Nupepa Puka La Kuokoa, Volume I, Number 110, 3 August 1893 — UA HALA O J. KAUAI. [ARTICLE]

UA HALA O J. KAUAI.

Ma ka po Poalua, Augate, 1, ua kipa ae ka anela o ka make ma ka pa ma’i o Kalihi a kaili ia aku la ka hanu ola o J. Kauai. Ua hanau ia oia ma Niumalu, Hana, Maui-Hikina. Ua komo mai i ke kula nui o Lahainaluna a puka pono, noho kumu kula ma Kawaiahao a haalele, holo aku i Kaleponi oia na makahiki eli gula oia aina, a hoi mai noho he kumu kula no Manoa, a o J. Paniani kekahi o kana mau haumana. Ua mare wahine me Mrs. Kaenaku, a mahope iho ua hoi aku no Waimea, Kauai, he nui na oihana ana i lawelawe ai, he luna kanawai luna helu, a ohi auhau, a he mau makahiki lehulehu i hele ai i ka ahaolelo kau kanawai o ke aupuni. Oia ka pouhana o ka pono iloko o ka ekalesia o Waimea, i ka wa i ulu ai ka haunaele kuloko me Rowela a lanakila o J. Kauai ma. He mau makahiki kona loaa ana i ka ma’i lepera, ua hoi aku oia i Kalalau e noho ai, a i keia lawe ia ana mai nei o na ma’i lepera mai Kalalau mai o J. Kauai kekahi, a malaila oia a hala wale aku la. Me ka wahine a me na keiki ko makou aloha nui, a na ke Akua e hoomama mai i na luuluu, aloha wale ia keiki hanau o ke one oiwi.