Ka Wai Ola - Office of Hawaiian Affairs, Volume 34, Number 3, 1 March 2017 — Ola ka hana keaka i ka wai a ka ʻōpua [ARTICLE+ILLUSTRATION]

Ola ka hana keaka i ka wai a ka ʻōpua

Na Haili'ōpua Baker, MFA He Polopeka Kōkua 'o Haili'ōpua ma Ke Ke'ena Hana Keaka ma Ke Kula Nui 'o Hawai'i ma Mānoa. 'O ia ke Po'o o ka Hālau Hanakeaka a me ka Kākau Hanakeaka 'Ōiwi. Wai puna lau ke aloha e nā hoa makamaka o ka 'Ōlelo Hawai'i. 'Auhea 'oukou e ka 'ī, ka Mahi, ka Palena. Mai ka pi'ina a ka lā i Ha'eha'e ā hiki i ka mole 'olu 0 Lehua 'o ka 'Ōlelo Hawai'i a me ka mo'olelo Hawai'i ka mea 1 Hawai'i ai kākou. A 'o ka hana keaka Hawai'i kekahi alahele e ho'omana ai a e ho'oikaika ai i ko kākou 'ano Hawai'i. Ma o ia ho'omana 'ana a'e iā kākou iho e pa'a pono ai ko kākou kahua, kā kākou 'ōlelo i māke'e nui 'ia,

a me nā mea e pono ai ka lāhui Hawai'i. 'O ka ha'i mo'olelo, 'o ka mole nō ia o ka hana keaka. I ka wā e hana keaka 'ia ai nā mo'olelo a nā kūpuna i waiho maila no kākou, ola kēlā mau mo'olelo a me nā hunahuna 'ike i kanu 'ia i loko o ua mau mo'olelo lā. Me ia mana'o ola nō ho'i ka 'ike ku'una, nā loina o ke au i hala, ka lawena, ka

mo'omeheu, ka hana no'eau, ka pili 'uhane, ke kuana'ike Hawai'i, a me ka mauli Hawai'i. I mea nō ho'i ka hana keaka e ho'ole'ale'a ai ka po'e anaina i pa'a ka 'ōlelo. I nanea ka maka a me ka pepeaio i ka hana keaka. 'O ka ho'okahua hana keaka ka'u e ho'omano nei no kēia hanauna a me nā hanauna hou a'e e hiki mai ana. Ma ke kulanui o Hawai'i ma Mānoa i loko o ke ke'ena hana keaka a me hulahula i ho'okumu 'ia ai he papahana Hana Keaka Hawai'i i 'ekolu makahiki aku nei. He papahana Masters of Fine Arts (MFA) kū ho'okahi ia e a'o ana i nā haumāna i ka hana keaka, ka hula, ke oli, ka mele, ka hula ki'i, ka ha'i mo'olelo, a me ka haku hana keaka. 'O Lā'ieikawai ka hana keaka mua loa o kēia papahana hou i

ho'okahua 'ia ma ka hale keaka 'o Kennedy i ka makahiki 2015. 'O ua hana keaka nei ka hana keaka Hawai'i mua i lawelawe 'ia i mua o ka lehulehu ma ke kahua nui o ia hale keaka he 5 1 makahiki 'o kona kū 'ana. Ua komo kākou, ua holo ka papahana, a no kākou like ka hale keaka i kēia manawa. Eia nō mākou ke ho'omākaukau nei no ka papahana nui a ka haumāna MFA Hana Keaka Hawai'i mua e alaka'i ai, 'o ia nō 'o Kau'i Kaina, ka lehua nui o ka papahana Hawai'i. 'O Nā Kau a Hi'iaka kāna mo'olelo hana keaka no Hi'iakaikapoliopele, ke kaikaina punahele o Pele, ka 'iu o nā moku. Ma o ke ka'ao 'ana o ia mo'olelo kaulana o ka wā kahiko e ola hou ai ka ha'awina, ka 'ike, a me ka 'Ōlelo Hawai'i. E ola mau ka 'Ōlelo Hawai'i! ■

< NĀHANANA s < EVENTS /

www.oha.org/kwo | kwo@OHA.org NATiVE HAWAiiAN » NEWS | FEATURES | EVENTS

'lke Pili no ka Hana Keaka 'o Nā Kau a Hi'iaka > Āhea: ka lā 9, 10, a me 11 o Malaki 2017 > Hola: 7:00 ahiahi (la 9 & 10); 2:00 'auinalā (la 11) > Ma: ka hale keaka 'o McKay, BYU-Hawai'i > Kāki: $10 (Haumāna & Kūpuna), $20 (Lehulehu)

Punihei Lipe (Hi'iakaikapoliopele) lāua 'o loane Goodhue (Lohi'au) o ka hana keaka "Nā Kau a Hi'iaka". - Photo: na Haili'ōpua Baker