālau hula 'o Keali ' ika' apunihonua Ke'ena A'o Hula no kāna hana 'oi kelakela ma ka ho'okūkū hula kūmakahiki 'o ka "Merrie Monarch" i mālama 'ia ma Hilo ma ka moku o Keawe i kēlā mahina aku nei. Ua lilo ka lei o ka lanakila iā ia ma ka māhele "Mike Aloha Hula," he ho'okūkū hula pākahi o nā wāhine, a he mea i makemake nui 'ia e ka lehulehu. Ma laila pū kekahi i hā'awi 'ia

aku ai he makana 'ōlelo Hawai'i maiā OHA aku i ka moho i loa'a ka nui loa o nā helu 'ai no ka māhele "oli," he koina ia i ka māhele hula kahiko. Ma ka pepa loiloi, loa'a kekahi māhele no ka loiloi 'ana i ke oli. Hō'ulu'ulu 'ia nā helu o ia māhele mai nā luna loiloi a pau, a pēlā nō i koho 'ia ai ka ka wahine nona ka lanakila o ia makana a OHA, he 'elima haneli kālā ka loa'a. I kekahi makahiki, lanakila kekahi i ia makana no ke oli 'ana, a kekahi no ka Mike Aloha Hula. A, i kēia makahiki, ua eo iā "Kamalani" Ho nā makana 'elua!

No ka māhele hula 'ōlapa, ua hula 'o ia iā "Pā Ka Makani," he mele no Ka'auhelemoa, he kupua moa no Pālolo mai, a ua hula 'auana 'o ia i 'elua mele i ho'ohui 'ia, 'o "Ka Lehua I Milia" a 'o "He Aloha Ku'u Ipo," na Kawena Pūkū'i lāua 'o Maddy Lam nā mele 'elua. Ho'omaika'i iā Ku'ukamalani Ho, me kāna kumu hula a Leimomi Ho, kona māmā nō ho'i! E ola ka ho'oiiina 'o Victoria Keali'ika'apunihonua 'I'ī Rodrigues, kā Leimoni Ho kumu hula, ka mea nona ka inoa o ia hālau hula ma Pālolo, O'ahu.